22. september 2005 IMA 2005/3
Inatsisissatut siunnersuummut nassuiaatit
Nassuiaatit nalinginnaasut1. Aallaqqaasiut:
Naalakkersuisut siulittaasuata nalunaarutigaa Inatsisartunut qinersisoqassasoq, ullorlu qinersivissaq 15. november 2005-imut aalajangiullugu.UPA 2005/25-mi "Inatsisartut Naalakkersuisullu pillugit Inatsisartut inatsisissaattut siunnersuut"-mik suliarinninnermi suleqatigiissitamit nassuiaat" Inatsisartut oqaluuseraat. Nassuiaammi Inatsisartunut qinersisitsisoqartarnissaa pillugu apeqqut ilaatigut pineqarpoq. Nassuiaatip Inatsisartuni oqaluuserineqarnerani suleqatigiissitap nassuiaasersuinerit inernerillu angusai pillugit nalornissuteqartoqarneranik saqqummersoqanngilaq.
Suleqatigiissitap nassuiaataani atuarneqarsinnaavoq, Inatsisartut Naalakkersuisullu pillugit inatsisip pisuni naalakkersuisut ataasiakkaat, Inatsisartut tamarmiusut imaluunniit naalakkersuisut siulittaasuata ilaasortaajunnaarsinneqarneranni Inatsisartunut qinersisoqarnissaanik erseqqissumik aalajangersaanissamut periarfissiinnginnera, Naalakkersuisulli siulittaasuata peqqutaasuni allani kissaatigippagu Inatsisartunut qinersisitsissasoq, tamanna piffissap qinigaaffiup naannginnerani pissagaluarpat.
Inatsisartunut qinersisarneq pillugu Inatsisartut inatsisaata aalajangersaavigaa, Inatsisartunut ilaasortat ukiunut sisamanut qinigaasarnissaat. Kingullermik 3. december 2002-mi qinersisoqarpoq. Taamaalilluni 15. november 2005-imi qinersisoqarneratigut inatsisitigut qinigaaffissap piffissartaa nalinginnaasumik ukiut sisamaasussaq qaammatinik aqqaneq marlungajannik sivikillineqassaaq. Taamatut nikingasoortitsineq inatsisitigut tunngavissaqartinneqartariaqarpoq, tamannalu qinersisarneq pillugu inatsimmiinngitsoq imaluunniit Inatsisartut Naalakkersuisullu pillugit inatsimmiinngitsoq nalilerneqarpoq.
Taamaalilluni inatsisissatut siunnersuutip 15. november 2005-imi Inatsisartunut qinersisitsinissap inatsisitigut tunngaviata nalornisoorutigineqarsinnaannginnera qularnaarpaa.
2. Pisortanut aningaasaqarnikkut allaffissornikkullu sunniutaasussat:
Inatsit naapertorlugu kingusinnerpaamik 2006-imi Inatsisartunut qinersisoqartussaagaluarnera pillugu 2005-imi qinersisoqarnissaata kingunerissavaa, aningaasaqarnikkut allaffissornikkullu sunniutaasussat ukioq ataaseq sioqqullugu maannamut nalilerneqarsinnaanngitsutut sunniuteqarnissaat. Ilimagineqanngilaq 2005-imi inatsisartunut qinersinermi aningaasaqarnikkut allaffissornikkullu sunniutissat 2006-imi qinersisoqarnissaanut sanilliullugu nikingasooruteqarnissaat.Qinersisarneq pillugu inatsimmi maleruagassat naapertorlugit inatsisartunut qinersinissap piareersarneqarnissaanut ingerlanneqarnissaanullu allaffissornikkut nukissanik atuinermut atuinissamillu kommunit nalinginnaasumik aningaasartuuteqassapput.
Inatsisartunut qinersisoqarnerani nalinginnaasumik annertussusilinnik Nunatta karsia qinersinermi atortunut allanullu allaffissornikkut nukissanik atuissaaq, tassunga ilaalluni Valgnævnip allattoqartinneqarnera. Qinersinissamut nunatta karsiata aningaasartuutissaasa matussuserneqarnissaannik Inatsisartut Aningaasaqarnermut Ataatsimiititaliaannut Naalakkersuisut qinnuteqarput. 2002-mi inatsisartunut qinersinermi aningaasartuutit 354.000 kr.-iupput. Allakkanik nassiussuinermi kinguaattoornerit pissutigalugit assartuinermut aningaasartuutinik takkuttoqarataannaavoq. Ilimagineqarporli 2005-imi inatsisartunut qinersinissami aningaasartuutit 500.000 kr.-it sinnissanngikkaat.
Tamatuma saniatigut, siunertamut tamatumunnga immikkut aningaasaliissutissanik immikkoortitsisoqassagaluarpat, politikikkut soqutigisaqaqatigiinnut allanullu tapiissutissanut nunatta karsia aningaasartuuteqarsinnaavoq. Tamatumunnga Naalakkersuisut Inatsisartut Aningaasaqarnermut Ataatsimiititaliaannut ilassutitut aningaasaliissuteqarnissamut 3.400.000 kr.-inik qinnuteqaateqarput, taakkua naalakkersuisut 2006-imut inatsisartut aningaasanut inatsisissaattut siunnersuutaanni immikkoortitaareersut aningaasaliissutaannut naapertuupput.
3. Inuussutissarsiuteqartunut aningaasaqarnermut allaffissornikkullu sunniutissat:
2006-imut taarsiullugu 2005-imi inatsisartunut qinersisoqarnissaani inuussutissarsiuteqartunut aningaasaqarnermut allaffissornermullu sunniutissat qanoq annertutiginissaasa naliliiffigineqarnissaat periarfissaqanngitsutut nalilerneqarpoq.
4. Avatangiisunut pinngortitamullu sunniutissat:
Siunnersuutip avatangiisinut pinngortitamullu sunniuteqarnissaa ilimagineqanngilaq.
5. Innuttaasunut allaffissornermut sunniutissat:
Siunnersuutip innuttaasunut allaffissornikkut sunniuteqarnissaa ilimagineqanngilaq.
6. Naalagaaffeqatigiinnermut namminersornermullu pissutsit:
Siunnersuut naalagaaffeqatigiinnermut namminersornermullu sunniuteqarnissaa siunniunneqanngilaq.
7. Oqartussaasut soqutigisaqaqatigiillu tusarniaavigineqarnerat:
Siunnersuut tusarniaassutigineqanngilaq, siunnersuummi taamaallaat inatsisartunut qinersisoqarnissaanut aalajangersaanermik tunngassuteqarmat, takuuk nalinginnaasumik nassuiaammi aallaqqaasiut.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutNaalakkersuisut siulittaasuata aalajangiiffigaa, 15. november 2005-imi inatsisartunut qinersisoqassasoq. Taamatuttaaq nalinginnaasumik nassuiaammi aallaqqaasiut innersuussutigineqarpoq.
Ulluliussap aalajangersaavigineqarnerani pingaartumik qinersinissap piareersarneqarneranut atatillugu eqquutsinneqartussani qinersisarneq pillugu inatsimmi killissarititaasut sianiginiarneqarsimapput. Assersuutigalugu qinersisarneq pillugu inatsimmi aalajangersarneqarpoq, partiit nutaat qinersinissamut qineqqusaarnissamik kissaateqartut qinersinissap pilinnginnerani sapaatit akunneri tallimat nallertinnagit Valgnævnimut nalunaarutigineqarnissaat. Tamatumunngalu naliliinissamut ilanngunneqarpoq inatsisartunut qinersinissap piareersarneqarnera pillugu suliassanut tunngassuteqartut.
§ 2-mutSiunnersuutip kingunerissavaa, qinigaasarnerup piffissartaa ukiunut sisamanut aalajangersagaasoq, maanna qinersinissaq pineqartoq eqqarsaatigalugu nikingassammat. Taamatuttaaq nalinginnaasumik nassuiaammi aallaqqaasiut innersuussutigineqarpoq.
§ 3-mutSiunnersuutigineqarpoq inatsisartut inatsisissaata 23. september 2005-imi atuutilernissaa. Inatsisip 23. september 2005-imi atuutilernissaaniit qinersinissamut aningaasartuutit matussuserneqarnissaat inatsimmi tunngavissaqartinneqarpoq.