25. april 2005

UPA 2005/17

 

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut

pillugu

Inatsisartut Akileraartarnermut Akitsuusiisarnermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Jørgen Wæver Johansen, Siumut, siulittaasoq
Inatsisartunut ilaasortaq Agathe Fontain, Inuit Ataqatigiit, siulittaasup tullia
Inatsisartunut ilaasortaq Simon Olsen, Siumut
Inatsisartunut ilaasortaq Augusta Salling, Atassut
Inatsisartunut ilaasortaq Per Skaaning, Demokraatit

 

UPA 2005-imi siullermeerinerup kingorna siunnersuut matumani pineqartoq Inatsisartut Akileraartarnermut Akitsuusiisarnermullu Ataatsimiititaliaata suliaraa.

Siunnersuutip imarisai

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni aalajangersakkat aqqutigalugit atuagaateqarfiit akiliisitsissutaannik akilinngitsuukkanik akiliisitsiniarsinnaaneq siunnersuut manna aqqutigalugu tunngavissinneqarpoq. Atuagaateqarfiit atortuutaannik kingusinaarluni tunniussisoqarsimappat aseruisoqarsimappalluunniit atuagaateqarfinni atortartut atuagaateqarfiit akiliisitsissutaannik nalinginnaasumik akileeqquneqartassapput.

Siunnersuutip akuersissutigineqarneratigut eqqartuussivimmi eqqartuussummik piniaqqaanngikkaluarluni pisassarisat siuliani allassimasutut ittut Kalaallit Nunaanni eqqartuussisarneq pillugu inatsimmi nr. 271-imi, 14. juni 1951-imeersumi kapitali 7-mi malittarisassat malillugit pinngitsaaliissummik akiliisitsissutiginiaqqullugit atuagaateqarfiit kommunini akiliisitsiniartartut qinnuigisinnaanngussavaat. Ilaatigut pisortanit ikiorsiissutit pillugit Inatsisartut peqqussutaat naapertorlugu pisassarilersimasat ullumikkut taama akilertinniarneqartareerput.

Naalakkersuisut naliliinerat malillugu akiligassanit kinguaattoorutit ukiumut 30.000 kr.-it tikillugit amerlassuseqartut akiliisitsiniartarnikkut isertitsissutigineqartarnissaat naatsorsuutigineqarpoq.

Siunnersuut UPA 2005/23-imut, tassalu Atuakkanik atorniartarfeqarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuummut attuumassuteqarpoq.

Tusarniaanermit akissutisiat

Siunnersuut matumani pineqarpoq tusarniaanermut akissuteqarnissamut 13. december 2004 killiliullugu KANUKOKA-mut, Aningaasaqarnermut Pisortaqarfimmut, Naalakkersuisut Allattoqarfiannut aammalu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut ulloq 9. november 2004-mi tusarniaassutigalugu nassiunneqarpoq. Tusarniaaffigineqartussaatitaasut siunnersuummik naliliinissaannut naammaginartumik piffissalerneqarsimasut Akileraartarnermut Akitsuusiisarnermullu Ataatsimiititaliap iluarisimaarlugu maluginiarpaa.

Tusarniaanermit akissutigineqartut ilusiliinermut annertunerpaamik attuumassuteqartut aammalu tusarniaaffigineqartut oqaaseqaataat naammaginartumik annertussusilimmik ilanngunneqarsimasut ataatsimiititaliap paasivaa. Tamatuma saniatigut tusarniaanermit akissutisiat ataatsimiititaliap oqaaseqaateqarnissaanut pissutissaqalersitsinngillat.

Akileraartarnermut Akitsuusiisarnermullu Ataatsimiititaliap inassuteqaataa

Siunnersuut saqqummiutissallugu pissutissaqarluartoq Akileraatarnermut Akitsuusiisarnermullu Ataatsimiititaliaq isumaqatigiittoq isumaqarpoq matumuunalu inassutigissallugu siunnersuut saqqummiunneqarnermisut iluseqarluni Inatsisartunit akuersissutigineqassasoq.

 

	Jørgen Wæver Johansen, Siulittaasoq
Agathe Fontain		Simon Olsen
Augusta Salling		Per Skaaning