31. januar 2005

UPA 2005/17

 

Inatsisissatut siunnersuummut oqaaseqaatit

 

Oqaaseqaatit nalinginnaasut

Inatsisissatut siunnersuut allannguutinik annikitsunik marlunnik imaqarpoq, tassuunakkut bibliotekeqarneq pillugu Inatsisartut peqqussutaat, pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaannut ilanngunneqarluni.

Inatsisissatut siunnersuummut tunngaviuvoq Inatsisartut Ombudsmandiata, atuagaateqarfiit atuagaataannik atukkanillu allanik kingusinaartumik utertitsisoqarnerani akiliisitsissutinik akiligassiisarnissamik periarfissiisumik aalajangersaasoqarnissaanik Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut qinnuteqarsimanera. Periarfissaq taanna bibliotekeqarneq pillugu Inatsisartut peqqussutaatigut aqqutissiuunniarneqassaaq. Periarfissiuussinermut tassunga atatillugu bibliotekeqarneq pillugu Inatsisartut peqqussutaata, pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni ilaalernissaa kissaatigineqarpoq, ilaatigut atuagaateqarfiit akiliisitsissutaasigut pisortanut akiligassat taanna malillugu aningaasarsianit unerartitsinikkut il.il. akilersinniarneqarsinnaanngorlugit.

Aningaasatigut allaffissornikkullu pisortanut sunniutissai

Kommunit akiliisitsiniartarfiisa bibliotekeqarneq pillugu Inatsisartut peqqussutaat naapertorlugu akiitsunik akiliisitsiniarsinnaanerisa pitsanngoriaateqarnissaa naatsorsuutigineqarpoq, tassami aningaasarsianik unerartitsisoqarsinnaalissammat, pinngitsaaliillunilu akiliisitsisoqar-sinnaalissalluni.

Atuagaateqarfiit akiliisitsiniartarnerminnut kredsrettit aqqutigeqqaartariaarummatigit kom-munilli akiliisitsiniartartui aqqutigalugit pinngitsaaliinikkut akiliisitsiniarsinnaalernerisa ki-ngunerisaanik akiitsut annertunerusut isertinneqartalernissaat naatsorsuutigineqarpoq. 2003-ip naanerani Kalaallit Nunaanni atuagaateqarfiit atorniartartunit 100.000 kr.-it missaani akiitso-qarfigineqarput. Naatsorsuutigineqarpoq pinngitsaaliinikkut akiliisitsiniarsinnaalernerup ki-ngunerissagaa ullumikkut akiitsut appartinneqarsinnaassasut. Ukiuni tulliuttuni naatsorsuu-tigineqarpoq pinngitsaaliilluni akiliisitsiniarsinnaalerneq ukiumut 30.000 kr.-it qulaannagit isertinneqartalissasut.

Inuussutissarsiutinut il.il. aningaasatigut allaffissornikkullu sunniutissai

Siunnersuut inuussutissarsiortut aningaasarsiornerannut inuussutissarsiortulluunniit allaffissornerannut sunniuteqassangatinneqanngilaq.

Avatangiisinut pinngortitamullu sunniutissai

Inatsisissatut siunnersuut avatangiisinut pinngortitamulluunniit sunniuteqartussaanngilaq.

Innuttaasunut allaffissornikkut sunniutissai

Siunnersuut innuttaasunut allaffissornikkut sunniuteqassangatinneqanngilaq.

Naalagaaffeqatigiinnermut namminersulernissamullu tunngasut

Inatsisissatut siunnersuut naalagaaffeqatigiinnermut namminersulernissamulluunniit tunngassuteqartunik imaqanngilaq.

Tusarniaaneq

Inatsisissatut siunnersuut, novembarip 9-ani 2004-mi, decembarip 13-ani 2004-mi akerii-gassanngorlugu tusarniaassutigineqarnikuuvoq KANUKOKA-mut, Aningaasaqarnermut Pi-sortaqarfimmut aamma Kultureqarnermut, Ilinniartitaanermut, Ilisimatusarnermut Ilagee-qarnermullu Pisortaqarfimmut

Inatsisileriffik oqaaseqaatinik ataasiakkaanik nassiussaqarpoq taakkulu inatsisissatut siunner-suummut ilanngunneqarnikuupput. Aningaasaqarnermut Pisortaqarfimmit akiliisitsiniartar-nerup pitsanngortinneqarneratigut aningaasatigut sunniutissai nalilersoqquneqarput. Taakku oqaaseqaatinut ilanngunneqarnikuupput. Naggataatigullu atortuulersinneqarnissaanut piffis-saliussaq juunip aallaaqqaataanut 2005-imut allanngortinneqarluni, taamaalilluni inatsisissatut siunnersuut una, bibliotekeqarneq pillugu Inatsisartut peqqussutaallu ataatsikkut atortuuler-sinneqartussanngorlugit.

 

Inatsisissatut siunnersuummi aalajangersakkanut ataasiakkaanut oqaaseqaatit

 

§ 1, nr. 1-3-mut

Bibliotekeqarneq pillugu peqqussut ilanngunneqarpoq, tassuunakkut Inatsisartut peqqussutaat taanna tunngavigalugu akiligassiissutaalersimasut akiliisitsiniartarneq pillugu Inatsisartut inatsisaanni aalajangersakkat naapertorlugit akilersinniarneqarsinnaanngorlugit.

Nr. 4-mut

Paragraffip taassuma allanngortinneqarneratigut bibliotekeqarneq pillugu Inatsisartut peqqussutaat ilanngunneqarpoq, taamaalillutik Inatsisartut peqqussutaat naapertorlugu akiligassat pinngitsaaliinikkut akilersinniarneqarsinnaanngorlugit. Tassunga tunngaviupput atuagaateqarfiit pigisaat pillugit akiliisitsissutissat nalileruminartuummata aammalu naammagittaalliuutigineqarsinnaanerat annertunani. Taakku saniatigut akiligassat aamma annertuujusarnavianngillat, taamaattumillu eqqartuussivinnit tunngavissamik qinnuteqarnissaq siunertaqartussaanani.

§ 2-mut

Siunnersuutigineqarpoq Inatsisartut inatsisissaat 1. juni 2005-mi atortuulersinneqassasoq.