24. februar 2005

UPA 2005/15

 

Inatsisissatut siunnersuummut nassuiaatit

 

Nassuiaatit nalinginnaasut

1. Aallarniut:

Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaanni nr. 1, 31. maj 2001-imeersumi § 9, imm. 3-mi takuneqarsinnaavoq, § 6 malillugu tapiissuteqarfigineqarsimasut (qinequsaarnissamut tapiissutit) qinersinerup kingorna kingusinnerpaamik qaammatit pingasut qaangiunneranni uppernarsarlugu Naalakkersuisunut nalunaarutigissagaat aningaasat qinersineq sioqqullugu naalakkersuinikkut suliniarnermut ilumut atorneqarsimasut.

Ilanngullugu takuneqarsinnaavortaaq, 25.000 kroninit amerlanerusunik tapiissutisisimasut uppernarsarlugu nalunaarumminnut ilanngullugit tapiissutit atorneqarnerinut naatsorsuutinik kukkunersiukkanik nassiussaqassasut.

Kiisalu takuneqarsinnaavoq taamatut uppernarsarlugu nalunaaruteqartoqanngippat imaluunniit naatsorsuutinik kukkunersiukkanik nassiussisoqanngippat Naalakkersuisut aalajangersinnaagaat tapiissutigineqarsimasut tamakkerlugit ilaannakorlugilluunnit utertinneqassasut.

Paasinarsisimavoq pissusissamisuunngitsoq, naatsorsuutinik kukkunersiukkanik tunniussinissamut maannakkut piffissaliussaasoq taama sivikitsigimmat. Tassunga atatillugu eqqarsaatigineqassaaq, attaveqaatinik pilersuinerup pissutsillu allat pissutigalugit piffissartornarsinnaasoq suliniutaasimasunut tamanut qinersinernut peqataanermi suliarineqartartunut ilanngussanik pissarsiniarnissaq. Aammattaaq pissusissamisuunngilaq, partiit kattusseqatigiillu immikkut ittunik naatsorsuusiornissamut kukkunersiuisartumik pissarsiniartarnerat piffissani ukiumoortumik naatsorsuusiortarnerup avataani.

Tamanna tunngavigalugu siunnersuutigineqassaaq, qinersereernerup kingorna qaammatinik pingasunik piffissaliussaq atuuttoq sivitsorneqassasoq taamaasilluni, naatsorsuutit tunniunneqarsimassallutik kingusinnerpaamik ukiup ullorsiuteqarfiusup qinersisoqareernerata kingorna tullinnguuttup aallartinnerata kingornani qaammatit arfinillit qaangiunnerini.

Siunnersuutikkut partiit kattusseqatigiillu periarfissinneqassapput qinersinermut tapiissutit atorneqarnerinut kukkunersiukkanik naatsorsuusiornissamut peqatigitillugulu partiip kattusseqatigiilluunniit naalakkersuinikkut sulinermut tapiissutisinerinut naatsorsuusiorsinnaalissallutik naatsorsuutinillu kukkunersiuisinnaalissallutik.

2. Pisortanut aningaasaqarnikkut allaffissornikkullu kingunissat:

Siunnersuut pisortanut aningaasaqarnikkut kinguneqassanngilaq. Naatsorsuutigineqarpoq, siunnersuutip kingunerissagaa, qinersinernut peqataanermi tapiissutinut naatsorsuutinik kukkunersiukkanik nassiussisarneq siunissami piffissaq eqqorlugu pisarsinnaalissasoq. Tamatuma allaffissornikkut suliamik sullissisarneq annikillisissinnaavaa, taamaattoqartarneranimi pisariaqarunnaassammat naatsorsuutinik nassiusseqqulluni noqqaasoqartarnissaa.

3. Inuussutissarsiortunut aningaasaqarnikkut allaffissornikkullu kingunissat:

Siunnersuut inuussutissarsiortunut aningaasaqarnikkut allaffissornikkullu kinguneqassanngilaq.

4. Avatangiisitigut pinngortitamullu kingunissat:

Siunnersuut avatangiisitigut pinngortitamullu kinguneqassanngilaq.

5. Innuttaasunut allaffissornikkut kingunissat:

Naatsorsuutigineqassaaq siunnersuut partiinut, kattusseqatigiinnut kisimiillutillu qinigassann-gortittunut pitsaasunik allaffissornikkut kinguneqarumaartoq, tassami qineqqusaarnermut atukkanik nalunaarummik naatsorsuutinillu kukkunersiukkanik nassiussisarnermut piffissa-liussaq siunnersuutigineqarmat sivitsorneqassasoq qinersereernerup kingorna qaammatinit pingasuniit qaammatinut arfinilinnut ukiup ullorsiuteqarfiusup qinersisoqareernerata kingorna tullinnguuttup aallartinnerata qaangiunneraniit.

6. Naalagaaffeqatigiinnermut namminersornermullu pissutsit:

Siunnersuut Naalagaaffeqatigiinnermut namminersornermullu kinguneqassanngilaq.

7. Oqartussaasut kattuffiillu tusarniarneqartut:

Siunnersuut Aningaasaqarnermut Pisortaqarfimmut tusarniaassutigineqarnikuuvoq, taannalu oqaaseqaatissaqanngilaq.

 

 

Inatsisissatut siunnersuutip aalajangersagartaannut ataasiakkaanut nassuiaatit

 

§ 1-imut

Innersuussisoqassaaq nalinginnaasumik nassuiaatit aallaqqaataannut.

Qinersinermut tapiissutit atorneqarnerinut naatsorsuutit ilanngunneqarsinnaapput partiinut kattusseqatigiinnullu tullianik ileqquusumik ukiumoortumik naatsorsuutinut ilanngullugit (partiinut kattusseqatigiinnullu tapiissutit atorneqarnerinut naatsorsuutit), taakkulu Inatsisartut Siulittaasoqarfiannut tunniunneqassapput.

Kommunimulli Inatsisartunullu qinersinermut peqataanermi tapiissutinut naatsorsuutit kukkunersiukkat Naalakkersuisunut tunniunneqassapput.

Imatut pisoqartillugu, partii kattusseqatigiilluunniit Inatsisartunut qinigaanngitsoortoq, qiner-sinermut tapiissutit atorneqarnerinut naatsorsuutit aamma tunniunneqarsimassapput ukiup ullorsiuteqarfiusup qinersisoqareernerata kingorna tullinnguuttup aallartinnerata kingornani kingusinnerpaamik qaammatit arfinillit qaangiunnerini.

§ 2-mut

Siunnersuutigineqassaaq, Inatsisartut inatsisaat 1. juni 2005 atuutilissasoq, imaasilluguli, qi-nersinermut tapiissutinut 1. januar 2005-ip kingorna tunniunneqartunut sunniuteqassalissallu-ni. Taamaasiornikkut inatsit kommunimut april 2005-imi qinersinermut atatillugu tapiissuti-nut aamma atuutissalluni.