Ilanngussaq
Bibliotekeqarneq pillugu Inatsisartut peqqussutaata allannguutissatut Inatsisartut peqqussutissaannut siunnersuut
UPA 2005/23
pillugu ilassutitut allakkiaq
Naalakkersuisut ulloq 4. april 2005 naqqiutaat tunngavigalugu Inatsisartut Allattoqarfiata inatsisissanik nalilersuisarfiata peqqussutissatut siunnersuut misissuataaqqippaa ataanilu oqaatigineqartutut siunnersuut § 12d, imm.1-ip ima oqaaseqarfiginissaa pisariaqartissimallugu.
Siunnersuutigineqartoq tunngavigalugu § 12 ima oqaasertalerneqassaaq:
§ 12d. Nunatta Atuagaateqarfiata kommuninilu atuakkanik atorniartarfiit atuisoq atuakkanik atorniartarfinnit atorniarnissamut mattussinnaavaat, atuisup atortussat atukkami innarlerneqaratik utertinneqarnissaannik pisussaaffini annertuumik sumiginnarsimappagu.
Imm. 2. Atuakkanik atorniartarfinnit atorniarnissamut mattussineq aamma pisinnaavoq atuisoq akiliummik § 12c naapertorlugu aalajangersarneqartumik akiligassaqarpat imaluunniit atortussanut innarlerneqarsimasunut tammarsimasunulluunniit taarsiissutitut akiligassanik akiligassaqarpat.
Imm. 3. Atuisup atuakkanik atorniartarfinnut pisussaaffini aaqqippagit, matumani aamma atortussat innarlerneqarsimanngitsut utertinnerisigut imaluunniit atortussat innarlerneqarsimasut taarsernerisigut kiisalu akiliutissat akilerneqarsimanngitsut akilernerisigut, mattussineq atorunnaarsinneqassaaq.
Nalinginnaasuni oqaaseqaatini § 12 ilaatigut ima allassimavoq:"Imm. 1. Aalajangersagaq nutaajuvoq. Atuakkanik atorniartarfimmi atorniartartut arlaleriarlutik atukkaminnik paarsinerlullutik annertuumik innarliisimasut atorniaqqissinnaanerannik mattunneqartarnissaat siunnersuutigineqarpoq. Atorniartartup atortut angerlaallugit atorsimasani utertinngippagit, imaluunniit atukkat utertinneqartut innarlersimappagit, aammalu atorniartartup atortussat atorsimasami taarsernissaannik piumasaqarfigineqarnini malinngippagu aalajangersagaq atorneqarsinnaavoq. Taamattaaq mattussineq pisinnaavoq atuisarneq arlaleriarluni atornerlunneqarsimappat, tassa angerlaallugit atorniarsinnaaneq taamatut pisoqartillugu piffissami aalajangersimasumi mattukkallarneqarsinnaalluni. Aalajangersagaq taamaallaat atortut atukkat aallaavigalugit pisussaaffinnut attuumassuteqarpoq, taamaalillunilu atuakkanik atorniartarfimmi malittarisassanik allanik unioqqutitsineq, soorlu peqqissaarnissamut malittarisassat unioqqutinneqarneri pissutigalugu mattunneqarneq, aalajangersaaffigineqarani. Taamaalilluni aalajangersagaq atuakkanik atorniartarfiup atortuinik atuisinnaatitsinnginnermik tunngaviliisunik imaqanngilaq. Atuakkanik atorniartarfiup nammineq peqqissaarnissamik malittarisassai malillugit mattussinerit taama ittut nalimmassarneqartassapput." (Inatsisartut Allattoqarfiata inatsisissanik nalilersuisarfiata erseqqissunngorlugu allappaa.)
Inatsisartut inatsisissanik nalilersuisarfiata paasivaa periaasiusoq § 12-imut atuakkanik atorniartarfimmi atorniartartut arlaleriarlutik atukkaminnik paarsinerlullutik annertuumik innarliisimanerat kisiat tunngavigalugu atorniaqqissinnaanermik mattussunissaq tunngavissaqanngitsoq.
Taama paasinninnermut tunngavigineqarpoq,
- Mattussinissamut tunngavik taanna peqqussutip oqaasertaanik tunngaveqartinneqanngitsoq
- Uani pineqarmat atuakkanik atorniartarfimmi atorniartartumut pisarissersuutaasumik aalajangiineq tamannalu inatsimmi erseqqissumik tunngaveqartinneqarummat, ilaatigut uani takuuk Inatsisartut Ombudsmandiata atuakkanik atorniartarfiit pillugit inatsisitigut tunngaviliinissamik piumasaqaataa aamma
- 12d, imm. 3, mattussaanerup atorunnaarsinneqarnissaanut bibliotekinut aaqqitassami unitsinnissaanut sanioqqunneqarsinnaanngitsumik piginnaatitaasoq § 12d, imm. 3-mi aalajangersarneqarpoq (assersuutigalugu atortut atukkat utertinnerisigut, atortut ajoqusikkat taarsernerisigut akiliutissalluunniit akilerneqanngitsut akilernerisigut).
Atuakkanik atorniartarfiit atuisunut paarsinerluttunut illersornissamut piffissalersukkamik bibliotekit illuatungaatigut eqqarsaatigineqarnissaasa illuatungaatigullu atuakkanik atorniartarfiit atuisunut sapinngisamik amerlanerpaanut ammatinneqarnissaannik kissaateqarneq, tassunga ilanngullugit atuisut siusinnerusukkut sumiginnaasimasut, akornanni naliliineq §12d, imm. 3-mi inatsisiliortup taamaalilluni isumagissavaa. Taamaattumik aaqqitassat aaqqissallugit pisariaqanngikkallartut mattussinissamut tunngavissaasariaqanngitsut naliliinerup kingunerissavaa.
Siusinnerusukkut aaqqitassat pissutigalugit mattussinissamik piffissaliinissamut nassuiaatini paasissutissiissutigineqartut eqqartuussivimmi suliaralugit misiliinermi illikartillugit
atuakkanik atorniartarfinnit atuisoqarsimappat naatsorsuutigineqanngitsuussasut tunngavissalimmik aarleqqutigineqarsinnaasoq tamanna tunngavigalugu Inatsisartut Allattoqarfianni inatsissanik nalilersuisarfik isumaqarpoq.
Nassuiaatini nassuiaatigineqartutut mattussinissamik periarfissaq piviusunngortinneqassasoq kissaatigineqarsimassappat tamatumunnga qularnaatsumik tunngavissiisoqarnissaanut periarfissamik Inatsisartut inatsisissanik nalilersuisarfiat tikkuaajumavoq, s.a §12d-mut imm. 4-mik nutaamik ilanngussinikkut, ima imaqartukkut:
Imm.4 Nunatta Atuagaateqarfiata kommuninilu atuakkanik atorniartarfiit atuisoq atuakkanik atorniartarfinnit atorniarnissamut mattussinnaavaat, atuisup atortussat atukkami innarlernagit utertinneqarnissaannik siusinnerusukkut pisussaaffini arlaleriarlugit sumiginnarsimappagit. Atuisup atorniartarfimmut pisussaaffini aaqqippagit piffissamut siumut aalajangikkamik mattussineq, sivisunerpaamik qaammatinit XX-nit qaangiisuunngitsumik, atuuttussatut aalaja-ngerneqassaaq.
31. marts 2005-imi allakkiakkut Inatsisartut inatsisissanik nalilersuisarfiata qulaani oqaatigineqartutut peqqussutip oqaasertaliivigineqarnerani nassuiaatillu akornanni aaqqiagiinngissutit Inatsisartut inatsisissanik nalilersuisarfiata Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut maluginiaqquvai, aaqqiagiinngissulli suli atuuttoq oqaatigalugu.
19. april 2005 Stefan Krehbiel