4. april 2005

UPA 2005/23

 

Naqqiut
(siunnersuutip ulloq 3. marts 2005 ullulerneqarsimasup taartaa)

 

Peqqussutissatut siunnersuummut oqaaseqaatit nalinginnaasut

1. Peqqussutissatut siunnersuutip tunuliaqutai

Atuakkanik atorniartarfiit akiliummik akiliisitsisinnaanerannut inatsisitigut tunngavissaqarnersoq Inatsisartut Ombudsmandiata akiligassiisarnerat inatsisitigut qanoq tunngavilerneqarnersoq misissorlugu 4. august 2003 nammineerluni aallartippaa, tassungalu atatillugu atuakkanik atorniartarfeqarneq pillugu inatsisartut peqqusutaat akiliuteqartarnissamut tunngasunik malittarisassartaqanngitsoq paasillugu.

Atuakkanik atorniartarfiit akiliuteqartitsisarnerat aammalu inatsit pisinnaatitsisoq Inatsisartut peqqusutaat nr. 4 15. oktober 1979-imeersoq qanimut misissoreerlugit Naalakkersuisut naleqquttuusoraat akiliisitsisarneq maannamut ingerlanneqartoq siunnersuut manna atorlugu inatsisitigut tunngavississallugu.

Naalakkersuisut tassunga tunngatillugu eqqumaffigisimavaat pisortat suliffiutaasa pisortatigoortumik inatsisitigut tunngavissiuunneqarnissaannik piumasaqaatit annertusigaluttuinnarnerat, minnerunngitsumik akiliutit eqqarsaatigalugit, taamaaliornissamullu akiliuteqartitsisarneq pisortatigoortumik aalajangersakkanik tunngaveqartinneqassasoq, tamannalu siunnersuummi siunertaavoq pingaarneq.

tuakkanik atorniarnermi kingusinaarluni atukkanik utertitsinermi akiliuteqartarneq maani nunami allanilu ileqqutoqaavoq.

Akiliutit annermik siunertaraat atuisut (atorniartartut) utertitsinissamut piffissaliussanut malittarinninnissaat, taamaalillutik akiliutit atuakkat atorneqartut il.il. piffissaliunneqartup iluani utertitsinnissaannut kaammattuutaallutik. Kingusinaarluni atuakkanik il.il. utertitsinermi akiliuteqartarnissaq piumasaqaataanngippat atuisup kingusinnerusukkut atuakkanik angerlaallugit atorniarsinnaaneq ajornarsisissavaa, atukkanik piffissami sivisuumi tigumminniinnarnermigut allat angerlaassillutik atorniarsinnaanerigaluat ajornarsisissammagu. Atuakkanik atorniartarfinni atuakkanik atortitsisarneq il.il. ingerlatiinnarneqassappat atukkat piffissaq eqqorlugu utertinneqartarnissaat piumasaqaataavoq, taamaalillutik atuisut allat, aamma inniminneereersimasut atorniarnissamik periarfissaasunik atorluaasinnaaqqullugit. Taamaalillutik paasititsiniaaneq, ilinniartitaaneq kulturikkullu sammisassaqartitsineq piorsarniarlugit atuakkat atortullu allat akeqanngitsumik atorneqarnissamut piareersimatinneqarnissaannut akiliutit pingaarutilimmik inissisimalerput, taamalu atuakkanik atorniartarfiit siunertaminnik naammassinnissinnaalersillugit.

Akiliutittaaq allamik siunertaqarput, tassa atukkanik killissamik qaangiisimasunut utertitseqqusissutit aamma atorniartartullu piffissamik killiliunneqartunik qaangiisarnerit pillugit atorniartarfiit allaffissornermi aningaasartuutaasa ilaannut matussutaasaramik.

Atortussanik akeqanngitsumik atortitsisarneq atuakkanik atorniartarfeqarnermi tunngaviusumik malittarisassaajuassaaq, taamaalilluni akiliisitsisannginneq attatiinnarneqarluni. Atuakkanik atorniartarfinnut nammineq takkulluni atortussanik kiffaanngissuseqartumik atuisinnaatitaaneq innuttaasunut periarfissaavoq.

Akeqanngitsumik atukkiisinnaanermut pingaarnertut malittarisassamut ilaanngitsumik siunnersuutaavoq atuakkanik atorniartarfiit immikkut ittumik sullissinernut akiliuteqartitsisarnissaminnut periarfissaasa inatsisitigut malittarisassiornissaat. Tassunga assersuutigineqarpoq pappialanik assiliisarneq, akiliutissallu annertussusaa aalajangerneqartassasoq sullissinermut atatillugu aningaasartuutinut matussusiisumik.

Atuakkanik atorniartarfiit arlaqartut aningaasatigut akiitsoqarnerit, soorlu atorniartartut atukkaminnik kingusinaarlutik tunniussisarnerinit pilersimasut peqqutigalugit, atorniartartunik atorniarsinnaajunnaarsitsisarnissaq aalajangersarsimavaat. Peqqussummi atuuttumi tamanna pillugu aalajangersagaqanngilaq, paasiuminaapporlu taamatut pisoqartillugu atorniartartunik atorniarsinnaajunnaarsitsisinnaanermut atorniartarfiit inatsisitigut tunngavissaqarnersut. Taamaattumik siunnersuutigineqassaaq atortut suulluunniit atorsimasat innarlernagit tunniunnissaannik pisussaaffik annertunerusumik unioqqutinneqarpat, atorniartartunik atorniarsinnaajunnaarsitsinissamut atorniartarfiit inatsisitigut ersarissumik tunngavissalerneqassasut.

Atuakkanut innarlerneqartunut tammarneqartunulluunniit il.il. taarsiisarnissaq inatsisitigut malittarisassaliuutissallugu pisariaqartinneqanngilaq, apeqqutit taarsiinissamut malittarisassanik nalinginnaasunik iluarsiivigineqartarmata, taarsiissutillu annertussusaa nalinginnaasumik atuakkap pissarsiareqqinneranut atuakkallu ungalulerneranut aningaasartuutinut matussusiigajuttarmat.

2. Peqqussummut siunnersuummi immikkoortut pingaarnerit

a) Pisinnaatitaaneq atuuttoq

Bibliotekeqarneq pillugu Inatsisartut peqqussutaat nr. 4, 15. oktober 1979-imeersoq, Inatsisartut peqqussutaata allanngortinneqarneranik Inatsisartut peqqussutaat nr. 13, 30. oktober 1992-imeersoq kiisalu Namminersornerullutik Oqartussat atuakkanik atorniartarfinnut akiliuteqartarneq pillugu nalunaarutaat nr. 15, 5. oktober 1999-imeersoq nunatsinni atuakkanik atorniartarfeqarnermi inatsisitigut tunngaviupput. Inatsisaasulli akitsuutit, immikkut kiffartuussissutinut akiliuteqarnissamut imaluunniit atorniarsinnaajunnaarsitaanissamut tunngasunik aalajangersakkanik imaqanngillat. Aammattaaq atorniarsinnaanermut killilersuinissamut maleruagassaqanngilaq, taamatuttaarlu ilitsersuinissamik pisussaaneq pillugu maleruagassanik aalajangersimasoqarani.

b) Siunnersuut

Atukkanik kingusinaarluni utertitsinermi akiliuteqartarnissap saniatigut atuakkanik atorniartarfiit atuisunut immikkut ittunik sullissinerisa akilersittarnissaat siunnersuutigineqarpoq, najukkani atuakkanik atorniartarfinnik atuinermit annerusumik sullissinertut isigineqartariaqarmata. Tassani pineqarput sullissinerit immikkut ittut, atuakkanik atorniartarfiit qitiusumik kiffartuussinerinit allaanerusut, soorlu atukkiussinernit inniminniinernillu kiisalu atuakkanik atorniartarfimmut nammineq takkulluni neqeroorutinik assigiinngitsunik, ilisimatitsissutinik ilitsersuutinillu atuinernit allaanerusut. Kiffartuussinerit immikkut ittut pineqartut assersuutigalugu tassaapput atortunik atuisup piniagaanik pigilerumaagaanillu assiliilluni naqitikkanik akiliisitsisarneq. Aammattaaq pineqarput sullissinerit, atuakkanik atorniartarfiit annertunerusumik iliuuseqarnissaanik piumasaqartut aammalu suliap pissarsiariniarneqarnerani immikkut ittumik aningaasartuuteqarfiusartut.

Akiliutissatut siunnersuutigineqartuni akiliutit maannakkut atuuttut aallaavigineqarput, taamaattorli aningaasartuutit nalinginnaasumik annertusiartornerat malillugu akiliutit annerpaaffissaattut siunnersuutigineqartumut qaffaasinnaanissaq periarfissaassaaq.

Aammattaaq siunnersuutigineqarpoq atuakkanik atorniartarfiit sulinerini atorniarsinnaajunnaarsitsisarneq aalajangersakkami inatsisitigut aalajangersaaffigineqassasoq, tassalu atukkaminnik arlaleriarlutik utertissimanngitsut, atukkaminnik innarliisimallutik utertitsisut imaluunniit utertitsinissamut killiliussaq eqqorlugu utertitsinngitsoortut akileeqqusissummillu nassinneqarsimallutik akiligassaqartut atorniarsinnaajunnaarsinneqartassasut.

Atuakkanik atorniartarfiit immikkut ittumik pisoqartillugu, assersuutigalugu suliat qaqutigoorluinnartuuppata imaluunniit suliat immikkut ittumik akisuppata, angerlaatassanik atortitsisinnaanerup killiliiffiginissaanut aalajangersaasinnaaneranut maleruagassanik aalajangiisoqassasoq siunnersuutigineqarpoq. Taamatuttaaq siunnersuutigineqarpoq atorniartartut ataasiakkaarlutik ataatsimut atorniarsinnaasaasa inniminnersinnaasaasalu amerlassusissaat eqqarsaatigalugu atuakkanik atorniartarfiit killiliisarnermik periuserisaat inatsisiliuunneqassasoq.

Aammattaaq Naalakkersuisut akiitsoqartitsinaveersaarnermut akileeqqusinerillu pillugit Inatsisartut inatsisaannik allannguinissamik siunnersuutaannut ataqatigiissillugu siunnersuut isigeqquneqarpoq, taamaalilluni atuakkanik atorniartarfeqarneq pillugu inatsisartut peqqussutaannut innersuussineq inatsimmut pineqartumut ilanngunneqassalluni.

3. Aningaasaqarnikkut allaffissornikkullu pisortanut kingunissai

Allanngortitsinani maannakkut akiliisitsisarnerup ingerlatiinnarneqarnissaata tunngavigineqarnissaa pissutigalugu peqqussutissatut siunnersuut aningaasaqarnikkut imaluunniit allaffissornikkut Namminersornerullutik Oqartussanut kommuninulluunniit kinguneqassangatinneqanngilaq. Taamaattorli akigititat aningaasartuutinik matussusiisinnaannginneri pissutigalugit akit maannakkut atugarineqartut nalimmassarneqarnissaat naatsorsuutigineqarpoq. Aamma aningaasartuutit nalinginnaasumik ineriartornerinut akit nalimmassaaffigineqarnissaat naatsorsuutigineqassaaq.

4. Aningaasaqarnikkut allaffissornikkullu inuussutissarsiutinut kingunissai

Inuussutissarsiutinut aningaasaqarnikkut allaffissornikkulluunniit peqqussutissatut siunnersuutip kinguneqarnissaa naatsorsuutigineqanngilaq.

5. Avatangiisinut kinguneqarnissaa

Peqqussutissatut siunnersuut avatangiisinut kinguneqassanngilaq.

6. Allaffissornikkut innuttaasunut kinguneqarnissaa

Peqqussutissatut siunnersuutip innuttaasunut allaffissornikkut kinguneqarnissaa naatsorsuutigineqanngilaq.

7. Naalagaaffeqatigiinnermut namminersulivinnissamullu atasut

Siunnersuut Naalagaaffeqatigiinnermut imaluunniit namminiilivinnissamut ineriartornermut sunniuteqarnissaa naatsorsuutigineqanngilaq.

8. Oqartussasut kattuffiillu tusarniaavigineqartut

Peqqussutissatut siunnersuut ukunani tusarniaavigineqarpoq:

Nunatta Atuagaateqarfia
KANUKOKA
Akileraarnermut Pisortaqarfik
Inuussutissarsiornermut Pisortaqarfik
Aningaasaqarnermut Pisortaqarfik
Kulturministeriet
Naalakkersuisut Allattoqarfiat, Inatsisilerinermut allaffeqarfik

Nunatta Atuagaateqarfia aammalu Akileraartarnermut Pisortaqarfik siunnersuummut oqaaseqaateqanngillat. Taamaattoq Atuagaateqarfiup ilannguppaa inatsisartut peqqussutaata nutarternissaa pisariaqartoq, taamaalilluni atortussat kalaallisut oqaasertallit naqitigaanngitsut soorlu videot, cd, cd-rom aammalu dvd utertitsisussaatitaanermik aalajangersakkamut ilanngunneqarlutik taamaalillutillu pigiuaannarnissaat qulakkeerneqarluni. Tassunga atatillugu Atuagaateqarfik allappoq paasissutissat amerliartuinnartut, qarasaasiat kisiisa aqqutigalugit tamanut saqqummiunneqartartut, immikkut ajornartorsiutaasut. Oqaaseqaatit tamakku Naalakkersuisut eqqumaffigaat piffissarli pissutigalugu peqqussutip kingusinnerusukkut nutarternerani ilanngunneqarumaarlutik, tamakkuninnga itinerusumik misissuinissaq pisariaqarmat kiisalu taamatut inatsisiliornermi attorneqartussat eqqarsaatigalugit kingumut tusarniaasoqartariaqarluni.

Kulturministeriemit akissut aammattaaq tiguneqarpoq, taakkulu siunnersuut Biblioteksstyrelsemut saqqummiussimavaat, tassannga oqaaseqaatit ilaat siunnersuummut ilanngunneqarput. Biblioteksstyrelsep ilaatigut ilannguppaa § 12 c-mi akiliutit ukiumoortumik qaffattarnissaannut periarfissiinissaq isumassarsiatsialaassasoq. Tamanna akuerineqanngilaq, akinik nalimmassaanissamut immikkut procentiliisarneq Kalaallit Nunaanni atorneqanngimmat, soorlu tamanna Danmarkimi assersuutigalugu pisortanut akiliisarnissamut aalajangersakkani imminik nalimmassaasarnermi atorneqartartoq.

Tamatuma saniatigut KANUKOKA-mit akissut tiguneqarpoq, kommuninit tallimanit akissutit tiguneqarsimallutik taamatuttaarlu pisortaqarfiup kommunimit ataatsiminit akissut tigusimallugu. Taakku tamarmik siunnersuut taperserpaat, tamatumali saniatigut ilanngunneqarluni atuakkat il.il. tammarneqartut innarlerneqartulluunniit taarserneqartarnissaat pillugu aalajangersakkat peqqussutissatut siunnersuummut ilanngunneqartariaqartut. Kingullertut taaneqartut siunnersuutip allanngortinnissaanut tunngavissiisimanngillat, taarsiinissamut tunngasuni taarsiinissamut maleruagassat nalinginnaasut malinneqartarmata, tamatumalu kingorna taarsiinissami naatsorsuisarnerit eqqartuussivimmit suliassaasarlutik. Taarsiinissamut tunngasut pillugit akiliutinut il.il sanilliullugit piumasaqaataasartut aamma assigiinngillat, taarseeqqusisarnermi pillaatissaasunut assingusut ilanngunneqartanngimmata. Taarsiinissami annaasanut matussusiinissaq kisimi pineqartarpoq.

Tamatuma saniatigut KANUKOKA allappoq, pisariitsumik takunnissinnaanissaq eqqarsaatigalugu ataatsimoortumik peqqussusiortoqartariaqartoq, inatsisartut peqqussutaat ataasiarlugu allanngortinneqareersimammat. Soorlu oqaatigineqartutut siusinnerusukkut allanngortitsineq ataaseq pineqarpoq, taamaalillunilu una siunnersuut aatsaat aappassaanik allanngortitsineruvoq, inatsisilerinerlu eqqarsaatigalugu nutaamik peqqussusiornissamut tunngavilersuutissatut tamanna naammanngilaq. Naalakkersuisulli ilisimaaraat inatsisartut peqqussutaat pisoqaanerusoq ataatsimoortumillu nalilersoqqittariaqarunartoq matumani pineqarmat. Naalakkersuisut tassunga atatillugu Nunatta Atuagaateqarfiata oqaaseqaataanut tunngatillugu siusinnerusumi allaaserineqartut innersuussutigissavaat.

KANUKOKAp oqaaseqaataasa sinneri siunnersuummut ilanngunneqarput, taamatuttaarlu Naalakkersuisut Allattoqarfiannit, Inatsisilerisoqarfimmit oqaaseqaatit ilanngunneqarlutik.

Kiisalu Aningaasaqarnermut Pisortaqarfimmit akissutit tiguneqarput, taakkulu apeqquserpaat pissutsit piumasaqaatillu, peqqussummi akissarsiassat akiligassallu akileqqusarnissaannut tunngaviliisussat, eqqortumik allattornissaannut Inatsisilerisoqarfik suleqatigissallugu periarfissaqannginnersoq, taavalu akiliutit angissusissaat kingorna nalunaarummi aalajangerneqarluni. Kultureqarnermut, Ilinniartitaanermut, Ilisimatusarnermut Ilageeqarnerullu Pisortaqarfiup Inatsisilerisoqarfik oqaloqatigereerllugu nalilerpaa, peqqussummi akiliutit angissusiisa aalajangiusimanissaa eqqornerusoq, akiliutit pillaatisiatut iluseqarnerat pissutigalugu.

 

Aalajangersakkanut ataasiakkaanut oqaaseqaatit

 

§ 1 -imut

Nr. 1-imut.

Allannguutissatut siunnersuut tassaavoq akiliuteqartarnissamik il.il. aalajangersaanissamut siunnersuutip malitsigisaa, tassa akeqanngitsumik sulissinermi malittarisassani pingaarnerni kisiartaalluni ilaanngitsoq.

Nr. 2 -mut.

Siunnersuutigineqarpoq "kulturimut atuartitaanermullu direktion"-inik taaguut atorunnaareersimasoq taarserlugu inatsisartut inatsisaanni inatsisartullu peqqussutaanni eqqortumik taaguut "Naalakkersuisut" atorneqassasoq.

Nr. 3-mut.

Bibliotekeqarneq pillugu inatsisartut peqqussutaanni nr. 4-mi, 15. oktober 1979-imeersumi § 7, imm. 1 maannakkut kulturikkut ingerlatsineq sunngiffimmilu sammisassaqartitsineq pillugit inatsisartut peqqussutaanni nr. 10-mi, 21. maj 2002-meersumi § 2, imm. 2-mut ilanngunneqarnerata malitsigisaanik, allannguutissatut siunnersuut naqqiineruvoq. Taassuma saniatigut aamma oqaasertaata allanngortinneqarnissaa siunnersuutaavoq, tassa aalajangersagaq maannakkut periaasiusumut naapertuuttunngortinniarlugu, Inatsisartummi pilersaarusiat taakku suliarineqarneranni peqataaneq ajorput. Oqaasertap allanngortinneqarnissaanik siunnersuuteqarnermut tunngaviuvoq Nuummi atuakkanik atorniartarfiit pilersaarusiorneqarneranni Inatsisartut akuutinneqarnissaat Naalakkersuisunit inatsisitigut pisussaaffiussanngimmat, taamaakkaluartorli Naalakkersuisut Inatsisartunik taakkualuunniit ataatsimiititaliaannik pisariaqarfiani ilisimatitsisinnaasut. Aammattaaq Nuummi atuakkanik atorniartarfeqarnermut immikkut pilersaarusianik marlunnik (atuakkanik atorniartarfinnut pilersaarut aamma pitsanngorsaanissamut pilersaarut) peqaannarnissamik piumasaqaateqarnissaq siunissami pisariaqarnavianngilaq, soorluttaaq Nunatta Atuagaateqarfiata pisortaata pilersaarusiamik suliaqarnissamik, matumani aamma Nuup Kommunianik isumaqatiginninniarnissanik isumaginninnissaa tunngavilersuutigineqartoq. Kiisalu allassimasussaavoq Naalakkersuisut, Nunatta Atuagaateqarfiata pisortaata inassuteqaataanik akuersissuteqarsinnaanngikkunik Nunatta Atuagaateqarfiata pisortaata inassutigeqqaagaa allanngortiternagu inassuteqaammik nutartikkamik qinnuteqarsinnaasut.

Nr. 4-mut.

Akiliutit, akissarsiat il.il. aalajangersakkat, aaqqissuussineq peqqutigalugu kapitali 4-tut nutaatut siunnersuutigineqarput.

§ 12b.

Imm. 1. Aalajangersagaq nutaajuvoq ilanngunneqarnissaalu siunnersuutigineqarluni atuakkanik atorniartarfiit immikkut ittumik sullissinerminnut akiliuteqaqqusinissamut periarfissaasa inatsisitigut tunngavissaqalernissaat anguniarlugu. Kiffartuussinerit immikkut ittut tassaapput inniminniilluni kiffartuunneqarnissamik qinnitit, atuakkanik atorniartarfiit paasissutissiisarnermik siunertaannut attuumassuteqartut, sumiiffigisamili atuinermit, atortunik atorniarnermit aammalu nalinginnaasumik ilitsersuinermit annertunerusumik sullissinerit. Taamaalillutik sullissinerit immikkut ittut tamakku nalinginnaasumik atuinermut naleqqiullutik nukissanik annertunernik atuiffiusarput. Sullissinerit tamakku ilagaat tuaviortumik sullissinerit, atuisoq immikkut ittumik suliniuteqarnikkut atugassanik piaarnerpaamik piumasaqaraangat imaluunniit atuisoq atugassanik Qallunaat Nunaannit, Savalimmiunit nunanilluunniit allanit tikisitseqqusigaangat, tassungalu tunngasunik immikkut ittunik aningaasartuuteqartarnerit. Aalajangersakkami aammattaaq ilanngunneqassapput atuisartumit kissaatit, pissarsiffimmut imaluunniit pisinnaatitaaffimik piginnittumut immikkut akitsuutinik akiliutit, soorlu atortunik digitaliusunik, taamaallaat qarasaasiaq atorlugu atorneqarsinnaasunik soorlu tekstbehandlingsprogramimik atukkiussinermi piumasarineqartartut. Paasissutissat elektroniskiusut iserfiginissaannut pisinnaatitaaffiit aalajangersakkanut allanut tunngasuupput, naqitikkanut piumasaqaatinit allaanerullutik isumaqatigiissuteqarnikkullu pilersinneqarajuttarlutik.

Aammattaaq atuisumit suliakkiissutigineqarlutik atortussat atuisumit pigineqalersussat assilinerinut naqiterneqarinullu akiliutit aalajangersakkamut ilaassapput.

Sullissinerit immikkut ittut atuakkanik atorniartarfimmi sullissinernik nalinginnaasunik, naammaginanngitsumik annertussuseqalersitsillugit sunniuteqassanngitsut piumasaqaataavoq, soorlu atuakkanik atorniartarfiit atuisunik nalinginnaasumik sullissinerinik annikillisaallutik.

Imm. 2. Aalajangersagaq nutaajuvoq. Siunnersuutigineqarpoq taamaallaat kiffartuussineq paatsoorneqarsinnaanngitsumik atuisumit suliakkiissutaappat imm. 1. malillugu sullissinermut akileeqqusisoqarsinnaasoq.

Imm. 3. Aalajangersagaq nutaajuvoq. Siunnersuutigineqarpoq Naalakkersuisut kommunalbestyrelsillu stk. 1.-imi sullissinermi taaneqartutut akiliutissat annertussusissaat eqqortut aalajangiiffigisassagaat. Tamatumani tunngaviussaaq sulissinermi tunniussinermiluunniit aningaasartuutinut matussutissat akiliutit annerpaaffigissagaat.

§12c.

Imm. 1. Aalajangersagaq nutaajuvoq. Siunnersuutigineqarpoq atuakkanik atorniartarfiit angerlaallugit atukkanik kingusinaarluni utertinneqartunut akiliuteqartarnissamik piumasaqarsinnaanerat inatsisitigut aqqutissiuunneqassasoq. Akiliutaasartut annertussusissaannut aalajangersimasunut anertussusiliinissaq eqqarsaatigalugu atuakkanik atorniartarfinni maannamut akiliisitsinermi aki atorneqartartoq annertunerpaamik tunngavigineqarpoq, siunersuutilli siunissaa isumannaarniarlugu killissamik siunnersuuteqartoqarluni. Taamaalillutik akiliutit nalingi atuakkanik atorniartarfinni maannamut akigitinneqartunit qaffasinnerupput. Aamma akit eqqarsaatigalugit atuisut inersimasut aammalu meeqqat inuusuttullu 15-it inorlugit ukiullit immikkoortinneqartarnissaannik siunnersuuteqartoqarnera aalajangersakkamiippoq. Taaneqartut kingulliit akiliisinnaassusikinnerusutut naatsorsuutigineqarnerat pissutigalugu assigiinngitsunik akiliisarnissaq siunnersuutigineqarpoq.

Akiliutissat annerpaaffiisa peqqussummi allassimanissaat eqqonerusutut isigineqarpoq, akiliutit inunnit ataasiakkaanit pillaatisiatut misigineqarsinnaammata.

Aalajangersakkap pinngitsaaliissutaanngitsutut atorneqarsinnaanera maluginiaqquneqarpoq, tassami akiliuteqaqqusisoqassanersoq taakkulu atuakkanik atorniartarfiit utertitseqqusillutik allaffissornerannut aningaasartuutinut sanilliullugit, qaffasinnerpaamik akiliutissat iluanni, qanoq annertutiginissaat Naalakkersuisut kommunalbestyrelsillu aalajangissavaat.

Aammattaaq atortunut ataatsimoortillugit atorneqartunut akiliut taamaallaat ataasiussaaq, atukkat ataasiakkaarlugit akiliisoqarnani.

Imm. 2. Aalajangersagaq nutaajuvoq. Atorniarnermi uppernarsaatip taartissaanik tunniussaqarnermi atuakkanik atorniartarfiit akiliuteqartarnissamik piumasaqarsinnaanerat inatsisitigut ersarissumik aqqutissiuunneqassasoq siunnersuutigineqarpoq. Aningaasartuutit malillugit angissusilimmik akiliuteqartoqarnissa piumasarineqartassasoq aalajangersakkap anguniarpaa. Imm. 1-imi ajornartorsiut taaneqartoq siunissami isumannaarinissamut tunngasoq eqqarsaatigalugu qaffasinnerpaamik akiliutaasussaq maannakkut atuakkanik atorniartarfiit atorniarnermi uppernarsaammik tunniussinermi akigitittagaannit qaffasinneruvoq.

§ 12d.

Imm. 1. Aalajangersagaq nutaajuvoq. Atuakkanik atorniartarfimmi atorniartartut arlaleriarlutik atukkaminnik paarsinerlullutik annertuumik innarliisimasut atorniaqqissinnaanerannik mattunneqartarnissaat siunnersuutigineqarpoq. Atorniartartup atortut angerlaallugit atorsimasani utertinngippagit, imaluunniit atukkat utertinneqartut innarlersimappagit, aammalu atorniartartup atortussat atorsimasami taarsernissaannik piumasaqarfigineqarnini malinngippagu aalajangersagaq atorneqarsinnaavoq. Taamattaaq mattussineq pisinnaavoq atuisarneq arlaleriarluni atornerlunneqarsimappat, tassa angerlaallugit atorniarsinnaaneq taamatut pisoqartillugu piffissami aalajangersimasumi mattukkallarneqarsinnaalluni. Aalajangersagaq taamaallaat atortut atukkat aallaavigalugit pisussaaffinnut attuumassuteqarpoq, taamaalillunilu atuakkanik atorniartarfimmi malittarisassanik allanik unioqqutitsineq, soorlu peqqissaarnissamut malittarisassat unioqqutinneqarneri pissutigalugu mattunneqarneq, aalajangersaaffigineqarani. Taamaalilluni aalajangersagaq atuakkanik atorniartarfiup atortuinik atuisinnaatitsinnginnermik tunngaviliisunik imaqanngilaq. Atuakkanik atorniartarfiup nammineq peqqissaarnissamik malittarisassai malillugit mattussinerit taama ittut nalimmassarneqartassapput.

Imm. 2. Aalajangersagaq nutaajuvoq. Akiligassanik taarsigassanilluunniit akiliisoqanngitsoqarnerani akiligassaqalersimaneq pissutigalugu atuakkanik atorniartarfiit ataasiakkaat atuisartunik mattussinissaminnut erseqqissumik pisinnaatinneqarnissaat siunnersuutigineqarpoq. Atorniartartunik atorniarsinnaajunnaarsitsineq taamaallat akiitsoqarnermut, atuakkanik atortunilluunniit atorniarnermut pilersimasunut tunngatillugu kiisalu atorniarnermut allagartat taartissaannik sananermi atorneqarsinnaavoq, taamaammallu soorlu nuutsitsilluni assiliinermut akiliisimannginnermut atorneqarsinnaanani.

Imm. 3. Aalajangersagaq nutaajuvoq. Atuisup akiligassani imm. 1-imi aamma 2-mi pineqartut akilerpagit mattussaaneq atorunnaarsinneqassasoq siunnersuutigineqarpoq. Tassunga atatillugu atorniartup atukkaminik innarlersimasamik utertitsinera naammanngimmat, atukkat innarlerneqartut akilerneqareernerisigut atorniarsinnaaqqilersinnaasoq maluginiaqquneqarpoq. Atorniartartup aatsaat akiitsuni tamaat akilereerpagu atorniarsinnaajunnaarsitaaneq atorunnaarsinneqassaaq, atorniartartoq isumaqatigiissuteqarfigineqanngippat atorniarsinnaajunnaarsitaanermik atorunnaarsitsisumik. Pingaarnertut maleruagassap ilanngunneqarnissaa siunnersuutigineqarpoq, akiitsut tamakkerlugit akilerneqartarnissat siunertaralugu. Taamaalilluni soorlu atorniartartup akiitsuminik millisitsinera naammanngilaq, tamanna naafferartumik akilersuinissamik isumaqatigiissuteqarneq malillugu pinngippat.

§ 12e.

Imm. 1. Aalajangersagaq nutaajuvoq. Atuakkanik atorniartarfiit atortunik angerlaallugit atorneqartartunik killilersuisinnaanerat periarfissinneqassasoq siunnersuutigineqarpoq, assersuutigalugu atortut immikkut ittumik akisuujuppata, qaqutigoortuullutik imaluunniit aserujasuuppata.

Imm. 2. Aalajangersagaq nutaajuvoq. Siunnersuutigineqarpoq atortunik akisuunik imaluunniit qaqutigoortunik atorniarnermi atuakkanik atorniartarfiit qularnaveeqqusiissutinik akiliuteqarnissamik piumasaqarsinnaanissaat inatsisitigut aqqutissiuunneqassasoq.

§ 12f.

Aalajangersagaq nutaajuvoq. Atuakkanik atorniartarfiit ataasiakkaarlugit periarfissippai ileqquusut naapertorlugit atorniartartut angerlaassinnaasaannik killilersuinissamut aamma atuakkanik atorniartarfiup isumalluutigisinnaasamigut sillimmateqarnissaa eqqarsaatigalugu, soorlu atuakkanik atorniartarfiup atuagaataasa aalajangersimasut uninngatinnissaannut tunngasut. Siunnersuummi siunertarineqarpoq atorniartartut ataasiakkaat atorsimasaasa amerliartunnginnissaat, atorniartartunut allanut ajornartorsiutaalersumik. Aalajangersakkap siunertaraa angerlaallugit atorneqartartut ingerlaavartuunissaasa qulakkeernissaat.

§ 12g.

Imm. 1. Aalajangersagaq nutaajuvoq. Nunatta Atuagaateqarfiata kommunillu atuakkanik atorniartarfiisa atuakkanik atorniartarfinnik atuineq pillugu atuisunik ilitsersuinissaq pisussaaffigissagaat siunnersuutigineqarpoq. Taamaalilluni atuakkanik atorniartarfiit neqeroorutaannik atuinermi atugassarititaasut pillugit paasissutissiisarnissaat anguniarneqarpoq.

Imm. 2. Aalajangersagaq nutaajuvoq. Siunnersuutigineqarpoq Nunatta Atuagaateqarfiata kommunillu atuakkanik atorniartarfiisa atuakkanik atorniartarfinnik atuineq pillugu atuisunik ilitsersuisarnerinnaasigut atuisartut ilisimatinneqartarnerat pisassanngitsoq, aammali malittarisassat atuisartunut tunniunneqartassasut, taamaalilluni atuisartut pisussaallutik malittarisassat sunik imaqarneri ilisimassallugit, atuakkanik atorniartarfimmit allagartaliinerit oqaatsitigullu ilitsersuussinerit kisiisa aqutsiginagit.

 

§ 2-mut

Peqqussutip 1. juni 2005-imit atuutilernissaa siunnersuutigineqassaaq.