6. maj 2005

UPA 2005/20

 

Inissianik attartorneq pillugu Inatsisartut peqqussutissaattut siunnersuut

pillugu

Inatsisartut Attaveqarnermut Ineqarnermullu Ataatsimiititaliaata

ISUMALIUTISSIISSUTAA

 

Peqqussutissatut siunnersuutip aappassaaneerneqarnerani saqqummiunneqartoq

 

Inatsisartut Attaveqarnermut Ineqarnermullu Ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Agathe Fontain, Inuit Ataqatigiit, siulittaasoq
Inatsisartunut ilaasortaq Per Rosing-Petersen, Siumut, siulittaasup tullia
Inatsisartunut ilaasortaq Jørgen Wæver Johansen, Siumut
Inatsisartunut ilaasortaq Godmand Rasmussen, Atassut
Inatsisartunut ilaasortaq Palle Christiansen, Demokraatit

 

18. april 2005-imi siullermeerinerup kingorna inissianik attartorneq pillugu Inatsisartut peqqussutissaattut siunnersuut Inatsisartut Attaveqarnermut Ineqarnermullu Ataatsimiititaliaata misissorpaa.

Tusarniaanermit akissutisiat

Siunnersuutip matumani pineqartup ataatsimiititaliami suliarineqarnissaanut atugassatut tusarniaanermit akissutisiat nuutinneqarnerinik ataatsimiititaliaq piniarpoq. Tusarniaaffigineqartut akissuteqarnissamut qaammatinik marlunnik periarfissinneqarsimanerat tusarniaanermillu akissutisiat annertuutigut siunnersuummut ilanngunneqarsimanerat ataatsimiititaliap iluarisimaarlugu maluginiarpaa.

Kiisalu peqqussutissatut siunnersuummut allannguutissatut siunnersuutinik arlalinnik, inissianik attartorneq pillugu inatsisitigut inissisimanerup erseqqissaavigineqarneranut peqataaqataasunik Naalakkersuisut saqqummiussinerannik nassataqartumik Inatsisartut Naalakkersuisullu allattoqarfiisa ingerlalluartumik eqaatsumillu suleqatigiissimanerat ataatsimiititaliap iluarisimaarlugu maluginiarpaa.

Siunnersuutip imarisai

Naalakkersuisut siunnersuuteqarnermikkut inissianik attartorneq pillugu peqqussut maanna atuuttoq kingusinnerusukkullu allannguuteqartinneqartarsimasoq ataatsimoortunngortippaat. Tamatumalu peqatigisaanik iliuutsit nutaat arlallit peqqussummut ilanngunneqarput.

Allannguutit ilaat Inatsisartut Attaveqarnermut Ineqarnermullu Ataatsimiititaliaannit maluginiarneqartoq tassaavoq sulisunut inissiat ukiut arfineq marluk najugarineqareernerisigut inissiatut nalinginnaasumik attartukkatut tiguneqarsinnaalernissaat. Tamatuma saniatigut soraarninngortut sulisunut inissiami ukiut pingasut najugaqarsimagunik soraarninngornerminni taassuma tigunissaanut periarfissinneqarnerat pissusissamisoortutut ataatsimiititaliamit isigineqarpoq. Iliuutsit taaneqartut ineqarneq suliffeqarnerlu eqqarsaatigalugit nikerarsinnaassuseqarnermut annertusaataaqataallutillu suliffeqareernerup kingorna soraarninngortut amerlanerit nunatsinniiginnarnissaannut periarfissiipput.

Inissiap attartukkap ukioq ataaseq tikillugu allamut attartortinneqarsinnaanera periarfissinneqarmat naapertuuttutut isigineqarpoq. Taamatuttaaq inissiat pisortat attartortittagaasa paarlaasseqatigiissutigineqarsinnaanerannut periarfissat pitsanngortinneqarnerat ilassilluarneqarpoq.

Avatangiisinut taamatullu attartortut ataasiakkaat aningaasaqarnerannut iluaqutaasumik imermut naatsorsuutit pillugit maleruagassat nutaat imermik atuinerup ataatsimut isigalugu appariaateqarneranut peqataaqataanissaat naatsorsuusitigineqarsinnaavoq.

Kiisalu Ineqarneq pillugu Maalaaruteqartarfimmik pilersitsinissaq Inatsisartut Attaveqarnermut Ineqarnermullu Ataatsimiititaliaannit qilanaarineqarpoq. Tamanna ineqarneq pillugu maalaarutit pilertornerusumik suliarineqartalernerannut peqataaqataassasoq ataatsimiititaliap neriuutigaa.

Tamanna tunngavigalugu inissianik attartorneq pillugu Inatsisartut peqqussutissaattut Naalakkersuisut siunnersuutaat allannguutitai ilanngullugit akuersissutigineqassasoq ataatsimiititaliami amerlanerussuteqartut Siumumeersut, Inuit Ataqatigiinnersup Demokraatineersullu inassutigaat.

Ataatsimiititaliami ikinnerussuteqartup Atassummeersup siunnersuut tunngaviusumik isigalugu isumaqatigaa, siunnersuutilli aappassaaneerneqarnissaata 2005-imi ukiakkut ataatsimiinnissamut kinguartinneqarnissaa kissaatigalugu, taamaaliornikkut suliarinninnissamut piffissaqartoqarnerusinnaaqqullugu. Tamanna tunngavigalugu siunnersuut maannakkuugallartoq itigartitsissutigineqassasoq Atassutip inassutigaa.

Taama oqaaseqarluni Inatsisartut Attaveqarnermut Ineqarnermullu Ataatsimiititaliaata siunnersuut aappassaaniigassanngortippaa.

 

	Agathe Fontain, siulittaasoq
Per Rosing-Petersen, siulittaasup tullia		Jørgen Wæver Johansen
Godmand Rasmussen		Palle Christiansen