12. april 2005

UPA2005/20

 

Peqqussutissatut siunnersuummut nassuiaatit

 

Nassuiaatit nalinginnaasut

 

1. Aallaqqaasiut

Inissianik attartorneq pillugu Inatsisartut peqqussutaat atuuttoq 2001-imiilli atuussimavoq. Piffissap ingerlanerani attartornermut tunngassuteqartunik misilittagaqaleriartornerup nassatarisaanik peqqussut pingasoriarluni allanngortinneqartarpoq. Allanngortitsisarnerit tamarmik annertuumik pingaaruteqartuusarput. Allanngortitsisarnerit peqqussutip atuisunut paasiuminaalliartorneranut peqqutaaqataasarsimapput. Aammattaaq pissutsit attartornermut tunngassuteqartut allanngoriartornerat pissutaalluni, matumani ilanngullugu ineqartunut maalaaruteqartarfimmik inissianillu piginneqataasalernissamik kissaateqarnerit, attartornermut peqqussutip nutarteriffigineqarnissaa eqikkaarlugulu allanneqarnissaa pisariaqalersimavoq.

Siunnersuut matumuuna saqqummiunneqartoq ilaatigut inissianik attartorneq pillugu malittarisassanik atuuttunik ingerlateqqitanik imaqarpoq, ilaatigullu aamma najugaqartut maalaaruteqartarfiannik atuutsitsilerneq pillugu malittarisassat nutaarluinnaat imaralugit. Inatsisartut Ombudsmandiata inissianik attartorneq pillugu maalaarutaasarsimasut assigiinngitsut tunngavigalugit inassuteqaatigisarsimasai siunnersuummut ilanngunneqarput.


2. Peqqussutissatut siunnersuummi pineqartut pingaarnerit

Siunnersuummi saqqummiunneqartumi inatsisinut atuuttunut naleqqiussinermi, pingaartumik uku erseqqissaavigineqassapput:

Tamatuma saniatigut Naalakkersuisut ineqarneq pillugu naalakkersuinikkut ingerlatsinerat malillugu arlalinnik iluarsiisoqarpoq.


3. Pisortanut aningaasaqarnikkut allaffissornikkullu aqutsinermut sunniutissat

3.1. Pisortanut aningaasaqarnikkut sunniutissat

Peqqussutissatut siunnersuutip atuutsinneqalernissaa imminermini Nunap Karsianut aningaasaqarnikkut sunniuteqartussaanngitsutut naliliiffigineqarpoq. Kisianni ineqarneq pillugu maalaaruteqartarfiup atuutsinneqalerneratigut ineqarnermut aningaasaliissutit ilaneqarnissaat pisariaqartinneqalissaaq. Taamaattumik peqqussutissatut siunnersuummi attartortitsisut ataasiakkaat attartukkamut ataatsimut ukiumoortumik 100 kr.-inik akiliisarnissamik peqquneqarnissaannut aningaasallu Namminersornerullutik Oqartussanut akiliutigineqartarnissaat periarfissinneqarpoq. Ullumikkut pisortat attartortitaasa 12.300-t missaannik amerlassuseqarnissaat naatsorsuutigineqarpoq.

Ineqarneq pillugu maalaaruteqartarfiup ingerlanneqarneranut aningaasartuutit ilaatigut attartortut ataatsimoorlutik akiliisittarnerisigut matussuserneqarsinnaapput, tassa Naalakkersuisut attartortitsisumut ukiumoortumik ataatsimoortumik akiliutissamik akilersitsiniartoqartarnissaannik peqqusippata, ilaatigullu sulianik maalaaruteqartarfimmut tunniussinermut atatillugu atuisut annikitsumik akiliuteqartittarnerisigut matussuserneqarsinnaallutik. Kiisalu atuisunut akiliut 500 kr.-iusoq aatsaat attartortoq suliakkiinermini tamakkiisumik ilaannaakuussumilluunniit taperserneqanngippat akiliutigitinneqartassaaq.

Najugaqatigiiffinnik ingerlatsineq annertunerpaamik imminut nammattussaavoq. Attartortitsisup imaluunniit inissianik aqutsisup ineqarnermut akiliut aqqutigalugu inissianik aqutsinermut aningaasartuutini matussuserniarsinnaavai. Attartortitsisup inissiaatai ineqarfittut immikkoortortanut aggugaapput, ingerlatsinermut, aserfallatsaaliuinermut illuartitsisarnernullu tunngatillugu aningaasartuutiviusut tunngavigalugit namminersorlutillu aningaasaqartunut.

Iluarsaassinissat isaterinissallu attartortunut inissianiit nuuttussanut taarsiissutissanut aningaasartuuteqarfiusussat eqqarsaatigalugit, aningaasartuutissat sanaartukkanut ataasiakkaanut ilanngunneqarsinnaassapput, taakkulu aqqutigalugit aningaasalersorneqarsinnaassallutik.


3.2. Pisortanut allaffissornikkut sunniutissat

Pisortat atuisuusut, tassalu A/S Inissiaatileqatigiiffik INI kommunellu, namminneq inissiaatiminnik aqutsisuusut peqqussutissatut siunnersuutip atuutilerneratigut attartornermut maleruagassanik atuuttunik nassuiaasinnaanerat ajornannginnerulissasoq naliliisoqarpoq.


4. Inuussutissarsiornermut aningaasaqarnikkut allaffissornikkullu sunniutissat

Namminerisamik inissiaatinik attartortitsinermut maleruagassat maleruagassanut maanna atuuttunut naleqqiullutik annertunerusumik allannguuteqartinneqanngillat. Taamaattumik matuma inuussutissarsiornermi aningaasaqarnikkut allaffissornikkullu sunniuteqarnissaa naatsorsuutigineqanngilaq.


5. Avatangiisinut pinngortitamullu sunniutissat

Peqqussutissatut siunnersuut avatangiisinut pinngortitamullu sunniuteqartussatut naliliiffigineqanngilaq.


6. Innuttaasunut allaffissornikkut sunniutissat

Peqqussutissatut siunnersuutip innuttaasut ataasiakkaat, tassalu attartortut attartortullu peqatigiiffii, inissianik aqutsisoq attartortitsisorluunniit pillugit maalaaruteqarnissamut periarfissaannik oqinnerulersitsinissaa naatsorsuutigineqarpoq. Tamatuma saniatigut peqqussutissatut siunnersuutikkut attartortut atuisinnaatitaanerat arlalitsigut ajornannginnerulersinneqarpoq. Paarlattuanik attartortut piffissaq eqqorlugu inissiamut aningaasartuutinik akiliineq ajortut sukateriffigineqarput.


7. Sunniutaasinnaasut annertuut allat

Peqqussutissatut siunnersuutip atuutilerneratigut ineqarneq pillugu maalaaruteqartarfimmik, attartortut pisortallu attartortitsisut akornanni aaqqiagiingissutinik isumagisaqarnissamut piginnaatitaasumik pilersitsisoqassaaq. Taamaalilluni maalaarutit suliarineqartarnerat sivikillineqangaatsiassaaq, aammalu attartortup periarfissai pitsannguuteqangaatsiassasut naatsorsuutigineqarpoq. Peqqussutissatut siunnersuut allanik annertuunik sunniuteqassanngitsoq nalilerneqarpoq.


8. Pissutsit Naalagaaffeqatigiinnermut namminersulernissamullu attuumassutillit

Peqqussutissatut siunnersuut namminersulernissamik suliaqarnerup ingerlaneranut sunniuteqassanngitsoq nalilerneqarpoq. Naalagaaffeqatigiinnermut tunngatillugu Namminersornerullutik Oqartussat Danskillu Naalagaaffiata suliffeqarfiutai sinnerlugit Kalaallit Nunaanni Rigsombudsmandip akornanni inissianik pilersuinissaq inissianullu tunngassutillit pillugit isumaqatigiissuteqartoqarpoq.


9. Oqartussaasunut kattuffinnullu il.il. tusarniaaneq

Peqqussutissatut siunnersuutissap allaqqaarnera 2004-mi ukiakkut tusarniaassutigineqarpoq, ukununnga: A/S Inissiaatileqatigiiffik INI, KANUKOKA, Kalaallit Nunaanni kommunet tamarmik, Kommunet Kukkunersiuisoqarfiat, SIK, Sulisitsisut peqatigiiffiat, PPK, PIP, AK, IMAK, ASG, Siumut, Atassut, Kattusseqatigiit, Demokraatit, Inuit Ataqatigiit, Tele Greenland A/S, Royal Greenland A/S, Air Greenland A/S, Nukissiorfiit, Mittarfeqarfiit, Kalaallit Nunaanni Politimestereqarfik, Kalaallit Nunaanni Rigsombudsmandi, Inatsisartut Ombudsmandiat, Kalaallit Nunaata Eqqartuussivia, Inatsisartut Allattoqarfiat, Namminersornerullutik Oqartussani pisortaqarfiit tamarmik, Grønlandsbanken, Sparbank Vest, Deloitte, Price Waterhouse Coopers, Ejendomskontoret Igdlo kiisalu Grønlands Ejendomskontor.

Ineqarnermut Attaveqarnermullu Pisortaqarfik tusarniaanerminut atatillugu akissutinik tigusaqarpoq, ukunannga: A/S Inissiaatileqatigiiffik INI, KANUKOKA, Paamiut Kommuneat, Maniitsup Kommunea, Nuup Kommunea, Qeqertarsuup Kommunea, Ammassallip Kommunea, Kommunet Kukkunersiuisoqarfiat, Sulisitsisut Peqatigiiffiat, PPK, AK, IMAK, ASG, Nukissiorfiit, Kalaallit Nunaanni Rigsombudsmandi, Inatsisartut Ombudsmandiat, Nunanut allanut Pisortaqarfik, Ilaqutariinnermut Pisortaqarfik, Piniarnermut Aalisarnermullu Pisortaqarfik, Akileraarnermut Pisortaqarfik, Inuussutissarsiornermut, Nunalerinermut Suliffeqarnermullu Pisortaqarfik, Aningaasaqarnermut Pisortaqarfik, Aqutsinermut Pisortaqarfik, Inatsisilerivik, Namminersulernissamut, Aatsitassaqarnermut Inatsisilerinermullu Pisortaqarfik kiisalu Igdlo Ejendomskontor.

Tusarniaanermi akissutit pissarsiarineqartut, inatsisit teknikimut tunngasortaanik kukkunernut kiisalu oqaatsinut tunngasortaanik kukkunernut amigaatinullu oqaaseqaatitaqartut oqaaseqaateqarfigineqaratik peqqussutissatut missingiutip allaqqaarneranut iluarsiissutigineqarput.

Tusarniaanermi akissutit pissarsiarineqartut allat, siunnersuutip allaqqaarnerani najoqqutassat imaannut tunngassuteqartut annertunersaat matuma kinguliani saqqummiuteqqinneqarput oqaaseqaateqarfigineqarlutillu. Immikkoortuni tulliuttuni takuneqarsinnaasutut tusarniaanermi akissutit arlallit peqqussutissatut missingiutip allaqqaarnerani iluarsiinissamut tunngaviliipput.

Ineqarnermut Attaveqarnermullu Pisortaqarfimmit tusarniaanermi akissutit peqqussutissatut siunnersuutip allaqqaarnerani tulleriinnilersuineq malillugu oqaaseqaateqarfigineqarnissaat naleqqunnerpaatut isumaqarfigineqarpoq.

 

Missingiummi § 4-mut

Sulinermik inussutissarsiuteqartut kattuffii AK, IMAK, PPK aamma ASG ataatsimoortumik allagaqarlutik missingiummi § 4, inissiigallartarnermut tunngasoq oqaaseqarfigaat. Kattuffiit paasiuminaatsippaat Naalakkersuisut kattuffiit tamanna pillugu isumasioqqaarnagit nutaamik peqqussutissatut missingiummi, utaqqiisaagallartumik ineqartitsisarnermi akiliuteqartitsinissamik periarfissiisumik suliaqarsimammata. Kattuffinniit tikkuarneqarpoq 2003-mi Naalakkersuisunut isumaqatiginninniarnermi utaqqiisaagallartumik ineqartitsisarneq pillugu paasiniaanissaq isumaqatigiissutigineqarsimammat. Kattuffiit ataasiakkaat Naalakkersuisullu akunnerminni isumaqatigiissutigisaasa allattorsimaffianni takuneqarsinnaavoq, isumaqatiginninniarnermi illuatungeriit utaqqiisaagallartumik inissiigallartarneq oqallisigisimagaat, taamatullu kattuffiit paasiniaanermut, sulisunut utaqqiisaasumik inissiigallartarnermi aningaasartuutinik appartitsissutaasussanik siunnersuusiornermik aaqqissuussanillu inassuteqarnermik kinguneqartussanut peqataanissaq piareersimaffigigaat. Aqutsinermut Pisortaqarfimmiit kiisalu Aningaasaqarnermut Pisortaqarfiup Isumaqatiginninniarnernut Immikkoortortaaniit isummersuutinik isummanut taakkununnga assingusunik saqqummiussisoqarpoq.

Peqqussutissatut siunnersuummi isumaqatiginninniarnernut akulerunnissaq siunertarineqanngimmat pisortaqarfiup kattuffinnit oqaaseqaatigineqartut tusaatissatut tiguneqarnissaat aalajangiunneqarpoq, taamaattumillu siunnersuummi § 4, imm. 2 naapertorlugu utaqqiisaassumik inissiigallarnermut akiliuteqartitsisinnaaneq peerneqarluni. Kattuffiit ataatsimoorlutik tusarniaanermut akissuteqarnerisa kingunerisaanik § 4 tamakkerlugu nutaamik oqaasertalerneqarpoq.


Missingiummi § 5-imut

A/S Inissiaatileqatigiiffik INI-miit inissiamik imm. 1, nr. 1-5 naapertorlugu innersuunneqartumik attartortoq sunik piumasaqarsinnaanera pillugu erseqqissaasoqarnissaa kissaatigineqarpoq. Imm. 2-mi allaqqavoq inissiap naleqquttumik angissuseqarnissaa pitsaassuseqarnissaalu anguniarneqassasoq. Inissiap pitsaassusaa angissusaalu pillugit sukumiisumik nassuiaateqartoqarnissaa kissaatigineqanngilaq, aalajangersakkami siunertaasoq tassaammat inissiamik innersuussinermi inissiamut aalajangersimasumut tunngasunik naliliisarnissaq, tassanilu suliat ataasiakkaat ataatsimoortumik naliliiffigineqartassallutik. Assersuutigalugu soorlu inissiaq pingasunik initalik angisooq, annikitsumik ineqarnermut akiliuteqarfiusartoq inissiamit sisamanik initalimmit mikisumit, annertuumik ineqarnermut akiliuteqarfiusartussamit pilerigineqarnerusinnaavoq.

A/S Inissiaatileqatigiiffik INI-miit inissiat inoqanngitsut imm. 4 naapertorlugu Naalakkersuisuniit agguaasseqatigiinnissamut aalajangersaavigineqanngitsut agguaanneqarnissaannut aallaavissamik ujartuisoqarpoq. Imm. 1, nr. 1-6 naapertorlugu inissianik innersuussisarneq nr. 7-10 naapertorlugu innersuussisarnermit salliutinneqassaaq. Kommunet ataasiakkaat imaluunniit Naalakkersuisut nr. 7-10 naapertorlugu inissianik agguaassinissamut malitassamik sukumiinerusumik isumaqatigiissuteqarnissaq pisariaqartikkunikku, tamanna namminneerlutik isumaqatigiissutigisinnaavaat. Isumaqatigiissuteqartoqarsimanngippat agguaassinerit imm. 1-imi tulleriinnilersuinerit taaneqartut malillugit pisassapput.

KANUKOKA-miit isumaqartoqarpoq imm. 1-imi allassimasut tulleriiaarneri allanngortinneqartariaqartut, taamaalilluni inissiat kommunep inunnik isumaginninnermik siunertaqartumik pisariaqartitai naammassiniarlugit taakku nr. 8-miit siulliutinneqalerlutik. Kommunep agguaasseqatigiittarnerup allanngortinneqarnissaa pisariaqartippagu, tamanna pillugu Naalakkersuisunut isumaqatigiissuteqarnissaa kaammattuutigineqarpoq.


Missingiummi § 6-imut

A/S Inissiaatileqatigiiffik INI-miit imm. 1 pisariaqanngitsutut isumaqarfigineqarpoq, qinnuteqartut inissiamik neqeroorfigineqarnerminni inissiamik tigusiumanngissinnaammata. Naalakkersuisunit tamanna isumaqataaffigineqanngilaq, qinnuteqartut inissiamut immikkut kissaatigisaat qinnuteqartup inissiamik tigusinissaanut akornutaasinnaammata, taamaalillunilu qinnuteqartup kissaataanut naapertuutinngitsumik neqerooruteqarnermi qinnuteqartoq itigartitsisinnaalluni. Aalajangersagaq allanngortinneqarpoq, taamaalillunilu inissarsiortut kissaatigisaannut allattorsinnaasaannut tamanut matussusiisumik imaqalerluni.

KANUKOKA isumaqarpoq imm. 3 allanngortinneqartariaqartoq, taamaalillunilu sumiiffinni attartortitsinissamik ajornartorsiorfiusuni inissiat annerusut inissarsiortunut, utaqqisut allattorsimaffianni nalinginnaasumi allatsissimasunut init amerlassusaat apeqqutaatinnagit tunniunneqarsinnaanerat neqeroorutigineqarsinnaalerluni. Naalakkersuisut tamatumunnga isumaqataapput, taamaattumillu imm. 3 allanngortinneqarluni. Naalakkersuisunit allannguinissaq eqqarsarnartoqartinneqanngilaq, aalajangersakkamimi § 7, imm. 1-imi attartortut ineqarnermut aningaasartuutinik ingerlaavartunik akiliisinnaanngitsut inissianik tunineqarsinnaanerat pinaveersaartinneqarmat.


Missingiummi § 7-imut

Ombudsmandip 2004-mi novembarimi nammineerluni misissuinerminut atatillugu oqaatigaa, Naalakkersuisut nalunaarusiornermikkut inoqutigiit isertitai ineqarnermut, kiassarnermut innaallagissamullu aningaasartuutinut matussutissatut amigarpata, attartortitsisut attartortitsinissamik itigartitsisinnaanerannik maleruagassamik atuutsitsilernerat isornartoqartinneqartoq. Ombudsmandip oqaaseqaataa Naalakkersuisunit tusaatissatut tiguneqarpoq, taamaattumillu maanna § 7, imm. 1-imi inissarsiortut isertitaat pillugit paasissutissanik piumaffigineqarsinnaanerat inatsisitigut tunngavissinneqarpoq.

A/S Inissiaatileqatigiiffik INI-miit imm. 2-p erseqqissarneqarnissaa kissaatigineqarpoq, taamaalilluni qinnuteqartup utaqqisut allattorsimaffiini tamavinni allatsissimanermut sullissinermut akiliisarnissaa ersarinnerulersinneqarluni. Tamanna aalajangersakkamut nassuiaatini erseqqissarneqarpoq.


Missingiummi § 8-mut

A/S Inissiaatileqatigiiffik INI-miit aalajangersagaq paatsoorneqarsinnaasutut isigineqarpoq, taamaattumillu Naalakkersuisut aalajangersakkap oqaasertai allanngortippaat, taamaalillunilu imm. 1 peerneqarluni. Imm. 2 allanngortinneqarpoq, taamaalillunilu inissarsiortut kissaatigisaannut allattorsinnaasaannut tamanut matussusiisumik imaqalerluni.


Missingiummi § 10-mut

IMAK-imiit imm. 2-p allanngortinneqarnissaa siunnersuutigineqarpoq, taamaalillunilu sulisut angerlarsimaffimminni sulisariaqartartut/piareersartariaqartartut kissaatigigunikku inoqutigiinni inuit amerlassusaannut naleqqiullugu init tunniunneqarsinnaasut inimik ataatsimik ilaneqarsinnaalernissaat siunnersuutigineqarpoq. Naalakkersuisut naalakkersuinikkut ingerlatsinerat, 2003-mili peqqussutissatut siunnersuummut atugartik ingerlatiinnarpaat, taannalu aamma attartorneq pillugu peqqussutissatut siunnersuummut nutaamut ilaatinneqarpoq. Naalakkersuisut naalakkersuinikkut ingerlatsinerat aningaasaqarnikkut tulleriiaarinermut ersersitsisuuvoq, taamaattorli kommunet ataasiakkaat tamanna kissaatigippassuk Naalakkersuisut kommuneni ataasiakkaani allatut naalakkersuinikkut ingerlatsinnissartik ammaffigaat.


Missingiummi § 16-imut

IMAK-imiit allaffimmi pisortat akissaateqarfik 36 qaffasinnerusorluunniit naapertorlugu akissarsiaqartinneqartut pisortanut inissianut innersuunneqarsinnaajunnaarnerat, sulisunullu allanut naleqqiullutik inissianut innersuussisarnermi salliutiinnarneqartalernissaat naammaginartuutinngilaat. Naalakkersuisut naalakkersuinikkkut igngerlatsinerminni ilaatut allaffimmi pisortat akissaateqarfik 36 qaffasinnerusorluunniit naapertorlugu akissarsiaqartinneqartut pisortanut inissianut innersuunneqartarnerat atorunnaarsereernikuuvaat, tamannalu 2003-mi attartorneq pillugu peqqussutip allanngortinneratigut pereerpoq. § 16 tassunga nangissutaavoq.


Missingiummi § 19-imut (maanna § 18-inngortumut)

Aalajangersagaq § 18, imm. 3-nngorlugu allanngortinneqarpoq. Aalajangersagaq imm. 4-mik aamma 5-imik nutaamik ikkussinikkut erseqqissaavigineqarpoq.


Missingiummi i § 20-mut (maanna § 19-inngortumut)

Aalajangersagaq § 19-inngorlugu allanngortinneqarpoq.


Missingiummi § 21-mut (maanna § 20-nngortumut)

Sulinermik inuussutissarsiuteqartut kattuffii AK, IMAK, PPK aamma ASG ataatsimoortumik allagaqarlutik oqaatigaat, Naalakkersuisut kattuffinnut isumasiueqqaaratik sulisup inissiamik neqeroorutigineqartumik tigusisussaanera, piumanngikkunilu utaqqisut allattorsimaffiannit peerneqartussaanera aalajangersarsimagaat. Naalakkersuisut sulisunut inissianut najugarilivigassanut utaqqisut allattorsimaffianni allatsissimasunik ikilisaaniarnerminni, aalajangersagaq Naalakkersuisut naalakkerusinikkut ingerlatsinerannik piviusunngortitsinissamut pisariaqartutut isumaqarfigaat. Naalakkersuisut sulinermik inuussutissarsiuteqartut kattuffiinut allanulluunniit inissiamik neqeroorutigineqartumik tigusisussaatitaanermut maleruagassat ilusilerneqarnerannut kattuffiit allalluunniit sunniuteqarsinnaanissaanik ilimasuutississimanngilaat. Tamatumani inissiap sulisumut innersuunneqartup inissianik nalinginnaasumik iluarsaassisimanissaq pillugu inatsisitigut piumasaqaatinut naammassinnissimanissaa soorunami piumasaqaataavoq. Ullumikkut pisortat inissiaataanni attartortittakkani inissiat ilaat ukiut 40-t sinnerlugit pisoqaassuseqarput, inissiallu taakku soorunami pisoqqatut nungullarsimasutullu isikkoqassapput, kisiannili atorsinnaassallutik. Aalajangersagaq § 20-mut allanngortinneqarpoq.


§ 21-mut nutaamut

Naalakkersuisut maleruagassamik, sulisunut inissiamik najukkamik inissiatut attartortittakkatut nalinginnaasutut tigusisinnaanermut periarfissiisumik ilanngussaqarput. Pisinnaatitaaffik piumasaqaatit sukumiinerusumik allaaserineqartut tunngavigalugit atuutissaaq.


Missingiummi § 22-mut

Aalajangersagaq atorunnaarsinneqarpoq, pisortaqarfik A/S Inissiaatileqatigiiffik INI-miit saaffigineqarnissamut oqartussaaffeqarnermigut sulisunut inissianik innersuussivigineqarsinnaatitaallutik atorfinitsinneqarsimasunut inissianik innersuussisarnermut atatillugu suliassanik suliaqarnissamut periarfissaqareermat.


Missingiummi § 23-mut

Teknikimut tunngasut eqqarsaatigalugit siunnersuummi imm. 1, § 22-ngorlugu allanngortinneqarpoq, aalajangersakkallu sinnera § 23-imiitiinnarneqarluni. Kiisalu aalajangersakkap oqaasertai imaalu allanngortinneqarput, A/S Inissiaatileqatigiiffik INI-miit aalajangersagaq malillugu aqutsinerup isumagineqarnera ajornakusoortoq oqaatigineqarmat.


Missingiummi § 24-mut

Imm. 3 allanngortinneqarpoq, suliassaqarfimmi allaffissornikkut aqutseriaatsimik ineriartortitsinermut naapertuuttunngortinneqarluni.


Missingiummi kapitali 3-mut aamma 4-mut

Aalajangersakkap ersernerlunnera, najugaqatigiiffiup ataatsip aamma A/S Inissiaatileqatigiiffik INI-p akornanni eqqartuussisulersuussinermik kinguneqartoq pissutaalluni Naalakkersuisut missingiummi kapitali 3, kapitalinik malunnik, tassalu 3-mik 4-millu, taarserpaat. Kapitalini nutaani marlunni aalajangersakkat, kapitali 3-mut nutaanngitsumut aalajangersakkanut naleqqiullutik ataatsimik amerlanerupput, taamaattumillu peqqussutissami aalajangersakkat sinneri paragrafimik ataatsimik siuartinneqarlutik. Tassalu: § 36 § 37-nngorpoq, § 37 § 38-nngorpoq il.il.


Missingiummi § 36-mut (maanna § 37-nngortumut)

A/S Inissiaatileqatigiiffik INI-miit aalajangersakkap annikitsunik arlalinnik iluarsiivigineqarnissaa kissaatigineqarpoq, tamannalu naammassineqarpoq. Imm. 5 naapertorlugu maanna attartortitsisup qularnaveeqqusiissut immikkullu sillimmasiissut attartortup akiligassaanut matusissutissatut atorsinnaalerpai. Siunnersuummi aningaasat taakku attartortitsisup attartornermut isumaqatigiissut naapertorlugu pisussaaffiinut matusissutissatut taamaallaat atorneqarsinnaagaluarput, taamaalillunilu attartortitsisup attartortumut, soorlu attartortup illumi aserorterineranut piumasaqaateqarsinnaanera mattunneqarluni. Kiisalu imm. 6-imik nutaamik ikkussisoqarpoq, taannalu malillugu naafferartumik akilersuisinnaanermut aaqqissuussineq attartortunut, ukiut kingulliit pingasut iluanni attartugarisimasaminni ineqarnermut aningaasartuutinut ingerlaavartunut akiliinngitsoortarnermikkut sumiginnaasimasunut atuuttussaatinneqanngilaq.


Missingiummi § 37-mut (maanna § 38-nngortumut)

Peqqussutissatut siunnersuummi imm. 2 peerneqarpoq, ullumikkut attartortut tamarmik siumoortumik ineqarnermut akiliuteqartinneqartarmata.

A/S Inissiaatileqatigiiffik INI-miit attartortitsisup akileeriaasissamik aalajangiisinnaanerata ilanngunneqarnissaa kissaatigineqarpoq. Naalakkersuisunit attartortut ataasiakkaat ineqarnermut, imermut kiassarnermullu qanoq ilillutik akiliisarnissaannik aalajangersaanissaq kissaatigineqanngilaq, attartortitsisup akiliinissamut piffissaq akiliiffissarlu pillugit aalajangiisinnaanera naammattutut Naalakkersuisunit isumaqarfigineqarmat.


Missingiummi kapitali 5-imut (maanna kapitali 6-inngortumut)

Naalakkersuisut tusarniaanermi akissutinik siunnersuummi kapitali 5-imut (maanna kapitali 6-inngortumut) oqaaseqaateqarfiusunik arlalinnik tigusaqarput. Tusarniaanermi akissutit Naalakkersuisut kapitalimi tassani annertuunik allannguinissamut tunngavissippaat, taamaalillunilu illuutini immikkut uuttuusersugaasuni imermut naatsorsuutinik ataatsimoortunik suliaqartoqartarunnaassalluni. Illuni taamaattuni attartortut ataasiakkaat pilersuisutullu ingerlatseqatigiiffiup akornanni toqqaannartumik, imaluunniit attartortut ataasiakkaat attartortitsisullu akornanni toqqaannartumik akiligassanik iluarsiisoqartassaaq.

Missingiummi §§ 42 aamma 43 kattullugit § 42-nngortinneqarput, § 44 § 43-nngortinneqarpoq, kiisalu § 44-mik nutaamik, imermik akiliisarnermut tunngasumik ilanngussisoqarluni.


Missingiummi § 40-mut (maanna § 41-nngortumut)

A/S Inissiaatileqatigiiffik INI-miit naatsorsuutinik nikisitsisinnaanermut periarfissiisoqarnissaa kissaatigineqarpoq. Kapitalimi aalajangersagaq ullunik akiliiffissanut killiliussanik arlalinnik imaqarpoq. Naatsorsuutinik nikisitsisinnaaneq ammaanneqarpat, tamanna ullunik akiliiffissatut killiliussanik paatsiveerutitsisinnaavoq. Kiisalu Naalakkersuisut isumaqarput, ukiumoortumik naatsorsuutit suliarineqarnissaannut piffissaliussaareersoq naammattoq.

Tamatuma saniatigut A/S Inissiaatileqatigiiffik INI-miit attartortitsisup kiassarnermut naatsorsuutit suliarinerinut akiliisitsisinnaaneranut inatsisitigut tunngavissamik pilersitsisoqarnissaa kissaatigineqarpoq. Naalakkersuisut Inissiaatileqatigiiffiup kissaataa naammassiniarlugu imm. 3-mik nutaamik ilanngussipput.

Nukissiorfiit aamma Inuussutissarsiornermut, Nunalerinermut Suliffeqarnermullu Pisortaqarfik attartortitsisup siunertanut ataatsimoortunut inaallagissamut aningaasartuutaasa attartortitsisup siunertanut ataatsimoortunut kiassarnermut aningaasartuutai, tak. imm. 1, assigalugit matussuserneqarsinnaanissaannik ujartuipput. Attartortitsisup siunertanut ataatsimoortunut innaallagissamut aningaasartuutai ingerlatsinermut aningaasartuutit ataanneereerput, taakkulu attartortut ineqarnermut akiliutit aqqutigalugit akilertarpaat, taamaattumillu kiassarnermut maleruagassat assinginik ilanngussinissaq pisariaqarani.


Missingiummi § 41-mut (maanna § 42-nngortumut)

Inuussutissarsiornermut, Nunalerinermut Suliffeqarnermullu Pisortaqarfik isumaqarpoq, innaallagissamut aningaasartuutit missingiummi § 41-mut (maanna § 42-nngortumut) ilaasariaqartut. Tamatumunnga tunngatillugu erseqqissaatigineqassaaq, innaallagissamut akiligassat pilersutut ingerlatseqatigiiffup atuisullu akornanni toqqaannartumik iluarsineqartarmata.


Missingiummi § 43-mut (maanna § 43-nngortumut)

A/S Inissiaatileqatigiiffik INI-miit aalajangersakkap oqaasertaasa allanngortinneqarnissaat kissaatigineqarpoq, taamaalillunilu Nukissiorfiit akiligassanik ima kingusitsigisukkut nassiussisarnerat, allaat akiligassat ukiumut naatsorsuusiorfiusumut tullermut nuuttariaqarlutik, pinngitsuuinernut tunngavigineqartarunnaassalluni. Naalakkersuisut isumaqarput aalajangersakkami akiligassat siumut naatsorsuutigereersinnaanngisat pineqarnerat ersarissumik allassimareersoq, taamaattumillu aalajangersagaq allanngortinneqanngilaq.


Missingiummi § 43-mut nutaamut (maanna § 44-nngortumut)

Naalakkersuisut aalajangersakkamik, imermik akiliisarnermut iluarsiiffiusumik ilanngussipput.


Missingiummi § 44-mut (maanna § 45-nngortumut)

Namminersulernissamut, Aatsitassanut Inatsisilerinermullu Naalakkersuisoqarfimmit tikkuarneqarpoq, inatsisinut nassuiaatit imm 2, nr. 3-p paasinissaanut ilitsersuussinngitsut ilassuteqanngitsulluunniit, taamaattumillu inissiap nungullarnerata pisoqalinerataluunniit kingunerisaanik nutarterisarnerit allatulluunniit iluarsaassinerit illuutip attartukkallu pissusiat eqqarsaatigalugu akulikitsumik pisariaqartut. Naalakkersuisut inissiat iluini sukumiisumik toqqartorneqartuni nutartigassanut iluarsaassanulluunniit sunut aalajangersimasumik piffissamut killiliinissaq kissaatiginngilaat. Aalajangersagaq aalajangersimasumik nalilersuinissamut ammaavoq, tamatumunngalu pissutsit pissutaasussat amerlapput. Tamanna aalajangersakkamut nassuiaatini ilanngunneqarpoq.


Missingiummi § 47-mut (maanna § 48-nngortumut)

Ejendomskontoret Igdlo siunnersuuteqarpoq, inissiami ineeqqamik attartortup atuinerminik allamut tunniussisinnaanngineranik aalajangersakkamik ilanngussisoqassasoq. Naalakkersuisut tamatumunnga isumaqataapput, taamaattumillu aalajangersakkami imm. 4-mik nutaamik ilanngussisoqarpoq.


Missingiummi § 50-imut (maanna § 51-inngortumut)

A/S Inissiaatileqatigiiffik INI isumaqarpoq aalajangersagaq attartortup pisinnaatitaaffiisa annikinnerpaaffilerneqarnerannik imaqartariaqartoq, kiisalu inissiap atorneqarnerata ingerlaqqinnissaa attartortitsisup attartortullu akunnerminni isumaqatigiissutigisinnaavaat. Naalakkersuisut aalajangersagaq maannatut oqaasertaqartinneqarnera naapertuuttutut isumaqarfigaat, attartortup atortunik ikkussuinissamut illuummi innaallagissap kuuffeqarnerullu pisinnaasai naammannersut naliliiffigissallugu tamatigut pisariaqartunik ilisimasaqartarnissaa naatsorsuutigineqarsinnaanngimmat.


Missingiummi § 51-imut (maanna § 52-inngortumut)

A/S Inissiaatileqatigiiffik INI isumaqarpoq, aalajangersakkami attartortup akuersissutinik pisariaqartunik qinnuteqarnissamut taakkununngalu akiliisarnissamut pisussaatitaaffiata immikkut ittumik naatsorsuusiorneqartarnissaa ersittariaqartoq. Naalakkersuisut isumaqarput akuersissutinik qinnuteqartussaatitaaneq attartorneq pillugu peqqussummi maleruagassiorneqarsinnaanngitsoq, kisiannili imm. 4-mik nutaamik ikkussinikkut antennit immikkut pigineqartut ataatsimoorussalluunniit attartortitsisumit susassarineqannginnerat, taamaattumillu tuniniaasup attartortullu akuersissummik pisisimasut akunnerminni tamanna iluarsisassarigaat erseqqissarneqarpoq.


Missingiummi § 54-imut (maanna § 55-inngortumut)

A/S Inissiaatileqatigiiffik INI isumaqarpoq aalajangersakkap oqaasertai allanngortinneqartariaqartut, taamaalillunilu aalajangersagaq attartortup pisinnaatitaaffiisa annikinnerpaaffilerneqarnerannik imaqalerpoq, kiisalu inissiap atorneqarnerata ingerlaqqinnissaa attartortitsisup attartortullu akunnerminni isumaqatigiissutigisinnaavaat. Naalakkersuisut aalajangersagaq maannatut oqaasertaqartinneqarnera naapertuuttutut isumaqarfigaat, attartortitsisoq pitsannguutissatut kissaatigineqartup kingunerisassaanik naleqqunneranillu naliliisinnaasutut qaninnerpaatut naatsorsuutigineqartariaqarmat. Tamatuma saniatigut Namminersornerullutik Oqartussat kommunellu inissiaataannik attartortittakkanik attartortitsineq pillugu nalunaarummi nr. 23-mi, 22. december 2003-meersumi kapitali 15 attartortup pitsanngorsaanissamut taakkununngalu taarsiiffigineqarnissamut pisinnaatitaaffiinut maleruagassanik sukumiinerusunik imaqarpoq.


Missingiummi § 56-imut (maanna § 57-inngortumut)

A/S Inissiaatileqatigiiffik INI-miit kissaatigineqarpoq, qinnuteqaatit suliarineqartarnerinut attartortitsisup sullissinermut akiliisitsisinnaaneranut inatsisitigut tunngavissiisoqassasoq. Naalakkersuisut Inissiaatileqatigiiffiup kissaata akueralugu imm. 2-mik nutaamik ikkussipput.


Missingiummi § 57-imut (maanna § 58-inngortumut)

A/S Inissiaatileqatigiiffik INI aalajangersakkamut arlalinnik oqaaseqaateqarpoq, taakkulu ilaat Naalakkersuisunit akuerineqarput. Imm. 2-p oqaasertalerneqarnera allanngortinneqarpoq, taamaalillunilu "ilinniariartorneq" taarserlugu "ilinniagaqarneq" ikkunneqarpoq, ilinniagaqarneq annertunerusunut eqquisinnaammat, ilinniariartornerullu pineqarnerani atuagarsornerinnaq eqqarsaatigineqartarluni. Imm. 2-mi "assigisaaluunniit" peerneqarpoq, inatsisip atuutsinneqarnissaani tamatumani sunarpiaq pineqarnersoq nalornissutigineqarmat. Naalakkersuisut oqaatsip taassuma peerneqarnissaa naapertuuttutut isumaqarfigaat, tamatumunnga peqatigitillugu imm. 1-imik nutaamik ikkussisoqarmat, taannalu malillugu attartortup peqanngikkallarnermini kissaatini attartortitsisumut tunngavilersunngikkaluarlugu inissiaq najukkani qaammatit aqqaneq marluk tikillugit allanut attartortissinnaavaa.


Missingiummi § 58-imut (maanna § 59-inngortumut)

A/S Inissiaatileqatigiiffik INI siunnersuuteqarpoq attartortut attartukkaminnik attartornertik ingerlatiinnarlugit inissianik paarlaasseqatigiissinnaasariaqartut, tassalu pisinnaatitaaffimminnik pisussaatitaaffimminnillu tamavinnik paarlaallutik. Naalakkersuisut tamatumunnga isumaqataapput. Aalajangersagaq allanngortinneqarpoq, taamaalillunilu attartortut inissianik paarlaannerminni periaaseq nutaaq toqqassallugu periarfissaqalerput. Aammattaaq inissianik paarlaannermut atatillugu allaffissornikkut aqutsinermut attartortitsisup attartornermut ataatsimut 250 kr.-inik sullissinermut akiliisitsisarnissaa inatsisitigut tunngavissiuunniarlugu ilanngussisoqarpoq.


Missingiummi § 59-imut (maanna § 60-inngortumut)

Nukissiorfinniit nassuiaatit oqaasertaliornerisa paatsuunganarnerat uparuarneqarpoq, taakkulu allanngortinneqarput. Aammattaaq missingiummi imm. 2 allanngortinneqarpoq, taamaalillunilu attartortup, aappaasup qimagaasup imaluunniit inooqataasup qimagaasup sivikinnerpaamik ukiuni marlunni inissarsiortut allattorsimaffiannut nalinginnaasumut allatsissimanissaa piumasaqaataajunnaarpoq. Nutaamik oqaasertalernerani piffissamut piumasaqaat peerneqarpoq.


Missingiummi § 60-imut (maanna § 61-inngortumut)

Missingiummi i imm. 1 erseqqissarneqarpoq. Taamatuttaaq aalajangersakkamut nassuiaatit erseqqissarneqarput, taamaalilluni peqqussutip oqaasertaanik paasiniaanermi ikiorneqarsinnaaneq ersarinnerulersinneqarluni.


Missingiummi § 62-imut (maanna § 63-inngortumut)

Missingiummut nassuiaatit erseqqissarneqarput, taamaalilluni peqqussutip oqaasertaanik paasiniaanermi ikiorneqarsinnaaneq ersarinnerulersinneqarluni.


Missingiummi § 64-imut (maanna § 65-inngortumut)

A/S Inissiaatileqatigiiffik INI-miit aamma Namminersulernissamut, Aatsitassaqarnermut Inatsisilerinermullu Naalakkersuisoqarfimmiit erseqqissarneqarpoq, nassuiaatini inatsisinik atuutsitsisoqartoq. Aalajangersakkamut imm. 2 nutaaq ilassutigineqarpoq, nassuiaatillu taanna naapertorlugu iluarsineqarput.


Missingiummi § 66-imut (maanna § 67-inngortumut)

Namminersulernissamut, Aatsitassaqarnermut Inatsisilerinermullu Naalakkersuisoqarfimmiit erseqqissaatigineqarpoq, aalajangersagaq siunnersuummi inissianik piginneqataaffiusunik taamaatitsinissamut aalajangersakkanut naapertuutinngitsoq. Nr. 4 allanngortinneqarpoq, taamaalillunilu attartortut inatsisitigut pisinnaatitaaffii nukittortinneqarlutik.


Missingiummi § 67-imut (maanna § 68-inngortumut)

A/S Inissiaatileqatigiiffik INI-miit aamma Namminersulernissamut, Aatsitassaqarnermut Inatsisilerinermullu Naalakkersuisoqarfimmiit aalajangersakkami naapertuutinngitsut marlussuit uparuarneqarput. Tamatuma kingunerisaanik Naalakkersuisoqarfimmiit imm. 1 allanngortinneqarpoq, taamaalilluni attartortup attartornermut isumaqatigiissut malissimaneraa pillugu naliliisarneq, Namminersornerullutik Oqartussat kommunelluunniit attartortumik attartorunnaarsitsineranni pisussanngortinneqarluni. Tamatuma saniatigut imm. 5-imik nutaamik ilanngussisoqarpoq, taamaalillunilu attartortitsisup attartortut inissiamiit aninerannut atatillugu taarsiissutinut aningaasartuutai illuummik iluarsaassinermut isaterinermulluunniit aningaasaliissutinit akilerneqartartussanngorput.


Missingiummi § 69-imut (maanna § 70-inngortumut)

Ejendomskontoret Igdlo siunnersuuteqarpoq, aalajangersakkamik namminerisamik illuutini inissianik attartortitsisartut attartortullu attartortup attartornermik taamaatitsinissamut siumoortumik nalunaarfissaata qaammatit pingasut tikillugit qaammatip naaneranut atuuttussanngorlugu akunnerminni isumaqatigiissuteqarsinnaanerannik periarfissiisumik ilassuteqartoqassasoq. Naalakkersuisut Ejendomskontori siumoortumik nalunaarnissamut piffissaliussap qaammammik ataatsimik sivisussusillip attartortitsisup attartortussamik nassaarniarnissaanut sivikippallaarnera pillugu isumaqatigaat. Taamaattumik siunnersuutigineqartoq malillugu Naalakkersuisut aalajangersagaq allanngortippaat.


Missingiummi § 72-imut (maanna § 73-inngortumut)

Naalakkersuisut imm. 1-imut ilassuteqarput, taannalu malillugu namminerisamik attartortitsisut attartortup akiliinngitsoornerata kingunerisaanik attartornermut isumaqatigiissummik atorunnaarsitsinissaq pisussaaffigiunnaarpaat. Tamatumunnga tunngavigineqarpoq namminerisamik attartortitsisartut eqqarsaatigisassaasa pisortat attartortitsinerinut naleqqiunneqarsinnaannginnerat, pisortat attartortitsinerini eqqarsaatigisassat tassaammata inissiap najugaqatigiiffimmut atanera, aammalu attartortup akiliinngitsoornerani najugaqatigiiffiup aningaasartuuteqartussaanera, aningaasartuutillu attartortut sinnerinut agguarneqartussaanerat.


Missingiummi § 73-imut (maanna § 74-inngortumut)

Imm. 2 nutaaq ilanngunneqarpoq, taamaalillunilu aalajangersagaq siunnersuummi § 72-ip (maanna § 73-ip) allannguutaanut naleqquttunngorpoq. Imm. 3-mi sullissinermut akiliisitsisarnermut maleruagassaq allanngortinneqarpoq, taamaalillunilu maanna annerpaamik 150 kr.-inik sullissinermut akiliisitsisoqarsinnaalerluni. Attartortitsisup akileeqqusissutaanik nassiussinermut sullissinermut akiliisitsisoqarsinnaavoq, aammalu tamatuma kingorna atorunnaarsitsinerup atorunnaarsinneqarneranut akiliisitsisoqarsinnaalluni. Taamaattorli sullissinermut akiliutissat attartortitsisup akileeqqusissummik nassiussinermini allaffissornikkut aqutsinermut aningaasartuutigisarpiaanit amerlanerussanngillat.


Missingiummi § 74-imut (maanna § 75-inngortumut)

§ 58-imi maanna atuuttumi attartukkamik allamut attartortitsigallartaarneq pillugu aalajangersakkamut innersuussisummik ilanngussisoqarpoq, tassanilu attartortitsisoq attartukkamik allamut attartortitsigallarnermi attartornermi nalinginnaasumi attartornertut atorunnaarsitsisinnaanera ersarissumik periarfissinneqarpoq.


Missingiummi § 76-imut (maanna § 77-inngortumut)

A/S Inissiaatileqatigiiffik INI Naalakkersuisunut qinnuteqarpoq, sumiiffinni attartortup inissiamiit anineranut atatillugu nalinginnaasumik iluarsaassinissamik attartortitsisumut ajornakusoortitsiviungaatsiartuni nalinginnaasumik iluarsaassinissamik aaqqissuussinermik allamik atuutsitsileqqullugu. Naalakkersuisut tamanna pillugu maleruagassamik imm. 4-mi ilanngussipput, tamatumalu saniatigut aalajangersakkami Namminersulernissamut, Aatsitassaqarnermut Inatsisilerinermullu Naalakkersuisoqarfimmiit oqaaseqaatigineqartunut naapertuuttunik annikitsunik iluarsiisoqarpoq.


Missingiummi § 78-imut (maanna § 79-inngortumut)

A/S Inissiaatileqatigiiffik INI-miit kaammattuutigineqarpoq, attartortitsisup attartortullu inissiap takuniarneqarnissaanut piffissaq oqaasiinnakkut isumaqatigiissutigisassagaat, ullumikkut periaaseq taanna atorneqarmat, aammalu tamatumunnga atatillugu ajornartorsiorteqartoqanngimmat. Naalakkersuisut aalajangersagaq tamanna naapertorlugu allanngortippaat. Kiisalu A/S Inissiaatileqatigiiffik INI-miit qinnutigineqarpoq, attartortitsisup akissatut missiliuutigineqartoq attartortup tamanna pillugu kissaateqarnerani allakkatiguinnaq tunniuttassagaa. Naalakkersuisut aalajangersagaq tamanna naapertorlugu allanngortippaat.

PPK-miit aalajangersakkamut ilassusiisoqarnissaanik kissaateqarpoq, tassanilu attartortitsisoq inissiamit aninermut atatillugu amigaatit aaqqiagiinngissutigineqarnerat pillugu ineqarneq pillugu maalaaruteqartarfimmut saqqummiussinissamik pisussaaffilerneqarnissaa pineqarpoq. Attartortup suliamik ineqarneq pillugu maalaaruteqartarfimmut suliakkiinera annertuumik aningaasartuuteqarnermik kinguneqassanngitsoq pisarissersuutaasanngitsoruunniit Naalakkersuisunit isumaqarput. Attartortoq 500 kr.-inik akiliissaaq, attartortorlu tamakkiisumik ilaannaasumilluunniit taperserneqarpat taanna utertinneqassaaq.


Missingiummi kapitali 13-19-imut, inissiat piginneqataaffiusut pillugit

Tusarniaanermi akissutinik, assigiinngitsutigut inissianut piginneqataaffiusunut kapitalinut maanna oqaasertaritinneqartunut isornartorsiuisunik amerlasuunik takkuttoqarpoq, taamaattumillu Naalakkersuisoqarfik aalajangerpoq kapitalit peqqussutip maanna ilusiligaaneranit peerniarlugit. Taamaattorli Naalakkersuisuniit, kingusinnerusukkut inissiat piginneqataaffiusut pillugit peqqussummik suliaqartoqarnissaa anguniarniarpaat.


Missingiummi kapitali 20-mut (maanna kapitali 14-inngortumut)

KANUKOKA isumaqarpoq, ineqarneq pillugu maalaaruteqartarfimmik pilersitsisoqartariaqanngitsoq, namminerisamik inissiaatini attartortittakkani attartortunut aamma pisortat inissiaataanni attartortittakkani attartortunut maleruagassat assigiinngitsut atuutsinneqarnissaat naammaginartinneqanngimmat. Taamatuttaaq KANUKOKA isumaqarpoq, tamakkiisunik ineqarnermut akiliutinik qaffaanikkut atuisut akiliutaannik atuutsisoqalertariaqanngitsoq, akerlianilli atuisut ataasiakkaat akiliisinneqartarnerisigut akilerneqartariaqartoq. Ineqarneq pillugu maalaaruteqartarfimmik pilersitsinissami siunertaavoq attartortup piginneqataasulluunniit aaqqiagiinngissutit aalajangiiffigineqarnissaannut eqaatsumik ajornanngitsumillu periarfissaqarnissap qulakkeerneqarnissaa. Taamatuttaaq Naalakkersuisut aalajangerput, namminerisamik inissiaatini attartortut ineqarneq pillugu maalaaruteqartarfimmik atuisinnaatinneqassanngitsut, maannarpiaq tamanna pisariaqarnersoq naliliiffigineqarsinnaanngimmat. Naalakkersuisut pisortat inissiaataanni attartortittakkani atuisunut akiliisitsissanngippata, suliakkiinissamut akigititassaq annertuallaarujussualertussaavoq.

Nuup Kommunea isumaqarpoq, ineqarneq pillugu maalaaruteqartarfiup pilersinneqarnissaa suliat ingerlanerinut naammassineqarnissaannullu kinguarsaataassasoq, tamatuma kingorna suliat eqqartuussivinnut nalinginnaasunut suliakkiissutigineqarsinnaasussaammata. Taamatuttaaq Nuup Kommunea isumaqarpoq, A/S Inissiaatileqatigiiffik INI inissianik aqutsisunit kisiartaalluni maalaaruteqartarfimmut ilaasortaatitaqarnissaa naapertuutinngilluinnartoq. Ineqarneq pillugu maalaaruteqartarfik kinguarsaataasussatut eqqarsaatigineqanngilaq, taamaallaalli attartortup piginneqataasulluunniit eqaatsumik ajornaatsumillu suliakkiinissaanut periarfissaalluni. A/S Inissiaatileqatigiiffik INI Kalaallit Nunaanni inissianik aqutsisut annersaraat, taamaattumillu A/S Inissiaatileqatigiiffik INI ineqarneq pillugu maalaaruteqartarfimmi issiatitaqartussanngorlugu toqqarneqarpoq.


Missingiummi § 125-mut (maanna § 82-inngortumut)

Sulisitsisut Peqatigiiffiat, PPK aamma IMAK ineqarneq pillugu maalaaruteqartarfiup katitigaanissaanut naammagittaalliorput, taamaattumillu Naalakkersuisut aalajangersakkami annikitsunik allannguipput.

Aammattaaq Sulisitsisut Peqatigiiffiat inassuteqarpoq, imm. 1-imi aalajangersagaq "-sinnaavoq" "-saaq"-mut allanngortinneqassasoq. Naalakkersuisut ineqarneq pillugu maalaaruteqartarfimmik pilersitsinissaq ersarissumik anguniagaraat, kisiannili ineqarneq pillugu maalaaruteqartarfimmi ilaasortaasussat avataaneersuusussaammata, Naalakkersuisut isumaat malillugu taakku maalaaruteqartarfimmut ilaanissaannut pinngitsaalineqarsinnaanngillat, taamaattumillu aalajangersakkat "-sinnaavoq"-mik oqaasertaqarnissaa aalajangerneqarpoq.

Sulisitsisut Peqatigiiffiannit aalajangersakkami maalaaruteqartarfimmut ilaasortat sinniisissalluunniit ineqarneq pillugu maalaaruteqartarfimmut takkutinngitsoornerisa kingunerisassaat takuneqarsinnaanngitsut oqaatigineqarpoq. Naalakkersuisut imm. 5 allanngortippaat, taamaalillunilu Naalakkersuisut kingunerisassanut isummernissamut pisinnaatitaaffilerneqarput.


Missingiummi § 126-mut (maanna § 83-inngortumut)

Namminersulernissamut, Aatsitassaqarnermut Inatsisilerinermullu Naalakkersuisoqarfiup kiisalu Sulisitsisut Peqatigiiffiata aalajangersagaq oqaaseqarfigaat, tassanilu akissarsiaqartitaaneq pillugu inatsit, ataatsimiititalianut ilaasortat akissarsiaannik iluarsiivioreersoq innersuuppaat. Naalakkersuisut aalajangersagaq nassuiaatinut naapertuuttunngorlugu allanngortippaat. Taamaalilluni maalaaruteqartarfimmut ilaasortat Inatsisartuni, Naalakkersuisuni il.il. ilaasortat akissarsiaqartitaanerat pillugu Inatsisartut inatsisaat nr. 22, 18. december 2003-meersoq naapertorlugu akissarsiaqartinneqassapput, ullormusiaqartinneqassapput angalanermullu aningaasartuutinut taarsiiffigineqartassallutik.


Missingiummi § 127-mut (maanna § 84-inngortumut)

Sulisitsisut Peqatigiiffiata ineqarneq pillugu maalaaruteqartarfimmut suliakkiinermut akiliuteqartitsisarnissaq paasilluarsinnaavaa, kisiannili 500 kr.-inik akiliuteqartitsisarnissap aalajangersimasunik isertitaqartartut ilaat maalaaruteqartarfimmut suliakkiinissaannut mattussisinnaanera eqqarsaatigineqartariaqarsoraat. Naalakkersuisut Sulisitsisut Peqatigiiffiata isumanerluutaa isumaqatiginngilaat, maalaaruteqartoq maalaarutimini tamakkiisumik ilaannaasumilluunniit taperserneqarpat aningaasat uterteqqinneqartussaammata. Tunngaviatigut isigalugu maalaaruteqartussap maalaarut tunngavissaqarluartunik imaqarpat 500 kr.-it akiliutigigallaannartussaavai.


Missingiummi § 129-mut (maanna § 86-inngortumut)

Namminersulernissamut, Aatsitassaqarnermut Inatsisilerinermullu Naalakkersuisoqarfimmiit tikkuarneqarpoq, imm. 3-mi naggatip kingulliup kingorna siulittaasup sinniisaata ilaasortallu ikinnerpaamik marluk, imaluunniit siulittaasup ilaasortallu marluk sinniisaasa najuunneranni maalaaruteqartarfiup aalajangiisinnaatitaanera ersarinngimmat. Naalakkersuisut imm. 3-p oqaasertai allanngortippaat, taamaalillunilu ersarissumik allassimalerpoq ineqarneq pillugu maalaaruteqartarfik aalajangiisinnaassuseqartoq, siulittaasoq taassumaluunniit sinniisissaa ilaasortallu imaluunniit taakku sinniisissaat ikinnerpaamik marluk najuunneranni.


Missingiummi § 131-mut (maanna § 88-inngortumut)

Namminersulernissamut, Aatsitassaqarnermut Inatsisilerinermullu Naalakkersuisoqarfiup imm. 1-ip immikkoortua siulleq imm. 2-mut naleqqiullugu pisariaqarsorinngilaa. Naalakkersuisut tamanna isumaqatigaat, taamaattumillu imm. 1, nr. 1 peerneqarpoq.

A/S Inissiaatileqatigiiffik INI-p isumaa malillugu attartornernut 1990-imiit 1995-imut aallartinneqarsimasunut aalajangersakkamik amigaateqartoqarpoq. Naalakkersuisut attartornernut 1990-imiit 1995-imut aallartinneqartunut maleruagassanik, Inatsisartut peqqussutissaanni nutaami aalajangersakkamut akerliusinnaasunik soqarsorinngilaat, taamaattumillu tamanna pillugu aalajangersakkanik ilanngussisoqanngilaq.


Missingiummi ilanngussaq 2-mut (maanna ilanngussaq 3-nngortumut)

A/S Inissiaatileqatigiiffik INI isumaqarpoq, sillimmasiinermi ingerlatsinermut, aserfallatsaaliuinermut illuartitassanullu akiliutit ukiumut m2-mut 18 kr.-iniit 25 kr.-inut qaffanneqartariaqartut. Naalakkersuisut ilanngussaq 2-mi kisitsisit pingaarnerit tamakkiisumik iluarsiivigaat, taamaalillutillu aningaasartuutiviusunut naapertuuttunngortinneqarput.


Ilanngussaq 3-mut (maanna ilanngussaq 4-nngortumut)

A/S Inissiaatileqatigiiffik INI isumaqarpoq, torersaarnissamut maleruagassat iluarsaattariaqartut, taakku qangalili suliarineqarsimammata. Iluarsineqarnerini attartorneq pillugu peqqussummi qimmeqarneq qitsuuteqarnerlu eqqarsaatigalugit maleruagassat oqaluttuareqqiinertaqannginnissaat immikkut pingaartinneqartariaqarpoq, tamatumalu saniatigut nipiliornissamut qununartumillu pissusilersornissamut inerteqquteqarneq ersarinnerujussuarmik nassuiarneqartariaqarluni. Naalakkersuisuniit torersaarnissamut maleruagassat maanna oqaasertaliornerat naleqquttutut isumaqarfigineqarput, torersaarnissamut maleruagassat ataatsimut isigalugit taakkunani attartorneq pillugu peqqussummi maleruagassat ersarissumik paasiuminartumillu allassimasariaqarmata.

Nuup Kommuneaniit illuni sanileriinni uigulukuttunilu namminerisamik isertarfilinni uumasuuteqartoqarsinnaannginneranik sukannernerulersitsineq naapertuussorineqanngilaq, taamaattumillu kommunemiit tamatuma qasukkartinneqarnissaa taamaalillunilu attartortut toqqissisimanerisa ajorseriannginnissaa inassutigineqarpoq. Naalakkersuisut pisortat inissiaataanni attartortittakkani qimmeqarnermut qitsuuteqarnermullu maleruagassat aalajangiusimaannarpaat. Tamatumunnga peqqutaavoq uumasuutit inissiami annertuumik nungullartitsisarmata, tamatumalu saniatigut sanilinut akornutaasinnaallutik.

 

Peqqussutissatut siunnersuummi aalajangersakkanut ataasiakkaanut nassuiaatit


§ 1-imut

Matumani erseqqissaatigineqassaaq peqqussutissatut siunnersuummi taamaallaat illunik illumilu ininik najugassatut attartornerit kisimik pineqarmata, matumani attartukkamik allanut attartortitsigallartarneq ilanngullugu. Pequtinik inissianiluunniit atortunik allanik, soorlu timigissarnermi atortunik, qarasaasianik, umiatsianik snescooterinilluunniit attartornissamut isumaqatigiissutit attartorneq pillugu peqqussummi aalajangersaavigineqanngillat. Atortunik pequtinilluunniit attartortoqassappat, tamanna atortunik atugassanik imaluunniit atortunik taakkuninnga attartornermut isumaqatigiissusiornikkut aalajangangersaasoqassaaq, tamatumani atortup immikkut attartorneqarnissaa imaluunniit inissiamik attartornermut atatillugu atortup attartornissaa pineqaraluarpalluunniit.

Kiisalu peqqussutissatut siunnersuut attartortoq inuttut namminiussisoqanngitsunut, soorlu ingerlatseqatigiiffiutillugu, imaluunniit attartortoq inuinnaalluni attartukkami nammineerluni najugaqartinnagu, soorlu illuummi inissianik arlalinnik attartortitseqqinnissaq siunertaralugu attartornermik ingerlatitseqqittuutillugu atuutissanngilaq.

Peqqussut illuutini Namminersornerullutik Oqartussanit, kommunenit namminersortuniillu pigineqartuni inissianut attartortittakkanut, kiisalu inissianut sulisunik atorfinitsitsinermut atatillugu atugassiissutaasartunut atuuppoq, tamatumani peqqussummi aalajangersakkani atuutinngitsutut allaqqasoqanngippat.

Attartorneq tassaavoq akiliilluni atuineq. Atornerit assigisaallu, soorlu aningaasanik annikitsuinnarnik akiliisitsilluni attartortitsinerit peqqussummi pineqanngillat. Akiliutaasoq aningaasaanngitsunik, soorlu sulinermik akiliinerusinnaavoq, taamaattumillu attartortitsisup peqqussummi aalajangersakkat sanioqqutiinnarlugit akiliut sulinermik taarsertissinnaanngilaa.

"Illut illunilu init inigisassat" isumaqarpoq, ineqariaatsit nalinginnaasut tamani, soorlu illuni quleriinnik, illuni sanileriinnik, illuni uiguleriiaanik, ilaqutariinnut ataatsinut illunik, illuni affarleriinnik, ineqarfinni ininik, ineeqqani inissianilu ininik attartortitsinerit, taakkulu tamarmik peqqussummi pineqarput. Aasarsiortarfinnik attartortitsineq peqqussummi ilaatinneqanngilaq, tamatumani aasarsiortarfittut taaneqartoq attartortup ulloq unnuarlu najugarisaa pingaarneq pineqanngippat. Aamma umiatsiat angerlarsimaffiit attartortinneqartarnerat peqqussummi pineqanngilaq.

Illunik illunilu ininik atuineq atuisumut aningaasanik akeqartoq sunaluunniit pisariaqanngilaq pissuseqartoq attartornerunermik. Tassalu piginneqatigiilluni inissiat inissiallu nammineq pigisat, aammalu atuisunit pigineqartuni ineqatigeeriaatsit assigiinngitsut attartornertut taaneqarsinnaanngillat. Inissialli taamaattut piginnittumit imaluunniit taamatut pisinnaatitaaffilimmit attartortinneqarpata, tamanna peqqussutip atuuffiata iluani attartortitsinertut taaneqassaaq.

Attartortitsinerit akuleriit, attartornermut isumaqatigiissut ataaseq atorlugu ininik najugassatut najugassatullu atuinermit allaanerusumut, soorlu inuussutissarsiornermut, atugassatut attartortitsinerit peqqussutip atuuffiata iluanniipput, aammalu najugassanik attartornertut isigineqassallutik. Akerlianik inuussutissarsiornerinnarmut atugassanik attartortitsinerit peqqussutip atuuffiata avataanniipput.

Aalajangersakkami erseqqissarneqarpoq peqqussut taamaallaat attartortitsinernut, attartortoq inuttut namminiussuseqartillugu atuutissasoq. Attartortoq inuttut namminiussuseqanngippat attartortitsineq attartorneq pillugu peqqussutip avataaniissaaq. Assersuutigalugu attartukkami attartortitsisoq inuttut namminiussuseqarpat, attartortorlu aktiaateqarluni ingerlatseqatigiiffiuppat, tamanna peqqussummik tunngaveqartinneqassanngilaq, kiisalu attartukkamik allamut attartortitsinermi attartortitsisoq/attartortoq aktiaateqarluni ingerlatseqatigiiffiuppat, attartukkanilu sulisut ilaannut attartortippagu, tamanna peqqussummut ilaatinneqassaaq.


§ 2-mut

Aalajangersakkap atuutilerneratigut Namminersornerullutik Oqartussat attartornermut isumaqatigiissusiassamik nalinginnaasumik assigiissakkamik inissianut assigiinngitsunut, soorlu ilaqutariinnut arlalinnut inissianut, ilaqutariinnut ataatsinut illunut, pisortat inissiaataannut attartortittakkanut, kiisalu namminerisamik inissiaatinut attartortittakkanut atugassamik pilersitsissapput. Attartornermut isumaqatigiissutit kalaallisut taamatullu qallunaatut oqaasertaqartinneqassapput, oqaatsit marluk taakku akuerineqarnissamut piumasaqaataassammata.

Peqqussummi aalajangersakkat ilaat attartortunut illersuutaapput, taamaattumillu attartortumut akornutaasumik sanioqqunneqarsinnaanatik. Imm. 2-p atuutilerneratigut attartortitsisup attartortullu akornanni isumaqatigiissutit, attartortup inatsisitigut inissisimaneranut aalajangersakkap kingunerisassai eqqarsaatigalugit ajorseriartitsisut atuuttussaatinneqassanngillat. Taamaalilluni attartortoq attartortitsisorlu akunnerminni attartorneq pillugu attartortumut peqqussummi aalajangersakkanit ajornerusumik inissisimalersitsisunik isumaqatigiissuteqarsinnaapput, tassanilu aalajangersakkat ersarissumik illersuutaasutut allassimasut allakkatigut isumaqatigiissummi tamanna ersarissarneqarsimappat taakku pineqanngillat.

Aalajangersakkakkut attartorneq pillugu peqqussummi anguniarneqartunit attartortumut ajornerusumik inissisimalersitsisut attartortup attartortitsisullu akunnerminni immikkut isumaqatigiissutigippassuk, tamanna akornuserneqassanngilaq.


§ 3-mut

Attartornerit inatsisini immikkut ittuni aalajangersaaffigineqartut peqqussutip atuuffiisa avataanniipput. Tamatumani assersuutigalugu sulisunut inissiat atuuffissaannut aalajangersarneqareersut najugarisassatut pisussaaffiusut eqqarsaatigineqarput, tak. Nalunaerutit C, 5-1-9. Aamma sullissivinniinnerit, soorlu utoqqaat illuanni assigisaaniluunniit najugaqarnerit, inunnik isumaginninnermut inatsisit naapertorlugit pilersinneqarsimasut peqqussutip atuuffiisa avataanniipput.

Naalakkersuisut inissianit attartortittakkanit inissianik immikkoortitsisinnaapput. Inissiani taamaattuni attartorneq pillugu peqqussummi maleruagassat malinneqassanngillat. Naalakkersuisut inissianut taamaattunut innersuussisinnaatitaapput, aammalu kikkut piumasaqaatit suut malillugit taakkuninnga tunniunneqassanersut aalajangersinnaallugu.


§ 4-mut

Aalajangersakkami ersarissarneqarpoq peqqussut utaqqiisaagallartumik inigitinneqartunut atuutissanngitsoq. Utaqqiisaagallartumik inigitinneqartunut aaqqissuussinissaq aalajangersaaffigineqassappat, taassuma ataani utaqqiisaagallartumik ineqartinneqartup akiliutissaanik aalajangersaasinnaanermut akiliisitsiniarsinnaanermullu periarfissiisoqassappat, tamanna Naalakkersuisut aamma sulinermik inuussutissartiuteqartut kattuffiat ilaasortaaffigisap isumaqatiginninniarnerminni isumaqatigiissutigissavaat. Utaqqiisaagallartumik ineqargitinneqarneq tassaavoq sulisorilivigassamik inissiamut innersuunneqarsinnaatitaalluni atorfinitsinneqartumik, sulisunut inissiamik innersuunneqarnissamut utaqqiisaasumik inissiigallarneq.

Aalajangersakkamissaaq erseqqissarneqarpoq, peqqussut utaqqiisaagallartumik inigitinneqartut saniatigut aamma utaqiisaagallartumik ineqartitaasunut allanut aamma atuutissanngitsoq, tamatumani utaqqiisaassumik inissiigallarnermut akiliuteqartitsinissaq aalajangersarneqarsimagaluarpalluunniit. Allatut inissiigallarneq tassaasinaavoq peqqinnissaqarfiup taartinik imaluunniit piffissami sivikitsumi atorfeqartinneqartunik inissiigallarnerat. Taamaattorli utaqqiisaagallartumik inigitinneqartunut allaanerusunik inissiigallartarnernut imm. 3 aamma 4 atuutissapput.

Aammattaaq angerlarsimaffeqanngitsunut angerlarsimaffinnut, akunnittarfinnut, sømandshjemminut, tikeraanut inissiisarfinnut, inissiigallartarfinnut assigisaannullu inissittarnerit peqqussutip atuuffiisa avataanniipput.

Aalajangersakkami imm. 3-p atuutilerneratigut Namminersornerullutik Oqartussat kommunellu inissiigallartarnermit allaanerusumik inissiigallarnermut aningaasartuutitik appartissinnaavaat, tassani inissiigallarnermut akiliuteqartitsisarnissaq inatsisitigut tunngavissiuunneqarmat. Naalakkersuisut akiliutissap kiisalu inissiigallarnermut atatillugu aningaasartutit annertussusissaannut maleruagassiornissamut pisinnaatinneqarput.

Inissiap inissiigallartarfittut atorneqartussap inissiigallartarfittut aalajangerneqarsimanissaa piumasaqaataavoq. Tamannattaaq inissianut, sullissiviup illuutaanut immikkoortuinullu allanut atasunut, aammalu inissianut, sulisunik sullissivimmi, taassuma immikkoortortaani ingerlatsivimmiluunniit atorfinitsinneqarsimasunik inissiigallarfittut atorneqartunut atuuppoq.


§ 5-imut

Aalajangersakkami inissiat inueruttut innersuunneqartarnerini tulleriiaarinissaq takutinneqarpoq. Inissarsiortut utaqqisut allattorsimaffianni nalinginnaasumi allatsissimasut, tak. nr. 10, saniatigut illuutini Namminersornerullutik Oqartussanit kommunenilluunniit pigineqartuni inissiat inueruttut nr. 1-9-mi siunertat aalajangersarneqartut malillugit innersuunneqartassapput.

Imm. 1, nr. 1-6 naapertorlugu inissianik innersuussisarneq nr. 7-10 naapertorlugu inissianik innersuussisarnermiit salliutinneqartassaaq.

Namminersornerullutik Oqartussat kommuneluunniit inissianit attartortittakkaniit inissiaq ataaseq amerlanerusulluunniit siunertanut immikkut ittunut atugassatut immikkoortissinnaavaat, assersuutigalugu inissiatut atorfinnut aalajangersimasunut atugassatut imaluunniit pisortanut inissiatut. Kiisalu Namminersornerullutik Oqartussat kommuneluunniit inissianik immikkut inuussutissarsiornermut suliassaqartitsiniarnermulluunniit atugassanik inniminniisinnaapput. Assersuutigalugu tamanna suliffeqarfinnik nutaanik aallartitsinermi sulisunik immikkut piginnaanilinnik pileritsatsitsiniarnermut imaluunniit inunnik isumaginninnermut suliffeqarnermullu naalakkersuinikkut ingerlatsinerup tamakkiisup iluani suliniuteqarnermut ikorfartuutitut pisinnaavoq. Inissiat inniminnerneqartunut tunngatillugu inissianik attartornermi peqqussummi maleruagassat malinneqassapput.

Imm. 4-mi kommunet ataasiakkaat imm. 1, nr. 7-10-mi inissaqartitsinissamut siunertat taaneqartut akornanni agguaassinissaq pillugu Naalakkersuisunut isumaqatigiissuteqarsinnaapput. Aalajangersagaq kommunemi inissianik isumaginninnermi atugassanik pisariaqartitsinerup appartinneqarnissaanik kommunep Naalakkersuisullu kissaateqarnerannik naammassinninnissamut atugassatut eqqarsaatigineqarpoq.


§ 6-imut

Aalajangersakkap atuutilerneratigut inissarsiortoq, utaqqisut allattorsimaffianni nalinginnaasumi allatsissimasoq inissiap akianut, inissisimaffianut, taassuma ataani quleriinni sumi inissisimanissaanut kiisalu inissiap angissusaa inoqutigiinni inuit amerlassusaannut naapertuuppat taassuma angissusissaanut tunngatillugu immikkut kissaatiminik allataqarsinnaavoq. Aalajangersarneqartut tamavinnut atuuttuupput, tassalu inissarsiortoq kissaatiminik allanik allataqarsinnaanngilaq. Inissarsiortoq, utaqqisut allattorsimaffianni nalinginnaasumi allatsissimasoq kissaatiminik immikkut ittunik allataqassappat, kissaat naammassineqarsinnaalertinnagu inissarsiortumut inissiamik neqerooruteqartoqarsinnaanngilaq. Taamaalilluni kissaatit immikkut ittut inissiamik neqeroorfigineqarnissap tungaanut piffissamik sivitsorsaaqataasinnaapput.

Sumiiffinni inissianik attartortitsiniartarnermik ajornartorsiorfiusuni inissarsiortut inissianik, inoqutigiinni inuit amerlassusaat ininik marlunnik amerlanerusunilluunniit sinnerlugit initalinnik tunineqarsinnaapput. Inissarsiortup inissiamut aningaasartuutinut ingerlaavartunut kiisalu qularnaveeqqusiissutissamik akiliisinnaanissaa qulakkeerniarlugu, pisuni taamatut ittuni attartortitsisup inissarsiortup aningaasarsiaanut paasissutissanik piumasaqartarnissaa immikkut pisariaqassaaq.


§ 7-imut

Aalajangersakkap atuutilerneratigut attartortitsisup inissarsiortoq aningaasarsiaanut paasissutissanik piumasaqarfigisinnaavaa. Paasissutissat taamaallaat attartortup inissiamut aningaasartuutinut ingerlaavartunut kiisalu qularnaveeqqusiissutissamut ataatsikkut akilerneqarsinnaasumut, imaluunniit qaammatit aqqaneq-marluk sinnernagit naafferarlugit akilersorneqartussamut akiliisinnaaneranut naliliiniarnermut atorneqassapput.

Namminersornerullutik Oqartussat kommunellu inissiaataannut inissarsiortut utaqqisut allattorsimaffiannut, attartortitsisumit ingerlanneqartumut allatsissapput. Inissiat piffissamut tulleriiaarineq, inissarsiortut utaqqisut allattorsimaffiannut allatsiffigisaat malillugu innersuunneqartassapput. Inissianut assigiinngitsunut inissarsiortunut allattuiffiit immikkoortillugit allattorneqassapput. Aalajangersakkami utaqqisut allattorsimaffiannik allaffissornikkut aqutsisoq sullissinermut akiliisitsisarnissamik pisussaaffilerneqarpoq. Sullissinermut akiliutissap angissusissaata aalajangerneqarnerani utaqqisut allattorsimaffiannik aqutsinermut aningaasartuutit pisariaqartinneqartut matussutissaqartinneqassapput. Utaqqisut allattorsimaffiannut allatsinnermut atatillugu sullissinermut akiliisitsisoqartassaaq aammalu ukiumoortumik uppernarsaanermut atatillugu sullissinermut akiliuteqartitsisoqartassalluni. Utaqqisut allattorsimaffiinut qinnuteqartup allatsiffigisaanut tamavinnut sullissinermut akiliisitsisoqassaaq.


§ 8-mut

Sulisunut inissiat inueruttut 20 procentii sulisunut namminneq kissaatigisamik nuunniarlutik utaqqisut allattorsimaffiannut allatsissimasunut innersuunneqartassapput. Maleruagassaq taanna sulisut sulisunut inissiamut najukkaminnut sunniuteqarsinnaanerat periarfissinniarlugu ilanngunneqarpoq. Aalajangersakkap atuutilerneratigut inissarsiortoq, utaqqisut allattorsimaffianni nalinginnaasumi allatsissimasoq inissiap akianut, inissisimaffianut, taassuma ataani quleriinni sumi inissisimanissaanut kiisalu inissiap angissusaa inoqutigiinni inuit amerlassusaannut naapertuuppat taassuma angissusissaanut tunngatillugu immikkut kissaatiminik allataqarsinnaalerpoq. Aalajangersarneqartut tamavinnut atuuttuupput, tassalu inissarsiortoq kissaatiminik allanik allataqarsinnaanngilaq. Inissarsiortoq, nammineq kissaatigisamik nuunniarluni utaqqisut allattorsimaffianni allatsissimasoq kissaatiminik immikkut ittunik allataqassappat, kissaat naammassineqarsinnaalertinnagu inissarsiortumut inissiamik neqerooruteqartoqarsinnaanngilaq. Taamaalilluni kissaatit immikkut ittut inissiamik neqeroorfigineqarnissap tungaanut piffissamik sivitsorsaaqataasinnaapput.


§ 9-mut

Aalajangersakkap atuutilerneratigut Naalakkersuisut Namminersornerullutik Oqartussat inissiaataanni attartortittakkani sulisunut inissianik inniminniinissamut inissianut normunik atugassiisinnaapput. Namminersornerullutik Oqartussat inissianut normuutaasa aqunneqarnerinut aningaasartuutit attartortunut tutsinneqannginnissaat qulakkeerniarlugu, aningaasartuutinut taakkununnga matusissutissanik sulisitsisunut, inissianut normunik inniminniisunut ukiumoortumik akiliisitsisoqartarsinnaavoq. Akiliutit ilaatigut aqutsisup inissianik neqerooruteqartarneranut, utaqqisut allattorsimaffiinik iluarsiisarneranut il.il. aningaasartuutaanut matusissutigineqartassapput.


§ 10-mut

Aalajangersakkap atuutilerneratigut Naalakkersuisut kommunalbestyrelsemut inissiat normuinik aalajangersimasunik amerlassusilikkanik, kommunemi sullissivinniluunniit tassunga atasuni sulisunut, inissiamik innersuunneqarsinnaatitaallutik atorfinitsinneqartunut inissianik inniminniinissamut atugassanik tunniussisinnaapput.

Kommunalbestyrelse aalajangersinnaavoq, pisuni tamavinni kommune sulisut inissiamik, inoqutigiinni inuit amerlassusaat inimik ataatsimik sinnerlugit innersuunneqartassanersut. Taamatut aalajangiineq taamaallaat inissiaq innersuunneqartoq kommunep nammineq inissiaataanut attuumassuteqarpat atorneqarsinnaavoq. Namminersornerullutik Oqartussat inissiaataat kommunalbestyrelsep inissianik, inoqutigiinni inuit amerlassusaat inimik ataatsimik sinnerlugit innersuussisinnaanissamut periarfissaqartitaaneranut ilaatinneqanngillat. Inissiat kommunemit aamma Namminersornerullutik Oqartussanit pigineqartut immikkoortinneqarnerannut pissutaavoq, Naalakkersuisut namminneq inissiaatiminnut tungatillugu ineqarneq pillugu naalakkersuinikkut ingerlatsinertik allanngortinnagu ingerlatsiinnarnerat, tamatumalu saniatigut kommuneni ataasiakkaani tamanna kissaatigineqarpat ineqarneq pillugu naalakkersuinikkut ingerlatsinermi allamik ingerlatsisoqarsinnanera Naalakkersuisunit ammaffigineqarmat.


§ 11-mut

Sulisunut, inissiamut innersuunneqarsinnaatitaallutik atorfinitsinneqartunut inissianik innersuussisarneq pillugu Naalakkersuisut aamma Naalagaaffiup Siinniisoqarfiata, Nunatta Eqqartuussiviata Politimestereqarfiullu akornanni isumaqatigiissusiortoqassaaq. Illuatungeriinnit inissiap inniminnerneqarneraniit kingusinnerpaamik qaammatit pingasut qaangiunnerini sulisup inissiamut innersuunneqartarnissaa anguniarneqassaaq. Tamanna naammassiniarlugu isumaqatigiissuteqarfiusinnaasut tassaassapput, inissianik aalajangersimasunik amerlassusilinnik Naalagaaffiup Sinniisoqarfianut, Nunatta Eqqartuussivianut Politimestereqarfimmullu atugassanik immikkoortitsisarneq.

Naalagaaffiup Sinniisoqarfiani, Nunatta Eqqartuussiviani Politimestereqarfimmilu pisortatut sulisut Namminersornerullutik Oqartussat qitiusumik allaffeqarfianni pisortat pisortanut inissianut salliutinneqartussaanerattut pisinnaatitaaffeqanngillat, kisiannili Naalakkersuisut aalajangersimasumik isumaqatigiissuteqartoqarneratigut sullissivinni taakkunani pisortatut sulisunut pisortanut inissianut innersuussisinnaapput.


§ 12-imut

Inatsisartuni sullissivinnilu taakkununnga atasuni sulisut inissianut innersuunneqartarnerat pillugu Naalakkersuisut Inatsisartullu akunnerminni isumaqatigiissusiussapput. Namminersornerullutik Oqartussat inissianik arlalinnik inniminniinermikkut isumaqatigiissummut pisussaaffini naammassisinnaavai. Kiisalu inissiat Namminersornerullutik Oqartussat qitiusumik allaffeqarfianni sulisunut innersuussisarnermut maleruagassat naapertorlugit innersuunneqartassapput. Pisortatut sulisunut pisortanut inissianik agguaassinissaq pillugu aalajangersimasumik isumaqatigiissuteqartoqarsinnaavoq, pisortalli taakku qitiusumik allaffeqarfimmi pisortatut atorfeqartinneqartut pisortanut inissianut salliutinneqartussaanerattut pisinnaatitaaffeqanngillat.


§ 13-imut

Aalajangersakkami takutinneqarpoq, inissiat qanoq tulleriinnilerlugit Namminersornerullutik Oqartussani sulisunut inissianut innersuussiffiginneqarsinnaatitaallutik atorfinitsinneqartunut innersuunneqartassanersut.

Namminersornerullutik Oqartussat sulisunut inissiaataat immikkoortunut sisamanut agguagaapput.

Aalajangersakkami allassimavoq, inissianik innersuussinermi Naalakkersuisuni ilaasortat, pisortat, immikkoortortani pisortat, allaffinni pisortat assigisaallu Namminersornerullutik Oqartussani sulisunit allanit salliutinneqartassasut. Aammattaaq allassimavoq taamatut salliutitsisinnaatitaaneq taamaallaat Namminersornerullutik Oqartussat qitiusumik allaffeqarfiani pisortanut atuuttoq.

Sulisunut sinnerinut inissiat tassaapput Namminersornerullutik Oqartussat qitiusumik allaffeqarfianni, taamatullu sullissivinni sullivinnilu tassunga atasuni, kiisalu sullissivinni allani, suliffeqarfinni allani aktiaatileqatigiiffinnilu Namminersornerullutik Oqartussanit pigineqartuni sulisunut innersuunneqartussat. Qitiusumik allaffeqarfimmiit inissianik isumagineqartut tassaapput pisortaqarfiit ataasiakkaat, kiisalu sullissiviit suliffeqarfiillu tassunga atasut, kiisalu sullissiviit, suliffeqarfiit aktiaatileqatigiiffiillu Namminersornerullutik Oqartussanit pigineqartut, tassaallutik soorlu Asiaq, Aja, Røde Kors Børnehjemmet aamma A/S Inissiaatileqatigiiffik INI.


§ 14-imut

Namminersornerullutik Oqartussat inissianik Naalakkersuisuni ilaasortanut Naalakkersuisoqarfinnilu ataasiakkaani pisortanut innersuunneqartussanik immikkoortitsissapput. Inissiani ataasiakkaani inoqutigiit aalajangersimasumik amerlassuseqarnissaannut piumasaqaateqartoqanngilaq, taakkulu pingaartumik tassaassapput ilaqutariinnut ataatsinut illut illullu affarleriit. Inissiat inissiaqarfittut immikkoortortamut ataatsimut immikkoortinneqassapput, tassalu Naalakkersuisuni ilaasortanut pisortanullu inissiat tamarmik inissiaqarfittut immikkoortortamut ataatsimut ataatsimoortinneqassapput, inissiaqarfittut immikkoortortanut allanut, pingaartumik ilaqutariinnut arlalinnut illunit ilaasortaaffigineqartunut ilaatinneqarnissaat naapertuuttutut isigineqanngimmat.


§ 15-imut

Namminersornerullutik Oqartussat inissianik Namminersornerullutik Oqartussat qitiusumik allaffeqarfianni immikkoortortani pisortanut assigisaannullu, akissaateqarfik 37 qaffasinnerusorluunniit naapertorlugu akissarsiaqartinneqartunut innersuunneqartussanik immikkoortitsisinnaapput, kisiannili Namminersornerullutik Oqartussat taamatut pinissamut pisussaaffilerneqanngillat. Pisortanut inissiat tassaasinnaapput illuni sanileriinni uigulukuttuniluunniit inissiat, kiisalu ilaqutariinnut ataatsinut illut illulluunniit affarleriit. Inissiat § 19-imi maleruagassani aalajangersarneqartut malillugit inoqutigiinni inuit amerlassusaat ininik marlunnik sinnerlugit initalimmik innersuussisoqarsinnaavoq.


§ 16-imut

Aalajangersakkami oqaatigineqarpoq, Namminersornerullutik Oqartussat qitiusumik allaffeqarfianni allaffinni pisortat, akissaateqarfik 36 qaffasinnerusorluunniit naapertorlugu akissarsiaqartinneqartut inissianut innersuussisarnermi Namminersornerullutik Oqartussani sulisunit allanit salliutinneqassasut.


§ 17-mut

Aalajangersakkami allassimavoq sulisut sulisunut inissiamik innersuunneqarsinnaallutik atorfeqartinneqartut allat aatsaat Naalakkersuisunut ilaasortanut, pisortanut, immikkoortortani pisortanut assigisaannullu kiisalu allaffimmi pisortanut inissianik innersuussinissamut pisariaqartitat naammassinerini sulisunut inissiamut innersuunneqartassasut.

Sulisorisat sinnerinut inissiat tassaapput Namminersornerullutik Oqartussat qitiusumik allaffeqarfianni, taamatullu sullissivinni sullivinnilu tassunga atasuni, kiisalu sullissivinni allani, suliffeqarfinni allani aktiaateqarluni ingerlatseqatigiiffinnilu Namminersornerullutik Oqartussanit pigineqartuni sulisunut innersuunneqartussat. Qitiusumik allaffeqarfimmiit inissianik isumagineqartut tassaapput pisortaqarfiit ataasiakkaat, kiisalu sullissiviit suliffeqarfiillu tassunga atasut, kiisalu sullissiviit, suliffeqarfiit aktiaatileqatigiiffiillu Namminersornerullutik Oqartussanit pigineqartut, tassaallutik soorlu Asiaq, Aja, Røde Kors Børnehjemmet aamma A/S Inissiaatileqatigiiffik INI.


§ 18-imut

Aalajangersakkami allassimavoq inissiat qanoq angissusillit sulisunut inissiamik innersuunneqarsinnaatitaallutik atorfinitsinneqarsimasunut tunniunneqarsinnaanersut. Inissiat angissusaat init amerlassusaat malillugit naatsorsugaapput, kvadratmeterit amerlassusaat tunngavigineqaratik. Assersuutigalugu inissiaq sisamanik initalik pingasunik sinittarfeqarpoq, ataatsimik ineqarluni, kiisalu perusuersartarfeqarluni/uffartarfeqarluni igaffeqarlunilu.

Najukkami inissianik attartortitsiniartarneq ajornartorsiorfigineqarpat, inissiat inoqutigiinni inuit amerlassusaat ataatsimik amerlanerusunilluunniit sinnerlugit initallit innersuunneqarsinnaapput.

Aalajangersakkap atuutilerneratigut Naalagaaffiup Sinniisoqarfiani, Nunatta Eqqartuussiviani, Kalaallit Nunaanni Politimesterqarfimmi sullissivinnilu taakkununnga atasuni sulisut, kiisalu Inatsisartuni sullissivinnilu tassunga atasuni sulisut aamma Namminersornerullutik Oqartussat qitiusumik allaffeqarfianni, sullissivinni suliffeqarfinnilu tassunga atasuni sulisut kiisalu sullissivinni suliffeqarfinnilu allani sulisut inissiamik innersuunneqarsinnaatitaallutik atorfeqartinneqartut inissiamik annerpaamik tallimanik initalimmik tunineqarsinnaapput, inoqutigiinni inuit amerlassusaat atorfeqartup inissiamik anginerusumik innersuunneqarnissaanut pisinnaatitaaffiliisut apeqqutaatinnagit. Maleruagassaq pissusiviusunik tunngaveqartinneqarluni ilanngunneqarpoq, Kalaallit Nunaanni inissiat arfinilinnik initallit ikittuaraannarsuit pigineqarmata.

Inoqutigiinni inuit amerlassusaat piffissami inniminniiffiusumi sulisitsisumit, sulisumut inissiamik inniminniissummik immersuisuusumit allanneqassapput. Tamatuma saniatigut piffissami innersuussiffiusumi inoqutigiit amerlassusaat allanneqassapput, inniminniinerup kingorna innersuussinissarlu sioqqullugu inoqutigiinni inuit amerlassusaat allannguuteqarsimasinnaammata. Piffissami innersuussiffiusumi inoqutigiinni inuit amerlassusaat inissiap qanoq angitigisup sulisumut tunniunneqarnissaanut aalajangiisuussaaq. Inniminniissutip paasissutissanik eqqortunik imaqarnissaa sulisitsisup akisussaaffigaa.


§ 19-imut

Aalajangersakkami allassimavoq, inoqutigiinni inuit amerlassusaat inissiamik innersuussinissamut atatillugu qanoq aalajangersarneqassanersut.

Angajoqqaat kisimiittut taamatullu aappariit meerallit inuttut marluttut naatsorsorneqartarput. Angajoqqaat kisimiittut aappariinnut sanilliunneqartarput, angajoqqaat kisimiittut ataatsimik meerallit namminneq sinittarfeqarnissaminnik, tamatumalu saniatigut meeqqap nammineq sinittarfeqarnissaanik pisariaqartitsinerisa aappariit namminneq sinittarfeqarnissaminnik, tamatumalu saniatigut meeqqap nammineq sinittarfeqarnissaanik pisariaqartitsinerisa annertoqatigiinnassagaa naatsorsuutigineqartariaqarmat.

Naartuneq naatsorsuinermut ilaatinneqarneq ajorpoq, tamanna nalorninartoqarsinnaammat.


§ 20-mut

Aalajangersakkap atuutilerneratigut Naalagaaffiup Sinniisoqarfiani, Nunatta Eqqartuussiviani, Kalaallit Nunaanni Politimesterqarfimmi, Inatsisartuni sullissivinnilu taakkununnga atasuni sulisut, kiisalu Namminersornerullutik Oqartussat qitiusumik allaffeqarfianni sullissivinnilu tassunga atasuni sulisut, pisussaapput inissiamik innersuunneqartumik tigusissallutik, tassani pisortat Naalakkersuisunilu ilaasortat kisimik pineqanngillat. Sulisut taakku inissiamik innersuunneqartumik tigusinissaq kissaatiginngippassuk, tamanna sukumiinerusunik nassuiarneqartunik arlalinnik kinguneqarsinnaavoq. Assersuutigalugu sulisoq inissiamut allamut innersuunneqarnissamut pisinnaatitaaffeerutissaaq.

Sulisup inissiamik tigusinissamut pisussaaffiligaanera, pisortat sulisitsisullu sulisumut inissiamik innersuussisussaatitaaneranut pissusissamisoortumik illuatungiliunneqartutut isigineqassaaq. Tassalu sulisitsisup inissiamik innersuussinerani inissarsiortut aalajangersimasumik qinnuteqaateqarnerat tunngavigineqartanngilaq, kisiannili atorfinitsinnerup malitsigisaatut isigineqartarluni. Taamaattumik sulisup atorfininnerminit piffissap sivikitsuinnaap ingerlanerani inissiamut innersuunneqarnissani naatsorsuutigisariaqarpaa.

Tamatumani sulinermik inuussutissarsiutillit kattuffiata sulisup ilaasortaaffigisaata ilaasortamik pilertortumik inissavimminnut innersuunneqarsinnaanissaat, taamaalillutillu inuunermik nalinginnaasumik ingerlatsilernissaat soqutigisarissagaa naatsorsuutigineqartariaqarpoq.

Taamaattumik sulisup inissiamik innersuunneqarsinnaatitaalluni atorfeqartinneqartup pilertornerpaamik sulisunut inissiamut najugarilivigassaanut innersuunneqarnissaata qulakkeerneqarnissaa anguniarneqartassaaq.

Sulisut inissiaq innersuunneqartoq naatsorsuutigisanut naapertuutsitsinngitsutut isumaqarfigigunikku, nammineq kissaatigisaminnik nuunnissamut imaluunniit inissianik taartigiinnissamut inissianillu niueruteqarnermi neqeroorutaasartunut allanut periarfissiissutaasut atorsinnaavaat.


§ 21-mut

Aalajangersakkap atuutilerneratigut Naalakkersuisut imaluunniit kommunalbestyrelsep aalajangersinnaavaa, sulisoq sulisunut inissiami najugaqartoq inissiamik attartortittakkamik nalinginnaasumik neqeroorfigineqarnermini inissiaq najukkani inissiani attartortittakkani nalinginnaasuni piumasaqaatit naapertorlugit najuinnassanerlugu aalajangersinnaatitaassanersoq. Tamatumani atorfillip inissiaq najukkani tigummiinnarniarlugu aalajangernerata pitsaaqutigissavaa, inissiamut init amerlaqataannik initalimmut nuuttariaqannginnera. Sulisup pisinnaatitaaffianit sulisunut inissianut imaluunniit inissianut attartortittakkanut nalinginnaasunut inissarsiortut allattorsimaffianni allatsissimasut allat sunniuteqarfigineqassanngillat, sulisunut inissiamut taarsiullugu inissiaq attartortittagaq nalinginnaasoq neqeroorutigineqartoq peerneqartussaammat. Sulisoq inissiamut attartortittakkamut nalinginnaasumut neqeroorutigineqartumut nuunnissaminut taarsiullugu sulisunut inissiaq najuinnarniarlugu aalajangerpat, inissiamut normu sulisup sulisitsisuata pigisaa atorneerutissaaq, taannalu atorlugu sulisunut inissiamik allamik inniminniisoqarsinnaavoq.

Sulisoq sulisunut inissiami ukiut arfineq marluk sinnerlugit najugaqarsimasoq inissiamik inissiatut attartortittakkatut nalinginnaasutut tigusinissani qinnutigisinnaavaa. Tamatumanili piumasaqaataavoq sulisup piffissaq tamakkerlugu inissarsiortut allattorsimaffianni nalinginnaasumi allatsissimanissaa.

Periarfissat nassuiarneqartut marluk inissianut Naalagaaffiup Sinniisoqarfiani, Nunatta Eqqartuussiviani, Kalaallit Nunaanni Politimesterqarfimmi sullissivinnilu taakkununnga atasuni, inissianut Naalakkersuisuni ilaasortanut Naalakkersuisoqarfinnilu ataasiakkaani pisortanut, inissianut Namminersornerullutik Oqartussat qitiusumik allaffeqarfianni sulisunut innersuunneqarsimasunut, kiisalu inissianut siunertanut aalajangersimasunut inniminnerneqarsimasunut imaluunniit inissianut atorfinnut aalajangersimasunut aalajangigaasunut atuutinngillat.


§ 22-mut

Aalajangersakkap atuutilerneratigut kommunep inissianik isumaginninnermi siunertanut innersuussisinnaatitaanerminik atuisup qulakkeertassavaa, kommunep taamaaliornermigut inissiaqarfittut immikkoortortamut aningaasatigut annaasaqartitsinnginnissani. Annaasaqarsinnaanermut matussusiinissaq ilaatigut kommunep attartornermut isertitassat uninngatinneqarnerinut akiliisarneratigut, ilaatigut annaasaqarsinnaanermut qularnaveeqqusiineratigut aammalu ilaatigut kommunep qularnaveeqqusiissutissanik tamakkiisunik akiliineratigut qulakkeerneqassaaq. Taamaattorli attartortup attartortitsisumut uppernarsarsinnaappagu, attartortoq ineqarnermut aningaasartuutinut ingerlaavartunut akiliisinnaanerminut naammattunik isertitaqartartoq, kommunep annaasaqarsinnaanermut qularnaveeqqusiinissaq pisussaaffigissanngilaa.

Taamatuttaaq attartortitsisup kommune inissianik isumaginninnermi siunertanut innersuussinerani itigartissinnaavaa, attartortoq siusinnerusukkut attartortitsisumut attartornermini ineqarnermut akiligassanik akilinngitsuugaqarsimappat imaluunniit taarsiinissamut piumasaqaatinut akiligassaqarpat. Assersuutigalugu attartortitsisoq attartortup siusinnerusukkut attartukkaminit ineqarnermut akiliutinik akiliinngitsoornini pissutigalugu anisitaanerani annaasaqarsimaguni, attartortoq taarsiisussanngortissinnaavaa. Kommunep ineqarnermut akiligassat akilinngitsuukkat imaluunniit taarsiinissamut piumasaqaatit akilersinnaagunigit inissiamik isumaginninnermut atatillugu innersuussisoqarsinnaassaaq.


§ 23-mut

Inissiamik isumaginninnikkut innersuussisarnermi attartortup ineqarnermut akiliummik akiliisinnaanissaa aallaavigineqassaaq, pineqartoq aningaasaqarnikkut ajornartorsiortutut isigineqanngimmat, taamaallaalli tamatumani iserfissaarunnera, tassalu inissaaleqinera pineqarmat.

Kommunep inissarsiortut allattorsimaffiat sanioqqutiinnarlugu innersuussinissaq kisiat siunertaralugu inissiamik isumaginninnikkut innersuussinermik atuippat, kommunep annaasaqarsinnaanera annikitsuararsuussaaq. Tamatumani attartortitsisup kommunep annaasaqarnissamut qularnaveqqusiissutaanut itigartitsinissaa naatsorsuutigineqartariaqarpoq, inissiamik inunnik isumaginninnikkut innersuussatut tunineqartup inissiamut aningaasartuutissat matussusernissaannut naammattunik aningaasassaqarnissaa naatsorsuutigineqartariaqarmat.

Kommune inummik inissaaleqiinnarani aammattaaq aningaasakilliortumut inissiamut innersuussisariaqartillugu, kommunep annaasaqarsinnaanermut qularnaveeqqusiissutaata attartortitsisumit atorneqarnissaa kommunemiit naatsorsuutigineqartariaqarpoq, inissarsiortup inissiamut aningaasartuutissat matussusernissaannut naammattunik aningaasassaqannginnissaa naatsorsuutigineqartariaqarmat.

Annaasaqarsinnaanermut qularnaveeqqusiissut tunngavigalugu piumasarineqartussat attartortup attartornerata unitsinneqarnerata imaluunniit anisitaanerata kingorna naatsorsorneqasssapput. Qularnaveeqqusiissut attartortup inissiamik atugassinneqarnerata kingorna qaammatit aqqaneq marluk qaangiunnerini ingerlaannartumik atorunnaassaaq, tassalu attartortitsisup attartorneq qaammatit aqqaneq marluk iluanni atorunnaarsissavaa. Piffissap taassuma ingerlanerani attartortitsisup annaasaqarsinnaanermut qularnaveeqqusiissutissamik atuisimanini pillugu kommune allaffigereersimassavaa.

Assersuutigalugu attartugassaq attartortumut 1. december 2004-mi atugassiissutigineqarsimappat, annaasaqarsinnaanermut qularnaveeqqusiissut 30. november 2005 ilanngullugu atuuttussaatinneqassaaq. Kingusinnerpaamik 30. november 2005-imi attartortitsisup qularnaveeqqusiissut atugassanngorniarlugu kommune allakkatigut ilisimatissimanngippagu, qularnaveeqqusiissut ingerlaannartumik atorunnaassaaq.

Attartortitsisup 30. november 2005-imi attartortup ineqarnermut akiliuteqarsimannginnera peqqutigalugu attartorneq unitsinneqarsimammat qularnaveeqqusiissut atugassanngorniarlugu kommune allakkatigut ilisimatissimappagu tamanna naammappoq, aammattaaq ullormi tassani annaasat amerlassusaat takuneqarsinnaanngikkaluarpataluunniit. Annaasat aatsaat 2006-imi apriilimi eqqartuussummik naammassititsiniaasartup attartortumik attartorneqartumiit anisitsinerata kingorna naatsorsorneqarsinnaappata, attartortitsisup eqqartuussummik naammassititsiniaasartup anisitsinerata kingunitsianngua akiligassap akileqquneqartup annertussusianik kommunemut nalunaaruteqarnissaanut piffissaqarluarpoq.

Tassalu tamanna piffissaliussap iluani piumasaqaatissanik pinngortoqarsimaneranut qularnaveeqqusiissutip atugassanngornissaanut naammappoq, naak piffissaliussap naanerata kingorna aatsaat annaasat amerlassusaat paasineqarsinnaagaluartut.


§ 24-mut

Aalajangersakkap atuutilerneratigut attartortoq inissiamik najukkaminik piginneqatigiilluni inissiatut imaluunniit namminerisamik inissiatut tigusinissaminik kissaateqanngitsoq inissiamut assingusumut innersuunneqarnissamut pisinnaatitaavoq. Inissiaq naammaattumik angissuseqassaaq pitsaassuseqassallunilu, aammalu ineqarnermut aningaasartuutit tamakkiisut sapinngisamik inissiami qimanneqartumi aningaasartuutit annertoqatigissallugit. Taamaattorli attartortup inissiaq innersuunneqartoq tigussallugu pisussaatitaanngilaq, attartortoq inissiaq najukkani piumasaqaatit atuuttut allangortinnagit najuinnassallugu aalajangersinnaavoq.

Illumi attartortut najukkaminni inissianik attartortittakkanik piginneqatigiilluni inissianngortitsinissaq siunertaralugu piginneqatigiilluni inissiaatillit peqatigiiffiannik pilersitsisimappata, Naalakkersuisut peqqussummi matumani aalajangersakkat sanioqqussinnaavaat. Taamaaliornikkut allannguiniarnermi suliamut tapersiinissaq siunertarineqarpoq.

§§ 5-imik aamma 65-imik sanioqqutsisinnaanermut periarfissaq piginneqatigiilluni inissiaatillit peqatigiiffiata pilersinneqarneraniit aamma illumik tigusinissamik allakkatigut qinnuteqarneraniit atuutilissaaq.

Kiisalu inissianik attartortittakkanik piginneqatigiilluni inissiaatillit peqatigiiffiannut allannguiniarluni suliap ingerlanerani attartortitsisoq inissiamik inueruttumik inummut peqatigiiffimmut ilaasortanngorniarluni allatsissimasumut innersuussisinnaavoq.


Kapitali 3-mut

Kapitali 3-mi aalajangersakkat attartorneq pillugu Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi §§ 8-9-mi aamma 12-imi aalajangersakkanut taartaapput. Aalajangersakkanut maannamut atuuttunut naleqqiullugu najoqqutassatigut allannguisoqarpoq, tamatumalu nassatarisaanik inatsisitigut inissisimaneq allanngortinneqarpoq, tamannalu pingaartumik ilaqutariinnut ataatsinut illuni illunilu affarleriinni inatsisitigut inissisimanermut tunngasuuvoq, kisiannili aamma oqaasertaasigut erseqqissaasoqarpoq, taakkunanilu inatsitsisitigut inissisimanermut najoqqutassanik allannguisoqanngilaq.

Aalajangersakkat attartorneq pillugu Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi §§ 8-9-mut aamma 12-imut naleqqiullutik "Najugaqartut oqartussaaqataanerat"-nik qulequtserneqarlutik kapitalimut immikkoortumut inissinneqarput, tassani attartortut inissianik attartortittakkanik najukkaminnik ingerlatsinermut sunniisinnaanerannut killissaqartitsinissaq pingaarnertut siunertarineqarnera ersarinnerulersinneqarluni.


§ 25-mut

Aalajangersagaq Namminersornerullutik Oqartussat kommunellu ilaqutariinnut arlalinnut illuutaannut oqaatsitigut erseqqissarneqarluni, attartorneq pillugu Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 8, imm. 1-3-mut assingusuuvoq.

Namminersornerullutik Oqartussat kommunellu ilaqutariinnut ataatsinut illuutaat illullu affarleriit najugaqatigiiffinnut agguarneqartarunnaarlutik ingerlatsinermut aserfallatsaaliuinermullu immikkoortortaqarfinnut agguarneqartalerput, tak. § 30. Aalajangersakkap atuutilerneratigut Namminersornerullutik Oqartussat kommunellu ilaqutariinnut arlalinnut illuutaat, tassalu illut quleriit, illut sanileriit illullu uigulukuttut, inissianik imminnut atasunik minnerpaamik pingasunik inissiartallit, najugaqatigiiffinnut agguarneqarput. Najugaqatigiiffinnut agguaaneq piginnittup suliniuteqarneratigut piumasaqarneratigullu pisassaaq, attartortut suliniuteqarneratigut pinnani.

Najugaqatigiiffik naatsorsuutinik immikkut ingerlatsiffiuvoq, aningaasaqarneralu najugaqatigiiffik aamma ingerlatsinermut aserfallatsaaliuinermullu immikkoortortaqarfinnit allanit immikkoortitaavoq. Najugaqatigiiffik inuit inatsisitigut piginnaatitaaffeqarneratuulli isigineqarsinnaanngilaq.

Inatsisini maannamut atuuttuni aalajangersarneqarpoq, "Namminersornerullutik Oqartussat kommunellu inissiaataat attartortittakkat najugaqatigiiffinnut namminerisaminnik aningaasaqarnermik ingerlataqartunut agguarneqassasut", tak. Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 8, imm. 1. § 25, imm. 1-imi oqaasertaliussamut allannguummi erseqqissarneqarpoq, najugaqatigiiffiit inuttut piginnaatitaaffiligaasutut isigineqarsinnaanngitsut.

Aalajangersakkamissaaq erseqqissarneqarpoq attartortut najugaqatigiiffimmi ataatsimiititsinermi najugaqatigiiffimmut siulersuisunik qinersisimappata, attartortut najugaqatigiiffiup ingerlanneqarneranut sunniuteqaqataanissamut pisinnaatitaaffeqartut. Attartortut najugaqatigiiffiup ingerlanneqarneranut sunniuteqaqataasinnaanerat najugaqatigiiffimmi siulersuisut aqqutigalugit aammalu § 26-mi aamma § 28, imm. 4-mi aalajangersakkat naapertorlugit pissaaq.

Kiisalu imm. 3-mi Naalakkersuisut Namminersornerullutik Oqartussat kommunellu ilaqutariinnut arlalinnut illuutaasa najugaqatigiiffinnut agguarneqarnissaat, najugaqatigiiffinni siulersuisunut qinersisarneq najugaqatigiiffinnilu siulersuit sulinerat, matumani ilanngullugit najugaqatigiiffinni siulersuisut najugaqartunut aningaasaliissutinik atuinissaannut maleruagassat pillugit maleruagassiornissamut pisinnaatitaaffilerneqarput.

Naalakkersuisut Namminersornerullutik Oqartussat kommunellu inissiaataannik attartortittakkanik attartortitsisarneq pillugu Namminersornerullutik Oqartussat nalunaarutaanni nr. 23-mi, 22. december 2003-meersumi najugaqatigiiffiit allaffisornikkut aqunneqarnerat pillugu sukumiinerusunik maleruagassiaqarput.


§ 26-mut

§ 26, imm. 1-ip aamma imm. 2-p Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 9, imm. 1 aamma imm. 2 assigai. Oqaasertai ataasiakkaat iluarsineqarput, tamatumanilu taamaallaat maleruagassat maannamut atuuttuusimasut erseqqissarneqarnissaat siunertarineqarpoq.

§ 26, imm. 1-ip aamma imm. 2-p atuutilernerisigut ukiut tamaasa missingersuusiornermut atatillugu najugaqatigiiffik misissuiffigineqartassaaq, attartortitsisorlu inissiaqarfimmik misissuineq tunngavigalugu ukiumut tulliuttumut ingerlatsinermut missingersuutissanik siunnersuusiortassaaq. Ingerlatsinermut missingersuutinut siunnersuutit attartortumit inaarutaasumik akuerineqannginnerminni najugaqatigiiffimmi siulersuisunut oqaaseqarfigisassanngorlugit saqqummiunneqartassapput.

Najugaqatigiiffimmi siulersuisut ingerlatsinermut missingersuutini killissarititaasut iluanni siunnersuuteqarsinnaapput:

  1. aserfallatsaaliugassat nutartigassallu suut attartortitsisup najugaqatigiiffimmi suliarisariaqarnersut,

  2. najugaqatigiiffimmi init ataatsimoorussat ingerlanneqarnerinut atorneqarnerinullu tunngasut, aamma

  3. najugaqatigiiffimmi sunngiffimmi sammisassanik assigisaanillu pilersitsinissaq pillugu.

Aalajangersakkani najugaqatigiiffimmi siulersuisut ingerlatsinermut missingersuutinik inaarutaasumik suliaqarnerannut, kiisalu aningaasat najugaqatigiiffimmi qanoq atorneqarnissaannut sunniisinnaanermut periarfissiisoqarnissaa siunertarineqarpoq.

Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 9, imm. 3 siunnersuummi § 26, stk. 3-mit taarserneqarpoq.

§ 26, imm. 3-p atuutilerneratigut attartortitsisoq najugaqatigiiffinni tamavinni ukiumoortumik naatsorsuutinik suliaqartassaaq, taakkulu kukkunersiorneqarlutik attartortitsisumit inaarutaasumik akuerineqannginnerminni najugaqatigiiffinnut oqaaseqarfigisassanngorlugit saqqummiunneqartassapput. Aalajangersakkap atuutilernerata kingunerisaanik Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 9, imm. 3 allanngortinneqarpoq, ukiumoortumik naatsorsuutit akuerineqartussanngorlutik najugaqatigiiffinni siulersuisunut nassiunneqartarunnaarlutik oqaaseqarfigisassanngorlugit nassiunneqartalerlutik. Allannguinermi tunngavigineqarpoq najugaqatigiiffinni siulersuisut ukiumoortumik naatsorsuutinik akuersinissaat pisariaqartutut isigineqanngimmat, ukiumoortumik naatsorsuutini kisitsisit oqaluttuarisaanermut tunngasuummata, aammalu attartortut inissiat najukkamik ingerlanneqarnerinut sunniuteqarsinnaanerat attartortut najugaqatigiiffimmi siulersuisut aqqutigalugit ingerlatsinermut missingersuutit il.il. suliarineqarnerinut sunniuteqarsinnaanerisigut qulakkeerneqarmat, tak. § 26, imm. 1 aamma imm. 2.

§ 26, imm. 4 nutaajuvoq, taassumalu atuutilerneratigut najugaqatigiiffimmi siulersuisut ukiumoortumik naatsorsuutit akuerisat tusaatissatut tigusalissavaat.

Aalajangersakkap oqaasertai erseqqissarneqarlutik, Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 12-imut assingusuuvoq.

Paragrafip nassataraa najugaqatigiiffinni namminerisamik pigisani imaluunniit illuutini namminerisamik pigisani ikinnerpaamik arfinilinnik inissiartaqartuni, piginnittumit ataatsimit pigineqartuni, ataatsimoorussanik ataatsimik arlalinnilluunniit atortulersugaasuni, soorlu ataatsimut kiassagaasuni, errorsiveqartuni, nalliuttorsiortarfeqartuni, najugaqartut illuannik peqartuni il.il. attartortut apeqqutit illuutip ingerlanneqarneranut pingaarutillit tamaasa attartortitsisumut oqaloqatigiissutigisinnaalerpaat, tamatumani ineqartut sinniisaannik ataatsimik arlalinnilluunniit qinersisimaneq apeqqutaalluni.

Imm. 1-ikkut illuni namminerisamik pigisani attartortittakkanik inissiartalinni attartortut attartortitsisumut oqaloqatiginnittarnissaat qulakkeerneqarpoq.

Siunnersuummi imm. 2-kkut Naalakkersuisut najugaqartut sinniisaannik qinersisarneq najugaqartullu sinniisaasa sulinerat, taassuma ataani illuni namminerisamik pigisani attartortittakkanik inissiartalinni ingerlatsinermut sunniutqaqataasinnaanerat pillugu maleruagassiornissamut pisinnaatinneqarput. Ineqarnermik tamakkiisumik iluarsartuusseqqinnerup ilaatut, tassumalu nassataanik illut namminerisamik pigisat attartortittakkanik inissiartallit amerlassutsimikkut qaffannissaannik naatsorsuuteqarneq tunngavigalugu pisortat ilaqutariinnut arlalinnut inissiaataanni najugaqartut oqartussaaqataanerannut assingusumik aalajangeeqataasinnaanissaat qulakkeerniarlugu maleruagassiortoqarnissaa naapertuutissaaq. Naalakkersuisut taamaattunik maleruagassiorsinnaanissamut § 27, imm. 2-kkut tunngavissinneqarput.


Kapitali 4-mut

Kapitali 4-p attartorneq pillugu Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi §§ §§ 10, 11 aamma 13, 14, 15 aamma 16 taarserpai. Aalajangersakkanut maannamut atuuttunut naleqqiullugu najoqqutassatigut allannguisoqarpoq, tamatumalu nassatarisaanik inatsisitigut inissisimaneq allanngortinneqarpoq, tamannalu pingaartumik ilaqutariinnut ataatsinut illuni illunilu affarleriinni inatsisitigut inissisimanermut tunngasuuvoq, kisiannili aamma oqaasertaasigut erseqqissaasoqarpoq maleruagassallu ilusilersugaanerannik allannguisoqarluni, taakkunanilu inatsitsisitigut inissisimanermut najoqqutassanik allannguisoqanngilaq.

Kapitali 4-mi paragrafit attartortumut ajoqutaasumik sanioqqunneqarsinnaanngillat.


§ 28-mut

§ 28-p annerpaartaa Namminersornerullutik Oqartussat kommunellu ilaqutariinnut arlalinnut inissiaataannut tunngatillugu Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 10, imm. 1-3-mut aamma imm. 5-imut assingusuuvoq.

Imm. 1-imi aalajangersarneqarpoq ilaqutariinnut arlalinnut inissiani pisortanit pigineqartuni ineqarnermut akiliutit najugaqatigiiffinni ataasiakkaani isertitat aningaasartuutinut naleqqunnissaat tunngavigalugu aalajangerneqartassasut. Tassalu ineqarnermut akiliut oqimaaqatigiissitsinikkut akiliuteqarfiusassaaq (attartorneq aningaasartuutinit aalajangigaasoq), tassanilu inissiaqarfittut immikkoortortap isertitai najugaqatigiiffiup aningaasartuutaanut naapertuutsinneqassapput.

Najugaqatigiiffiup ingerlanneqarneranut aningaasartuutit aningaasartuutinut assigiinngitsunut arlalinnut agguagaapput. Ilanngussaq 1-imi ingerlatsinermut aningaasartuutinut assersuutit arlallit takussutissiorneqarput. Ilannguaaq 1 tamavinnut matussusiinngilaq, taamaattumillu inissiaqarfittut immikkoortortap aningaasartuutaanik tamakkiisunik attartortitsisup naatsorsuinerani ilanngussaq 1-imi taaneqartut saniatigut ingerlatsinermut aningaasartuutinik allanik ilanngussisoqarsinnaavoq.

Aningaasartuutit pingasunngorlugit immikkoortiterneqarsinnaapput, tassa aningaasartuutinut nalinginnaasunut, illuartitanut aningaasartuutinullu immikkut ittunut. Aningaasartuutit nalinginnaasut ataaniissapput inissianik piginnittup aningaasaatitigut iluanaarutissai, iluarsaassineq, sillimmasiissutit, aserorterinissamik pinaveersaartitsinermut akiliutit, inissiamit aninermi nalinginnaasumik iluarsaassinerit, najugaqartunut sammisaqartitsinerit il.il. Illuartitat tassaasinnaapput pilersaarutaasumik piffissaligaasumik aserfallatsaaliuinissamut nutarterinissamullu, inissiat inoqannginnerinut inissianiillu nuuttoqarneranut atatillugu annaasassanut atugassat. Aningaasartuutit immikkut ittut ataaniissinnaasut ilaatigut tassaapput inissiat inoqannginnerinut inissianiillu nuuttoqarneranut atatillugu aningaasanik illuartitsivigineqarsimanngitsunut annaasat.

Ineqarnermut akiliutit aningaasartuutit naapertorlugit aalajangigaanerisa kingunerissanngilaat, aningaasartuutit inissiaqarfittut najugaqatigiiffinni ataasiakkaani ingerlatsinermut missingersuutinut ilanngunneqartut akiviusut imaluunniit najugaqatigiiffimut ataatsimut akiviusoq kisimik ilanngunneqarsinnaanissaat. Taamaattumik allanit sullinneqarnermut aningaasartuutit, soorlu allaffissornikkut aqutsisumut avataaneersumut akiliutit, tak. § 32, tamakkiisumik ingerlatsinermut missingersuutinut ilanngunneqassapput, tassalu allanit sullinneqarnermi sullissisuusup iluanaarutissaa ilanngunneqassaaq. Kiisalu allaffissornikkut aqutsinermut aningaasartuutinut akiliutit attartukkami ataatsimi attartortumut ataatsimut aningaasartuutissatut agguarneqassapput, tak. § 32, imm. 2.

Aammattaaq najugaqatigiiffimmi ilaqutariinnut arlalinnut inissianit ilaasortaaffigineqartumi ineqarnermut akiliutit aningaasartuutit naapertorlugit aalajangigaanerinit mattunneqassanngilaq, Kalaallit Nunaanni periaatsitut atuuttutut nalinginnaasutut assigiimmik akeqartitsisoqartarmat, imaluunniit assigiimmik akeqartitsinissamik maleruagassiortoqartarmat.

Siunnersuummi imm. 2-p atuutilerneratigut attartortut ataasiakkat ineqarnermut akiliutaannik qaffaanissap qaammatinik pingasunik siumut ilisimatitsereernikkut atuutsinneqalertarnera unioqqutitsinerussanngilaq. Siumoortumik ilisimatitsinerit, ineqarnermut akiliutip qaffanneranut peqqutaasumik taassumalu angissusaannik paasissutissanik imaqanngitsut atuuttussanngortinneqarsinnaanngillat. Siumoortumik ilisimatitsissut minnerpaamik ineqarnermut akiliutit qaffanneqarnerinut pissutaasumut paasissutissanik pingaarnernik imaqassaaq. Pissutaasutut oqaatigineqarsinnaapput allaffissornikkut aqutsinermut aningaasartuutit qaffannerat, aningaasaliissutinit iluanaarutit qaffannerat, ingerlatsinermut pingaarnermut aningaasartuutit qaffannerat imaluunniit illuartitanut aningaasartuutit qaffannerat. Attartortitsisup aamma paasissutissiisussaatitaanerminut tapertaralugu ukiumut tulliuttumut missingersuutit kisitsisitaat ilanngussinnaavai, tassanilu ukiumi ingerlasumi ukiumilu tulliuttumi missingersuutini aningaasartuutissat pingaarnerit takuneqarsinnaassapput.

Paragrafimi imm. 4 naapertorlugu najugaqatigiiffimmi siulersuisut pitsanngorsagassanik nutartigassanillu naammaginartunik annertussusilinnik suliaqartoqarnissaanik siunnersuuteqarsinnaapput, assersuutigalugu tassaasinnaapput allanngortiterinerit, taassuma ataani atortut nukissamik sipaartut aamma teknikikkut atortulersuutit. Najugaqatigiiffimmi siulersuisut aamma ataatsimoorussanik atortussanik sananissamut siunnersuuteqarsinnaapput, taakku ataanni errorsisarfiit, init ataatsimoortarfiit, pinnguartarfiit, biilinut unittarfiit il.il.

Tamatumani piumasaqaataavoq, najugaqatigiiffimmi siulersuisut siunnersuuteqarnerisa kingunerisaanik ineqarnermut akiliutip qaffanneqarnissaanut najugaqatigiiffimmi siulersuisut akuersinissaat. Siunnersuut imaluunniit siunnersuutit najugaqatigiiffimmi najugaqartut tamarmik ataatsimiitinneqarnerini akuersissutigineqartassapput.

Siunnersuummi imm. 5 naapertorlugu Naalakkersuisut pilersaarutaasumik aserfallatsaaliuinissamut teknikikkullu atortulersuutinik nutarterinissamut illuartitsisarneq, ineqarnermut akiliutip naatsorsorneqartarnera aamma ineqarnermut akiliutip iluarsineqarnissaanut siumoortumik ilisimatitsisarneq pillugu maleruagassiornissamut piginnaatinneqarput.


§ 29-mut

Tunngaviatigut illunik piginnittut Namminersornerullutik Oqartussat kommunellu inissiaataanni attartortittakkani imermut uuttuusersuinissaq pisussaaffigaat, attartortut imermik atuinerat najugaqatigiiffimmut tamarmiusumut isumagineqarnerat naapertuuttutut isumaqarfigineqanngimmat. Taamaalilluni attartortut imermik sipaartut attartortut imermik atuisorujussuit akiligassaannut akileeqataasarnerat aalajangersakkap atuutilerneratigut atorunnaassaaq. Atuisut akiliuteqartarnerisa atuutilerneratigut imermik atuinerup apparnissaa naatsorsuutigineqarpoq, tamannalu Naalakkersuisut avatangiisit eqqarsaatigalugit inatsimmik atulersitsinissamik pingaarnertut naalakkersuinikkut ingerlatsinerannut napertuuppoq.

Imm. 2-p atuutilerneratigut imermut uuttuutinik ikkussuisussaatitaaneq aallaqqaammut ikkussuinissaq teknikimut tunngasuinnaat eqqarsaatigalugit naapertuutsitsiviunngitsunut atuutissanngilaq. Tamatumani assersuutigalugu tassaapput illuni quleriinni erngup aqqutaanik silaannarissarfikkut qummut ikkussuussinissaq, taamaalillunilu igaffiit tamarmik, uffarfiit tamarmik (errorfiit qortortitsiviillu immikkoortillugit) kiisalu kuutsitsisarfiit allat tamarmik aqqusaarneqassallutik.


§ 30-mut

§ 30, imm. 1 nutaajuvoq, taassumalu atuutilerneratigut ilaqutariinnut ataatsinut illut illullu affarleriit Namminersornerullutik Oqartussanit kommunenillu pigineqartut ingerlatsinermut aserfallatsaaliuinermullu immikoortortanut aggorneqassapput. Siusinnerusukkut ilaqutariinnut ataatsinut illut illullu affarleriit Namminersornerullutik Oqartussanit kommunenillu pigineqartut najugaqatigiiffinnut aggorneqartaraluarput, tak. attartorneq pillugu Inatsisartut peqqussutaanni nr. 5-imi, 31. maj 2001-imeersumi § 8, imm. 1. Allannguineq najugaqatigiiffinni, maannamut ilaqutariinnut ataatsinut illunit illunillu affarleriinnit ilaaffigineqarsimasut najugaqatigiiffinni najugaqatigiiffimmut siulersuisunut qinersinikkut sunniuteqarsinnaanerminnik atuinissamik kissaateqartarsimannginnerisa kinguneraa. Tamatumunnga pingaartumik ilaqutariinnut ataatsinut illut illullu affarleriit ataatsimoorlutik inissisimannginnerat peqqutaavoq, tamatumalu kingunerisaanik najugaqatigiiffimmi ilaqutariinnut ataatsinut illuni illunilu affarleriinni attartortut ataatsimoortaratik. Tamanna tunngavigalugu ilaqutaariinut ataatsinut illut illullu affarleriit ingerlatsinermut aserfallatsaaliuinermullu immikkoortortanut aggorneqarnissaat naleqqunnerutinneqarpoq, taamaaliornikkut ataatsimoorfiusoq kisimi tassaalissalluni attartortut aningaasartuutit ilaannik agguaqatigiittarnerat.

Ingerlatsinermut aserfallatsaaliuinermullu immikkoortortaq ilaqutariinnut arlalinnut inissianut najugaqatigiiffittulli naatsorsuutinik immikkut ingerlatsiviuvoq, aningaasaqarnera ingerlatsinermut aserfallatsaaliuinermut immikkoortortanit najugaqatigiiffittullu allanit immikkoortitaaluni.

Kiisalu § 30, imm. 1-ip atuutilerneratigut kommunet ilaqutariinnut ataatsinut illut illullu affarleriit pigisatik ingerlatsinermut aserfallatsaaliuinermullu immikkoortortamut ataatsimut amerlanerusunulluunniit agguassavaat. Ilaqutariinnut ataatsinut illut illullu affarleriit Namminersornerullutik Oqartussanit pigineqartut ingerlatsinermut aserfallatsaaliuinermullu immikkoortortamut ataatsimut agguarneqassapput, tassani Naalakkersuisunut pisortanullu inissiat pineqanngillat, tak. § 14, imm. 1, taakku ingerlatsinermut aserfallatsaaliuinermullu immikkoortortamut nammineq ingerlasumut immikkoortinneqartussaammata.

Imm. 2-4-mi aalajangersakkat atuutilernerisigut ilaqutariinnut ataatsinut illuni illunilu affarleriinni pisortanit pigineqartuni ineqarnermut akiliutit ingerlatsinermut aserfallatsaaliuinermullu immikkoortortani ataasiakkaani isertitat aningaasartuutinut naleqqunnissaat tunngavigalugu aalajangerneqartassapput. Tassalu ineqarnermut akiliut oqimaaqatigiisitsinikkut akiliuteqarfiusassaaq (attartorneq aningaasartuutinit aalajangigaasoq), tassanilu ingerlatsinermut aserfallatsaaliuinermullu immikkoortortap isertitai ingerlatsinermut aserfallatsaaliuinermullu immikkoortortap aningaasartuutaannut naapertuutsinneqassapput.

Ineqarnermut akiliutit aningaasartuutit naapertorlugit aalajangigaanerisa kingunerissanngilaat, aningaasartuutit ingerlatsinermut aserfallatsaaliuinermullu immikkoortortani ataasiakkaani ingerlatsinermut missingersuutinut ilanngunneqartut akiviusut imaluunniit najugaqatigiiffimmi ataatsimut akiviusoq kisimik ilanngunneqarsinnaanissaat. Taamaattumik allanit sullinneqarnermut aningaasartuutit, soorlu aqutsisumut avataaneersumut akiliutit, tak. § 32, imm. 1-6, tamakkiisumik ingerlatsinermut missingersuutinut ilanngunneqassapput, tassalu allanit sullinneqarnermi sullissisuusup iluanaarutissaa ilanngunneqassalluni. Kiisalu allaffissornikkut aqutsinermut aningaasartuutinut akiliutit attartukkami ataatsimi attartortumut ataatsimut aningaasartuutissatut agguarneqassapput, tak. § 32, imm. 1-6.

Aammattaaq ingerlatsinermut aserfallatsaaliuinermullu immikkoortortani ilaqutariinnut ataatsinut illunit illunillu affarleriinnit ilaasortaaffigineqartuni ineqarnermut akiliutit aningaasartuutit naapertorlugit aalajangigaanerinit, Kalaallit Nunaanni periaatsitut nalinginnaasutut atuuttutut assigiimmik akeqartitsisoqartarnera, imaluunniit assigiimmik akeqartitsinissamik maleruagassiortoqartarnera mattunneqassanngilaq.

Imm. 3-p atuutilerneratigut ingerlatsinermut aserfallatsaaliuinermullu immikkoortortap ingerlanneqarneranut aningaasartuutit aningaasartuutinut assigiinngitsunut arlalinnut agguagaapput. Ilanngussaq 2-mi ingerlatsinermut aningaasartuutinut assersuutit arlallit takussutissiorneqarput. Ilanngussaq 2 tamavinnut matussusiinngilaq, taamaattumillu najugaqatigiiffiup aningaasartuutaanik tamakkiisunik attartortitsisup naatsorsuinerani ilanngussaq 2-mi taaneqartut saniatigut ingerlatsinermut aningaasartuutinik allanik ilanngussisoqarsinnaavoq.

Siunnersuummi imm. 4-p atuutilerneratigut attartortut ataasiakkat ineqarnermut akiliutaannik qaffaanissap qaammatinik pingasunik siumut ilisimatitsereernikkut atuutsinneqalertarnera unioqqutitsinerussanngilaq. Siumoortumik ilisimatitsinerit, ineqarnermut akiliutip qaffanneranut pissutaasumik taassumalu angissusaanik paasissutissanik imaqanngitsut atuuttussanngortinneqarsinnaanngillat. Siumoortumik ilisimatitsissut minnerpaamik ineqarnermut akiliutit qaffanneqarnerinut pissutaasumut paasissutissanik pingaarnernik imaqassaaq. Pissutaasutut oqaatigineqarsinnaapput allaffissornikkut aqutsinermut aningaasartuutit qaffannerat, aningaasaliissutinit iluanaarutit qaffannerat, ingerlatsinermut pingaarnermut aningaasartuutit qaffannerat imaluunniit illuartitanut aningaasartuutit qaffannerat. Attartortitsisup aamma paasissutissiisussaatitaanerminut tapertaralugu ukiumut tulliuttumut missingersuutit kisitsisitaat ilanngussinnaavai, tassanilu ukiumi ingerlasumi ukiumilu tulliuttumi missingersuutini aningaasartuutissat pingaarnerit takuneqarsinnaassapput.

§ 30, imm. 5 nutaajuvoq, taassumalu atuutilerneratigut attartortitsisoq ineqarnermut akiliutip aalajangernerani imm. 2-4-mi aalajangersakkat tunngaviginiarnagit aalajangersinnaavoq, tamatumunngalu taarsiullugu ilanngussaq 3-mi kisitsisit aallaavissiat illuummik piginnittunut aningaasaliissutiniit iluanaarutissanut aningaasartuutinik, tak. § 31, aamma allaffissornikkut aqutsinermut aningaasartuutinik, tak. § 32, tapeqartitsiviusussat tunngaviginiarlugit aalajangersinnaalluni, tamatumani ingerlatsinermut aserfallatsaaliuinermullu immikkoortortami aningaasartuutiviusut apeqqutaatinnagit. Aalajangersagaq ilaqutariinnut ataatsinut illuni illunilu affarleriinni ineqarnermut akiliutip ingerlatsinermut aserfallatsaaliuinermullu immikkoortortami isertitat aningaasartuutinut naleqqunnissaat tunngavigalugu naatsorsorneqartarneranut aallaaviusumik naleqqussaaneruvoq.

Aammattaaq § 30, imm. 5-ip atuutilerneratigut attartortut ataasiakkat ineqarnermut akiliutaannik qaffaanissap qaammatinik pingasunik siumut ilisimatitsereernikkut atuutsinneqalertarnera unioqqutitsinerussanngilaq. Siumoortumik ilisimatitsinerit, ineqarnermut akiliutip qaffanneranut peqqutaasumik taassumalu angissusaanik paasissutissanik imaqanngitsut atuuttussanngortinneqarsinnaanngillat. Siumoortumik ilisimatitsissut minnerpaamik ineqarnermut akiliutit qaffanneqarnerinut pissutaasumut paasissutissanik pingaarnernik imaqassaaq. Pissutaasutut oqaatigineqarsinnaapput allaffissornikkut aqutsinermut aningaasartuutit qaffannerat, aningaasaliissutinit iluanaarutit qaffannerat imaluunniit akit aallaaviusut qaffannerat. Attartortitsisup aamma paasissutissiisussaatitaanerminut tapertaralugu ukiumut tulliuttumut missingersuutit kisitsisitaat ilanngussinnaavai, tassanilu ukiumi ingerlasumi ukiumilu tulliuttumi missingersuutini aningaasartuutissat pingaarnerit takuneqarsinnaassapput.

Imm. 6 nutaajuvoq, tassanilu aalajangersarneqarpoq attartortitsisup qaammatisiutit malillugit ukiup naanissaanut qaammatit pingasut sioqqullugit allakkatigut siumoortumik ilisimatitsissuteqarnermigut imm. 2-4-mi aalajangersakkat tunngavigalugit ineqarnermut akiliummik aalajangersaanissaq atornagu (ingerlatsinermut missingersuutit tunngavigalugit oqimaaqatigiissitsilluni ineqarnermut akiliuteqartitsineq) imm. 5-imi maleruagassat atorniarlugit (kisitsisit aallaavissiat tunngavigalugit ineqarnermut akiliuteqartitsineq) imaluunniit paarlattuanik piniarluni.

Ineqarnermut akiliutip qaffannissaanut naatsorsueriaatsimik allannguisoqarsimappat, siumoortumik ilisimatitsissut qaffaanermut tunngaviusoq aamma qaffaatissap qaammammut annertussusissaa koruuninngorlugu imaqarpat tamanna inatsisinik malinninnerussaaq.

Aammattaaq imm. 7 nutaajuvoq, taassumalu atuutilerneratigut aningaasartuutit ilaat attartortumit toqqaannartumik akilerneqartalissapput. Ineqarnermut akiliut imm. 2-4-mi maleruagassat malillugit (ingerlatsinermut missingersuutit tunngavigalugit oqimaaqatigiissitsilluni ineqarnermut akiliuteqartitsineq) imaluunniit imm. 5-imi maleruagassat malillugit (kisitsisit aallaavissiat tunngavigalugit ineqarnermut akiliuteqartitsineq) aalajangersarneqaraluarpalluunniit aalajangersagaq atuutissaaq.

Taamaalilluni aalajangersakkap atuutilerneratigut attartortut siunissami eqqagassat aaneqartarnissaat, septiktankit imaarneqartarnissaat imermillu pajunneqartarnissaq pillugu isumaqatigiissuteqartalissapput, attartortullu innaallagiaq, imeq kiassarnerlu atugartik kisiat akilertalissavaat. Attartortut toqqaannartumik aningaasartuutinut, § 30, imm. 7-imi taaneqartunut akiliisassapput.

§ 30, imm. 8-mi aalajangersagaq naapertorlugu Naalakkersuisut pilersaarutaasumik aserfallatsaaliuinissamut teknikikkullu atortulersuutinik nutarterinissamut illuartitsisarneq, ineqarnermut akiliutip naatsorsorneqartarnera aamma ineqarnermut akiliutip iluarsineqarnissaanut siumoortumik ilisimatitsisarneq pillugu maleruagassiornissamut pisinnaatitaaffilerneqarput.


§ 31-mut

Paragrafi annikitsunnguanik allannguuteqartinneqarluni Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartinneqartumi § 10, imm. 4-mut aamma § 11-imut assingusuuvoq. Aalajangersagaq Namminersornerullutik Oqartussat kommunellu ilaqutariinnut arlalinnut illuutaannut, tak. § 28, aamma ilaqutariinnut ataatsinut illunut illunullu affarleriinnut, tak. § 30, atuutsinneqarpoq.

Namminersornerullutik Oqartussat kommunellu aningaasaaliissutinit iluanaarutissaat illup sananeqarnerani akiata 1,5%-ianik annertussuseqarput.

Paragrafimi illut sananeqarnerinut akiinik naatsorsuisarnermut maleruagassat takutinneqarput. Sananermut akiusoq Namminersornerullutik Oqartussat kommunellu ukiumoortumik aningaasliissutinit iluanaarutissaannik naatsorsuinermi tunngaviusarpoq.

Imm. 2-mi sananermut akiusoq, aningaasaatitigut iluanaarutissat naatsorsorneqarnerinut atorneqarsinnaasoq kradratmeterimut 7.000 koruuninik minnerpaaffilerneqarpoq aammalu 15.000 koruuninik annerpaaffilerneqarluni. Tamatumunnga tunngaviuvoq illut nutaanngitsut nutaanerusullu aningaasaliissutinit iluanaarutissartaasa assigiinngippallaannginnissaannik qulakkeerinissamut kissaateqarneq.

Illumi iluarsaanneqarsimasumi sananermut akiusoq illup iluarsaanneqareernerani teknikikkut aningaasaqarnikkullu naliliineq tunngavigalugu aalajangersarneqartarpoq, tak. imm. 3. Taamaalilluni illup pineqartup nalinga piffissami akiusut malillugit aalajangerneqartarpoq. § 31, imm. 2 aamma illuni iluarsaanneqarsimasuni sananermut akiusup aalajangersarneqarneranut atorneqartarpoq.

Siunnersuummi imm. 4 malillugu illumi pisiaasumi sananermut akiusup naatsorsornerani pisinermut akiusoq kingusinnerusukkullu allanngortiterinerit, iluarsaassinerit pitsannguinerilluunniit nalinganut annertusaataasinnaasut ilanngullugit annertussusilerneqassaaq. Illumi pisiarineqartumi iluarsaassineq illup nalinganut qaffatsitsinngippat, iluarsaassinermut aningaasartuutit illup pisiarineqarneranut akiusumut ilassutigineqassanngillat. § 31, imm. 2 aamma illuni iluarsaanneqarsimasumi sananermut akiusup aalajangersarneqarneranut atorneqartarpoq.

Illup akeqanngitsumik tunissutitut, kingornussinikkut, taarsiissutitalimmik arsaagaanikkut imaluunniit aapparisap taarsernerani pissarsiarineqartoq sananermut akiata aalajangersarneqarnerani illup teknikimut aningaasaqarnermullu tunngasunik naliliiffigineqarnera tunngavigineqassaaq, tak. imm. 7. Tassanissaaq § 31, imm. 2 atorneqassaaq.

Illup teknikikkut aningaasaqarnikkullu nalingata aamma niuernikkut nalingata assigiinngissutigaat, teknikikkut aningaasaqarnikkullu naliliinermi illup sananeqarnerani atortussat akiisa, sulinermi akissarsiat aningaasaliissutinullu aningaasartuutit kisimik eqqarsaatigineqartarnerat, tassalu illup nalinga kikissat kikissallu qinnillit nalii malillugit aalajangerneqartarpoq, kiisalu niuernikkut nalingata aalajangerneqarnerani illup qanoq akilersillugu tunineqarsinnaaneranik ersersitsisuusarpoq. Tassalu illup niuernikkut nalinga teknikikkut aningaasaqarnikkullu nalinganit sumiiffinni illunik piumanninnerup annertuffiini qaffasinnerusarpoq, paarlattuanillu sumiiffinni illunik piumanninnerup annikiffiini immaqaluunniit piumanniffiunngitsuni appasinnerusarluni.

Imm. 5-imi illuutip sananeqarnerani akiusoq akinut minnerpaaffissamut kvadratmeterimut 7.000 kr.-inut aalajangerneqarsimappat, aammalu illuummi atortulersuutit nalinginnaasut ilaannik illu amigaateqarpat, sananermut akiusoq atortulersuummut amigaataasumut ataatsimut kvadratmeterimut 1.000 kr.-inik appaasoqarsinnaanera aalajangersarneqarpoq.

Imm. 6-imi naternut, qilaamut iikkanullu kiffiutissat mineraluldit 250 mm-it inorlugit issussuseqarpata, sananermut akiusoq ilanngaaserneqarnissaa aalajangersarneqarpoq, tak. imm. 5, nr. 6. Kiffiutissat allat atorneqarsimappata, kiffiutissat oqorsaasinnaassusiat mineraluldip oqorsaasinnaassusianut uuttuunneqassapput, taamaalillunilu oqorsaasinnaassusii assigiimmik naliliiffigineqarsinnaassallutik.

§ 30-mi imm. 7-imi aalajangersakkap atuutilerneratigut Naalakkersuisut imm. 3 aamma 4 malillugu teknikimut aningaasaqarnermullu naliliinissap qanoq ingerlanneqarnissaa pillugu maleruagassiornissamut pisinnaatinneqarput.


§ 32-mut

§ 32 nutaajuvoq, Namminersornerullutik Oqartussat kommunellu ilaqutariinnut arlalinnut inissiaataanni aamma ilaqutariinnut ataatsinut illuni illunilu affarleriinni aqutsisumut akiliutinut tunngasuulluni.

Imm. 1 attartortitsisup illuutiminik attartortittakkanik nammineerluni allaffissornikkut aqutsineranut tunngasuuvoq. Attartortitsisup, tassalu Namminersornerullutik Oqartussat kommunelluunniit attartortut allaffissornikkut aqutsinermut akiliisinniarsinnaavai, allaffissornikkut aqutsinermut atatillugu aningaasartuutinut toqqaannanngitsunut taamatullu toqqaannartunut matusissutissanik. Aalajangersakkap atuutilerneratigut attartortitsisup illuutiminik attartortittakkanik nammineerluni allaffissornikkut aqutsisuusup illuutinik allaffissornikkut aqutsinermini niuernikkut iluanaarutissani ilanngullugit naatsorsuusiorsinnaanngilai.

Namminersornerullutik Oqartussat kommunellu allaffissornikkut aqutsisumik avataaniit atorfinitsitsisinnaapput, soorlu A/S Inissiaatileqatigiiffik INI. Aallaffissornikkut aqutsisumut avataaneersumut akiliutissat attartortitsisup attartortumut allaffissornikkut aqutsinermi akiliutitut akilersissinnaavai. Allaffissornikkut aqutsisup avataaneersup akissarsiassai attartortitsisup allaffissornikkullu aqutsisup avataaneersup akunnerminni isumaqatigiissusiornerisigut aalajangersarneqassapput.

Aammattaaq aalajangersakkap atuutilerneratigut avataaniit allaffissornikkut aqutsisussamik atorfinitsitsisoqartillugu allaffissornikkut aqutsisumut akiliut allanit sullinneqarnermut akiliutitut isigineqassaaq, taamaattumillu allaffissornikkut aqutsisup avataaneersup akissarsiassai inissiaqarfittut immikkoortortani imaluunniit ingerlatsinermut aserfallatsaaliuinermullu immikkoortortani ataasiakkaani ingerlatsinermut missingersuutinut tamakkiisumik ilanngunneqassapput, tassalu iluanaarutissai ilanngullugit, soorlumi allanit sullinneqarnernut allanut aningaasartuutit taamatut pineqartartut.

Tassalu inatsisitigut inissisimaneq inissiaatileqatigiiffimmik pilersitsineq pillugu Inatsisartut peqqussutaata nr. 12-ip, 28. oktober 1993-imeersup aamma inissianik attartorneq pillugu Inatsisartut peqqussutaata nr. 3-p, 13. juni 1994-imeersup nalunaarutillu taakkununnga atasut atuutilermatali atuussimasoq tassuuna erseqqissarneqarpoq.

Imm. 3-5 attartortitsisup inissiaatiminik attartortittakkanik allaffissornikkut aqutsisussamik avataaneersumik atorfinitsitsisimaneranut attartortitsisullu nammineerluni allaffissornikkut aqutsineranut tunngasuuvoq.

Namminersornerullutik Oqartussat kommunellu inissiaataanni attartortittakkani allaffissornermut akiliut attartortitsisup inissiaataanni attartortittakkani tamavinni, inissiap attartortittakkap Kalaallit Nunaanni sumi inissisimanera aammalu inissiap attartukkap suunera apeqqutaatinnagu attartukkamut ataatsimut assigiimmik akeqartitsineq tunngavigalugu aalajangersarneqarpoq. Taamaattumik allaffissornikkut aqutsinermut akiliut Namminersornerullutik Oqartussat inissiaataanni attartortittakkani, ilaqutariinnut arlalinnut inissiaappata, ilaqutariinnut ataatsinut illuuppata aammalu illuuppata affarleriit, assigiippoq, tamatumani illut, najugaqatigiiffiit imaluunniit ingerlatsinermut aserfallatsaaliuinermullu immikkoortortat allaffissornikkut aqunneqarnermikkut allanit akikinnerugaluarpataluunniit.

Imm. 3-5-ip atuutilerneratigut inissianut attartortittakkanut A/S Inissiaatileqatigiiffik INI-mit allaffissornikkut aqunneqartunut allaffissornermut akiliutit naatsorsorneqartarnerinut tunngatillugu maannamut inatsisitigut inissisimaffiusimasoq allannguuteqartinneqarpoq. A/S Inissiaatileqatigiiffik INI-mi assigiimmik akeqartitsineq naapertorlugu maannamut allaffissornermut akiliutit Kalaallit Nunaanni attartornerni tamakkiisumik assigiimmik akeqartitsineq tunngavigalugu naatsorsorneqartarsimavoq. Inissianut attartortittakkanut A/S Inissiaatileqatigiiffik INI-mit allaffissornikkut aqunneqartunut allanullu siunissami allaffissornermut akiliutit attartornermi ataatsimi attartortitsisumut ataatsimut assigiimmik akeqartinneqartutut aalajangersarneqartassapput.

Kiisalu aalajangersakkat atuutilernerisigut allaffissornikkut aqutsinermut akiliutit tunngaviusumik sullissinermut tunngaviusumik akiliutinut aamma tapiliussatut sullissinermut tapiliussatut akiliutinut aggorneqarsinnaalissapput. Tunngaviusumik akililiutit attartornermi ataatsimi attartortitsisumut ataatsimut assigiimmik akeqartinneqarlutik aalajangersarneqassapput. Tapiliussatut akiliutit najugaqatigiiffinni aamma ingerlatsinermut aserfallatsaaliuinermullu immikkoortortani attartornermut ataatsimut, attartortitsisup tapiliussatut sullissigineqartussatut toqqagaani assigiimmik akeqartinneqarlutik aalajangersarneqassapput.

Paragrafimi imm. 6 naapertorlugu Naalakkersuisut Namminersornerullutik Oqartussat kommunellu inissiaataasa attartortittakkat allaffissornikkut aqunneqarnerat ingerlanneqarnerallu pillugit sukumiinerusunik maleruagassiorsinnaapput.

Imm. 7 naapertorlugu attartortitsisup Namminersornerullutik Oqartussat imaluunniit kommunet ilaqutariinnut arlalinnut inissiaataanni attartortut aningaasartuutinut, najugaqatigiiffimmi aserorterisarnermik pinaveersaartitsinermut attuumassuteqartunut matussutissanik akiliisinniarsinnaavai.


§ 33-mut

§ 33 Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartumi § 13-imut assingusuuvoq.

Ineqarnermut akiliutit aningaasartuutit naapertorlugit aalajangersarneqartut tassaapput ineqarnermut akiliutit, ineqarnermut akiliutinut missingersuutit tunngavigalugit aalajangersarneqartut, taakkununngalu ingerlatsinermut aningaasartuutit, illuartitsinerit, aningaasaliissutinit iluanaarutissat aningaasalersuinermilu pissarsiaq naammaattunik annertussusillit pisariaqartinneqartullu ilaatinneqarput.

Imm. 2-p aamma 3-p atuutilernerisigut aningaasaliisup aningaasalersuinermi aningaasartuutini illuutillu attartortinneqartup ingerlatsinini (aningaasaliissuteqarnermi) uppernarsarneqarsimasut matussusertissinnaavai, aningaasaliissutaasut taarsigassarsinikkut imaluunniit nammineq aningaasaataanit aningaasalersorneqarsimanerat apeqqutaatinnagu. Tamatuma saniatigut attartortitsisoq illuutip attartortinneqartup teknikikkut aningaasaqarnikkullu nalilerneqarneranit ernianik pissarsiassaminik naatsorsuisinnaavoq. Teknikikkut aningaasaqarnikkullu naliliineq illuutip namminerpiaq nalingata niuernikkut nalinganut, sumiiffimmi pineqartumi illuutip qanoq akilersillugu tunineqarsinnaaneranut takussutissaasumut naleqqiullugu assigiinngissutaanut takussutissaavoq.

Aningaasalersugaq (illu) avataanit taarsigassarsianik illuliornermi taarsigassarsinikkut aningaasalersorneqarpat, aningaasalersuinermut aningaasartuutit tassaassapput ukiumoortumik erniaritinneqartut. Aningaasaliisup aningaasalersuineq aningaasaatini nammineq atorlugit aningaasalersorpagu, aningaasaliisoq ernianik pissarsiassaminik naatsorsuisinnaavoq, taakkulu aningaasalersugaasumi aningaasaliisumut aningaasartuutit annertoqatigissavaat.

Aningaasalersuinermut aningaasartuutitut naatsorsugaq pissarsissutissamut erniap annaaneqarsinnaaneranut assinganik nalorninartumut akileraarutit peereerlugit allamut assersuunneqarsinnaavoq. Erniatulli naatsorsorneqartoq obligationinut ernianit sivisuumik erniaritinneqartartunit annerusartussaavoq,

pissutigalugu inissiap sivisunerusumik atasussaanera,

pissutigalugu aningaasalersorneqartoq aningaasat ileqqaakkat atorlugit aningaasalersorneqarmat, tassalu nammineq aningaasaatit, taarsigassarsilluni aningaasaatinit qaffasinnerusumik ernialersorneqartunik, aamma

pissutigalugu inissianut aningaasaliisarneq nalorninartoqartarmat.

Aningaasalersuinermut aningaasartuutit 10%-imut naatsorsorneqarsimasut soorlu makkuninnga imaqarsinnaavoq:

  1. Obligationit naalagaaffimmit pisiat sivisuumik atuuttussat erniaat nalorninartoqanngitsut (5%).

  2. Aningaasaliissuteqarnermi sivisuumik piffissaligaanerannit pissarsiat (2%).

  3. Piginnittup nalinginnaasumik annaasaqaratarsinnaaneranut pissarsiaritat, aningaasanik atoriaannaarnik amigaateqarneq aningaasanillu pissarsiniarnermi aningaasartuutit (2%).

  4. Nalikilliliinerit naatsorsukkat (1%).

Illu 85 m2-nik angissusilik 1.160.259 kr.-inik (13.650 kr./m²) akilerlugu sananeqarpat pisiarineqarpalluunniit, aningaasaliisullu niuerneq nammineerluni aningaasalersorpagu, aningaasaliisup aningaasaliinermut aningaasartuutai naatsorsorneqartut 10%-iusimappata ukiumut aningaasalersuinermut aningaasartuutit 116.025 kr.-inik naleqassapput.

Taakku saniatigut ukiumoortumik aningaasartuutit illuartitsinerillu soorlu 29.133,75 kr.-it (342,75 kr./m²) ilanngunneqassapput. Kiisalu aningaasaliisoq illuutip teknikikkut aningaasaqarnikkullu nalinganut ernianik, diskontop affaanik annertussuseqartumik akiliisitsiniarsinnaavoq, tassalu diskonto 4,75%-iuppat taanna 27.666,94 kr.-inik ((1.160.250 * 4,75 %) / 2) naleqassaaq.

Ukiumut ataatsimut aningaasartuutit katillugit: 116.025,00 + 29.133,75 + 27.555,94 = 172.714,69 kr., taakkulu qaammammut ineqarnermut akiliummut 14.392,89 kr.-inik (172.714,69 / 12) naleqarput. Aningaasaliisup aningaasalersuinermut aningaasartuutigisai naatsorsukkat affaappata, tassalu 5%-it, qaammammut ineqarnermut akiliut 9.558,52 kr.-iussaaq.

Attartortitsisoq imm. 5 naapertorlugu akit akigititallu qaffannerisa imaluunniit illuummi attartortinneqartumi pitsanngorsaanerup kingunerisaanik ineqarnermut akiliut iluarsiivigisinnaavaa. Ineqarnermut akiliutinik qaffaanissaq allakkatigut illuummi attartortunut tamanut ataatsikkoortumik aammalu qaammatit pingasut sioqqullugit siumoortumik nalunaarutigineqarsimassaaq. Ineqarnermut akiliutit pillugit siumoortumik nalunaarutit, qaffaanissamut peqqutaasunut qaffatissallu annertussusaanut paasissutissanik imaqanngitsut atuuttussaatinneqarsinnaanngillat.


§ 34-mut

Aalajangersagaq Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartumi § 14-imut assingusuuvoq.

Imm. 1 attartortitsisup ineqarnermut akiliummik qaffaanissamik siumoortumik nalunaarutaanut, attartortup akuerisinnaanngisaanut attartortup akerliliinissaanut periarfissiivoq. Attartortoq ineqarnermut akiliutip qaffanneqarnissaanik siumut nalunaarummik tigusinerup kingorna sapaatit akunnerisa marluk iluanni tunngavilersukkamik allaganngorlugu qaffaaniarnermut akerliliissummik saqqummiussissaaq. Attartortitsisup ineqarnermut akiliummik qaffaanissaminik piumasaqarnini aalajangiusimaannaruniuk suliaq sapaatit akunneri arfinillit qaangiutsinnagit eqqartuussivinnut suliakkiissutigissavaa, ineqarnermut akiliutip aalajangiusimaannarnissaa piumasaqaatigalugu.

Eqqartuussivimmut suliakkiineq atuuttussanngortitsivinnermik kinguneqassanngilaq, tak. imm. 2, kisiannili tamatuma kingorna ineqarnermut akiliut eqqartuussiviup aalajangiinera naapertorlugu iluarsiivigineqassaaq, aammalu ineqarnermut akiliisitsisoqarpallaarsimappat kingumoortumik atuuttussanngortinneqassalluni.

Imm. 3-mi aalajangerneqarpoq, ineqarnermut akiliisitsivallaarutinik iluarsiineq eqqartuussiviup aalajangiineraniit kingusinnerpaamik qaammatit pingasut qaangiunnerini pisimanngippat, attartortup kingusinaarluni akiliinermi il.il. ernialersuisarneq pillugu inatsimmi maleruagassat malillugit ineqarnermut akiliivallaarutit ernialerneqarnissaat piumasarisinnaagaa.


§ 35-mut

§ 35 Inatsisartut peqqussutaanni nr. 5-imi, 31. maj 2001-imeersumi kingusinnerusukkut allannguuteqartumi § 15-imut assingusuuvoq.

Inissiami inimik attartornermut akiliutip annerpaaffissaa inissiami init amerlassusaannut naleqqiullugu naatsorsorneqassaaq. Aalajangersagaq taamaallaat ininut najugassianut, Kalaallit Nunaanni illuutit pillugit maleruagassani 1982-imeersuni, ininut minnerpaamik 12,5 m3-nut, sikaaviit aalaakkaasut inimiittut inimilu tassaniittussat ilanngullugit minnerpaamik 6 m2-nik nateqartunut ilassutitaqartinneqartuni nassuiarneqartunut tunngasuuvoq. Illuni quleriinni init qilaamut portussusaat minnerpaamik 230 cm-iussapput, aammalu init ilaqutariinnut ataatsinut illuniittut, illuni sanileriinniittut, illuni uiguleriinniittut assigisaanniittulluunniit 210 cm-iussallutik.

Imm. 2-p atuutilerneratigut inini attartortitsisup nammineq najugaata ilaanniittuni attartornermut akiliutit qaffanneqarnissaat qaammammik ataatsimut sioqqutsisumik ilisimatitsissuteqareernikkut pisassapput. Ininut allanut, tassalu ininut attartortitsisup nammineq inissiatut najugarinngisaaniittunut tunngatillugu qaammatinik pingasunik sioqqutsisumik ilisimatitsisoqartassaaq. Siumoortumik nalunaarutit allaganngorlugit tunniunneqartut atuuttussaatinneqassapput.


§ 36-mut

Aalajangersakkap atuutilerneratigut §§ 30-35-mi atorunnaarsitsinissamut maleruagassat attartortumut illersuutitut sunniuteqarput.


§ 37-mut

Aalajangersakkap atuutilerneratigut inissianik allaffissornikkut aqutsisoq taarsigassarsinermut uppernarsaatinut suliarinerinut sullissinermut akileeqqusisinnaavoq, kiisalu qaammatikkaartumik akilersukkat akilersinniarneqarnerinut qaammammoortumik akiliuteqartitsisinnaalluni. Kiisalu allaffissornikkut aqutsisoq aamma akiliinngitsoornermi nukingisaaruteqarnermut sullisinermut akiliisitsisinnaavoq.

Aalajangersakkami siunertaavoq allaffissornikkut aqutsinerup sapinngisamik ersarinnerpaamik ingerlanneqarnissaa. Tamatuma ilaatigut kingunerisaanik attartortut akiliutit pillugit apeqquteqartut taakkuttaaq namminneerlutik akilertalissavaat.

Taamaattorli tamanna inunnut, ukiumut isertitat akileraaruteqaataasussat piffissami pineqartumi naatsorsorneqartut ineqarnermut tapiiffigineqarnissamut killissarititaasut inorlugit amerlassuseqarpata atuutissanngilaq. Inissarsiortoq sullissinermut akiligassamik taassuminnga akiliisannginnissamik kissaateqartoq inoqutigiit ukiumut isertitassaattut naatsorsuutigineqartut killissarititaasut inorlugit amerlassuseqarnerat uppernarsassavaa, soorlu qaammatini pingasuni akissarsiat allagartaannik, piffissamut naatsorsuutaagallartunik, ingerlatsivimmiit uppernarsaammik imaluunniit nalunaarummik allamilluunniit akuerisaasumik takutitsinikkut.

Attartortup akiliummik akiliinngitsoortinneqarsinnaaneranut aalajangiinermi, attartortup ukiumi pineqartumi isertitarisimasai malillugit ineqarnermut tapiiffigineqarnissamut killiliussat atorneqassapput, attartortup ukiumi kingullermi isertitarisai pinnagit. Tamatumunnga peqqutaavoq attartortup piffissami pineqartumi isertitaasa annertussusaat ineqartup akiliisinngitsoorneqarsinnaaneranut tunngavissatut pingaarnerusariaqarnerat.

Namminersornerullutik Oqartussat aningaasatigut killissarititaasut, nammineerluni akilertagassat aammalu ineqarnermut tapiissutinut minnerpaaffissat annerpaaffissallu pillugit Nalunaarutaat nr. 34, 13. september 2001-meersoq naapertorlugu aningaasatigut killissarititaasut massakkorpiaq imatut isikkoqarput:

Kr. 180.000-it inoqutigiinnut meerartaqanngitsunut.
Kr. 372.000-it inoqutigiinnut ataatsimik meerartalinnut.
Kr. 396.000-it inoqutigiinnut marlunnik meerartalinnut.
Kr. 408.000-it inoqutigiinnut pingasunik meerartalinnut.
Kr. 416.000-it inoqutigiinnut sisamanik meerartalinnut.
Kr. 428.000-it inoqutigiinnut tallimanut meerartalinnut.
Kr. 444.000-it inoqutigiinnut arfinilinnik amerlanerusunilluunniit meerartalinnut.

Suliassaqarfiup nutaanik nalunaarusiorfigineqartarnera malittaralugu aningaasatigut killiliussat allanngortikkiartuaarneqassapput.

Attartortoq aningaasaqarnini pillugu eqqunngitsunik paasissutissiippat, taamaalillunilu sullissinermut akilersuinerminut akiliuteqartinneqartannginneq angusimappagu, tamanna qularnaveeqqusiinissamut taarsigassarsianik sumiginnaanertut isigineqassaaq, qularnaveeqqutissatullu akiligassaq erniinnaartumik akiligassanngortinneqassalluni.

Attartortup attartukkaminik qimatsineranut atatillugu attartortitsisup qularnaveeqqusiissut immikkullu qularnaveeqqusiissut, tak. § 50, imm. 5, attartortumut piumasaqaatinut matusissutissatut atorsinnaavai. Qularnaveeqqusiissut immikkullu qularnaveeqqusiissut attartortup attartugaanut atatillugu attartortitsisup piumasarisinnaasaanut tamanut matussutissanut atorneqarsinnaavoq.


§ 38-mut

Aalajangersakkami attartortup ineqarnermut akiliutinik attartornermilu akiligassanik allanik piffissaq attartornermut isumaqatigiissummi aalajangerneqartoq eqqorlugu akiliiffissamut attartortitsisup innersuussinissamut pisussaaffigisaanut, kiisalu akileeriaaseq attartortitsisup toqqarsimasaa atorlugu akiliinissamut pisussaaffeqarnera aalajangersarneqarpoq. Attartortitsisoq akiliiffissamik innersuussisimanngippat, ineqarnermut akiliut attartortitsisup niuerfianut akilerneqassaaq.


§ 39-mut

Aalajangersakkakkut attartortup attartornerup taamaatineqarnera imaluunniit piffissamut aalajangersimasumut killiligaanera peqqutigalugu atorunnaarnissaata tungaanut ineqarnermut akiliinissamik pisussaaffeqarnera erseqqissarneqarpoq.


§ 40-mut

Aalajangersakkakkut inissiamik namminerisamik pigineqartumik attartortitsisup qularnaveqqummut, aallarniummut ineqarnermullu akiliutissanik ataatsimoortunik qanoq amerlatigisunik siumoortumik akileeqqusisinnaanera killilerneqarpoq.


§ 41-mut

Attartortitsisoq kiassanermik imermillu kissartumik attartortumut pilersuisuusoq, attartortitsisup attartortup kiassarnermut imermullu kissartumut atugaanut aningaasartuutimi utertitussaavai. Attartortitsisoq kiassarnermut naatsorsuutinik immikkut suliaqassaaq, tassanilu aningaasartuutinit tamakkiisunit attartortitsisup akiligassai allassimassapput, taakkulu attartortup akiliutigigallagaannut ataqatigiissinneqarsinnaassapput.

Imm. 2-p atuutilerneratigut attartortoq akilerallagassaminik qaammatikkaartumik akiligassinneqartassaaq, naak attartortup atuinera ukiumoortumik naatsorsorneqartaraluartoq. Imm. 3 naapertorlugu attartortitsisoq kiassarnermut naatsorsuusiornermini allaffissornermut akiliuteqartitsisinnaavoq, aammalu imm. 4 naapertorlugu Naalakkersuisut kiassanermut naatsorsuusiorneq, aningaasartuutit attartortunut agguarneqartarnerat, akiliisarneq aamma kiassarnermut akiliutissat iluarsiivigineqartarnerat pillugit maleruagassiorsinnaapput.


§ 42-mut

Aalajangersakkami attartortitsisup kiassarnermut naatsorsuutinik saqqummiussinissaanut piffissat suut malinneqassanersut, kiisalu piffissaliussat malinneqanngippata tamatuma attartortitsisumut kingunerisinnaasai aalajangersarneqarput. Pisarneq malillugu saqqummiussineq attartortitsisup niuerfiani pisarpoq, soorlu INI-p immikkoortortaqarfiini kommunellu allaffiini. Saqqummiineq assersuutigalugu najukkami nivinngaavinnut nivinngaanikkut, imaluunniit aviisitigut nuna tamakkerlugu saqqummersartutigut imaluunniit najukkani aviisitigut sapaatit akunnikkaartumik saqqummersartutigut ilanngussinikkut pisinnaavoq.

Attartortitsisup kingusinnerpaamik juunip ulluisa 30-anni kiassarnermut naatsorsuutit saqqummiussimanngippagit, attartortup naatsorsuutit inaarutaasut malillugit pisassami akilerneqarnissaasa tungaanut, Kalaallit Nunaanni aningaaserivimmi uninngasuutinut erniat sukkulluunniit qaffasinnerpaatinneqartut annertoqataannik ernialersussallugit pisinnaatitaavoq.

Taamatuttaaq aalajangersakkami attartortitsisup saniatigut akiligassat imaluunniit utertoorutissat pillugit attartortumut ilisimatitsissuteqarnissaanut piffissaliussat maleruagassallu, kiisalu attartortup kiassarnermut naatsorsuutinut akerliissuteqarsinnaaneranut aammalu malittarisassat malinneqannginnerini tamatuma attartortitsisumut kingunerisassai pillugit maleruagassat aalajangersarneqarput. Piffissaliussatut allanneqartut ukiut arlallit ingerlanerini ilanngunneqartarsimapput. Danskit attartorneq pillugu inatsisaanni maleruagassanut naleqqiullugu aalajangersakkap oqaasertaliornerisa kingunerisaannik attartortitsisoq attartortumik nalunaarummik nassiussisimappat piffissaliussat malinneqarsimassapput. Piffissaq nassiussiffiusoq piffissaliussap killissaanut apeqqutaasussatut toqqarneqarpoq, attartortup nalunaarummik tigusiffia pinnani, tamatumanilu allakkat Kalaallit Nunaanni ingerlaartarnerisa, pingaartumik nunaqarfinnut isorliunerusunullu, allanngorarneranni misilittakkat tunngavigineqarput.


§ 43-mut

Aalajangersakkami kiassarnermut naatsorsuutit suliarineqareernerisa saqqummiunneqareernerisalu kingorna avataaniit pilersuisunit, soorlu Nukissiorfinnit akiligassanut iluarsiissutinik takkuttoqarsinnaanera iluarsiivigineqarpoq. Taakku tassaasinnaapput utertoorutit imaluunniit akilikkat saniatigut akiligassat. Naatsorsuutiginngisamik akilikkanut iluarsiissutissanik takkuttoqartillugu, aningaasartuutissat ukiumut kiassarnermut naatsorsuuteqarfiusumut tullermut nuunneqarsinnaapput.

Tamatumani soorlu qaammatit pingasukkaarlugit akiligassanik kukkusumik piffissaliinerinnaap peqqutaannginnissaa, kisiannili akiligassanut iluarsiissutissat naatsorsuutiginngisat siumullu ilisimariinngisat pineqarnissaat piumasarineqarpoq. Aalajangersakkamissaaq attartortut akerliliissuteqarsinnaaneranut piffissaq naareersoq aningaasartuutit attartortut akornanni kukkusumik agguarneqarsimasut paasineqarpat, iluarsiissutissat qanoq attartortut akornanni iluarsineqassanersut aalajangersarneqarpoq.


§ 44-mut

Aalajangersakkami kikkut attartortunut ataasiakkaanut imermut akiligassiisassanersut aalajangersarneqarpoq. Tassani imeq pilersuisutut ingerlatseqatigiiffimmiit toqqaannartumik tunniunneqartarnersoq imaluunniit attartortitsisoq attartortumut imermik pilersuisuunersoq immikkoortinneqarput.

Pilersuisutut ingerlatseqatigiiffik attartortumut imermik pilersuisuuppat, tamanna pilersuisutut ingerlatseqatigiiffiup pilersuinermut piumasaqaatai nalinginnaasut naapertorlugu ingerlanneqassaaq.

Attartortitsisoq attartortumut imermik pilersuisuuppat, attartortitsisup aningaasartuutini attartortumit utertittussavi. Illuummi inissiat immikkut imermik uuttuusersugaanersut uuttuusersugaannginnersulluunniit tassani immikkoortinneqarput. Taakkunani marluusuni attartortup uterterlugit akilersitassai suunersut iluarsiivigineqarpoq.

Naalakkersuisut atuaasarneq imermullu atukkamut akiliisitsiniartarneq, kiisalu imermut naatsorsuusiortarneq pillugu sukumiisunik maleruagassiorsinnaapput.


§ 45-mut

Aalajangersakkap atuutilerneratigut inissianik attartortittakkanik pigisaqartup inissiaatini isumannaatsumik aserfallatsaaliorneqarnissaat pisussaaffigaa. Piginnittoq aserfallatsaaliugassanik aalajangersimasunik piffissani aalajangersimasuni suliaqarnissamik pisussaaffilerneqanngilaq, kisianni piginnittoq pisussaavoq illup attartukkallu pissusia eqqarsaatigalugu pisariaqartitsiviusuni nutarterissalluni iluarsaassissallunilu. Tamanna qanoq akulikitsigisumik pisassanersoq piginnittup pisunut aalajangersimasunut naliliinera tunngavigineqartassaaq.

Taamaattumik attartortup inissiamik tigusinerminut atatillugu piumasarisinnaavaa inissiaq isumannaatsumik aserfallatsaaliorneqarsimassasoq aammalu nalinginnaasumik iluarsaanneqassalluni, kiisalu atortulersuutit pitsaasuussasut atorsinnaassallutillu. Attartortup inissiamut iserternerminut atatillugu attartortoq immikkut ittumik aserfallatsaaliugassanik suliaqarnissamut piumasarisinnaanngilaa.

Attartortup inissiaq nalinginnaasumik aserfallatsaaliugaq tiguguniuk, attartornermi nalaani inissiap iluani aserfallatsaaliuinissaq akisussaaffigaa aningaasartuutinullu akiliisartussaalluni, tassanilu pineqarput qilaat qalipallugit qaqorsarnissaat, iikkat qalipanneqartarnerat aamma / imaluunniit ungalitsersorneqarnissaat kiisalu natit lakkerneqartarnerat. Attartortup attartornermi nalaani inissiami aserfallatsaaliugassat pisussaaffigaa, taakkulu akulikitsigisumik pisassapput, taamaaliornikkut nalinginnaasumik nungullarnerit pisoqalisullu saniatigut inissiaq ajorseriartinnaveersaarneqassalluni.


§ 46-mut

Aalajangersakkap atuutilerneratigut § 45-mi Namminersornerullutik Oqartussat kommunellu inissiaataanni aserfallatsaaliuinissamut maleruagassat inissiani namminerisamik pigisani attartortitsinermut atorneqalissapput. Taamaattorli illuatungeriit isumaqatigiissuteqarnermikkut tamanna sanioqqussinnaavaat.


§ 47-mut

Aalajangersakkap atuutilerneratigut attartortitsisup attartorneqartoq piffissamit attartornissap aallartiffissaaniit pitsaasumik illersorsinnaasumillu pitsaassuseqartillugu attartortumut atugassanngortissavaa. Tassa attartortup iserternerani iikkat, qilaat naqqillu nalinginnaasumik iluarsaanneqarsimassapput, inissiaq eqqiarneqarsimassaaq, igalaavi, sikaaviit matui aamma matut ilivitsuussapput, taamatullu matut atorsinnaasunik paarnaarsaateqassallutik.

Aalajangersakkami erseqqissarneqarpoq inissiamut iserternissamut atatillugu attartugassamik takuniaasoqassasoq inissiamullu iserternermut nalunaarusiortoqassalluni. Attartortoq nalunaarummut oqaaseqaatissaqaruni, inissiamut iserternerminiit sapaatit akunneri marluk qaangiutsinnagit tamanna nalunaarutigissavaa, tamatumani ajoqutit amigaatillu ersinngitsut pineqanngippata.

Iserternissamut takuniaasoqarsimanngippat attartortup iserterneraniit ullut 14-it qaangiutsinnagit attartortumit uparuarneqarsimasut pillugit attartortitsisup attartortoq amigaatinik iluarseeqqusinnaanngilaa.


§ 48-mut

Aalajangersakkami attartortup attartukkaminik isumannaatsumik atuisussaanera, taamatullu attartortup attartukkamik atuinerminik allanut tunniussisussaannginnera imaluunniit attartortitsisoq akuersiteqqaarnagu attartukkap inissiatut atornagu siunertanut allanut atorneqarsinnaannginnera aalajangersarneqarpoq.

Attartortup attartugaq isumannaatsumik paarijuartussaavaa. Tassani attartukkami aserortut, attartortitsisup pitsaasumik isumannaatsumillu pitsaassuseqartinnissaannik akisussaaffigisaat aamma attartukkami attartortup aserfallatsaalissallugit akisussaaffigisaat immikkoortinneqarput. Attartortitsisup akisussaaffigisaani peratarsinnaasumik aserortoqarpat, attartortup attartortitsisoq tamanna pillugu ilimatissavaa, taamaalilluni attartortitsisup ajoquserneq iluarsissallugu periarfissinneqassalluni.

Attartortup attartukkani isumaqatigiissutaasumit allaanerusumut atorsinnaanngilaa. Tassalu inissiamiit inuussutissarsiutinik ingerlatseqqusaanngilaq, tamatumani nammineq inuttut sullissineq, nerisassiuussineq, nerisassanik kissartunik assartuineq, nujalerineq, ulluunerani meeqqanik paarsineq, immiaaqqanik, viinninik, imigassanik aalakoornatulinnik ikiaroornartunilluunniit nioqquteqarneq pineqaraluarpalluunniit. Inuussutissarsiutit taagorneqartut nassaqartussaapput sullitat aqqusaartuilernerannik imaluunniit attartorneqartumik pissusissamisuunngitsumik nungullartitsiartornermik kinguneqartartut.

Taamatuttaaq aalajangersakkap atuutilerneratigut attartortoq attartugaq qimavillugu anisimappat, attartortup tunngavissaqanngitsumik kinguartiterinani tamanna pillugu attartortitsisumut nalunaaruteqassaaq. Attartortitsisumut nalunaaruteqannginneq attartortitsisup attartukkamut atorunnaarsitsineranik kinguneqarsinnaavoq.


§ 49-mut

Aalajangersakkap atuutilerneratigut attartortoq pisussaavoq aalajangersakkami taaneqartunik pisoqartillugu attartortitsisoq inissiamut isernissaanut akuerissallugu. Attartortitsisup attartortoq suliassanik aallartitsinissaq siumoortumik nalunaarfigisussaavaa, tamatumani suliassat kinguartinneqarsinnaanngitsut, soorlu imermik innarlikkanik, atortulersuutit ajoquserlutik, ikuallannernik allanillu illuummut najugaqartunullu ulorianartorsiortitsisinnaasunik iluarsaassinissaq pineqartinnagu. Iluarsaassinerit sapinngisamik attartortumut najugaqartunullu allanut annikinnerpaamik ajoqutaasumik suliarineqassapput, tunngavissaqanngitsumillu kinguartiterneqaratik naammassineqassallutik.


§ 50-imut

Aalajangersakkami erseqqissarneqarpoq attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi torersaarnissamut maleruagassat maleruassagaat. Attartortup ajoqusikkat inuit taagorneqartut attartukkami ajoqusersimasinnaasaat akisussaaffigai.

Immikkoortortami siulersuisut torersaarnissamut maleruagassanut ilassutaasunik aalajangersaasinnaapput. Taakku tassaasinnaapput inissiap iluani atisanik panerseeqqusaannginneq, sapaatikkut sakkunik atueqqusaannginneq imaluunniit raadiunut fjernsyninullu antenninik illuummut ikkusseqqusaannginneq.

Aallaaviatigut Namminersornerullutik Oqartussat kommunellu inissiaataanni attartortittakkani qimmeqarnissaq qitsuuteqarnissarlu inerteqqutaavoq. Attartortoq peqqussutip matuma atuutilernerani maleruagassanik unioqqutitsinani inissiami attartortittakkami qimmeqartoq qitsuuteqartorluunniit uumasuutip toqunissaata tungaanut imaluunniit attartortup arlaannik peqquteqarluni uumasuutaarunnissaata tungaanut qimmeqarsinnaavoq qitsuuteqarsinnaallunilu.

Taamaattorli ilaqutariinnut ataatsinut illuni illunilu affarleriinni attartortup attartortitsisumut allakkatigut qimmiuteqarnissaq qitsuuteqarnissarlu qinnutigisinnaavaa. Qimmeqarnissamut qitsuuteqarnissamulluunniit akuersissuteqarnermi attartortitsisup qaammatini pingasuni ineqarnermut akiliutip annertoqataanik immikkut sillimanissamut akiliuteqarnissaq piumasarisinnaavaa. Uumasuutip toqunerani imaluunniit attartortoq arlaannik peqquteqarluni uumasuuteqarunnaarpat, attartortitsisoq illuut attartugarlu takuniarlugit attartortup sillimmasiissutaanik tigumminniinnarnissamut piumasaqaatit atuukkunnaarsimanersut, aammalu aningaasat utertinneqassanersut aalajangersinnaavoq.


§ 51-imut

Aalajangersakkap atuutilerneratigut attartortoq attartortitsisumut allakkatigut akuersissummik piniaqqaarluni attartukkamini atortulersuutinik assigiinngitsunik atortulersuutinut taamaattunut ikkuffissanik piareersimasoqareertinnagu ikkussuisinnaavoq, taakkulu tassaasinnaapput errorsiviit, panersiiviit erruiviilluunniit maskiinat.

Attartortitsisoq attartukkat ilusilersugaanera atortuisalu, soorlu innaallagissamut kuuffinnullu tunngatillugu, pisinnaasai atortulersuutinut naammanngitsut isumaqaruni attartortup kissaataanut akerliusinnaavoq.

Pisuni tamani attartortoq ikkussuilinnginnermini attartortitsisumut akuersissummik piniaqqaartassaaq.


§ 52-imut

Aalajangersakkap atuutilerneratigut attartortut ataasiakkaat imaluunniit najugaqatigiiffik ataatsimoorluni attartortitsisumut akuersissummik piniareernikkut attartortitsisup innersuussinera malillugu illuummi radiomut fjernsynimulluunniit antenniliisinnaatitaapput bredbåndimilluunniit ikkussisinnaatitaapput imaluunniit radiomut fjernsynimulluunniit kabelinut attaviliisinnaatitaallutik.

Taamaattorli attartortitsisup ikkussugassaq pineqartoq attartortunut allanut illuummulluunniit ajoqutaasoq uppernarsarsinnaappagu tamanna atuutissanngilaq, taamatullu attartortup kissaatigisaa attartortitsisup ataatsimoorussamik kabelinut antenneqarfinnulluunniit imaluunniit attartortut ataatsimoortumik atugassatut ikkussimasaat aqqutigalugu naammassineqarsinnaappat pisinnaatitaaffik taanna atuutissanngilaq.

Aalajangersakkap atuutilerneratigut attartortut pisussaapput ikkussuinissaq sioqqullugu attartortitsisup allakkatigut akuersissutaanik piniassallutik. Attartortitsisoq ikkussukkap peerneqarnerata kingorna illuutip iluarsaateqqinnissaanut sillimmasiissutissamik attartortut qularnaveeqqusiissuteqarnissaannik piumasaqarsinnaavoq.

Attartortut akuersissutinik tuniniaasartunut isumaqatigiissutaat attartortitsisumit susassarineqanngillat, tassalu najugaqatigiiffimmi attartortut, soorlu fjernsynikkut aallakaatitanik qaammataasakkut tigusisarnissamik kissaateqartut tamatumunnga namminneerlutik akiliisassapput.


§ 53-imut

Aalajangersakkap atuutilerneratigut attartortoq immikkut atortunik ikiorsiissutinik pisariaqartitsisoq attartortitsisoq tamanna pillugu allakkatigut akuersiteqqaarluni ikkussuisinnaatitaavoq. Ikkussukkat tassaasinnaapput kalerrisaarutit, attartukkami allanngortiterinerit imaluunniit immikkut ittumik ilusilersuinerit, soorlu uffartarfimmi igaffimmilu, illup isaariaani majuartarfinnilu majorallaffiliat.

Aalajangersakkattaaq atuutilerneratigut attartukkamit nuunnermut atatillugu attartortitsisoq attartukkap iluarsaateqqinnissaanik piumasaqarsinnaavoq, taassuma ataani iluarsaasseqqinnissamut aningaasartuutinut akiliutissanik kommunalbestyrelsep qularnaveeqqusiinissaa.


§ 54-imut

Aalajangersakkap atuutilerneratigut attartortoq atortut attartortup attartukkamut ikkussuussimasai peqqutaallutik ajoqusikkanut taarsiinissamut akisussaavoq. Attartortitsisup atortunik ikkussuinerminut atatillugu taarseeqqusisoqassagaluarpat piumasaqaatip naammassinissaanut atugassanik sillimmasiissuteqarnissaa piumasarisinnaavaa. Qularnaveeqqusiissutissaq attartortitsisup § 52 naapertorlugu antennilersuinerup kingorna iluarsaasseqqinnissamut sillimmatissanik qularnaveeqqusiinissamut piumasaqarsinnaaneranut aamma attartortitsisup § 53 naapertorlugu kommunalbestyrelsep qulanaveeqqusiinissaanik piumasaqarsinnaaneranut atasutut isigineqassaaq.


§ 55-imut

Aalajangersakkap atuutilerneratigut attartortoq attartortitsisumit siumut allaganngorlugu akuersissummik piniaqqaarluni inissiami silataanilu pitsanngorsaasinnaatitaavoq. Pitsanngorsaatit tassaasinnaapput atortut nukissamik sipaarfiusut, atortut imermik sipaarfiusut, nuussineq, iikkanik talulersuutinik piiaaneq ikkussuinerlu, eqqiluisaarnermut atortulersuutit immikkut ittut il.il. Pitsanngorsaatit inissiap inissarsiortunit assigiinngitsunit tamavinnit atorsinnaaneranik piiaassanngillat.

Pitsanngorsaatit attartortitsisumut immikkut ingerlatsinermut aserfallatsaaliinermullu aningaasartuutinik kinguneqassappata, ineqarnermut akiliutit amerlaqataannik qaffanneqassapput. Aammattaaq attartortoq inissiap silataani suliassanik, attartukkap nalinganut qaffatsitsisunik, soorlu quinik, aneerasaartarfinnik assigisaannillu suliaqarnissamut allakkatigut akuersissummik piniarsinnaavoq. Allannguineq takuneqarsinnaasutut pitsannguinerussaaq, tassa attartulersinnaasut amerlanersaasa pitsannguutitut isumaqarfigisinnaassavaat, attartortup pineqartup kisimi pinnani.

Attartortup pitsanngorsaataasoq attartortitsisoq akuersiteqqaarnagu suliarisimappagu, pissutsit eqqarsaatigalugit pitsanngorsaaneq attartukkamut mianersugaalliortumik iliornertut isigineqarsinnaavoq, attartortorlu tamatumunnga taarsiinissamut akisussaatinneqassaaq.

Attartortup inissiamiit nuunnerminut atatillugu pitsanngorsaanermut aningaasartuutit akilikkani uppernarsarneqarsimasut ajunngitsorsiatut taarsertissallugit pisinnaatitaaffeqarpoq. Ajunngitsorsiassatq maleruagassat Naalakkersuisunit aalajangersarneqartut malillugit naatsorsorneqassaaq. Taamaattorli atortulersuutit nukissamik atuineruffiusut imaluunniit inuulluataarniutaaneri ersarissut ajunngitsorsissutaasinnaanngillat.


§ 56-imut

Aalajangersakkap atuutilerneratigut attartortitsisup attartortumut akileqqusani, soorlu inissiamit aninermi akiligassat, ineqarnermut akiligassat akilinngitsuukkat, kiassarnermut iluarsiissutit il.il. attartortitsisup attartortumut ajunngitsorsiassanik akiliineranut atatillugu iluarsiivigitissinnaavai. Ajunngitsorsiassat attartortup pitsanngorsaaneraniit qaammatinut 100-nut amerlaqatigiinnik aningaasartalerlugit nalikilliartuaartinneqassapput.

Ajunngitsorsiassat attartortup attartortitsisumit pisassarisai attartortup pitsanngorsaaneraniit qaammatinut 100-nut amerlaqatigiinnik aningaasartalerlugit nalikilliartuaartinneqassapput. Kinguliani assersuutigineqartumi taarsiissutissat qanoq naatsorsorneqarsinnaanersut takutinneqarpoq:

Attartortoq inissiami najukkamini kr. 20.000-it nalinginut pitsanngorsaavoq.

Attartortoq pitsanngorsaanerup naammassineraniit qaammatit 30-it qaangiuttut inissiamit najukkaminit nuuppoq.

Attartortitsisup attartortumut ajunngitsorsiarititassai qaammammut 20.000 / qaammatit 100-t = kr. 200-nik amerlassuseqarput. Ajunngitsorsiassat pitsanngorsaanerup naammassineraniit qaammatit, attartortup qaammatinit 100-uusunit inissiami najugaqarfiginngisai kisiisa tunngavigalugit akilerneqartussaapput.

Attartortoq qaammatit 30-t qaangiunnerini nuuppat, attartortoq qaammatinut 70-inut, attartortup inissiami najugaqarfiginngisaanut ajunngitsorsitinneqassaaq, taamaalillunilu attartortup inissiami pitsannguinera iluaqutiginngitsuussallugu.

Taamaattumik attartortoq qaammatit 70-it à kr. 200 = kr. 14.000-inik ajunngitsorsitinneqassaaq.

Attartortup nutaap inissiamik attartulernermini attartukkap anisup pitsanngorsagai tigussavai, tamatumunngalu atatillugu piffissami tigusiviusumi pitsanngorsakkap nalinganut akiliisalissalluni. Tamanna ineqarnermut akiliutip qaffanneratigut pitsanngorsaanerup nalingata sinnera illuatungilerneqassaaq. Attartornermut qaffaataasoq piffissap nalikilliartortitsiviusup qaammatinik 100-nik sivisussuseqartup naanerani unitsinneqassaaq. Attartortut pingajuat, qaammatit 100-t taakku iluanni pitsanngorsakkanik tigusisoq siornatigut attartortuusimasutut aamma pineqassaaq.

Attartortup pitsanngorsaanermik suliaqartup tamatumunnga atatillugu aningaasartuutit tamaasa akilissavai. Attartortoq taanna piffissap nalikilliartuaartitsiviusup qaammatinik 100-nik sivisussuseqartup iluani attartukkamiit nuuppat, attartortitsisup aningaasat nalikilliliissutaasut attartortumut ajunngitsorsiaritissanngilai. Attartortut tulliuttut attartortitsisup pitsanngorsaanermut aningaasanik utertitsinerminut atatillugu akilerallarsimasinnaasai kisiisa matussusissavaat.


§ 57-imut

Aalajangersakkap atuutilerneratigut Naalakkersuisut attartortup pitsanngorsaavigisinnaasai suliarisinnaasaalu allat, aammalu taakku angissusissaat, naatsorsorneqarnissaat ajunngitsorsiassanillu akilerneqartarnissaat pillugu sukumiinerusunik maleruagassiussallutik pisinnaatinneqarput.

Kiisalu attartortitsisup qinnuteqaatinik suliarinninnerminut sullissinermut akiliuteqartoqarnissaanik piumasaqarsinnaanera periarfissinneqarpoq, tak. §§ 51 aamma 55. Sullissinermut akiliutissaq attartortitsisup qinnuteqaammik suliarinninneranut aningaasartuutinut matusissutigineqassaaq, taannalu qinnuteqartup immikkut sullinneqarnissamut akiliisarnissaanut ersiutaavoq.


§ 58-imut

Aalajangersakkami imm. 1-ip atuutilerneratigut attartortup attartornermut isumaqatigiissut maleruarsimaguniuk, attartortoq inigisaminik qimatsisimagallarnermini inigisaminik qaammatit aqqaneq-marluk tikillugit allamut attartortitsigallarnissamut pisinnaatitaavoq. Attartortoq qaammatinit pingasunit sivikinnerusumik attartukkaminik allamut attartortitsigallarsinnaanngilaq, tamatumunngalu pissutaavoq attartukkamik allamut attartortitsigallarnissamut isumaqatigiissutip suliarineqarnissaa allaffissornertaqarmat. Taassuma saniatigut allamik killiliisoqarpoq, tassalu attartortup inissiaq attartukkani ukiut tallimat ingerlanerini katillugit qaammatini aqqaneq-marlunni taamaallaat allamut attartortikkallarsinnaavaa. Tamatumuunakkut akornuserniarneqarpoq aattartortup inissiaq attartukkani ingerlaannartumik allamut attartortitsigallartarnissaa, annertunerusumik nammineq tassunga atassuteqarani. Qaammatit pingasut aqqaneq-marlullu akornanni attartukkamik allamut attartortitsigallarsinnaanermut pisinnaatitaaffik nutaajuvoq. Aalajangersagaq attartortup qilersorsimannginnerulernissaa anguniarlugu ilanngunneqarpoq, soorlu assersuutigalugu piffissami aalajangersimasumi aaparilikkami misiliilluni najugaqateqarsinnaalersillugu, tamatumalu saniatigut piffissap naanerani attartortoq inissiamut nammineq attartukkaminut uteqqinnissani kissaatigiguniuk uteqqinnissamut pisinnaatitaaffia pigiinnarneqassaaq.

Siuliani piffissamut killiliussat apeqqutaatinnagit attartortup attartornermut isumaqatigiissummik malinnissimasup qaammatit aqqaneq-marluk sinnerlugu peqannginnissani pissutigalugu inissiaq najukkani allamut attartortikkallarniarlugu qinnuteqarsinnaavoq. Taamaattorli attartortitsisoq attartukkamik allamut attartortitsigallarniarnermut akerliliisinnaavoq, inissiami najugaqartussat amerlassusaat inissiap angissusaanut naapertuutinngippata. Aamma attartortitsisoq attartukkamik allamut attartortitsigallarniarnermut akerliusinnaavoq tunngavissaqarluartumik tamatumunnga pissutissaqaruni, soorlu inissiaq inummut ataatsimut amerlanerusunulluunniit, siusinnerusukkut attartortitsisumut attartornermut isumaqatigiissummik sumiginnaasimasunut, aammalu tamatumunnga atatillugu attartortitsisup annaasaanut taarsiisimanngitsunut attartortikkallarniarneqarpat.

Peqanngikkallarnissaq qaammatit aqqaneq-marluk sinnerlugit sivisussuseqartussaanersoq naliliinermi nalinginnaasumik attartukkamik allamut attartortitsigallarnissaq akuerineqarsinnaavoq piffissami aalajangikkami pineqaatissinneqarluni pinerluuteqarsimasunik inissiisarfimmiittussanngornermi, illoqarfimmi allami nunamiluunniit allami nappaatip katsorsarneqarnerani, suliffimmiit nuutsinneqarallarnermi allamulluunniit suliartortineqarnermi, tamanna attartortup nammineerluni piumasarisimagaluarpagu, imaluunniit qanorluunniit ilinniagaqarnermik pissuteqarsimagaluarpat.

Attartortoq attartukkamik attartortinneqarallartumiit attartortup nammineerluni inissiamut aningaasartuutaanit tamakkiisunit inissiamik pequsersukkamik attartortitsigallarnermut annikitsunik akiliuteqartitsinermik ilaqartinneqartunit annerusumik akiliiffigineqassanngilaq. Attartortup aningaasannanniutigalugu inissiamik attartukkaminik allamut attartortitsigallarsinnaanissaa pinaveersaartinniarlugu aalajangersagaq ilanngunneqarpoq.

Aalajangersakkattaaq atuutilerneratigut attartortup attartukkaminik allamut attartortitsigallarnissamut akuerineqarnissamut taarsiullugu piffissap peqanngiffiusup naanerani inissiamut allamut innersuunneqarnissamut qularnaveeqqusiiffigineqarluni inissiaq attartorunnaarlugu taamaatissinnaavaa.


§ 59-imut

Aalajangersakkami attartortup nammineq kissaatigisamik nuunniarluni utaqqisut allattorsimaffianut allatsissinnaanermut inissiamillu paarlaasseqatigiinnissamik pisinnaatitaaffeqarnera iluarsineqarpoq. Attartortoq attartortumik allamik inissiamik paarlaasseqatissaminik nassaarsimanngikkuni nammineq kissaatigisamik nuunniarluni utaqqisut allattorsimaffiannut allatsinnissaq iluaqutigisinnaavaa. Taamaalilluni attartortitsisoq attartortup inissiamik pilerigisaminik takkuttoqarpat paarlaassinissamik kissaateqarnera ilisimariissavaa. Attartortorli attartortumik allamik inissiamik paarlaasserusuttumik nassaareersimappat nammineq kissaatigisamik nuunniarluni utaqqisut allattorsimaffiannut allatsinnissaq pisariaqassanngilaq.

Attartortut inissiamik paarlaakkusuttut marluullutik attartornermut isumaqatigiissutinik malinnissimanissaat piumasaqaataavoq. Attartortitsisup inissiamik taartigiinnissamik qinnuteqaatinik suliaqarnera ullunit 14-init sivisunerusariaqanngilaq.

Attartortitsisoq inissianik paarlaasseqatigiinnermut attartorneqartumut ataatsimut 250 kr.-inik sullissinermut akiliisitsisinnaavoq. Akiligassaq inissianik paarlaannermut atatillugu akilerneqassaaq, taannalu attartortitsisup attartornermut isumaqatigiissutinik nutaanik suliaqarneranut taakkununngalu atatillugu allaffissornikut aqutsinermut aningaasartuutinut matusissutigineqassaaq.

Attartortup inissianik taartigiinnermi periarfissat marluusut arlaat toqqarsinaavaa.

Periarfissaq ajornannginnerusoq siulleq tassaavoq attartortut attartukkaminnik paarlaallutik attartornermik ingerlatsiinnarnissaat. Attartornermut isumaqatigiissutiminni pisinnaatitaaffiit pisussaatitaaffiillu paarlaatissavaat. Oqaatigiinnavillugu oqartoqarsinnaavoq attartornermut isumaqatigiissutit aallaqqaataanni atit titaannarlugit paarlaanneqassapput. Attartortut qularnaveeqqusiinermut assigiinngitsunik akiligaqarsimappata, tamanna attartortitsisumit susassarineqanngilaq, tamatumanilu piumasarineqarpoq attartortut namminneerlutik iluarsiissasut. Attartortut attartukkanik paarlaannermi inatsitigut sunniutissat pillugit attartortitsisumit ilitsersuunneqarnissartik pisinnaatitaaffigaat, isumaqatigiissutit kingusinnerusukkut aningaasaqarnermut sunniutissanit annerusunit eqqugaasinnaammat, attartortup aappaata assersuutigalugu inissiaq najukkani nungullartingaatsiarsimappagu, attartortullu aappaata najukkani paarilluarsimagaa. Periaaseq taanna attartornerit marluusut tamarmik 1. januar 2002-mi kingusinnerusukkulluunniit aallartinneqarsimappata aatsaat atorneqarsinnaavoq. Taamatut piffissamik killiliinikkut inissiat pisoqqat nungullarsimasorujussuillu inissianik nutaanerungaatsiartunik taarserneqartarnissaat pinngitsoortinniarneqarpoq.

Periaaseq taanna ajornanngitsuararsuuvoq, kisiannili paarlattuanik attartortup kingusinnerusukkut aningaasartuutissat, attartortup aappaata inissiamut, attartortup paarlaaffigisaanut akiligassanngortitarisimasai akilertussanngorsinnaavai.

Periaatsip aappaani attartornermut isumaqatigiissummik nutaamik atuuttussanngortitsisoqarsinnaavoq. Attartornermut isumaqatigiissutaasimasut atorunnaarsinneqassapput inissiallu nalinginnaasumik iluarsaanneqassallutik, imaluunniit inissianik paarlaasseqatigiinnermi nalinginnaasumik iluarsaanneqarsimasutut isikkoqassallutik. Attartortut attartukkaminnut nutaamut qularnaveqqutissanik nutaanik akiliissapput, attartortitsisorlu attartortut attartorsimasaminnut qularnaveeqqusiissutinut akilersimasaannut iluarsiissuteqassaaq.

Attartortut attartukkamut nutaamut iserternerminnut atatillugu namminneerlutik nalinginnaasumik iluarsaassiniarlutik allakkatigut nalunaaruteqassapput. Attartukkat marluusut ajorisassaanngippata, aammalu attartortut marluullutik natit nungullalaarsimasut iikkalluunniit annikitsunik simerneqartut ajorinngikkunikkit nalinginnaasumik iluarsaassinissamut aningaasartuutissat sipaarusukkunikku taamaaliornissaq attartortut toqqarunikku iluaqutigisinnaavaat. Attartortut namminneerlutik inissiamut iserternerminni nalinginnaasumik iluarsaassiniarlutik nalunaarutigisimappassuk, inissiat attartortup tungaaniit nalinginnaasumik iluarsaanneqarsimasutut isigineqassapput. Taamaattorli attartortitsisoq attartortup attartukkamini nutaami nalinginnaasumik iluarsaassiniarluni kissaateqarneranut akerliusinnaavoq, attartukkap kingullermik iluarsaanneqarneraniit ukiut tallimat sinnerlugit qaangiussimappata. Aalajangersagaq attartortup kingusinnerusukkut inissiaq paarlaaffigisani qimannialeruniuk attartortup nuunnissaa sioqqullugu attartortup aappaata inissiami najugaqarallarneranut tunngasunut attartortitsisumiit akiligassinneqangaatsiarnissaanut illersorneqarnissaa siunertaralugu ilanngunneqarpoq.

Periaaseq taanna periaatsimut siullermut naleqqiullugu pisariunerulaarpoq, paarlattuanilli attartortoq kingusinnerusukkut aningaasartuutissaanik siumut ilisimariinngisanik tigusaqannginnissaa qulakkeerneqarpoq.

Imm. 4, nr. 2 naapertorlugu inissianik paarlaannermut assersuut: A L1-imi najugaqartoq aamma B L2-mi najugaqartoq inissianik paarlaanniarlutik kissaateqarunik, marluullutik attartukkatik taamaatissavaat, isumaqatigiissutinillu nutaanik atsiorlutik. Tassalu A-p L1-imi attartornini taamaatissavaa, L2-milu attartornermut isumaqatigiissummik nutaamik atsiuissalluni. B-p L2-mi attartornini taamaatissavaa, L1-imilu attartornermut isumaqatigiissummik nutaamik atsiussalluni.

Erseqqissaatigineqassaaq marluullutik aaqqissuussinerup tamarmiusup iluatsinnissaa tatigalugu atsiormata. A-p L2-mi attartornermut isumaqatigiissut nutaaq atsiorsimatsiaannarlugu L2-mi attartornissani nutaaq taamaatippagu, tamanna B-p L1-imi attartornissamut isumaqatigiissutaata atuuttussanngortinneqarneranut sunniuteqassanngilaq.

Attartornermut isumaqatigiissutit inissianik paarlaannerup pinerata kingorna kingusinnerpaamik sapaatit akunnerat ataaseq qaangiutsinnagu atsiorneqartariaqarput. Inissiamik paarlaanneq qaammatip ingerlanerani ullormi sumiluunniit pisinnaavoq.

Attartortut imm. 4, nr. 2-mi maleruagassat malillugit inissianik paarlaanniarpata, aammalu inissiat nalinginnaasumik iluarsaanneqarnissaat toqqarneqarpat, inissiat najugaqarfigineqarnerisa nassatarisaanik nalinginnaasumik iluarsaassinermut atatillugu saniatigut aningaasartuuteqartoqarsinnaavoq. Nalinginnaasumik iluarsaassineq saniatigut aningaasartuuteqarfiussappat, aningaasartuutit attartortumit inissiamit anisussamit akilerneqassapput.

Attartortup aappaa imaluunniit attartortut marluullutik sulisunut inissiani najugaqarpata, inissianik paarlaannissamut attartortitsisoq akuersissuteqartussaavoq. Aalajangersagaq pingaartumik illoqarfinnut Namminersornerullutik Oqartussat kommunellu ataatsimoorlutik inissiaateqarfiginngisaannut, aammalu Namminersornerullutik Oqartussat kommunellu sulisunut inissiaatimik sulisunut suliffimmi pineqartumi atorfeqartinneqartuinnarnut atugassiisarnissamik kissaateqarfigisaannut tunngatinneqarpoq. Taamatut pisoqartillugu attartortitsisup soorlu kommunemi sulisup aamma Namminersornerullutik Oqartussani sulisup inissianik paarlaanniarnerat akueriumanngissinnaavaa.

Aalajangersakkap atuutilerneratigut Naalakkersuisut inissianik paarlaattarneq pillugu sukumiinerusunik maleruagassiorsinnaapput.


§ 60-imut

Aalajangersakkami attartortup toqunerani aapparisaata inooqatigisaatalu qimagaasup toqusup attartorneranik ingerlatitseqqinnissamut tigusinissamullu pisinnaatitaaffeqarnera iluarsiivigineqarpoq. Tamatumani inooqataasup attartukkamik tigusisinnaaneranut piumasarineqarpoq, pineqartup sivikinnerpaamik ukiuni marlunni attartortumut illoqataasimanissaa. Aappaasunut piffissamut killiliisoqanngilaq.

Attartortoq inissiami attartortittakkami nalinginnaasumi najugaqarpat, aappaasoq inooqataasorluunniit qimagaasoq atugassarititaasut atuinnarlugit attartornermik ingerlatseqqiinnarsinnaatitaavoq. Tamanna inissiap inoqutigiinni inuit amerlassusissaannut naapertuunnissaanik piumasaqaatitaqanngilaq, inoqutigiinni inuit amerlassusaat inummik ataatsimik ilanngarmata. Assersuutigalugu aappaasup toqukkut qimagaasup inissiaq attartortittagaq nalinginnaasoq sisamanik initalik tigusinnaavaa, naak aappariit qitornaat marluk angerlarsimaffimmiit nooreeraluartut.

Taamatuttaaq aalajangersakkap atuutilerneratigut aappaasoq inooqataasorlunniit sulisoqarnermut inissiamik inissiatut attartortittakkatut nalinginnaasutut tigusinissamik innersuunneqarsinnaavoq, attartortoq, aappaasoq imaluunniit inooqataasoq toqukkut qimagaasoq tamanna sioqqullugu inissarsiortut allattorsimaffiannut nalinginnaasumut allatsissimappat. Inissarsiortut allattorsimaffiannut nalinginnaasumut allatsissimanissamut piumasaqaateqarnermut tunngaviuvoq, attartortup, aappaasup imaluunniit inooqataasup qimagaasup sulisunut inissiap piffissap ingerlanerani qimanneqarnerani pisortat aqqutigalugit ineqarnissamik soqutiginninnermik takutitsisimanissaat. Tassanissaaq inissiap inoqutigiinni inuit amerlassusissaannut naapertuunnissaanik piumasaqaatitaqanngilaq.

Aammattaaq attartortoq paaqqinnittarfimmut assigisaanulluunniit nuuppat maleruagassat taakku atorneqassapput.

Aalajangersagaq aappariittut inooqatigiinnerinnarmut imaluunniit ataatsimoortumik qitornaliinnarnik atuutinngillat. Aalajangersagaq aamma qatanngutigiit imaluunniit meeqqat angajoqqaallu najugaqatigiinnerannut, imaluunniit najugaqartut eqqarleriinngikkaluarlutik najugaqatigiinnerannut atuutsinneqarpoq.


§ 61-imut

Aalajangersakkap atuutilerneratigut attartortut averuserneranni avinneranniluunniit imaluunniit aappariinnerup atorunnaarsinneqarnerani aappariinni arlaat attartornerup ingerlateqqinnissaanut pisinnaatitaassanersoq aappariit isumaqatigiissutigisinnaavaat. Tassani pissutsit eqqartuussivinniit attartornermik ingerlatitseqqissinnaatitaasoq kinaassanersoq aalajangiisoqarniartillugu pingaartinneqarsinnaasut taagorneqarput. Eqqartuussiviilli aalajangersakkami pissutsinik taagorneqartuinnarnik atuinissamut qilersorsimaneqanngillat.

Averusernerup, avinnerup imaluunniit aappariinnermik atorunnaarsitsinerup kingorna inissiap inoqutigiinni inuit amerlassusissaannut naapertuunnissaanik piumasaqaatitaqanngilaq, inoqutigiinni inuit amerlassusaat inummik ataatsimik ilanngarmata. Assersuutigalugu aappaasup qimagaasup inissiaq attartortittagaq nalinginnaasoq sisamanik initalik tigusinnaavaa, naak aappariit qitornaat marluk angerlarsimaffimmiit nooreeraluartut.

Aalajangersagaq aappaasup aappaa kisimi attartornermut isumaqatigiissummi allassimagaluarpat, imaluunniit aappariit illugiillutik attartornermut isumaqatigiissummi atsiorsimagaluarpata atuutissaaq.

Kiisalu aalajangersakkami allassimavoq, attartortup aappani qimassimappagu aappaasup attartornermut isumaqatigiissummi piumasaqaatit allanngortinnagit attartorneq nangissinnaagaa.


§ 62-imut

Aalajangersakkap atuutilerneratigut inuit sivikinnerpaamik ukiuni marlunni illoqatigiissimasut inooqatigiinnerminnik taamaatitsigunik, arlamik sorliup attartornermut isumaqatigiissummi piumasaqaatit allanngortinnagit attartorneq ingerlatiinnarsinnaassaneraa isumaqatigiissutigisinnaavaat. Attartortitsisoq isumaqatigiissummut akerliusinnaavoq, attartortitsisoq taamaaliornissamut pingaarutilinnik pissutissaqaruni, soorlu attartornermik ingerlatitseqqittussaq siornatigut attartortumut attartornermut isumaqatigiissutaasimasumik sumiginnaasimappat.

Inooqatigiinnerup taamaatinneqarnerata kingorna inissiap inoqutigiinni inuit amerlassusissaannut naapertuunnissaanik piumasaqaatitaqanngilaq, inoqutigiinni inuit amerlassusaat inummik ataatsimik ilanngarnerat pissutigalugu piumasaqaat amerlanertigut naammassineqarsinnaanngimmat. Assersuutigalugu aappaasup qimagaasup inissiaq attartortittagaq nalinginnaasoq sisamanik initalik tigusinnaavaa, naak aappariit qitornaat marluk angerlarsimaffimmiit nooreeraluartut.

Aalajangersagaq aappaasup aappaa kisimi attartornermut isumaqatigiissummi allassimagaluarpat, imaluunniit aappariit illugiillutik attartornermut isumaqatigiissummi atsiorsimagaluarpata atuutissaaq.

Inooqatigiit attartorneq arlamik sorliup attartorneq ingerlatiinnarsinnaassaneraa isumaqatigiissutigisinnaanngikkunikku, § 61 malillugu aalajangiisarnerni piumasaqaataasut assinginik piumasaqaatitaqarfiusumik apeqqut eqqartuussivinnut aalajangiiffigitissinnaavaat.


§ 63-imut

Aalajangersakkami attartortut sulisunut inissiami atorfimmut aalajangersimasumut atugassanngortitaasumi najugaqartut imaluunniit innarluutilinnut inissiami najugaqartut iluarsiivigineqarput. Attartortup aappaa qimagaasoq siornatigulluunniit aapparisimasaa inissiamik atorfimmut aalajangersimasumut atugassanngortitaasumi imaluunniit innarluutilinnut inissiami najugaqaannarnissamik piginnaatitaaffeqanngilaq, inissiat taamaattut siunertanut aalajangersimasunut atugassiissutaammata. Tassunga taarsiullugu inissarsiortut allattorsimaffianni nalinginnaasumi allatsissimasunit salliutitsilluni inissiamik allamik innersuussisoqarsinnaavoq.

Pissutsilli immikkut ittut peqqutaallutik attartortup aappaa qimagaasoq siornatigulluunniit aapparisimasaa attartortup inissiaq atorfimmut aalajangersimasumut atugassiissutaasoq imaluunniit innarluutilinnut inissiaq tigusinnaavaa, soorlu pineqartoq nammineerluni inissiami atorfimmut aalajangersimasumut atugassanngortitaasumi imaluunniit innarluutilinnut inissiami najugaqarsinnaatitaaguni, attartortorli taamatut pisinnaatitaaffeqarnera peqqutaalluni pisinnaatitaaffimminik atuiinnarsimanngikkuni.


§ 64-imut

Aalajangersakkakkut attartortup nammineerluni atorunnaarsitsisinnaanera iluarsiivigineqarpoq. Inissiaq attartortumut ilaqutaanullu ataatsimut inigineqarpat, imaluunniit inissiaq aappariit aappaasulluunniit sulineranut atorneqarpat attartortup nammineerluni attartornermut isumaqatigiissut atorunnaarsissinnaanngilaa. Tamatumani attartortup atorunnaarsitsinerata allaganngorlugu tunniunneqarnissaa piumasarineqarpoq.


§ 65-imut

Aalajangersakkami sulisunut inissiamik attartorneq atorfeqarnerup unitsinneqarnerani atuukkunnaassasoq tamatumunngalu atatillugu qimanneqassasoq aalajangersarneqarpoq.

Sulisoq pisussaavoq inissiap qimanneqarnissaa nalunaarutigissallugu, aammalu sulisup akiligassat ingerlaavartut attartornermut attuumassuteqartut siumoortumik nalunaartussaatitaaneq nalinginnaasoq naapertorlugu attartornerup unitsinneqarnissaata tungaanut akilertassavai. Aalajangersagaq attuumassuteqartorujussuuvoq, attartortut ilaasa atorfeqarnermik unitsinneqarneranut atatillugu sulisunut inissiamik najukkaminnik taamaatitsinngitsoortarnerannut assersuutissaqarmat, attartortut isumaqaramik sulisitsisup inissiaq taamaatissallugu pisussaaffigigaa, sulisitsisup inissiamik sulisumut inniminniineq isumagisimammagu.

Assersuutigalugu atorfeqarneq juunip ulluisa 30-anni unittussanngorpat, attartortup attartornini kingusinnerpaamik maajip ulluisa 31-anni nalunaarutigissavaa. Attartorneq aatsaat soorlu juunip 30-ani unittussatut nalunaarutinneqarpat, attartortup ineqarnermut akiliut il.il. juulip ulluisa 31-ata tungaanut akilersussavai, kisiannili sulisoq juulip qaammataani sulisunut inissiami najugaqarnissamut pisinnaatitaaffeqassanngilaq. Taamaattorli attartortup juulip qaammataani inissiap allamut attartorteqqinneqarnissaa anguniassavaa. Inissiap juulip qaammataani allamut atartorteqqinneqarnissaa iluatsissappat imaluunniit iluatsittariaqassappat, attartortitsisup juulimi allamut attartortitseqqinnermini isertitai attartortitsisup attartortumit piumasaqaataanit ilanngaatigineqassapput.


§ 66-imut

Aalajangersakkap atuutilerneratigut attartortitsisup atorunnaarsitsinissamik nalunaarnissamut piffissarititaasut nalinginnaasut malillugit attartortitsisup inissiami najukkamini ineeqqanik ataasiakkaanik attartortitsinermik atorunnaarsitsisinnaalerpoq. Tamatuma saniatigut illumik affarleriimmik piginnittup piginnittoq inissiap aappaani najugaqaruni illumi affarleriimmi inissiap aappaani attartorneq atorunnaarsissinnaalerpaa. Atorunnaarsitsineq allaganngorlugu saqqummiunneqassaaq.


§ 67-imut

Aalajangersakkami qanoq pisoqartillugu attartortitsisup attartortumik attartorunnaarsitsisinnaanera aalajangersarneqarpoq. Aalajangersakkami attartortitsisoq inoqutaalu namminneerlutik attartukkami ineqalivinnissartik attartortitsisup kissaatigippagu attartortumik attartorunnaarsitsisinnaanera periarfissinneqarpoq. Tamatumani pineqartoq tassaasinnaavoq attartortup piffissami sivisuumi nunami allamiinnerminik tassanngaannaq kipititsisariaqalernera, taamaattumillu uternermini inissiami najugaqalernissaminik pisariaqartitsinera. Najugaqalivinnissamut piumasaqarnerup kingunerisaanik attartortitsisup attartukkamik nammineerluni atorfissaqartitsinerarluni attartortumik anisitseriarluni inissiaq allamut attartorteqqissinnaanngilaa.

Attartortitsisoq inatsisitigut inuttut naligiissitaalluni isigineqarpat, soorlu assersuutigalugu ingerlatseqatigiiffiuppat imaluunniit pisortani oqartussaasuuppat, taassuma attartortitsisup attartukkami najugaqalivinnissamik tunngavilersuuteqarluni attartorneq unitsissinnaanngilaa. Taamaattorli peqqutit immikkut ittut pingaaruteqarluartullu tunngavigalugit attartortitsisup attartortup attartorunnaarsitsinissaa pisariaqartissinnaavaa.

Tassani pineqartut tassaasinnaapput pisortatigut inuussutissarsiornikkulluunniit eqqarsaatigisassat annertuut, soorlu attartortitsisup illuut tuniniarlugu kissaateqarsinnaavoq, tamannalu attartorneq ataqqineqassappat ajornarsinnaalluni. Aamma eqqarsaatigisassat tassaasinnaapput attartortitsisup napparsimanera utoqqalineraluunniit peqqutigalugu inissiap nakkutilliisumut, illuutip ingerlanneqarneranik isumaginnissaguni illuummi najugaqartariaqartumut atorneqartariaqarnera.

Aamma attartortitsisup attartortoq attartorunnaarsissinnaavaa, attartortoq ileqqorissaarnissamut maleruagassanik malinninngippat, pissutsilli imaanngippata attartortitsisup attartornermik isumaqatigiissut atorunnaarsissinnaallugu. Aalajangersagaq attartortitsisup attartortup, uparuarneqartaraluarluni nipiliortortartup imaluunniit najugaqartunut allanut akornusersuisup, kisiannili pissutsit imaanngippata attartortitsisup attartornermik isumaqatigiissut atorunnaarsissinnaallugu, attartorunnaarsissinnaanera periarfissinniarlugu ilanngunneqarpoq.

Aalajangersagaq tamavinnut atuuppoq.


§ 68-imut

Aalajangersakkami illuut iluarsaassinissaq isaterinissarluunniit pissuutigalugu illuutip qimattariaqarnerani Namminersorullutik Oqartussat kommunellu inissiamik taartissamik innersuussinissamut pisussaaffeqarnerat aalajangersarneqarpoq. Isaterineq illuutip piiarneqarneranik paasineqassaaq.

Attartortitsisup attartortut attartornermut isumaqatigiissummik malinnissimasut inissiamut taartissamut innersuuttussaavai. Attartortut iluarsaassinerup kingunerisaanik iluarsaassinerup naammassereerneratigut illuni iluarsaanneqarsimasuni inissiamik, attartortullu isaterinerup kingunerisaanik illunut isatikkanut taarsiullugit inissiaqarfimmi sananeqartunut inissiamik innersuussivigineqarnissamut salliutinneqartussaatitaapput.

Inissiamut iluarsaanneqarsimasumut uternissamut imaluunniit inissiamut nutaamut salliutinneqartussaatitaanermi makku piumasaqaataapput: Attartortup attartortitsisup uternissamik neqerooruteqarnerata nalaani attartornermut isumaqatigiissut eqqortissimassavaa, tassalu inoqutigiinni inuit amerlassusaat inissiamut innersuunneqartumut naapertuutissapput. Attartortitsisup pissutsit annertuumik pingaaruteqanngitsut pissutiginiarsinnaanngilai. Pissutsit tunngaviginiarneqartut tunngavimmikkut ima annertutigissapput, inissiamik innersuussisinnaanermut itigartitsivinnissamut, imaluunniit attartornermik ingerlasumik unitsitsinissamut inatsisitigut tunngavissaqartoqassalluni.

Attartortup inissiamut taartaasussamut tassanngaanniillu nuunnerminut atatillugu, tassani iluarsaassinerup isaterinerulluunniit kingunerisaanik nuunnerit pineqaraluarpata, aningaasartuutai taarserniarlugit attartortitsisoq aningaasanik taarsiissutissanik attartortumut akiliuteqassaaq. Attartortitsisup aningaasanut taarsiissutissanut aningaasartuutai, aningaasaliissutit illuummik iluarsaassinissamut isaterinissamulluunniit atatillugu tunniunneqartut aqqutigalugit akilerneqassapput. Taamaattumik aningaasat inissiaqarfittut immikkoortortat ataasiakkaat aningaasaqarnerannut artukkiissanngillat.

Aningaasat taarsiissutissat annertussusissaannut attartortup nuunnermini aningaasartuutivii apeqqutaatinneqanngillat, inissiallu angissusaa apeqqutaatillugu imatut amerlassusiligaallutik:

Inissiap angissusaa

Taarsiissutissaq

Ataatsimik initalik

2.200

Marlunnik initalik

3.200

Pingasunik initalik

4.200

Sisamanik initalik

5.200

Tallimanik initalik

6.200

Arfinilinnik initalik

7.200


§ 69-imut

Aalajangersakkami attartortitsisup attartornermik atorunnaarsitsinerata tamatigut allaganngorlugu tunniunneqartarnissaa aalajangersarneqarpoq, taannalu tunngavilersugaassaaq akerliliinissamullu periarfissat pillugit paasissutissartaqassalluni. Attartortup attartorunnaarsitsineq akuerisinnaanngikkuniuk, attartorunnaarsitsinerup tiguneraniit sapaatit akunneri arfinillit qaangiutsinnagit tamanna pillugu attartortitsisumut akerliliissuteqassaaq, tamatumalu kingorna attartortitsisup atorunnaarsitsinini aalajangiusimaannaruniuk suliaq eqqartuussivinnut ingerlateqqittariaqassavaa. Namminersornerullutik Oqartussat kommunellu inissiaataanni attartortittakkani iluarsaassinissaq isaterinissarluunniit peqqutigalugit attartorunnaarsitsinermut akerliliissutit suliap kinguartinneqarneranik kinguneqarsinnaanngilaq, taamaattumillu attartortoq piffissaliussami anisariaqarluni. Taamatuttaaq illuummi nakkutilliisumik nutaamik atorfinitsitsinerup kingunerisaanik attartorunnaarsitsinermut akerliliissutit suliap kinguartinneqarneranik kinguneqarsinnaanngilaq.


§ 70-imut

Aalajangersakkap atuutilerneratigut attartortitsisup attartorunnaarsitsinissamik siumoortumik nalunaarfissaa sivikinnerpaamik qaammatinik pingasunik piffissalerneqarpoq, qaammatip naanerani atuuttussanngorlugu. Taamaattorli attartortitsisup inissiami najugaani inini ataasiakkaani attartortut qaammammik ataatsimik sioqqutsisumik nalunaarfigineqassapput.

Attartortup attartorunnaarsitsinissamik siumoortumik nalunaarfissaa qaammammik ataatsimik sivisussuseqarpoq, qaammatip naanerani atuuttussanngorlugu. Taamaattorli inissiami nammineq pigisami attartortitsisup taassumalu attartortuata isumaqatigiissutigisinnaavaat, attartortup tungaaniit siumoortumik ilisimatitsinissaq sivikinnerpaamik qaammatinik pingasunik sivisussuseqartinneqassasoq, qaammatip naanerani atuuttussanngorlugu. Tamanna taamaallaat attartortup inissiaq ilivitsoq, taassuma ataani illuni affarleriinni inissiaq najugassaq ataaseq attartorpagu tamanna atuutissaaq. Piumasaqaatit atuutsinneqassagunik attartornermut isumaqatigiissummi immikkoortillugit erseqqissarneqassapput. Taamaattumik attartortitsisup namminersortup inimik attartortoq isumaqatigiissuteqarfigereerlugu attartortup attartorunnaarnissamik siumoortumik nalunaaruteqarnissaa qaammammik ataatsimiit qaammatit pingasut tikillugit sivitsuinissamik isumaqatigiissuteqarfigisinnaanngilaa.

Attartortitsisut namminersortut attartortup attartorunnaarnissamik siumoortumik nalunaaruteqarnissaanut piffissarititaasup sivisunerunissaanut periarfissinneqarnerannut tunngaviuvoq, attartortitsisut namminersortut pisortat attartortitsisartuinut naleqqiullutik attartortitsinermik pisortani attartortitsisartutulli inuussutissarsiorsinnaassuseqarnissaat naatsorsuutigineqanngimmat, taamaattumillu annaasaqarnissamut ulorianartorsiornerusarlutik, piffissaq sivisunerusoq atorlugu attartortussamik nutaamik nassaarniartariaqartassagamik.

Attartortup akiligassat attartukkamut attuumassuteqartut attartorunnaarnissamut nalunaarfiusup naanissaata tungaanut akilersussavai. Piffissaq nalunaarfiusoq suli naanngitsoq attartortoq inissiamiit anippat, attartortup attartugaq allamut attartorteqqinniassavaa, attartortup aningaasartuutissai killilerniarlugit. Ineqarnermut akiliutit piffissaq nalunaarfiusoq naanngitsoq suli attartortitsisup inissiamik allamut attartortitseqqinnermigut isertitarisai attartortitsisup attartortumut piumasaqaataanit ilanngaatigineqassapput. Assersuutigalugu attartortoq qaammatinut pingasunut siumut ineqarnermut akiliisimappat, attartortitsisup inissiamik allamut attartortippagu attartortup piffissaq nalunaarfiusoq matussuserniarlugu qaammatinut pingasunut siumoortumik akiliutigisani utertissavai. Attartortitsisup piffissap nalunaarfiusup ingerlanerani inissiaq allamut attartortinngippagu, kisiannili attartortittariaqaraluarlugu, attartortoq taamatuttaaq aningaasartuutiminut attartortitsisumit taarsiiffigineqassaaq. Attartortitsisup piffissap nalunaarfiusup iluani inissiaq attartortittariaqarnera naliliisarneq inatsisilerinikkut isiginneriaatsit nalinginnaasut aallaavigalugit pisassaaq.


§ 71-imut

Aalajangersakkap atuutilerneratigut attartornermut isumaqatigiissut piffissamut aalajangersimasumut atuuttussanngortitaasimasoq piffissap attartornissamut isumaqatigiissuteqarfiusup naanerani siumut ilisimatitsinertaqanngitsumik attartorneq unitsinneqassaaq. Attartortup pissusilersornera attartortitsisumut illuummilu attartortunut allanut artukkiippat, attartortitsisup attartornermut isumaqatigiissut atorunnaarsissinnaavaa. Taamaattorli attartortitsisup attartortumut pissutiginiagai annertuumik pingaaruteqanngippata attartortitsisup attartornermut isumaqatigiissut atorunnaarsissinnaanngilaa. Pissutsit pingaarutillit attartortitsisup attartornermut isumaqatigiissummik atorunnaarsitsisinnaanera pillugu kapitali 11-mi takuneqarsinnaapput.

Kiisalu aalajangersakkap atuutilerneratigut attartortup attartortitsisup ilisimasaanik attartornerup piffissamut aalajangersimasumut atuuttussanngortitaasup naareernerani attartukkani atuinnarpagu, attartorneq attartornermut nalinginnaasumut piffissamut aalajangigaanngitsumut, inatsisitigullu sunniutissanut tassunga attuumassutilinnut ingerlaannartumik nuussaaq. Tassalu attartortoq attartortitsisorlu maanna attartorunnaarnissaq pillugu siumoortumik nalunaartussanngorput. Maleruagassaq attartukkami piffissamut killiligaasumi attartortut attartornerminnik ingerlatsiinnarsinnaatitaasut illersorniarlugit ilanngunneqarpoq. Taamatut pisoqartillugu attartortitsisup tassanngaannaq ullormik ataasiinnarmik periarfissiilluni attartortoq attartorunnaarsissappagu, paarlattuanillu attartortup attartorunnaarnissamut nalunaarut malissallugu akuerisariaqassappagu tamanna naapertuutissanngilaq.


§ 72-imut

Aalajangersakkap atuutilerneratigut §§ 67-71-imi atorunnaarsitsinissamut maleruagassat attartortumut illersuutitut sunniuteqarput.


§ 73-imut

Aalajangersakkami attartortup pissusisilersornera attartortitsisumut illuummilu attartortunut allanut artukkiippat, attartortitsisup attartornermut isumaqatigiissummik atorunnaarsitsisinnaanera iluarsiivigineqarpoq. Taamaattumik attartortitsisup attartortumut pissutiginiagai annertuumik pingaaruteqanngippata attartortitsisup aalajangersagaq malillugu taamaatitsisinnaaneranik kinguneqarsinnaanngilaq. Attartortitsisoq pisussaavoq attartortumut pissutsit iluarseqqullugit allakkatigut nalunaaruteqassalluni. Attartortup piffissaliussatut taaneqartup iluani pissutsit iluarsisimappagit, attartortitsisup attartornermut isumaqatigiissut atorunnaarsissinnaanngilaa.

Aammattaaq aalajangersakkap atuutilerneratigut imm. 1 naapertorlugu pisortaniit attartortitsisoq pisut ilaanni attartornermut isumaqatigiissummik atorunnaarsitsissalluni pisussaavoq. Tamanna ineqarnermut akiliummut akiliinngitsoornermut, imermut imaluunniit kiassarnermut akiliinngitsoornermut imaluunniit qularnaveeqqusiissummut akiliinngitsoornermut atuutsinneqarpoq. Tamatumunnga peqqutaavoq ineqarnermut akiliummut, imermut imaluunniit kiassarnermut qularnaveeqqusiissummulluunniit akiliinngitsoornerup tamatigut attartornermut isumaqatigiissummik sumiginnaanertut annertuutut isigineqartarnera, attartortut ataasiakkaat akiliinngitsoorneranni najugaqatigiiffimmi attartortut sinneri aningaasartuuteqartinneqartarmata, taamaattumillu attartortitsisoq pisussaavoq attartornermut isumaqatigiissummik atorunnaarsitsissalluni, taamaalillunilu attartortut allat aningaasartuutissat killilissallugit. Attartortitsisoq inuinnaappat maleruagassaq atuutsinneqassanngilaq, namminerisamik inissiaatit attartortittakkat inissiaqarfittut immikkoortortamut ilaanngimmata. Taamaattumik attartortitsisoq namminersortoq akiliinngitsoortoqarnerani attartornermut isumaqatigiissummik atorunnaarsitsinissamik pisussaaffiligaanngilaq, kisiannili attartortitsisoq taamatut suli periarfissaqarpoq.


§ 74-imut

Aalajangersakkami ineqarnermut akiliummut, imermut, kiassarnermut qularnaveeqqusiissummulluunniit kingusinaarluni akiliinerup kingunerisaanik attartornermut isumaqatigiissutip atorunnaarsinneqarneranut atatillugu periusissaq attartortitsisullu pisinnaatitaaffii pisussaaffiilu erseqqissarneqarput. Tassani § 73-imut nassuiaatini tunngaviliunneqartut assingi aallaavigalugit attartortitsisut pisortat namminersortullu immikkoortinneqarput.

Aalajangersagaq kingusinaarluni akiliinermut atatillugu akileeqqusinermut sullissinermut akiliisitsisoqarsinnaaneranut tunngavissanik imaqarpoq. Sullissinermut akiliutissaq attartornermi akiligassatut pisussaaffiuvoq. Sullissinermut akiliutissaq annerpaamik 150 kr.-iussaaq.

Aammattaaq aalajangersagaq tamatuma kingorna atorunnaarsitsinissap atorunnaarsinneqarneranut atatillugu sullissinermut akiliisitsisoqarsinnaaneranut tunngavissanik imaqarpoq. Sullissinermut akiliutissaq attartornermi akiligassatut pisussaaffiuvoq. Sullissinermut akiliutissaq annerpaamik 150 kr.-iussaaq. Attartortitsisup atorunnaarsitsinissap atorunnaarsinneqarneranut akiliisitsisarnissaanut tunngaviuvoq, pisortat inissiaataanni attartortikkani attartortut arlallit akiliinngitsoornerup kingunerisaanik atorunnaarsitsinerup kingorna erngerlutik ineqarnermut akiliummik akiliisarnerat. Attartortitsisut atorunnaarsitsinernik taakkununnga atorunnaarsitsisarnerat allaffissornermut artukkiisarpoq.

Taamaattorli attartortitsisup sullissinermut akiliutigititaa annerpaamik attartortitsisup akileeqqusissutaanik nassiussinermut imalunniit atorunnaarsitsinermik atorunnaarsitsinernut tamatumalu kingorna sulianut aningaasartuutaanit annertunerussanngilaq.


§ 75-imut

Aalajangersakkap atuutilerneratigut attartortoq illumut, attartortitsisumut, taassuma sulisuinut, illumi attartortunut allanut inatsisit malillugit illumiittunut annertuumik ajoqutaasumik pissusilersorpat, attartortitsisup attartortitsineq erngerluni atuutilersussamik atorunnaarsissinnaavaa. Ajoqutaasumik uloarianartumilluunniit pissusilersornerit attartortumit namminermit, attartortup inoqutaanit allanilluunnit attartortup attartukkamut isersinnaatitaanit piliarineqarnersut apeqqutaatinnagu attartortitsisup pisinnaatitaaffia atuutissaaq. Tamatumani pineqartoq tassaavoq inuup pissusilersornerminik unitsitsinissaanik piffissalerneqarnissaata isumaqannginnera.


§ 76-imut

Aalajangersakkami attartortup erngerluni attartukkamit aninissaminik, aammalu attartortup atorunnaarsitsinermik nalunaarfissap nalinginnaasup naanerani aninissaata tungaanut akiligassanik pisussaaffiusunik akiliinissamut pisussaatitaaffeqarnera erseqqissarneqarpoq. Kiisalu attartortoq pisussaavoq attartortup attartornermut isumaqatigiissummik sumiginnaanerata kingunerisaanik attartortitsisup annaasarisinnaasai taarsissallugit. Assersuutigalugu attartortoq inissiamit erngerluni aninngippat, attartortitsisoq attartortup eqqartuussummik naammassititsiniaasartumit anisinneqarnissaata utaqqinerani annaasaqassaaq. Attartortitsisup tamatumunnga atatillugu annaasai attartortumut taarsertinniarneqartussaapput, taakkulu attartortitsisup qularnaveeqqutaasinnaasunit, attartortup akilersimasaanit iluarsiiffigisinnaavai.

Tamatuma saniatigut aalajangersakkami erseqqissarneqarpoq, attartortitsisup attartortup aningaasartuutissai killilersorniassagai, attartortup nuunnerata kingorna attartortitsisup attartugaq pilertornerpaamik attartorteqqinniassallugu. Ineqarnermut akiliutit piffissaq nalunaarfiusoq naanngitsoq suli attartortitsisup inissiamik allamut attartortitseqqinnermigut isertitarisai attartortitsisup attartortumut piumasaqaataanit ilanngaatigineqassapput. Attartortitsisup piffissap nalunaarfiusup ingerlanerani inissiaq allamut attartortinngippagu, kisiannili attartortittariaqaraluarlugu, attartortoq taamatuttaaq aningaasartuutiminut attartortitsisumit taarsiiffigineqassaaq. Attartortitsisup piffissap nalunaarfiusup iluani inissiaq attartortittariaqarnera naliliisarneq inatsisilerinikkut isiginneriaatsit nalinginnaasut aallaavigalugit pisassaaq.

Aalajangersagaq naapertorlugu Naalakkersuisut Namminersornerullutik Oqartussat kommunellu inissiaataanni attartortittakkani attartornermik atorunnaarsitsisarneq pillugu maleruagassiornissamut pisinnaatinneqarput.


§ 77-imut

Aalajangersakkap atuutilerneratigut Inissiamit anisoqarnerani inissiaq nalinginnaasumik iluarsaanneqassaaq. Nalinginaasumik iluarsaassinermi pineqarput qilaanik qaqorsarlugit qalipaaneq, iikkanik qalipaaneq aamma/imaluunniit ungalitsersuineq kiisalu eqqiaaneq. Taakku saniatigut natii nutaamik lakkersimasutut isikkoqassapput, tassalu pisariaqarpat natii lakkerneqassapput. Attartortup nammineerluni nuunnerminut atatillugu nalinginnaasumik iluarsaassinissaq assassornermik ilinniagaqarsimasutut illersorneqarsinnaasumik pitsaassuseqartillugu suliarinissaanut imaluunniit isumaginissaanut periarfissaqaruni, tamanna attartorunnaarnissamut nalunaarfiusup naannginnerani suliarinissaa attartortup pisinnaatitaaffigaa.

Aalajangersakkami siunertaavoq attartukkap qimannerani inissiaq iserterfigineratut pitsaassuseqartillugu tunniunneqarnissaa. Tamatumattaaq kingunerisaanik iserternermi inissiaq nalinginnaasumik iluarsaanneqarsimanngippat, attartortup inissiaq iserterfigineratut itsillugu tunniutiinnarsinnaavaa.

Aalajangersakkap atuutilerneratigut attartortup nammineerluni nalinginnaasumik iluarsaassinissaq isumagisinnaavaa, tassalu attartortup nammineerluni iluarsaassineq suliarisinnaavaa imaluunniit iluarsaassinissaq sanasumut isumagitissinnaallugu. Attartortut qaammatit 100-t inorlugit attartukkaminni najugaqarsimasut, taamaattumillu suli nalinginnaasumik iluarsaassinermut akiliisussaasut, niuernikkut pissutsit apeqqutaatillugit namminneerlutik neqeroortitsinissaq aningaasaqarnikkut iluaqutigisinnaavaat. Aningaasartuutit appasitsinneqarsinnaappata tamanna attartortumut taamatullu inissiaqarfittut immikkoortortamut sipaaruteqarnissamik kinguneqarsinnaavoq, illuatungeriit marluullutik nalinginnaasumik iluarsaassinermut aningaasartuutissat avittussaammatigik.

Attartortitsisoq periarfissaqarpoq attartukkap qimanneqarnerani nalinginnaasumik iluarsaanneqarnissaanut maleruagassat sanioqqutissallugit. Tamatumunnga taarsiullugu attartortitsisup attartortoq inissiamit aninerminut atatillugu qaammammut inimut ataatsimut 50 kr.-inik aalajangersimasumik akiliuteqarnissaanik piumasaqarsinnaavoq. Tassalu inissiamut marlunnut initaqartumut attartortoq ukiumut 1.200 kr.-inik nalinginnaasumik iluarsaassinissamut akiliuteqartinneqassaaq, inissiamillu sisamanik initalimmik attartortoq ukiumut 2.400 kr.-inik akiliuteqartinneqassalluni. Attartortitsisup attartortoq nalinginnaasumik iluarsaassinissamut annerpaamik qaammatinut 100-nut akiliisissinnaavaa. Qaammatit 100-t inissiap nalinginnaasumik iluarsaassiffiusimanngitsut naaneranni inissiaq nalinginnaasumik iluarsaanneqassaaq, imaluunniit attartortitsisoq siunissami attartortussanut nalinginnaasumik iluarsaassinissamut akiliisitsinissamut pisinnaatitaaffeerutissalluni.

Maleruagassap nunaqarfinnut isorliunerusunullu, nalinginnaasumik iluarsaassinermi annertuunik aningaasartuuteqarfiusartunut atorneqarnissaa eqqarsaatigineqarpoq. Aammattaaq attartortitsisup atortussanik nunaqarfinnut assartuisitsinissani ajornakusoortissinnaavaa, soorlu sikorsuit peqqutaallutik. Aamma attartortitsisoq sanasunik piginnaanilinnik nunaqarfiliartitsiniarneq ajornartorsiorfigisinnaavaa.

Nalinginnaasumik iluarsaassineq, taassuma ataani teknikikkut pitsaassuserititassat, atortussanik toqqaasarneq suliassallu suliarineqarnissaanut piumasaqaatit pillugit maleruagassat sukumiinerusut Naalakkersuisunit aalajangersarneqassapput.


§ 78-imut

Aalajangersakkami erseqqissarneqarpoq, attartortitsisup aserfallatsaaliuinermut pisussaaffik qaammatit 100-t ingerlanerini tigujartuaassagaa. Qaammatit 100-t taakku suli naanngitsut inissiaq qimanneqarpat, nalinginnaasumik iluarsaassinermut aningaasartuutit attartortitsisup attartortullu akornanni angeqqatigiinnik avinneqassapput.


§ 79-imut

Aalajangersakkami erseqqissarneqarpoq, attartortup inissiamit anineranut atatillugu attartugaq misissorneqartussaasoq. Tassanissaaq attartortup misissuinermut peqataasinnaatitaanera erseqqissarneqarpoq. Peqataaneq attartortup nammineerluni imaluunniit sinniisorisaata takkunneratigut pisinnaavoq. Attartortitsisup attartortoq sivikinnerpaamik ullut arfineq marluk sioqqullugit misissuinermut peqataaqqullugu qinnuigisssavaa. Aalajangersakkamissaaq erseqqissarneqarpoq misissuinermut nalunaarusiortoqassasoq, taannalu misissuinermi peqataasunit atsiorneqassasoq. Attartortoq misissuinermut nalunaarutip assilineranik tunineqassaaq, tamatumalu kingorna attartortup attartortitsisoq tamanna pillugu qinnuigippagu suliassat attartortitsisup attartortumut akiligassatut isumaqarfigisaasa akissaat pillugit nalunaarfigineqassalluni.


§ 80-imut

Aalajangersakkami attartortoq taannaluunniit sinnerlugu takkuttussaq misissuinermut peqataanngitsoorpata attartortitsisup misissuinermut nalunaarutip tunngavigineqarnissaanik pisinnaatitaaffeqarnera erseqqissarneqarpoq. Taamatuttaaq attartortitsisup attartortup qularnaveeqqusiissutaanik attartortup nalunaarut attartornissamullu isumaqatigiissut naapertorlugu pisussaaffiinut matusissutissatut atuinissamik pisinnaatitaaffeqarnera aalajangersakkami erseqqissarneqarpoq. Attartortitsisup attartortup inissiamit anineranut atatillugu paarsinerluttoqarsimanera aserorterisoqarsimaneraluunniit patsisiginiassappagit, attartortitsisup tamanna immikkut ittumik uppernarsarsinnaassavaa, assersuutigalugu isiginnittut, assilisat videolialluunniit atorlugit.


§ 81-imut

Aalajangersakkap atuutilerneratigut Namminersornerullutik Oqartussat kommunellu inissianik allaffissornikkut aqutsisussamik avataaniit atorfinitsitsisimasut nakkutilliisussaatitaanerata aaqqissorneqarnissaa aalajangersarneqarpoq. Namminersornerullutik Oqartussat kommuneluunniit inissianik allaffissornikkut aqutsisussamik avataaniit atorfinitsitsisimasoq nakkutilliisussaatitaanerminnik naammassinnissinnaapput, allaffissornikkut aqutsisup kukkunersiuisuanik inissianik allaffissornikkut aqutsisup suliassaminik Inatsisartut peqqussutaat manna aalajangersakkallu peqqussut tunngavigalugu suliarineqarsimasut naapertorlugit isumaginninneranut nalunaarusiortitsinikkut. Tamatumuunali Namminersornerullutik Oqartussat kommunelluunniit kukkunernut sumiginnaanernullu, allaffissornikkut aqutsisup avataaniit atorfinitsinneqarsimasup piliarisaanut akisussaaffeqarnerat peerneqanngilaq.

Namminersornerullutik Oqartussat kommuneluunniit nammineerluni inissiaatiminik allaffissornikkut aqutsisuusup kukkunersiuisuni allaffissornikkut aqutsinerup Inatsisartut peqqussutaat manna aalajangersakkallu peqqussut tunngavigalugu suliarineqarsimasut naapertorlugit ingerlanneqarneranut nalunaarusiortissavaa. Nalunaarutit allaffissornikkut aqutsisup nammineerluni naatsorsuutiminik saqqummiussineranut atatillugu suliarineqartarnissaa Naalakkersuisunullu nassiunneqartarnissaa naatsorsuutigineqarpoq.

Aammattaaq aalajangersakkap atuutilerneratigut Naalakkersuisut nakkutilliinerpiamut, taassuma ataani nakkutilliinermi atortussanik suliaqartarnermut tunngasunik sukumiinerusunik maleruagassiorsinnaapput.


§ 82-imut

Aalajangersakkap atuutilerneratigut ineqarneq pillugu maalaaruteqartarfimmik pilersitsisoqarsinnaalerpoq. Maalaaruteqartarfiup pilersinneqarnerani siunertaavoq ataatsimiittartoqatigiinnik, attartortitsisup attartortullu akornanni aaqqiagiinnginnernut pilersunut aalajangiisinnaasunik pilersitsinissaq. Maalaaruteqartarfiup oqarsinnaatitaaffii suliassaqarfinni annerni misilittakkat naapertorlugit aalajangersarneqarput.

Ineqarneq pillugu maalaaruteqartarfik siulittaasoqassaaq, taassumalu saniatigut sulianut ilisimasalinnik pingasunik ilaasortaqassalluni. "Sulianut tunngasunik ilisimasalinnik" oqarnermi isumagineqartut tassaapput ilaasortat pisortat sanaartornerat pillugu inatsisinik aammalu inissianik attartortitsisarnermi pissutsinik ilisimasaqarluartut.

Imm. 3-p atuutilerneratigut siulittaasup, ilaasortat sinniisissallu qinigaanerat ukiut sisamat tikillugit atuuttassapput. Siulittaasoq ineqarneq pillugu immikkut ilisimasaqarsinnaavoq imaluunniit inatsisilerituutut misilitsissimassalluni, aammalu piginnittut kattuffiannut, inissiaatileqatigiit kattuffiannut imaluunnit attartortut kattuffiannut immikkut attuumassuteqartuussanngilaq, imaluunniit inuussutissarsiutigalugu illuutinik nioqquteqarnermut akuliusimasuussanani.

Maalaaruteqartarfimmut ilaasortaq sinniisussaaluunniit pissusissamisoortumik aggersarneqareernermini maalaaruteqartarfimmut aggernissamut pisussaatitaavoq. Naalakkersuisut ineqaneq pillugu maalaaruteqartarfimmi ataatsimiinnissamut takutinngitsoornerup kingunerisassai pillugit sukumiinerusunik maleruagassiorsinnaapput.

KANUKOKA, kommunet sinnerlugit ilaasortaatitaqartoq, taamatuttaarlu inissianik attartortittakkanik 5.000-it missaanniittunik pigisaqartoq ilaasortassamik sinniisissamillu inassuteqassaaq. A/S Inissiaatileqatigiiffik INI, pisortat inissiaataat attartortittakkat 90%-ii sinnerlugit aqutsisuusoq ilaasortassamik sinniisissamillu inassuteqassaaq. IPK (nuna tamakkerlugu attartortut kattuffiat) ilaasortassamik sinniisissamillu inassuteqassaaq. Erseqqissarneqassaaq IPK ukiuni kingullerni pingasuni uninngasimammat, taamaattumillu ilaasortassamik sinniisissamillu inassuteqarsinnaaneq kattuffinnut SIK-mut, IMAK-imut aamma PPK-mut taaneqarnerisa tulleriinneri malillugit tunniunneqassaaq. Tassa IPK ilaasortassamik inassuteqanngippat, pisinnaatitaaffik SIK-mut tunniunneqassaaq. Tullianik ilaasortassamik inassuteqartoqalerpat IPK tamanna pillugu neqeroorfigineqaqqissaaq, tassanngaanniillu ilaasortassamik taasisoqaqqinngippat pisinnaatitaaffik IMAK-imut tunniunneqassaaq il.il.


§ 83-imut

Naalakkersuisoqarfiup ineqarnermik isumagisaqartup allattoqarfittut ikiorsiinissaa tunngavissaritinneqarpoq. Nalinginnaasumik ineqarneq pillugu maalaaruteqartarfimmut allatsitut fuldmægtigi inatsisilerituutut suliaqartoq toqqarneqartassaaq, taassumalu suliassanut piareersagassat tamaasa isumagisassavai, tak. kinguliani tamanna pillugu nassuiaatit sukumiinerusut.

Maalaaruteqartarfiup sulineranut aningaasartuutit tamaasa Naalakkersuisut akilertassavaat, aammalu ineqarneq pillugu maalaaruteqartarfiup aningaasaqarnera qulakkeerniarlugu Naalakkersuisut pisortat inissiaataanni attartortittakkani ataasiakkaani tamavinni attartortortut ukiumoortumik 100 kr.-inik akiliisittarsinnaavai. Attartukkani ataasiakkaani attartortut ineqarneq pillugu maalaaruteqartarfimmut akiliutissanik akiliisitsiniarnissaq akiliisitsisarnissarlu attartortitsisup akisussaaffigaa.

Aalajangersakkap atuutilerneratigut ineqarneq pillugu maalaaruteqarfiup ukiumoortumik nalunaarummik, ilaatigut suliat tunniunneqartut naammassillugillu suliarineqartut pillugit kiisalu suliat aalajangiiffigineqartut ataasiakkaat kisitsisitaat naatsumik saqqummiullugit kisitsisitigut takussutissianik imaqartumik saqqummiussisassaaq.


§ 84-imut

Aalajangersakkap atuutilerneratigut ineqarneq pillugu maalaaruteqartarfiup suliassaqarfiit, imm. 1-imi taaneqartut aalajangiiffigisinnaavai. Aalajangersagaq tamanut matussusiivoq.

Suliaq maalaaruteqartarfimmut tunniunneqartoq maalaaruteqartup maalaaruteqartarfimmut isummerfigitikkusutai pillugit allakkiamik ilaqartinneqassapput. Assersuutigalugu maalaaruteqartoq isumaqarsinnaavoq, inissiami maalaaruteqartup iserterfigisaani nateq lakkernerlunneqarsimasoq, natip lakkia sapaatit akunnerini sisamani nalinginnaasumik atorneqareerluni katagalersimammat. Aamma maalaarut ernissap kræfterluni nunami allami katsorsarneqarnissaanut atatillugu attartukkap allamut attartortinneqarnissaanut itigartitsinermut tunngasinnaavoq.

Aalajangersakkamik ilanngussisoqarpoq, taannalu malillugu maalaaruteqartoq maalaaruteqartarfimmut suliakkiinermini 500 kr.-inik akiliisussaavoq. Aningaasat taakku suliap suliarineqarnissaanut akiliutissatut eqqarsaatigineqanngillaq, kisiannili maalaarutit tunngavissaqanngilluinnartut maalaaruteqartarfimmut tunniunneqartarnissaannut pinngitsoortitsinissamik siunertaqarluni akiliutitut naammaginartutut atuutsinneqalersimalluni. Maalaaruteqartoq maalaaruteqarnermini tamakkiisumik ilaannaasumilluunniit taperserneqarpat, 500 kr.-it taakku maalaaruteqartumut utertinneqassapput.


§ 85-imut

Suliassaqarfiit § 84, imm. 1-imi allattorneqartut pillugit maalaarutit amerlanersaasa pisariunngitsumik naammassineqartarnissaat ilimagineqarpoq, taamaattumillu paasissutissanik ilassutissanik pissarsiniarnikkut imaluunniit takuniaanikkut uppernarsaatissanik annertuunik pisariaqartitsiviussanatik. Paarlattuanik maalaarutinit ikittunnguit pisariungaatsiartarnissaat, amerlanertigullu arlalinnik tunngaveqartarnissaat naatsorsuutigineqarpoq, tassalu maalaarutit torersagassatut imaluunniit ataatsimoortitatut isigineqarsinnaasut, taakkunanilu pissutsit arlallit maalaarutigineqarsinnaapput, immaqa attartortoq ataatsimut isigalugu eqqunngitsumik pineqartutut misigisimammat. Suliani taamaattuni maalaaruteqartarfiup suliassaa tassaavoq attartortup attartortitsisullu akornanni tatigeqatigiinnerup pilersinneqaqqinnissaa. Maalaaruteqartarfiup maalaarutinik suliaqarnermini inassuteqaannarfissanik naammattuuisinnaavoq, tamatumani maalaarut saqqummiunneqartoq ilusiligaanini peqqutigalugu uppernarsaatigineqarsinnaasunik tunngavilerneqarsinnaanngimmat. Kiisalu maalaarutinik pissutsinilluunniit maalaaruteqarnissamut tunngavissaqannginnermut attartortitsisumit qulakkeerlugu uppernarsarneqarsinnaanngitsunik naammattuuisoqartarsinnaavoq.

Tamanna tunngavigalugu allattoqarfiup maalaarutit takkuttut ilaatigut misissortartussaavai, maalaaruteqartarfimmilu suliarineqassanersut isummerfigisartussaallugu. Suliaq maalaaruteqartarfimmi suliarineqartussatut tiguneqarpat allattoqarfik suliap saqqummiunneqarnissaanut allakkiussaaq, tassanilu suliaq sukumiinerusumik misissuiffigineqartariaqarnersoq erseqqissarneqartariaqarnersorluunniit naliliiffigineqassaaq. Suliap saqqummiunneqarnissaanut allakkiaq tunngavigalugu siulittaasup allattoqarfik ikiortigalugu inassuteqaasiornissamut, taamaalillunilu maalaaruteqartarfimmut aalajangiiffigisassanngorlugu saqqummiussinissamut suliaq naammattumik erseqqissarneqarsimanersoq aalajangiffigissavaa. Aammattaaq siulittaasoq suliamut aalajangersimasumut inassusiornissamut atatillugu sukumiinerusumik misissuisoqassanersoq aalajangersinnaavoq.

Suliat pitsaanerpaamik erseqqissaavigineqarnissaat qulakkeerniarlugu siulittaasup maalaaruteqartarfiup allattoqarfia ikiortigalugu nammineerluni misissugassat takuniarsinnaavai. Suliami akuusut sivikinnerpaamik sapaatit akunnerannik ataatsimik sioqqutsisumik takuniaanissamut aggersarneqassapput. Takuniaanermut aningaasartuutit Naalakkersuisunit akilerneqassapput.

Suliassat ineqarneq pillugu maalaaruteqartarfimmut saqqummiussassat allaganngorlugit piareersarneqassapput, taamaattumillu suliami akuusut takkunnerminni maalaaruteqartarfimmut nassuiaateqarsinnaanngillat.

Maalaaruteqartarfiup suliap maalaaruteqartarfimmi suliarineqarnissaa itigartippagu, maalaaruteqartup aalajangiineq tamanna allaffissornermi oqartussaasunut suliakkiissutigisinnaanngilaa, eqqartuussivinnulli suliakkiissutigisariaqassallugu.

Inassut arlalinnik immikkoortortaligaasinnaavoq, maalaaruteqartarfillu taamaalilluni assigiinngitsunik sakkortussusilinnik kimilinnilluunniit aalajangiisinnaavoq. Soorlu natip lakkernerata pitsaassusaa pillugu maalaarut kinguliani allassimasut ilaannik ataatsimik aalajangiiffigineqarsinnaavoq:

  1. nateq lakkeqqinneqassaaq,

  2. natip aserfallatsaalineqarnissaa attartortumut isumagisassanngortinneqanngilaq, imaluunniit

  3. ajoquserneq annikitsuararsuuvoq, taamaattumillu inissiamut iserternermi amigaatitut allanneqaannassalluni, inissiamiillu aninermi nateq nutaamik lakkerneqassanani.

Suliaq maalaaruteqartarfimmi suliarineqartussatut tiguneqarsimappat piffissaliussat malinneqassapput. Maalaarutigineqartoq maalaarut maalaaruteqartarfimmi suliarineqartussatut tiguneqarneraniit kingusinnerpaamik sapaatit akunnerisa marluk qaangiunnerini illuatungeriinni maalaarutigineqartoq ilisimatinneqassaaq. Tamatuma kingorna illuatungeriinni aappaasoq allakkatigut akissuteqarnissamut sapaatit akunnerinik pingasunik periarfissinneqassaaq. Suliaq pisariungaatsiarpat allattoqarfiup akissuteqarnissamut piffissarititaasoq sivitsorsinnaavaa.


§ 86-imut

Allattoqarfik akissutitut allakkiamik tigusiguni suliap saqqummiunneqarnissaanut allakkiussaaq, suliap naammattumik paasissutissiivigineqarnersoq pillugu naliliinertalimmik. Siulittaasup suliaq naammattumik paasissutissiivigineqarsimasutut isumaqarfiginngikkuniuk, misissugassat suut sukumiinerusumik misissorneqassanersut aalajangiiffigissavaa. Allattoqarfiup sapaatit akunneri pingasut tulliuttut iluini annertunerusumik misissugassat misissuiffigissavai. Illuatungeriit arlaat annertunerusumik misissuinermut atatillugu paasissutissanut ilassutissanik piumaffigineqaraluarluni, sapaatit akunnerisa pingasut qaangiunnerini akissuteqanngippat, tamanna illuatungiliuttumut tassunga akornutaasinnaavoq. Sapaatit akunnerisa pingasut taakku qaangiunnerini allattoqarfik sapaatit akunnerisa sisamat iluanni suliamik saqqummiussinissamut nutaamik inassutitalimmik allakkiussaaq, siulittaasumut saqqummiunneqartussamik. Siulittaasup inassut akueriguniuk, suliaq nammineq inassutiminik ilallugu ineqarneq pillugu maalaaruteqartarfimmut aalajangiiffigisassanngorlugu saqqummiutissavaa.

Siulittaasup suliassanik maalaaruteqartarfiup ataatsimiinnerani suliarineqartussanik nassiussinissaanut piffissarititaasoq maalaaruteqartarfimmut ileqqoreqqusani allassimassaaq. Nalinginnaasumik suliassat inassutitallit ataatsimiinnermi suliarineqannginnerini kingusinnerpaamik sapaatit akunneri sisamat sioqqullugit maalaaruteqartarfimmi ilaasortanut nassiunneqarsimanissaat piumasarineqassaaq.

Suliaq tamakkerluni ilaaluunniit nutserneqarsinnaappat, tamanna suliap suliarineqarnerani killissarititaasunik sivitsuinissamut pingaarutilittut tunngavigineqarsinnaavoq.

Suliap suliarineqarnissaa ataatsimut isigalugu maalaarutip suliarineqartussatut tiguneqarneraniit ineqarneq pillugu maalaaruteqartarfiup aalajangiinissaata tungaanut sapaatit akunneri 20-t tikillugit ingerlasinnaapput:

Sap. ak. ataaseq nalunaarsuinissamut naliliinissamullu, § 85, imm. 1.
Sap. ak. marluk nalunaaruteqarnissamut, § 85, imm. 3.
Sap. ak. pingasut tusarniaanissamut, § 85, imm. 3.
Sap. ak. pingasut misissuinissamut, § 85, imm. 5.
Sap. ak. ataaseq takuniaanissamut, § 85, imm. 6.
Sap. ak. sisamat suliamik saqqummiinissamut, § 86, imm. 1.
Sap. ak. sisamat maalaaruteqartarfimmi ilaasortanut.
Sap. ak. marluk aalajangiinissamut, nutserinissamut nassiussinissamullu.

Maalaaruteqartarfiup aalajangiineri Namminersornerullutik Oqartussanut kommunenullu inissianik attartortitsisuusunut sanioqqunneqarsinnaanngitsumik atuutissapput. Namminersornerullutik Oqartussat kommuneluunniit avataaniit allaffissornikkut aqutsisussamik atorfinitsitsimappat, maalaaruteqartarfiup aalajangiineri aamma sanioqqunneqarsinnaanngitsumik atuutissapput. Aalajangiinerit sanioqqunneqarsinnaanngitsumik atuutsinneqarnerisa kingunerisaannik attartortitsisoq aalajangiineq malissallugu pisussaatinneqarpoq. Kisianni maalaaruteqartarfiup aalajangiineri pinngitsaaliissummik naammassitinniarneqarsinnaanngillat. Tamaattumik maalaaruteqartarfiup aalajangiineri inaarutaasut attartortitsisumit malinneqanngippata, pinngitsaaliissummik naammassinnitsitsiniarnissamut tunngavissaqalerniarluni eqqartuussivinnut suliakkiissutigineqartariaqarput.

Ineqarneq pillugu maalaaruteqartarfik aalajangiisinnaassuseqassaaq, siulittaasoq minnerpaamillu ilaasortat marluk imaluunniit taakku sinniisissaat takkussimappata. Maalaaruteqartarfiup aalajangiineri nalinginnaasumik taasinermi amerlanerussuteqarnikkut atuuttussanngortinneqartassapput. Taasinermi marluk isumaqataappata marlullu akerliullutik siulittaasup taasinera aalajangiisuussaaq.

Ineqarneq pillugu maalaaruteqartarfiup aalajangiinera maalaaruteqartumut suliamilu peqataasunut allanut allakkatigut nalunaarutigineqassaaq, tassunga suliap saqqummiunneqarnera aalajangiinermullu tunngavigineqartoq ilanngunneqassallutik.

Ineqarneq pillugu maalaaruteqartarfiup aalajangiineri allaffissornikkut oqartussaasunut allanut suliakkiissutigineqarsinnaanngillat, tassalu maalaaruteqartup ineqarneq pillugu maalaaruteqartarfiup aalajangiinera naammaginngikkuniuk, tamatumalu iliuuseqarfiginissaa kissaatigiguniuk, suliaq eqqartuussivinnut nalinginnaasunut ingerlateqqittariaqarpaa.


§ 87-imut

Aalajangersakkami siunnersuutigineqarpoq, peqqussut 1. juli 2005 aallarnerfigalugu atuutsinneqalissasoq.

Inissianik attartorneq pillugu Inatsisartut peqqussutaat nr. 5, 31. maj 2001-imeersoq akuersissutigineqarnermi kingorna piffissap ingerlanerani Inatsisartut peqqussutaatigut nr. 18-ikkut, 12. november 2001-imeersukkut, Inatsisartut peqqussutaatigut nr. 2-kkut, 21. maj 2002-meersukkut aamma Inatsisartut peqqussutaatigut nr. 3-kkut, 15. april 2003-meersukkut allanngortinneqartarsimavoq.

Nalunaarutit Inatsisartut peqqussutaat taaneqartut tunngavigalugit atuutsinneqalersut immikkut atorunnaarsinneqarnissamik allannguuteqartinneqarnissamilluunniit tungaannut atuutiinnassapput.


§ 88-imut

Maannamut attartornernik atuuttunik, attartorneq pillugu peqqussutip siulliup 1. januar 1990 aallarnerfigalugu atuutilernera sioqqullugu atuutilersimasunik, aammalu attartornernik atuuttunik, 1. januar 1990-imiit 1. januar 1995-imut attartorneq pillugu peqqussutip tulliup atuutilerfiata nalaani atuutilersimasunik suli peqarpoq.

Aalajangersagaq aqqutigalugu inissianik attartortitsisarnerup assigiimmik iluarsiivigineqartarnissaa qulakkeerniarneqarpoq, taamaattorli attartornerni piffissani assigiinngitsuni aallartinneqarsimasuni immikkut pisinnaatitaaffeqarfiusut ajorseriaateqartinneqassanngillat.

Attartornernut attartorneq pillugu peqqussut siulleq 1. januar 1990-imi atuutilersoq sioqqullugu aallartinneqarsimasunut tunngatillugu aalajangersakkap atuutilerneratigut attartortut inissiami najugaqarnermik nalaani illup iluani aserfallatsaaliuineq aammalu attartukkaminnit aninerminnut atatillugu inissiap nalinginnaasumik iluarsaanneqarnissaa akisussaaffigisussaanngilaat.

Taamatuttaaq aalajangersakkap atuutilerneratigut inissiani namminerisamik pigisani attartornerit, peqqussutip matuma atuutilernissaa sioqqullugu aallartinneqarsimasunut attartornermut aalajangersakkanut isumaqatigiissutit attartornerup pineqartup atorunnaarsinneqarnissaata tungaanut allanngortinneqaratik ingerlaqqissapput.