6. maj 2005

UPA 2005/20

 

Uunga

allannguutissatut siunnersuut

 

Uunga siunnersuut: Inissianik attartortitsisarneq pillugu Inatsisartut peqqussutaat nr. x, xx. maj 2005-imeersoq
(Teknikikkut kukkunernut amigaatinullu kiisalu atuuffianut iluarsiissutit)

 

Aappassaanneerinninnermi Naalakkersuisunit saqqummiunneqartoq.

 

§ 1-imut

 

1. § 3-mi imm. 1, nr. 2-p kingorna normutut nutaatut ikkunneqassaaq:
"3) Namminersornerullutik Oqartussat kommunellu ilinniartut ilinniarnerannut atatillugu atugassiissapput, taamaattorli tak. imm. 3.".

2. § 3-mi imm. 2-p kingorna nutaatut ikkunneqassaaq:
"Imm. 3. Naalakkersuisut Kalaallit Nunaanni Kommunet Kattuffiannik isumasioqateqareerlutik inissiat imm. 1, nr. 3-mi taaneqartut pillugit maleruagassanik erseqqinnerusunik aalajangersaasinnaapput, matumani ilanngullugit attartornermut isumaqatigiissutini piumasaqaatit atugassarititaasullu.".

3. § 4, imm. 3 imatut oqaasertalerneqassaaq:
"Imm. 3. Namminersornerullutik Oqartussani kommuneniluunniit sulisunik inissianut utaqqiisaasumik sulisunut inigitinneqarallartunut inissinneqarallartoq sullissinermut akiliummik akiliuteqartinneqarsinnaavoq, tak. imm. 2.".

4. § 5, imm. 2 imatut oqaasertalerneqassaaq:
"Imm. 2. Imm. 1, nr. 1 – 5 naapertorlugu inissiat innersuunneqartut naleqquttumik angissuseqartinniarneqassapput pitsaassuseqassallutillu. Ineqarnermut aningaasartuutit tamarmiusut sapinngisamik inissiami qimanneqartumi aningaasartuutaasarsimasunit amerlanerunissaat pinngitsoorniarneqassaaq.".

5. § 9-mi imm. 1-imi oqaatsit "ukiumoortumik akiliuteqartinneqarsinnaavoq" allanngortinneqarpoq imaalillugu: "ukiumoortumik akitsuusiiffigineqarsinnaavoq",

6. § 9-mi imm 3-mi oqaatsit "ukiumoortumik akiliutaasartussap kiisalu aqutsinermut akiliutaasartussap" allanngortinneqarput imaalillugit: ukiumoortumik sullissinermut akitsuusiissutaasartut kiisalu allaffissornikkut aqutsinermut akitsiisiissutaasartussap".

7. § 13, imm. 2 imatut oqaasertalerneqassaaq:
"Imm. 2. Naalakkersuisut inunnut §§ 16-imi 17-imilu taaneqartunut inissianik innersuussisarneq pillugu maleruagassiorsinnaapput.".

8. § 14-imi imm. 2-p qallunaatoortaani "enfamile-" imatut allanngortinneqassaaq: "enfamilie-".

9. § 18, imm. 3 imatut oqaasertalerneqassaaq:
"Imm. 3. Sulisunut, tak. § 15, annerpaamik inissiat tallimanik initallit piniarneqarsinnaapput, inoqutigiinni inuit amerlassusaat § 19-imi maleruagassat malillugit naatsorsorneqarnerini sulisoq inissiamik anginerusumik ineqarnissamut pisinnaatitaanersoq apeqqutaatinnagu.".

10. § 20 imatut oqaasertalerneqassaaq:
"§ 20. Sulisunut, tak. §§ 11, 12, 15, 16 aamma 17, inissiamik innersuunneqarsinnaatitaallutik atorfinitsitaasimasunut atuutissapput:
1) Atorfeqartoq pisussaavoq sulisunut inissiaq innersuuneqartoq tigussallugu.
2) Sulisoq sulisunut inissiamik innersuunneqartumik tigusiumanngitsoq inissiamik allamik innersuunneqarnissamik pisinnaatitaaffeqanngilaq.
3) Sulisoq sulisunut inissiamik innersuunneqartumik tigusiumanngitsoq aammalu utaqqiisaagallartumik inissinneqarsimasoq, utaqqiisaagallartumik ineqartitaanerminut ajunngitsorsiassaqartinneqarunnaassaaq imaluunniit sulisitsisup akiligaanik inissinneqarallarnini ingerlateqqissinnaajunnaassallugu.
4) Sulisoq sumiginnaaneq pissutigalugu sulisunut inissiamit anisitaasoq inissiamut allamut innersuunneqarnissamut pisinnaatitaaffeqanngilaq.
Imm. 2. Naalakkersuisut sulisorisap soqotigisaqaqatigiiffik isumaqaitgiinniarsinnaasoq ilaasortaaffigisaa isumaqatigiissuteqarfigisinnaavaa inissianik immikkut ittunik innersuussisarneq pillugu.".

11. § 21-imi imm. 2 immikkortuani 1-imi allanngortinneqarpoq "tak. imm. 3" imaalersillugu: "tak. imm. 4.".

12. § 21-mi imm. 2-p kingorna nutaatut ikkunneqassaaq:
"Imm. 3. Imm. 1-imi taaneqartut apeqqutaatinnagit attartortoq soraarninngunnginnermini ukiuni pingasuni kingullerni sulisunut inissiami ataatsimi najugaqarsimasoq inissiap attartortittakkatut nalinginnaasutut tigunissaanik qinnuteqarsinnaavoq, taamaattorli tak. imm. 4. Tamatumani piumasaqaataavoq sulisup piffissaq tamakkerlugu inissiamut utaqqisut allattorsimaffianni nalinginnaasumi allatsissimanissaa.".

Tamatuma kingorna imm. 3 imm. 4-mut allanngortinneqassaaq.

13. § 21, imm. 3, imm. 4-mut allanngortinneqartoq imatut oqaasertalerneqassaaq:
"Imm. 4. Imm. 1-imi, 2-mi aamma 3-mi periarfissiissutigineqartut inissianut Naalagaaffiup Sinniisoqarfiani, Nunaatta Eqqartuussiviani, Kalaallit Nunaanni Politimestereqarfik aammalu sullissiviit taakkununnga atasut aqqutigalugit innersuunneqartunut, imaluunniit inissianut Naalakkersuisoqarfinni ataasiakkaani Naalakkersuisunut ilaasortanut pisortanullu, kiisalu Namminersornerullutik Oqartussat qitiusumik allaffeqarfianni immikkoortortani pisortanut assigisaannullu, akissaateqarfik 37 qaffasinnerusorluunniit naapertorlugu akissarsiaqartinneqartunut, tak. §§ 11, 14 aamma 15, kiisalu inissianut aalajangersimasumik siunertaqarluni imaluunniit atorfinnut aalajangersimasunut aalajangersimasumik atugassiilluni inniminnerneqarsimasunut atuutinngillat, tak. § 5, imm. 3.".

14. § 28 imatut oqaasertalerneqassaaq:
"§ 28. Namminersornerullutik Oqartussat kommunellu ilaqutariinnut arlalinnut illuutaanni najugaqatigiiffimmi inissianik attartortitsinermit isertitat tamakkiisut sukkulluunniit annertussusilerneqarnerini, najugaqatigiiffiup aningaasartuutinik tamanik akiliisinnaanissaa periarfissinneqassaaq, matumani ilanngullugit aningaasaaliissutinit iluanaarutinut illumik piginnittumut akiliutitut aningaasartuutit, tak. § 31, aamma ingerlatsinermut atatillugu aningaasartuutit, matumani ilanngullugit allaffissornikkut aqutsinermut akiliutit, tak. § 32, imm. 1-6, aserorterisarnermik pinaveersaartitsinermut akiliutit, tak. § 32, imm. 7, aamma akiliutissatut illuartitallu aalajangikkat.
Imm. 2. Ineqarnermut akiliutit ukiumoortumik attartortitsisup najugaqatigiiffiummi ingerlatsinermut missingersuusiai akuerisaalu tunngavigalugit ukiumut tulliuttumut annertussusilerneqartassapput. Imm. 1-imi piumasaqaatit naammassiniarlugit ineqarnermut akiliummik qaffaanissaq pisariaqassappat, tamanna attartortunut ataasiakkaanut qaammatinik pingasunik sioqqutsisumik nalunaaruteqareernikkut pisinnaavoq. Siumoortumik ilisimatitsissut qaffaanermut tunngaviusut qaffaatissallu qaammammut koruuninngorlugit annertussusissaat pillugit paasissutissanik imaqanngippat siumoortumik ilisimatitsissut atortussaatinneqarsinnaanngilaq. Ukiumut tulliuttumut missingersuutit siumoortumik ilisimatitsissummut ilanngunneqarsinnaapput, tassanilu qaffaanermut tunngaviusoq allaqqassaaq. Ineqarnermut akiliutinik appaanerit siumut ilisimatitseqqaarani pisinnaapput.
Imm. 3. Aningaasartuutit ingerlatsinermut missingersuutinut ilanngunneqarsinnaasut ilaatigut tassaasinnaapput ilanngussaq 1-imi aningaasartuutit suussusilersornissaannut assersuutigineqartut. Ilanngussaq 1-imi allassimasut aningaasartuutaasinnaasut tamakkerneqanngillat.
Imm. 4. Najugaqatigiiffimmi siulersuisut immikkoortortami akuersaarnartunik annertussusilimmik pitsanngorsaanissamut nutarterinissamullu siunnersuuteqarsinnaapput, tamatuma peqatigisaanik naugaqatigiiffimmi siulersuisut ineqarnermut akiuliummut qaffaatissat pisariaqartut akuerisinnaappatigik. Naugaqatigiiffimmi siulersuisut akuersaarnartunik annertussusilimmik pitsanngorsaanissamut nutarterinissamullu siunnersuutaat najugaqatigiiffimmi ataatsimiititsisinermi akuersissutigineqassaaq.
Imm. 5. Naalakkersuisut pilersaarutaasumik aserfallatsaaliuinissamut teknikikkullu atortulersuutinik nutarterinissamut illuartitsisarneq, ineqarnermut akiliutip naatsorsorneqartarnera aamma ineqarnermut akiliutip iluarsineqarnissaanut siumoortumik ilisimatitsisarneq pillugu maleruagassiorsinnaapput.".

15. § 29-mi imm. 2-p kingorna nutaatut ikkunneqassaaq:
"Imm. 3. Illuummi teknikikkut atortulersuutinik, tak. imm. 2, nr. 2, iluarsaassinerup peqatigisaanik immikkut imermut uuttuusersuisoqassaaq.".

16. § 32, imm. 4, imatut oqaasertalerneqassaaq:
"Imm. 4. Allaffissornikkut aqutsinermut akiliutit agguarlugit aalajangiiffigineqarsinnaapput, taamaalilluni tunngaviusumik sullissinernut akiligassanut tunngaviusumik annertussusiliisoqartassalluni aammalu ilassutitut sullissinernut akiligassanut ilassutissanik annertussusiliisoqartassalluni. Tunngaviusumik sullissinermi akiliutip qularnaasavaa tunngaviusumik isumannaatsumik allaffissornikkut aqutsinerup isumagineqarnissaa.".

17. § 32-imi imm. 7-imi allanngortinneqassaaq "aningaasartuutinut" imaalersillugu: "aningaasartuutinut naleqquttunut".

18. § 37, imm. 2, imatut oqaasertalerneqassaaq:
"Imm. 2. Akilersuinissamik isumaqatigiissuteqarnermi, tak. imm. 1, attartortoq isumaqatigiissutip pilersinneqarneranut akiliutitut 500 kr.-inik sullissinermut akiliisinneqassaaq, piffissallu akilersuiffiusup ingerlanerani qaammatit tamaasa 50 kr.-inik sullissinermut akiliisinneqartassalluni, taamaattorli tak. imm. 3. Attartortitsisup akileeqqusinermut sullissinermut akiliutitut 50 kr.-inik, taassumalu saniatigut akiitsut 1.000 kr.-it sinnerlugit amerlassuseqartut 2%-iinik akiliinissaq piumasarisinnaavaa, taamaattorli tak. imm. 3. Aningaasat koruuninut ilivitsunut qaninnernut ikilineqassapput. Sullissinermut akiliut attartortitsisumut tutsinneqartassaaq.".

19. § 38, imm. 2, imatut oqaasertalerneqassaaq:
"Imm. 2. Attartortitsisoq akiliiffissamik akileeriaasissamillu innersuussissaaq. Akiligassat, tak. imm. 1, kingusinnerpaamik akiliiffissap kingulliup qaangiunnerata kingorna ulluinnaat pingajuanni akilerneqarsimassapput. Ulloq taanna arfininngorneruppat, nalliuttuuppat imaluunniit Inuiaat Ullorippassuk ulluinnarmi tullermi akiliinissaq piffissaq eqqorlugu akiliinerussaaq. Aningaaserivikkut akiliineq akiliiffissatut innersuunneqartumut akiliinertut isigineqassaaq. Akiliiffissamik innersuussisoqarsimanngippat ineqarnermut akiliut attartortitsisup niuernermik ingerlataqarfianut imaluunniit attartortitsisoq avataaniit aqutsisumik atuippat, taassuma niuernikkut ingerlataqarfianut akilerneqassaaq.".

20. § 40, imm. 1, imatut oqaasertalerneqassaaq:
"Inissianik namminersortunit pigineqartunik attartortitsinermi qularnaveeqqusiissutit siumoortumillu ineqarnermut akiliutit qaammatini arfinilinni attartornerup nalinga sinnerlugu amerlassuseqassanngillat.".

21. § 43, imm. 3, imatut oqaasertalerneqassaaq:
"Imm. 3. Attartortoq akiligassiissutaagallartunut akiliinikippallaarsimappat, attartortitsisoq akiligassanut ilassutissanik siusinnerpaamik attartornermut akiliutinik akiliiffissami siullermi, imm. 2 naapertorlugu qaammammi attartortup nalunaarummik tigusaqarfianut tulliuttumi akiliisoqarnissaanik piumasaqarsinnaavoq. Ilassutissatulli akiligassat qaammatini pingasuni kiassarnermut siumoortumik akiliutaagallartunit amerlaneruppata, attartortoq pisinnaatitaavoq akiligassat qaammatikkaartumik akiligassatut pingasunut annertoqatigiinnik annertussusilerlugit agguarlugit akilissallugit.".

22. § 44 imatut oqaasertalerneqassaaq:
"§ 44. Pilersuinermik ingerlatseqatigiiffiusoq illuatungeriit isumaqatigiissuteqarnerat tunngavigalugu attartortunut imermik pilersuisuuppat, akileeqqusissut akilikkallu pilersuinermik ingerlatseqatigiiffiusup attartortullu akornanni toqqaannartumik naammassineqassapput. Akileeqqusissutit akilikkallu pilersuinermik ingerlatseqatigiiffiusup piumasaqaatai nalinginnaasut naapertorlugit ingerlanneqassapput.
Imm. 2. Attartortitsisoq attartortumut imermik pilersuisuuppat, attartortitsisoq tamatumunnga aningaasartuutini matussusertinniarlugit piumasaqarsinnaavoq. Attartortitsisup attartortoq attartortitsisup imermut aningaasartuutaanut matusissutissanik akiliutaagallartussanik akileeqqussavaa. Akiliutaagallartussat qaammammut ataasiarluni immikkoortillugit ineqarnermut akiliutissat nassiunneqarnerinut ilanngullugit akilersinniarneqartassapput.
Imm. 3. Illuummi inissiat immikkut naatsorsuinermut uuttuusersugaanngippata, illummi imeq atorneqartoq tamakkiisoq attartukkat ataasiakkaat angissusaat naapertorlugu agguarneqassaaq. Imermut naatsorsuusiornermi attartortitsisoq attartukkamut ataatsimut akiliisitsisinnaavoq, akiliutissarlu 275 kr.-init annertunerussanngilaq. Imermut naatsorsuutit najugaqatigiiffimmi illuutip inissisimaffigisaani ukioq naatsorsuusiorfiusoq malissavaat.
Imm. 4. Illuummi attartukkat ataasiakkaat immikkut naatsorsuinermut uuttuusersugaappata, uuttuutit ataasiakkaat aningaasartuutinut matussusiissutissanik akiliisitsiniarnissaq imaluunniit akiliutaagallartunut akiliivallaarutinik utertitsinissaq siunertaralugu ukiumut ataasiarlutik atuarneqartassapput. Tamannattaaq attartortup inissiamut iserterneranut aamma inissiamit anineranut atuutsinneqarpoq. Akiligassani attartortumut nassiunneqartuni ilaatinneqartussat tassaapput piffissami imermut uuttuut malillugu imermik atuinerup annertussuserpiaa 5 %-inik ilaqartinneqartoq, atuaanermut akiliut 175 kr.-init annertunerutinneqartussaanngitsoq, kiisalu uuttuummik attartorneq uuttuummut ataatsimut qaammammut 10 kr.-inik annertussusilerneqartoq.
Imm. 5. Attartortup attartortitsisumut isumaqatigiissuteqareeragut nammineerluni imermut uuttuumik atuaalluni tamatuma inerneranik attartortitsisumut nalunaaruteqartarpat, attartortoq atuaanermut akiliummik 50 kr.-it sinnernagit annertussuseqartumik akiliisinneqartassaaq. Akiliutaagallartunut akiliivallaarutit attartortumut utertinneqartassapput, aammalu akiliutaagallartunut akiliinikippallaarutit attartortumut ilassutitut akiligassanngortinneqartassapput. Ilassutitut akiligassat qaammatini pingasuni imermut akiliutaagallartunit annertuneruppata, attartortoq pisinnaatigaavoq akiligassat qaammatikkaartumik akiligassatut annertoqatigiinnut pingasunut agguarlugit akilersussallugit.
Imm. 6. Naalakkersuisut atuaasarneq imermullu atukkamut akiliisitsisarneq, kiisalu imermut naatsorsuusiortarneq pillugu sukumiisunik maleruagassiorsinnaapput.".

23. § 47, imm. 2, imatut oqaasertalerneqassaaq:
"Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.".

24. § 47-mi imm. 4-p kingorna nutaatut ikkunneqassaaq:
"Imm. 5. Inissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.".

25. § 50, imm. 3, imatut oqaasertalerneqassaaq:
"Imm. 3. Namminersornerullutik Oqartussat kommunellu inissiaataanni attartortittakkani attartortitsisoq allakkatigut akuersissuteqarsimatinnagu inissiami uumasuuteqartoqaqqusaanngilaq. Taamaattorli aalisakkat aalisagaasivimmiittut, timmisat ineqartinneqartut, kikkaasut ineqartinneqartut, kiisalu saaniluit akuersissuteqarnissamut piumasaqarfiussanngillat. Uumasuuteqarnissamut akuersissuteqarnermi attartortitsisup qaammatini pingasuni ineqarnermut akiliutip annertoqataanik immikkut sillimanissamut akiliuteqarnissaq piumasarisinnaavaa. Attartortut peqqussutip matuma atuutilernissaata tungaanut maleruagassat malillugit uumasuuteqarsimasut, uumasuutigisap maleruagassat malillugit uummasuutigineqartup pigisaqaannarnissamut pisinnaatitaapput.".

26. § 51 imatut oqaasertalerneqassaaq:
"§ 51. Namminersornerullutik Oqartussat imaluunniit kommunet inissiaataanni attartortittakkani attartortoq siumoortumik attartortitsisoq akuersiteqqaarlugu nammineq akilikkaminik attartukkami atortulersuutinik nalinginnaasunik ikkussuinissamut pisinnaatitaavoq, tamatumani attartortitsisup illuutip innaallagissamut kuuffinnullu atortuisa pisinnaasai atortulersuutinut naammanngitsut qularnaarsimanngippagu.
Imm. 2. Attartortitsisoq piumasaqarsinnaavoq attartortoq inissiamit nuunnermini iluarseeqqissasoq imaluunniit atortulersuutit attartortitsisumit tiguneqassasut.
Imm. 3. Attartortitsisoq piumasaqarsinnaavoq attartortoq atortulersuusersuinerup iluarseqqinnissaanut sillimmatissatut naammaginartunik annertussusilinnik qularnaveeqqusiissasoq.".

27. § 52, imm. 1, imatut oqaasertalerneqassaaq:
"Namminersornerullutik Oqartussat kommunellu inissiaataanni attartortittakkani attartortut kommunemi najukkamilu pilersaarutit ataqqillugit ataasiakkaarlutik imaluunniit ataatsimoorlutik illumi attartortitsisup innersuussineratigut radiop TV-llu aallakaatitaannik tigooqqaanissamut radiomut fjernsynimulluunniit antenniliisinnaatitaapput, taamaattorli tak. imm. 2. Taamatuttaaq attartortut illumi radiup TV-llu aallakaatitaannik isiginnaarnissamut kabelikkut attaviliisinnaatitaapput, najugaqarfimmi TV-mut kabelinut attaviliinissaq periarfissaqarpat.".

28. § 53, imm. 1, imatut oqaasertalerneqassaaq:
"Namminersornerullutik Oqartussat inissiaataanni attartortittakkami attartortoq attartortitsisoq siumut allakkatigut akuersissuteqarteqqaarlugu inunnik isumaginninnermi inatsisini aalajangersakkat malillugit iluaqusersuutinik ikkussuisinnaatitaavoq. Attartortitsisup attartortoq attartukkaminik qimatsinermini inissiap pissusiatut pilersitseqqinnissaa aamma kommunalbestyrelsi inissiap pissusaatut pilersitseqqinnermut aningaasartuutit akilerneqarnissaannut qularnaveeqqusinissaa piumasaqaatigisinnaavaa. Attartortup attartortitsisoq iluaqusersuutit ikkussuunneqannginneranni kingusinnerpaamik sapaatit akunnerinik arfinilinnik sioqqutsilluni ilisimatitsissuteqarfigissavaa.".

29. § 54 imatut oqaasertalerneqassaaq:
"§ 54. Namminersornerullutik Oqartussat kommunelluunniit inissiaataanni attartortittakkami attartortoq ajoqusikkanut, attartortut ataasiakkaat §§ 51 aamma 52 malillugit ikkussuussimasaannik pissuteqartunut taarsiinissamut akisussaavoq.
Imm. 2. Attartortup taarsiisussaatitaanera iluarseeqqinnermi imaluunniit attartortitsisup atortulersuutinik tigusinerani atorunnaassaaq.".

30. § 55 imatut oqaasertalerneqassaaq:
"§ 55. Namminersornerullutik Oqartussat kommunelluunniit inissiaataanni attartortittakkami attartortoq attartortitsisumit siumut allaganngorlugu akuersissummik peqqaarluni inissiami silataanilu erseqqissumik aalajangikkanik pitsanngorsaasinnaatitaavoq il.il., inissiamiillu nuunnermini aningaasartuutigisimasani uppernarsaaserneqartut aningaasanngorlugit taarsertinnissaannut pisinnaatitaalluni, tak. §§ 56 aamma 57.
Imm. 2. Attartortoq attartortitsisumit akuerineqarani attartukkamik allanngortiterisimappat, attartortoq attartortitsisumut tamanna pillugu taarsiisuteqarnissamut akisussaatinneqassaaq.".

31. § 58, imm. 6, imatut oqaasertalerneqassaaq:
"Imm. 6. Attartortoq pisinnaatitaavoq attartukkaminik utoqqiisaasumik allamit attartorallartumit qularnaveeqqusiissummik akiliisitsissalluni, attartukkamik utaqqiisaasumik attartorallartinneqartup attartortup pisussaaffiinut sillimmatissanik. Qularnaveeqqusiissut aamma inissiamik attartornermut siumoortumik akiliutit katillugit annerpaamik qaammatini arfinilinni attartornermut akiliutit amerlaqatigissavaat.".

32. § 59, imm. 1, imatut oqaasertalerneqassaaq:
"Namminersornerullutik Oqartussat kommunelluunniit inissiaataanni attartortittakkani attartortut nammineq kissaatigalugu nuunnissamut allattuiffimmut allatsissinnaapput.".

33. § 59, imm. 4, imatut oqaasertalerneqassaaq:
"Imm.4. Attartortut inigisaminnik paarlaateqatigiissinnaapput imaaliorlutik:
1) Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavai.
2) Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagissinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.".

34. § 61, imm. 1-ip immikkortua 2 imatut oqaasertalerneqassaaq:
"Aappariit isumaqatigiissinnaanngippata aappariinni arlaat attartornerup ingerlateqqinnissanut pisinnaatitaassanersoq akuersissuteqarnikkut imaluunniit eqqartuussinermi aalajangiinikkut tamanna aalajangiiffigineqassaaq, taamaattorli tak. § 63, imm. 4.

35. § 65 imatut oqaasertalerneqassaaq:
"§ 65. Atorfeqarnerup unitsinneqarnerani atorfilik pisussaavoq inissiamik taamaatitsinissani allakkatigut nalunaarutigissallugu. Atorfillip akiligassat ingerlaavartut attartukkamut attuumassuteqartut, taamaatitsinissamut siumoortumik nalunaarfissatut piffissarititaasup nalinginnaasup naanissaata tungaanut akiligassarai, taamaattorli tak. § 70, imm. 3.
Imm. 2. Sulisunut inissiaq attartugaq kingusinnerpaamik qimareersimaneqassaaq nalinginnaasumik taamaatitsinnisaamut nalunaarfissatut piffissarititaasupnaanginnerani.".

36. § 67-ip kingornani titarneq imaqanngitsoq peerneqassaaq.

37. § 69, imm. 2-p immikkoortua 3 imatut oqaasertalerneqassaaq:
"§ 67, nr. 2 aamma 3 naapertorlugit Namminersornerullutik Oqartussat kommunellu inissiaataanni attartortittakkani attartornermik atorunnaarsitsinermut akerliliissut kinguartitsigallarnermik kinguneqarsinnaanngilaq.".

38. § 81 imatut oqaasertalerneqassaaq:
" § 81. Namminersornerullutik Oqartussat kommuuniluunniit inissianik allaffissornikkut aqutsisussamik avataaniit pissarsisimappat, Naalakkersuisut imaluunniit Kommunalbestyrelsep nakutigissavaa, inissianik allaffissornikkut aqutsisup suliani Inatsisartut peqqussutaat manna aamma aalajangersakkati peqqussut manna naapertorlugu suliarineqartut naapertorlugit suliarinerai.
Imm. 2. Kommune nammineerluni inissiatiminik allaffissornikkut aqutsinermik isumaginnittuuguni, kommunep suliani Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit isumagissavai.
Imm. 3. Namminersornerullutik Oqartussat kommuneluunniit aningaasatigut nakkutilliisussaatitaanini, tak. imm. 1, naammassiniarlugu inissianik allaffissornikkut aqutsisup kukkunersiuisua inissianik allaffissornikkut aqutsisup suliani Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit suliarinerai nalunaarusiortissinnaavaa.
Imm. 4. Kommunep inissiaatiminik nammineq allaffissornikkut aqutsisup ukiumoortumik suliassat Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit isumagineqarnerat pillugu kukkunersiuisuni ukiumoortumik nalunaarusiortittassavaa.
Imm. 5. Naalakkersuisut Namminersornerullutik Oqartussat kommunellu inissiaataat attartortittakkat najugaqatigiiffillu nakkutigineqarnerat, matumani ilanngullugit inissianik piginnittup imaluunniit aqutsisup aningaasaatinik aqutsinera, missingersuusiortarnera, naatsorsuutinik saqqummiisarnera kukkunersiuisoqarneralu, pillugu maleruagassiorsinnaapput.".

39. § 82, imm. 6, imatut oqaasertalerneqassaaq:
"Imm. 6. IPK maalaaruteqartarfimmut ilaasortassamik toqqaanngippat, maalaaruteqartarfimmut ilaasortassamik innersuussisinnaatitaaneq suliniaqatigiiffinnut ukununnga, taaneqartut tulleriiaarneri malillugit tutsinneqassaaq: SIK, IMAK aamma PPK.".

40. § 83, imm. 2-p immikkoortua 1 imatut oqaasertalerneqassaaq:
"Maalaaruteqartarfiup sulineranut aningaasartuutit Naalakkersuisunit akilerneqartassapput, matumani ilanngullugit siulittaasup ilaasortallu suliaminnut atatillugu akiliussigallarnerannut, tak. imm. 5, kiisalu allaffissornermut il.il. aningaasartuutit.".

41. § 83, imm. 4, imatut oqaasertalerneqassaaq:
"Imm. 4. Ineqarneq pillugu maalaaruteqartarfik ukiumoortumik nalunaarummik saqqummiussisassaaq, ilaatigut suliassat takkuttut suliallu naammassineqartut pillugit kisitsisitigut takussutissanik, kiisalu aalajangiisarnerit ataasiakkaat inernerinik naatsunngorlugit saqqummiunneqarnerinik imaqartunik.".

42. § 83, imm. 5-ip immikkoortua 4 imatut oqaasertalerneqassaaq:
"Akiliutissaq ukiumoortumik Inatsisartut aningaasanut inatsisaannut oqaasertaliinikkut annertussusilerneqartassaaq.".

43. § 84 imatut oqaasertalerneqassaaq:
"§ 84. Ineqarneq pillugu maalaaruteqartarfiup attartortut maalaarutaat makkununnga tunngasut suliarisarpai:
1) Ineqarnermut akiliutinik qaffaanissamik siumoortumik ilisimatitsisarnermi piumasarisat, tak. § 28, imm. 2.
2) Aserfallatsaaliuineq iluarsaassinerlu, tak. § 45.
3) Inissiap iserterfigineqarnerani qanoq issusia, tak. § 47.
4) Attartukkami atortut ikkussukkat pitsanngorsaanerillu (atuisinnaatitaaneq), tak. §§ 51 aamma 55.
5) Attartortup attartukkaminik atuinera (torersaarnissamik malittarisassanik unioqqutitisinerit), tak. § 50.
6) Atuisinnaatitaanerup allanut tunniunneqarnera (inissianik paalaateqatigiinneq, attartukkamik allamut utaqqiisaasumik attartortitsigallarneq aamma attartornermik nangitsineq), tak. §§ 58-62.
7) Inissiamit aninermi inissiap qanoq issusia (iluarsaassineq nalinginnaasoq), tak. § 77.
Imm. 2. Maalaarutit ineqarneq pillugu maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarummut pissutsinut attartortup suliaritikkusutaanut uppernarsaatissat pisariaqartinneqartut ilaatinneqassapput.
Imm. 3. Maalaarutip ineqarneq pillugu maalaaruteqartarfimmi suliarineqarnissaanut attartortoq annerpaamik 500 kr.-inik sullissinermut akiliummik akiliuteqartinneqassaaq. Maalaaruteqartoq maalaarutigineqartoq pillugu taperserneqarpat imaluunniit suliaq ineqarnermut maalaaruteqartarfimmi suliarineqarnissaminut naleqqutinngitsutut itigartinneqarpat aningaasat sullissinermut akiliutigineqartut maalaaruteqartumut utertinneqassapput.
Imm. 4. Attartortup suliaq eqqartuussivinnut suliakkiissutigineqareersoq ineqarneq pillugu maalaaruteqartarfimmut suliakkiissutigineqarnissaa kissaatigippagu, maalaaruteqartarfik maalaarutip suliarinissaanut itigartitsissaaq.".

44. § 85 imatut oqaasertalerneqassaaq:
"§ 85. Ineqarneq pillugu maalaaruteqartarfiup maalaarut, maalaaruteqartarfimmi suliarineqarnissamut naleqqutinngitsutut nalilerneqartoq suliarinissaa itigartissavaa.
Imm. 2. Maalaaruteqartarfiup maalaarut attartortup taperserneqarnissaanik ilimanaateqanngitsutut isigisariaqartoq suliariumanngissinnaavaa.
Imm. 3. Maalaaruteqartarfiup allattoqarfik imm. 1-imi 2-milu aalajangigassanik taaneqartunik aalajangiinissamut pisinnaatissinnaavaa.
Imm. 4. Ineqarneq pillugu maalaaruteqartarfiup allattoqarfiata aamma siulittaasup maalaaruteqarfiup tullianik ataatsimiinnissami suliassat piareersassavaat. Siulittaasoq aalajangiisinnaavoq suliassaq aalajangersimasoq misissorneqassasoq imaluunniit erseqqinnerusumik qulaajaaffigineqassasoq suliassap qanoq inernilerneqarnissaa pillugu inassuteqaammik suliaqarnermut atasumik. Tassunga atatillugu siulittaasup piumasarisinnaavaa suliami ilaasut illuatungeriit, pisortat aamma namminersortut paasissutissanik tunniussissasut.
Imm. 5. Suliap suliarisassanngortinneqarluni ilanngunneqarneraniit kingusinnerpaamik sapaatit akunnerisa marluk qaangiunnerini maalaaruteqartarfiup allattoqarfiata suliami illuatungiliuttoq suliakkiissuteqarneq pillugu ilisimatissavaa, tassanilu nalunaarutip nassiunneraniit sapaatit akunneri pingasut qaangiutsinnagit illuatungiliuttup suliamut isummaminik saqqummiussisinnaanera allanneqassaaq. Piffissamik killissarititaasoq tamanna maalaaruteqartarfiup sivitsorsinnaavaa, tamatumani immikkut ittunik pissutissaqartoqarpat.
Imm. 6. Allattoqarfik siulittaasup suliami pineqarlutik ilaasunut allanulluunniit apeqqutigisaanut akissuteqarnissamut piffissamik killiliissaaq, tamatumanilu nalinginnaasumik sapaatit akunneri pingasut qaangerneqarsinnaanngillat. Nalunaarutip nassiunneraniit piffissamut killissarititaasoq tamanna maalaaruteqartarfiup sivitsorsinnaavaa, tamatumani immikkut ittunik pissutissaqartoqarpat.
Imm. 7. Siulittaasup maalaqaruteqartarfiup allattoqarfia noqqaaffigisinnaavaa inissiaq maalaarutigineqartoq suliamut attuumassuteqanngitsunit takuniarlugu misissorteqqullugu. Suliami pineqarlutik ilaasut sivikinnerpaamik sapaatit akunnera ataaseq sioqqullugu aggersarneqassapput. Takuniaalluni misissuinermut aningaasartuutit Naalakkersuisunit akilerneqassapput.
Imm. 8. Suliami pineqarlutik ilaasut takkunnerminni maalaaruteqartarfimmut nassuiaateqarsinnaanngillat.".

45. § 86-imi imm. 2-mi "§ 85, imm. 5" allanngortinneqassaaq "§ 85, imm. 6,"-inngorlugu.

46. § 86, imm. 3, imatut oqaasertalerneqassaaq:
"Imm. 3. Ineqarneq pillugu maalaaruteqartarfiup aalajangigai nalinginnaasumik amerlanerussuteqarnikkut aalajangiiffigineqassapput. Taasisut amerlaqatigiippata siulittaasup taasinera aalajangiisuussaaq. Ineqarneq pillugu maalaaruteqartarfik aalajangiisinnaatitaavoq, siulittaasoq taassumaluunniit sinniisussaa ikinnerpaamillu ilaasortat marluk taakkuluunniit sinniisussaat najuuppata.".

47. § 88, imm. 1, imatut oqaasertalerneqassaaq:
"§ 45, imm. 3 aamma §§ 77, 78 aamma 80, imm. 1 aamma 2 attartornernut, 1. januar 1990 sioqqullugu aallartissimasunut atuutissanngillat.".

 

Peqqussutissatut siunnersuummut nassuiaatit

 

Nassuiaatit nalinginnaasut

Peqqussutissatut siunnersuummut allannguutissatut siunnersuutip saqqummiunneqarneranut tunuliaqutaavoq Inatsisartut Inatsiseqarneq pillugu teknikimut tunngasunik ingerlatsiviata inassuteqarnera aamma teknikimut oqaasertaanillu aaqqiissutit.

Allannguutissatut siunnersuutip inatsiseqarneq pillugu teknikimut tunngasortai misissuiffigineqareerput.

Peqqussutissatut siunnersuutip allaffissornikkut aqutsinermut sunniutissai:

Allannguutissatut siunnersuut peqqussutissatut siunnersuummut naleqqiullugu allaffissornikkut aqutsinermut suliassat annertunerulernerinik kinguneqassanngilaq.

Peqqussutissatut siunnersuutip aningaasaqarnikkut sunniutissai:

Allannguutissatut siunnersuut peqqussutissatut siunnersuummut naleqqiullugu aningaasaqarnikkut sunniutissat allangornerinik kinguneqassanngilaq.

 

Aalajangersakkanut ataasiakkaanut nassuiaatit

 

§ 1-imut

Nr. 1-mut

Allannguutissatut siunnersuut Inatsisartut Ombudsmandiata aamma Inatsisartut Kukkunersiuinermut Ataatsimiititaliaata ilinniartut inaannut maleruagassiortoqarnissaanik inassuteqarnerisa kinguneraat. Siunnersuutip kingunerisaanik peqqussut inissianut, Namminersornerullutik Oqartussat kommunelluunniit ilinniartunut atugassiissutigisaannut atuutsinneqassanngilaq. Tamatuma kingunerisaanik periaaseq maanna atorneqartoq assigalugu taamatut attartortitsinermi ineqarnermut tapiissuteqartoqartassanngilaq.

Nr. 2-mut

Allannguutissatut siunnersuutip kingunerisaanik Naalakkersuisut Kalaallit Nunaanni Kommuneqarfiit Kattuffiat isumasioqatigereerlugit inissianut maleruagassanik aalajangersaasinnaalerput, matumani ilanngullugit ilinniartut ineqarfiini init inissiallu, ilinniartunut ilinniarnerannut atasumik atugassanngortinneqartut. Naalakkersuisut ilaatigut inissianut taamaattunut innersuussisarneq, attartortitsineq, attartornermut akiliutip iluarsineqarnissaanik siumoortumik nalunaaruteqartarneq, iluarsaassineq, attartukkamik atuineq, attartukkamik aallamut utaqqiisaassumik attartortitsigallarneq, taamaatitsineq, atorunnaarsitsineq, inissiamiit nuunneq, qularnaveeqqutissamik, innaallagissamut, imermut kiassarnermullu akiliisarneq il.il. pillugit maleruagassiorsinnaapput.

Tamatumani siunertaavoq inissiani Namminersornerullutik Oqartussanit atugassiissutigineqartuni ineqarnermut akiliutip annertussusissaa Inatsisartut Aningaasanut Inatsisaanni aalajangersarneqartassasoq, kiisalu kommunalbestyrelse inissiani, kommunalbestyrelsenit ataasiakkaanit atugassiissutigineqartuni ineqarnermut akiliutip annertussusissaa aalajangersarneqartassalluni.

Nr. 3-mut

Aalajangersakkami "utaqqiisaassumik sulisunut inigitinneqarallartunut inissiinermi" uuminnga taarserneqarpoq: "utaqqiisaassumik sulisunut inigitinneqarallartunut allatut inissiinermi", taamaalillunilu imm. 3 taamaallaat utaqqiisaasumik inissiigallartarnermut atuutilerpoq, tak. imm. 2, tassalu imm. 1 naapertorlugu najugassaqartitsigallartarnermut atuukkunnaarluni. Taamaalilluni aalajangersagaq Naalakkersuisut naalakkersuinikkut ingerlatsinerannut siunnersuummilu § 4-mut nassuiaatinut naapertuuttunngorlugu iluarsineqarpoq.

Nr. 4-imut

Aalajangersaq oqaasertamigut allannguuteqartinneqarluni siunnersuummi § 5, imm. 2-mut assingusuuvoq.

Nr. 5-imut

Aalajangersakkami "ukiumoortumik akiliuteqartinneqarsinnaavoq"taarserneqarpoq "ukiumoortumik akitsuusiiffigineqarsinnaavoq"-mik, erseqqissarumallugu, akitsuutit akiligassiissutigineqarsinnaasoq, pisariaqanngitsoq inissianut normunik allaffissornikkut aqutsinermi aningaasartuutit piviusut amerlaqatigissagaat.

Nr. 6-imut

Allannguut allannguutip § 9, imm. 1-imiittup kinguneranik iluarsiissutaavoq.

Nr. 7-imut

Aalajangersakkap qallunaatoortaani "§§ 16 og 17"-p kingorna uniffik peerneqarpoq.

Nr. 8-imut

Aalajangersakkami siunnersuutip qallunaatoortaani § 14, imm. 2-mi "enfamile-" "enfamilie-"-mut allanngortinneqarpoq.

Nr. 9-mut

Aalajangersakkami siunnersuummi § 18, imm. 3-mi §§ 11-mut, 12-imut, 16-imut aamma 17-imut innersuussineq peerneqarpoq, pineqartut inissiamik qanoq angitigisumik innersuunneqarsinnaanersut aalajangersakkani allani allassimareermata.

Nr. 10-mut

Aalajangersagap oqaasertamigut imarisamigullu siunnersuummi § 20-mi allannguutit assigai.

Imm. 1, nr, 1 erseqqissarneqarpoq, taamaalilluni taamaallaat aalajangersarneqarluni, atorfilik pisussaasoq sulisunut inissiamik innersuuneqartumik tigusinissamik pisussaasoq. Siunnersuutip immikkoortuata aappaa imm. 1, nr. 1-imiittoq allannguutissatut siunnersuutip imm. 2-atut ingerlatiinnarneqarpoq.

Imm. 1, nr. 2-p kingunerisaanik atorfilik sulisunut inissiamik innersuunneqartumik tigusiumanngitsoq sulisunut inissianut utaqqisut allattorsimaffianniit peerneqassaaq.

Imm. 1, nr. 3-p kingunerisaanik atorfilik sulisunut inissiamik innersuunneqartumik tigusiumanngitsoq ineqarnermi atukkaminik aaqqiinissaq eqqarsaatigalugu innuttaasutulli allatut nammineertussanngortinneqassaaq.

Imm. 2-p nassataraa, Naalakkersuisut aamma sulisorisap soqutigisaqaqatigiiffik isumaqatigiinniarsinnaasoq ilaasortaaffigisaa periarfissaqartut isumaqatigiissuteqarnissamut, tassani isumaqatigiissutigalugu, sulisut aalajangersimasut isumaqatigiissumi pineqartut, inigisassanik aalajangersimasunik immikkut ittunik piumasinnaasut, soorlu assersuutigalugu qanoq angissuseqassanersut aamma sumi inissisimassanersut. Erseqqissumik isumaqatigiissutitigut aalajangersarneqarpat, sulisorisaq tamanna najoqqutaralugu inissaanik innersuussiffigineqassaaq

Nr. 11-imut

Teknikikkut iluarsiissoqarnerata malitsigisaanik naqqiuteqartoqarpoq.

Nr. 12-mut

Inatsisartut Attaveqarnermut Ineqarnermullu Ataatsimiititaliaata, sulisut soraarninngortut isumagineqarnissaata ajunngitsumik naapertuuttumik pineqartarnissaanik kissaateqarnera tunngavigalugu aalajangersagaq ilanngunneqarpoq. Soraarninngornermi utoqqalinersiuteqalerneq eqqarsaatigineqarpoq, tak. pisortanit pensionisiat pillugit Inatsisartut peqqussutaat nr. 9, 15. april 2003-meersoq. Tassalu soraarninngornerup tunngavigineqarnerani siusinaarlutik pensionisiallit, innarluuteqarlutik pensionisiallit tjenestemandillu suli 63-iliinatik soraarninngortut pineqanngillat.

Tamatuma kingorna siunnersuummi imm. 3 imm. 4-nngorlugu allanngortinneqarpoq.

Nr. 13-mut

Aalajangersakkami imm. 4 oqaasertamigut allannguuteqartinneqarluni siunnersuummi § 21, imm. 3-mut assingusuuvoq.

Siunnersuummut oqaaseqaatini immikkoortoq kingulleq kukkuneqarpoq, tassanilu allaqqavoq aalajangersagaq Namminersornerullutik Oqartussat qitiusumik allaffeqarfianni allaffimmi pisortanut atuutinngitsoq. Tassani allassimasussaavoq aalajangersagaq immikkoortortani pisortanut, Namminersornerullutik Oqartussat qitiusumik allaffeqarfianni atorfeqartinneqartunut atuutinngitsoq.

Nr. 14-imut

Aalajangersagaq oqaasertamigut teknikimullu tunngasutigut erseqqissaavigineqarluni siunnersuummi § 28-mut assingusuuvoq.

Imm. 1-ip qallunaatoortaani "§ 32, stk. 7"-ip kingorna uniffik ikkunneqarpoq.

Imm. 2-p kingunerissaanik attartortitsisup paasissutissiisussaatitaaneranut tapertaasumik ilaatigut attartortitsisup ineqarnermut akiliutip allannguuteqarnissaanik siumoortumik nalunaaruteqarneranut ukiumut tulliuttumut missingersuutit, ukiumi atuuttumi ukiunilu tulliuttuni missingersuutini pingaarnernik takutitsiviusut ilanngunneqarsinnaapput.

Imm. 3 siunnersuummi § 28, imm. 3-mut naleqqiullugu allannguuteqartinneqanngilaq.

Imm. 4-p nassataraa, najugaqatigiiffimmi siulersuisut siunnersuutaat, najugaqatigiiffimmi naammaginartumik pitsanngorsaasoqarlunilu nutarterisoqarnissaanik suliaqartoqassappat, tamanna ilaqartinneqassasoq suliarineqartunut aningaasartuutinut matusissutissanik attartornermut akiliutit pisariaqarttinnetumik qaffanneqarnissaanik siunnersuumik akuersaassasut. Namminersornerullutik Oqartussat kommunellu inissiaataannik attartortittakkanik attartortitsisarneq pillugu Namminersornerullutik Oqartussat Nalunaarutissaattut nalunaarutaat nr. 23, 22. december 2003-meersumi allaqqavoq, ukiumoortumik ineqarnermut akiliut atuutoq 5 % sinnernagu qaffaateqarnissaa ilimanaateqanngitsoq, najugaqatigiiffimmi siulersuisut ineqarnermut akiliutii qaffaassutaa akuerissagaat. Akerlianik ineqarnermut akiliutip qaffaassutissaa naatsorsuutigineqartoq ukiumoortumik ineqarnermut akiliutip atuutup 5 %-iat sinnerlugu annertussuseqarpat , aammalu najugaqatigiiffimmi ataatsimiinnermi najuutut arfineq-pingasorarterutaasa piumasarippassuk, inaarutaasumik akuersissuteqarneq taasinikkut aalajangerneqassaaq, attartukkat tamarmik immikkut marlunnik taasinernik taasisinnaatitaallutik attartukkat angisussaa apeqqutaatinnagu.

Imm 4 atuutinneqartarpoq pitsanngorsaanermut nutarterinermullu suliat najugaqatigiiffiup aningaasatogut missingersuutaasa iluanni isumagineqarsinnaanngikkaangata, akerlianik § 26, imm. 2, atortinneqartarluni ima pisoqartillugu aserfallatsaaliuinermi suliat aamma nutaaliornerit najugaqatigiiffiup aningaasatigut missingersuutit iluanni isumagineqarsinnaagaangata.

Nr. 15-imut

Aalajangersakkap kingunerisaanik illuutini 1. januar 2015 nallertinnagu teknikikkut atortulersuutaannik iluarsaassiviusussani immikkut imermut uuttuusersuinissamut ilaatinneqannginnissami piumasarineqarpoq, illuutip pineqartup iluarsaassinermut atatillugu immikkut imermut uuttuusersuiffigineqarnissaa. Inissiamik piginnittup, tassalu Namminersornerullutik Oqartussat imaluunniit kommunep, immikkut imermut uuttuusersuinissaq qaqugu pissanersoq pillugu pingaarnermik naliliisussaavoq. Illuutini, teknikikkut atortut iluarsaanneqartussaatillugit, iluarsaassinermut ilaatillugit immikkut imermut uutuutinik ikkusuisoqartassaaq. Illutinut allanut tamanut tunngatillugu naatsorsuutigineqarpoq, illumik piginnittoq ikkussuisoqarnissaannut pilersaarummik suliaqassasoq piaartumik inatsisip atuutilernerata kingorna.

Nr. 16-imut

Aalajangersagaq teknikimut tunngasutigut allannguuteqartinneqarluni siunnersuummi § 32, imm. 4-mut assingusuuvoq. Siunnersuummut naleqqiullugu imm. 4-p immikkoortuisa pingajuat peerneqarpoq, tassanilu allassimavoq ilassutitut sullissinerit attartortitsisumit neqeroorutigineqarsinnaasut toqqarneqarsinnaasullu.

Aalajangersakkap kingunerisaanik attartortitsisup nammineerluni ilassutitut sullissinerit avataaniit allaffissornikkut aqutsisup neqeroorutigisai akuerisinnaavai itigartissinnaallugilluunniit, ilassutitut sullissinerit najugaqaqatigiiffiup ingerlatsinermut missingersuutaasa akuerisat iluanni aningaasalersorneqarsinnaappata, tak. siunnersuummi § 26, imm. 1. Attartortitsisoq pisussaatitaanngilaq aalajangiiniarnermini attartortut tusarniaaffigissallugit ilaatissallugilluunniit. Attartortitsisoq avataaniit allaffissornikkut aqutsisumik atorfinitsitsisimanngikkuni, attartortitsisup nammineerluni ilassutitut sullissinerit suut attartortunut neqeroorutigissanerlugit aalajangissavaa.

Aalajangersagaq avataaniit allaffissornikkut aqutsisunut, attartortitsisup atorfinitsissimasinnaasaannut tamanut atuutsinneqarpoq.

Tunngaviusumik sullissineq ima paasineqassaaq tassaasoq sullissineq illup isumannaatsumik allaffissornikkut aunneqarneranut pisariaqartinneqartoq. Taamaattumik Tunngaviusumik sullissinerup annertussusissaa illumik pisinnittumit aalajangersarneqartarpoq. Illuatungaani ilassutitut sullissineq tassaavoq allanik saniatigut sullissinerit, najugaqatigiiffiit ataasiakkaat illumik piginnittumut imaluunniit allaffissornikkut aqutsisumut isumaqatigiissutaat naapertorlugu suliarineqartussat. Aalajangersagaq allaffissornikkut aqutsisunut avataaniit attartortitsisumit atorfeqartinneqartunut atuuppoq.

Nr. 17-imut

Aalajangersakkami oqaaseq "aningaasartuutinut" taarserneqarpoq imaalersillugu "aningaasartuutinut naleqqutunut", erseqqissarumallugu, aserorterisarneq akiorniarlugu aamma aserorterneqartartut iluarsarneqartarnerannut akiliutissat piumamut qaffisinaarlugit attartortitsisumit aalajangersarneqartarnissaat pinngitsoorumallugu. Taamaalilluni naleqquttumik aalajangersaasoqartarnissaa aalajangersakkami ilaatinneqarpoq. Akiliutissap annertussusissaanik attartortitsisup siunnersuutaa najugaqatigiiffimmi siulersuisunut ilisimatitsissutitut saqqummiunneqartariaqarpoq, inaarutaasumik attartortitsisumit aalajangerneqannginnerani.

Nr. 18-imut

Aalajangersagaq siunnersuummi § 37, imm. 2-mut naleqqiullugu imm. 2-p immikkoortuisa sisamaat ilassutigineqarpoq, taannalu imaappoq: "Sullissinermut akiliut attartortitsisumut tutsinneqartassaaq."

Aalajangersakkap kingunerisaanik sullissinermut akiliut tamarmiusoq, tassunga ilanngullugit pilersitsinermi sullissinermut akiliut, sullissinermut akiliutit ingerlaavartut aamma akileeqqusinermut sullissinermut akiliutit attartortitsisumit akilersinniarneqassapput attartortitsisumullu tutsinneqassallutik. Tamatuma saniatigut sullissinermut akiliut pinngitsoorani akiligassaavoq, taamaattumillu akilersinniassallugu attartortitsisoq pisussaavoq.

Attartortitsisoq avataaniit allaffissornikkut aqutsisumut suliakkiisinnaavoq, taassumalu sullissinermut akiliutissat attartortitsisoq sinnerlugu akilersinniartassavai.

Nr. 19-imut

Aalajangersakkami imm. 2-p immikkoortuisa 5-ianni ilanngunneqarpoq "imaluunniit attartortitsisoq avataaniit allaffissornikkut aqutsisumik atuippat, taassuma niuernikkut ingerlataqarfianut akilerneqassaaq." Ilassut ilanngunneqarpoq attartortitsisoq avataaniit allaffissornikkut aqutsisumik atorfinitsitsisimappat, aammalu avataaniit allaffissornikkut aqutsisoq akiliiffissamik innersuussisimanngippat attartortup pisussaaffiujunaartumik attartortitsisup avataaniit allaffissornikkut aqutsisuutitaata niuerfianut ineqarnermut, imermut kiassarnermullu akiliisinnaanera erseqqissarniaarlugu.

Nr. 20-imut

Aalajangersakkami oqaaseq "aallarniutitut akiliut" peerneqarpoq, aallarniutissanik akiliisitsisoqartanngimmat, taamaallaalli inissianut attartortittakkanut attartornermut peqqussummi ilaatinneqartunut qularnaveeqqusiissutissanik akiliisoqartarmat.

Nr. 21-imut

Aalajangersakkami "Ilassutissatulli akiligassat qaammatini pingasuni attartornermut akiligassanit amerlaneruppata" imatut allanngortinneqarpoq: "Ilassutissatulli akiligassat qaammatini pingasuni kiassarnermut siumoortumik akiliutaagallartunit amerlaneruppata".

Aalajangersakkami erseqqissarneqarpoq ilassutissatut akiligassat qaammatini pingasuni kiassarnermut akiliutaagallartunit amerlaneruppata attartortoq pisinnaatitaasoq, akiligassat qaammatikkaartumik akiligassatut pingasunut annertoqatigiinnik annertussusilerlugit agguarlugit akilersussallugit.

Nr. 22-imut

Siunnersuummi § 44 oqaasertaasigut taamatullu najoqqutassatigut arlalinnik allannguuteqartinneqarpoq. Imm. 5 nutaaq ikkunneqarpoq, taamaalillunilu siunnersuummi imm. 6 allannguutissatut siunnersuummi imm. 7-inngorpoq.

Imm. 2-mi erseqqissarneqarpoq siumoortumik akiliutaagallartoq attartortitsisup imermut aningaasartuutaanut matusissutissaasoq.

Imm. 3-mi erseqqissarneqarpoq attartortitsisoq imermut naatsorsuutinik isumagisaqarnermut attartornermut ataatsimut 275 kr.-it sinnerlugit sullissinermut akiliisitseqqusaanngitsoq, attartortitsisup imermut naatsorsuutinik isumaginninneranut aningaasartuutit tamakkiisut aalajangersagaq malillugu akiliutinit isertitanit tamakkiisunit annerugaluarpataluunniit.

Aammattaaq imm. 4-mi erseqqissarneqarpoq attartortitsisoq imermik atuaanermut attartornermut ataatsimut 175 kr.-it sinnerlugit sullissinermut akiliisitseqqusaanngitsoq. Sullissinermut akiliutissamuttaaq tassunga killiliussaq atuutissaq aningaasartuuterpiaat tamakkiisut aningaasanit taakkunannga amerlanerugaluarpataluunniit.

Imm. 5-imi attartortup attartortitsisumut isumaqatigiissuteqareernermigut nammineerluni imermut uuttuumik atuaalluni tamatuma inerneranik attartortitsisumut nalunaaruteqartarnissaa periarfissinneqarpoq. Attartortoq periarfissamik taassuminnga atuissaguni attartortoq taamaallaat atuaanermut 50 kr.-it sinnernagit amerlassuseqartunik sullissinermut akiliisinneqarsinnaavoq.

Kiisalu attartortup imermut ilaliussatut akiligassaq qaammatini pingasuni imermut akiliutaagallartussat sinnerlugit annertussuseqarpata, ilaliussatut akiligassat qaammatini pingasuni siumoortumik akiliutaagallartussat sinnerlugit annertussuseqartut qaammatikkaartumik akiligassatut pingasunut annertoqatigiinnik annertussusilerlugit agguarlugit akileraasinnaavoq. Taamaalilluni attartortup imermut kiassarnermullu ilassutitut akiligassanik akilersuisinnaanissaa qulakkeerneqarpoq, tak. § 43, imm. 3-p immikkoortuisa aappat.

Nr. 23-mut

Aalajangersakkami imm. 5-imi pinngitsuuinissamut maleruagassamut innersuussut ilanngunneqarpoq.

Nr. 24-mut

Aalajangersakkami iserternissamut atatillugu misissuinngitsoortoqarsinnaaneranut periarfissaq ammaanneqarpoq. Pisartunit aalajangersakkamut attuumassuteqartunit inissiaq nunaqarfimmiitoq, taamaattumillu annertuunik aningaasartuuteqartoqarfiusariaqartoq, kiisalu attartortup attartortitsisullu sivisujaamik nunaqarfimmut misissuiartorlutik angalasariaqarnerat assersuutitut taaneqarsinnaavoq.

Nr. 25-mut

Aalajangersakkami siunertarineqarpoq, attartukkami uumasuutit ajoqusiinerisa amerlassusaannik killilersuinissaq, kiisalu uumasuuteqarnerup illuummi najugaqartunut ajoqutaanissaata pinngitsoorneqarnissaa.

Aalajangersakkami erseqqissarneqarpoq attartortitsisoq uumasuuteqarnissamut akuersissuteqartussaasoq, taamaattorli aalisakkat aalisagaasivimmiittut, timmisat ineqartinneqartut, saaniluit, kikkaasut ineqartinneqartut, soorlu hamsterit, marsvinit, terissat, teriarsuit, kaniinat chinchillallu akuersissuteqarnissamut piumasaqaateqarfiunngillat. Aalajangersakkami siunertaq eqqarsaatigalugu uumasuutinik taamaattunik peqarnissamut akuersissummik piumasaqaateqartoqarnissaa naleqquttutut isumaqarfigineqanngilaq.

Pisuni aalajangersimasuni suut akuersissuteqarfiussanersut attartortitsisup nammineerluni aalajangissavaa. Suut akuersissuteqarfiussanersut naliliiffigineqarnerini aalajangersakkami siunertaasoq pingaartinneqassaaq. Tapiitsut qimmiinik politiillu qimmiinik peqarnissamut tamatigut akuersissuteqartoqartariaqarpoq.

Nr. 26-mut

Aalajangersagaq siunnersuummi § 51-imut allannguutaavoq, tassani oqaasertai najoqqutassatigullu imai pineqarlutik.

Imm. 1-imi erseqqissarneqarpoq § 51 taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq.

Imm. 2 naapertorlugu attartortoq inissiamit nuunnermini attartortup ikkussukkat pissuserisimasaattut utertillugit iluarseqqinnissai attartortitsisumit piumasarineqarsinnaavoq, imaluunniit attartortup inissiamit nuunnerani attartortitsisup ikkussuutanik nammineerluni tigusinissani aalajangersinnaallugu.

Attartortup inissiamit nuunnermini ikkussukkanik pissuserisimasaattut utertillugit iluarseeqqinnissaa piumasarineqarpat, attartortitsisup tamatumunnga peqatigitillugu imm. 3 naapertorlugu attartortup naammaginartumik annertussusilimmik tamatumunnga sillimmatissatut qularnaaveeqqusiinissaa piumasarisinnaavaa. Aalajangersakkakkut attartortitsisoq iluarseeqqinnissamut pisussaaffimminik uniuippat attartortitsisoq aningaasatigut sillimmateqassaaq. Qularnaveeqqusiissut naammaginartumik annertussusilik tassaavoq, qularnaveeqqusiissut ikkussukkat iluarseqqinissaannut akiligassaanut naapertuuttunik aningaasartaqartoq.

Nr. 27-mut

Aalajangersakkami erseqqissarneqarpoq § 52 taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq.

Nr. 28-mut

Aalajangersakkami erseqqissarneqarpoq § 53 taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq.

Nr. 29-mut

Aalajangersakkami erseqqissarneqarpoq § 54 taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq. Taakkunani attartortut ataasiakkaat ikkussukkanik, siunnersuummi §§ 51-53 naapertorlugu ikkussorneqartunik pissuteqartumik ajoqusernernut taarsiisussaatitaapput. Taarsiisussaatitaaneq taarsiisussaatitaanermut inatsisit nalinginnaasut naapertorlugit periutsit malillugit maleruagassiorneqarpoq.

Pissutsini inunnik isumaginninnermut inatsisit naapertorlugit atortunik iluaqusersuutinik ikkussuisoqarsimatillugu, tak. siunnersuummi § 53, ikkussuinermut tunngasumik aserorneqarsimasinnaasunut taasiissuteqartussaanermut akisussaasoq tassaavoq najugarisami kommune, pilersitsinermi akuerinnittoq. Taamaalilluni kommune ikkussukkamut tunngatillugu qularnaveeqqusiissutut inissisimavoq.

Imm. 2-p kingunerisaanik nutaatut attartortup imm. 1 malillugu taarsiisussaatitaanera atorunnaassaaq, attartortoq inissiamit nuunnermini ikkussukkat iluarseqqippagit, imaluunniit ikkussukkat attartortitsisup tiguppagit.

Nr. 30-mut

Aalajangersakkap kingunerisaanik siunnersuummi § 55, imm. 2 peerneqarpoq, taamaalillunilu siunnersuummi imm. 3 imm. 2-tut nutaatut ikkunneqarluni.

§ 55, imm. 1-mi erseqqissarneqarpoq aalajangersagaq taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq.

Aammattaaq imm. 2-mi erseqqissarneqarpoq attartortoq attartukkamini attartortitsisumit siumut akuersissummik peqqaarani allanngortiterisimaguni attartortoq taarsiisussanngortinneqassasoq. Attartortoq taarsiisussaatitaanermut inatsisit nalinginnaasut naapertorlugit periutsit malillugit akisussaasuuvoq.

Nr. 31-mut

Aalajangersakkap atuutilerneratigut oqaaseq "aallarniutitut akiliut" aalajangersakkamit peerneqarpoq, periuseq taanna atorneqanngimmat.

Nr. 32-mut

Aalajangersakkami erseqqissarneqarpoq § 59 taamaallaat Namminersornerullutik Oqartussat kommunellu inissiaataanni attartortittakkani attartortunut tunngasuusoq.

Nr. 33-mut

Aalajangersagaq siunnersuummi § 59, imm. 4-p aallartinnerani oqaatsinut atorneqartunut erseqqissaataavoq, taamaalillunilu ersarinnerulerpoq imm. 4, nr. 1 aamma 2 periarfissatut saniatigut qinigassaasut.

Allanngutissatut siunnersuummi § 59, imm. 4, nr. 1, naapertorlugu inigisamik paarlaateqatigiisinnaaneq killilerneqarpoq pisinnaasoq qaammatini 36-imi inigisaq najorsimagaanni, peqqussutissatut siunnersuummi ullormik aalajangersimasumik taasaqarnissaraluamut taarsiullugu. Allannguuteqartitsineq suliarineqarpoq qulakkeerumallugu, inigisamik paarlaateqatigiineq qaqugukkulluunniit inigisat akornanni pisinnaasoq, paarlaateqatigiinissaq qaammatit 36-it kingulliit iluanni inigisani nutaamik iluarsaanneqarsimasuni.

Nr. 34-mut

Aalajangersagaq siunnersuummi § 61, imm. 1-ip immikkoortuata 2-ani oqaatsinut atorneqartunut erseqqissaataavoq, taamaalillunilu pineqartoq kinaassusersiunngitsutut paasineqarsinnaalerpoq.

Nr. 35-mut

Aalajangersakkap erseqqissarpaa, atorfeqartup atorfeqarneq taamaatinneqarpat atorneqarnermut atatillugu inigisami attartornera taamaatitsissallugu nalunaarutigissagaa, kisiannili atorfeqarunnaaraluarluni atorfeqarnermut atatilugu inigisaq najuinnarallarsinnaagaa, inigisap imm. 2 naapertorlugu inigisap taamaatitsinissamut piffissaritinneqartup nalinginnaasup naanissaata tungaanut. Aalajangersakkami erseqqissarneqarpoq sulisup atorfeqarnera unitsinneqaraluartoq, sulisup inissiaq imm. 2 naapertorlugu inissiamik taamaatitsinissamut piffissarititaasup nalinginnaasup naanissaata tungaanut najuinnarsinnaagaa. Taamaattumik sulisup atorfeqarnerata unitsinneqarnerani ulloq taanna sulisoq sulisumut inissiamit nuuttariaqanngilaq. Assersuutitut sulisup suliffimminit peersinneqarluni atorfeqarnerata erngerluni unitsinneqarnera taaneqarsinnaavoq. Taamatut pisoqartillugu sulisoq qaammatip tulliuttup naanissaata tungaanut inissiami najukkamini najugaqaannarsinnaavoq.

Nr. 36-mut

§§ 67-ip aamma 68-ip akornanni akunniliussaq peerneqarpoq, siunnersuummi aalajangersakkanut allanut akunniliussat assigilersillugit.

Nr. 37-mut

§ 69-ip qallunaatoortaani imm. 2-p immikkoortuisa pingajuanni "nr. 2 og 3"-p kingornani uniffik ikkunneqarpoq.

Nr. 38-mut

Aalajangersakkami oqaasertaliussat imm. 1-imi aamma 3-mi allanngortinneqarput, siunnersuummili § 85, imm. 5, peerneqarluni, taamaalilluni siunnersuummi imm. 6, imm. 5-inngorpoq.

Imm. 3-mi serseqqissarneqarpoq, Namminersornerullutik Oqartussat kommunellu nakkutilliisussaanermut pisussaaffiup ilaa, najugaqatigiiffiup aningaasaqarneranut tunngasoq, piginnaatitsinikkut illup allaffissornikkut aqutsisuata kukkunersiuisuanut isumagineqartussanngortinneqarsinnaasoq, taanna nalunaarummik suliaqartussanngorlugu, illumik allaffissornikut aqutsisup suliani Inatsisartut peqqussutaat manna aalajangersakkallu peqqussut manna naapertorlugu suliarineqartut naapertorlugit suliarigai. Aalajangersakkap taamaalilluni siunertaraa, kukkunersiuisup aningaasaqarnermut tunngatillugu nakkutilliineq isumagigaa, kisiannili imm. 1 malillugu nakkutilliinerup sinnera illumik piginnittup isumagisarigaa, tamannalu ingerlaavartumik nakkutiginninnikkut pisoq aamma attartortuniit maalaarutinik tigusaqartarnikkut pisoq.

Nr. 39-mut

§ 82, imm. 6-ip qallunaatoortaani "nævnsmedlem"-ip aamma "på"-p akornanni uniffik peerneqarpoq.

Nr. 40-mut

§ 83, imm. 2-p immikkoortuani siullermi imm. 5-ip kingorna uniffik ikkunneqarpoq.

Nr. 41-mut

Aalajangersakkap qallunaatoortaani § 83, imm. 4-p oqaasertai ersarissarneqarput, taamaalillunilu "statistisk oversigt" "en statistisk oversigt"-imik taarserneqarpoq..

Nr. 42-mut

Aalajangersakkap kingunerisaanik siunnersuummi § 83, imm. 5-ip immikkoortuisa pingajuanni najoqqutassatigut allannguisoqarpoq.

Akiliut ukiumiit ukiumut allanngortarmat, tassani ukiumoortumik Inatsisartut aningaasanut inatsisaanni oqaasertaliinikkut taamaallaat aningaasartaasa aalajangerneqartarnissaat naapertuuttutut isumaqarfigineqarpoq, taamaalillunilu aningaasartaasa allanngorneri tamaasa inatsisip allanngortinnneqartarnissaa pinngitsoorneqarpoq. Inatsisip atuutilernerani sullissinermut akiliut 100 kr.-inik annertussuseqartinneqarpoq.

Nr. 43-mut

Aalajangersakkami siunnersuutip § 84-iat oqaasertaanut aamma imarisaanut tunngasut allanngortinneqarput.

Imm. 1-imi erseqqissarneqarpoq, attartortut kisimik Ineqarneq pillugu maalaaruteqartarfimmut maalaarummik suliassanngortitsisinnaasut. Taamaalilluni attartortitsisoq maalaaruteqartarfimmut maalaarummik suliassanngortitsisinnaanngilaq.

Imm. 3-mi erseqqissarneqarpoq, attartortoq Ineqarneq pillugu maalaaruteqartarfimmut suliassanngortitsinermut atatillugu sullissinermut akiliummik akiliuteqassasoq. Sullissinermut akiliut utertinneqassaaq, attartortoq maalaarummut taperserneqarpat. Taperserneqarneq tassaavoq, suliassamut tunngatillugu aalajangiisoqarpat, maalaaruteqartup piumasaanik tamanik imaluunniit ilaanik isumaqatigineqarneq. Taperserneqannginneq tassaavoq, suliassamut tunngatillugu aalajangiisoqarpat maalaaruteqartup piumasaanik tamanik isumaqatigineqannginneq imaluunniit killilimmik isumaqatigineqarneq. Sullissinermut akiliut aamma utertinneqassaaq maalaaruteqarfimmi suliassaq naleqqutinngitsutut suliariumaneqanngippat.

Imm. 4-mi aalajangersarneqarpoq, Ineqarneq pillugu Maalaaruteqarfiup suliassap suliarineqarnissaa itigartissavaa, maalaarutip tunniunneqarnerata nalaani eqqartuussivinnut suliassanngortinneqareersimappat.

Nr. 44-mut

Aalajangersagaq siunnersuummi § 85-imut allannguutaavoq, tassani oqaasertai najoqqutassatigullu imai pineqarlutik. Immikkoortunik nutaanik ikkussisisoqarpoq (1-3). Siunnersuummi imm. 2 aamma 4 ataatsimut kattullugit allanneqarput allannguutissatut siunnersuummi imm. 4-nngorlutik. Immikkoortut siunnersuutip saqqummiunneqaqqaarneraniiitut matuma kingorna imm. 5-8-nngorput.

Imm. 1 naapertorlugu maalaaruteqartarfiup maalaarutit suliarineqartussatut naapertuutinngitsutut naliliiffigineqartut itigartittussaavai. Tamatumani pineqartut tassaasinnaapput uppernarsaatissarpianik saqqummiussuinissaq piumasarineqarpat suliami pissutsit naammassiuminaannerat paasiuminaanneralluunniit, taamaattumillu aalajangiiffigineqarsinnaanngitsutut nalilerneqartut.

Aammattaaq imm. 2 naapertorlugu maalaaruteqartarfiup suliat maalaarut attartortup taperserneqarnissaanik ilimanaateqanngitsutut isikkoqarnerat pissutigalugu itigartinneqarnissaat ilimagisariaqartut itigartissinnaavai. Tassani assersuutigalugu piumasaqaat pigisat pillugu inatsiseqarnermut maleruagassat naapertorlugit pisoqalisimasinnaavoq assigisaanilluunniit tunngaveqarsinnaalluni.

Nutaatut imm. 3-mi aalajangersarneqarpoq maalaaruteqartarfiup allattoqarfia maalaarutinik suliarineqarnissamut naapertuutinngitsutut nalinerneqartunik imaluunniit maalaarutinik attartortup taperserneqarnissaanik ilimanaateqarfiunngitsunik itigartitsinissaanut pisinnaatinneqassasoq.

Allannguutissatut siunnerssut imm. 4 siunnersuutip imm. 2-p aamma 4-p ataatsimut katillugit allanneqarnerisa inerneraa, tassungalu atasumik oqaasertaliussat erseqqissarneqarput.

Imm. 5-imi aamma imm. 6-imi erseqqissarneqarpoq piffissamut killissarititaasut saaffiginnissutip nassiunneqarneraniit naatsorsorlugu aalajangerneqartassasut.

Imm. 7-imi aalajangersarneqarpoq siulittaasup maalaaruteqartarfiup allattoqarfia noqqaaffigisinnaagaa inissiaq maalaarutigineqartoq suliamut attuumassuteqanngitsunit misissorneqassasoq. Aalajangersakkap kingunerisaanik maalaaruteqartarfiup allattoqarfiata siulittaasumit noqqaaffigineqarnermi kingorna suliaq suliamut attuumassuteqanngitsunit misissortissinnaavaa, suliassaqarfimmik ilisimasalik suliamut attuumassuteqanngitsoq attaveqarfigalugu aammalu ataatsimiititaliaq sinnerlugu inissiami maalaaruteqarnermut tunngaviusoq misissoqqullugu qinnuigalugu. Aalajangersakkami siulittaasup maalaaruteqartarfiup allattoqarfia ikiortigalugu nammineerluni misissuisinnaanera mattunneqanngilaq.

Nr. 45-mut

Siunnersuummi 85-ip allanngortinneqarnerata kinguneranik iluarsiissuteqarnermi allanngortitsineruvoq.

Nr. 46-mut

Aalajangersagaq § 86, imm. 3-p oqaasertaanik ersarissaaneruvoq. Taamaalilluni qallunaatuani "gør formandens stemme udfaldet"-imit allanngortinneqarpoq "er formandens stemme afgørende"-mut.

Nr. 47-mut

§ 86, imm. 1-ip qallunaatoortaani "§ 45, stk. 3"-p kiisalu "stk. 1 og 2"-p kingorna uniffiit ikkunneqarput.