26. april 2005

UPA 2005/19

 

Nakorsaatit pillugit Inatsisartut Peqqussutissaattut siunnersuut

Pillugu

Inatsisartut Ilaqutariinnermut Peqqissutsimullu Ataatsimiititaliaata

ISUMALIUTISSIISSUTAA

 

Siunnersuutip aappassaaneerneqarnerani saqqummiunneqartoq

 

Inatsiartut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Agathe Fontain, Inuit ataqatigiit, siulittaasuugallartoq
Inatsisartunut ilaasortaq Ole Thorleifsen, Siumut, sinniisussaq
Inatsisartunut ilaasortaq Enos Lyberth, Siumut
Inatsisartunut ilaasortaq Godmand Rasmussen, Atassut
Inatsisartunut ilaasortaq Astrid Fleischer Rex, Demokraatit

 

Inatsisartut Ilaqutariinnermut Peqqissutsimullu Ataatsimiititaliaata ulloq 18. april 2005-imi siullermeerinninnnerup kingorna siunnersuut misissuataarpaa makkuninngalu oqaaseqaateqarniarluni:

Tusarniaanermit akissuteqaat

Siunnersuutip pineqartup tusarniaanermit akissutip nuutinnera siunnersuummik uannga ataatsimiititaliap suliarinninneranut atugassatut ataatsimiititaliap pissarsiarisimavaa.

Attuumassuteqartorpassuit tusarniaanermut akissummik tunniusseqqullugit kaammattorneqarsimapput, amerlanerillu periarfissaq tusarniaanermut akissuteqaammik tunniussinissaminnut atorsimavaat.

Apeqquteqaat

Siunnersuutip siullermeerneqarnerani apeqqutit qaqinneqarsimasut pillugit Peqqinnissamut Naalakkersuisumit nassuiaammi ataatsimiititaliap siunnersuummik suliarinninnissaanut aatsimiititaliaq tigusaqarsimavoq. naalakkersuisunut ilaasortap nassuiaataata nuutinnera isumaliutissiissummut matumunnga ilanngussatut ilanngunneqarpoq.

Siunnersuutip imarisaa

Peqqinnissaqarfiup suliassaanik Namminersornerullutik Oqartussat 1992-imiit tigummatigilli pineqartoq nalimmassarneqarsimanngitsoq ataatsimiititaliap maluginiarpaa. Nakorsaatit pillugit inatsisiliorneq ullumikkut nunatsinni pissutsinut naleqqussarneqartariaqartoq ataatsimiititaliap naleqquttuutippaa.

Nakorsaatit pitsaassusaasa isumannaatsuunissaasalu nakkutigineqarnissaat nakorsaataateqarnermut tunngasuni qulakkeerunneqassasoq suliniutit ilagaat.

Pineqartumut ersarissumik najoqqutassiaqarnissaanik Naalakkersuisut qulakkeerinninnissamik peqquneqarnissaat naammagisimaarneqarpoq. Nakorsaatinut tunngatillugu atuagarsornikkut naalakkersuisunik siunnersuisinnaasunik nakorsaatinut ataatsimiititaliamik pilersitsisoqartariaqarpoq.

Ataatsimiititaliap pingaarnertut naatsorsuutigaa neriuutigalugulu maannakkut atorneqartut saniatigut avataaniit nakorsaatinik akikinnerusunik pisisoqarsinnaalernissaa periarfissiuunneqassasoq.

Siunissami nunatsinni nakorsaatinik tunisassiorsinnaanerup siunnersuutikkut ammaanneqarnera ataatsimiititaliap pitsaasutut isumaqarfigaa.

Siunissami nunatta EU-mik suleqateqarsinnaaneranut tunngatillugu siunnersuut pitsaasup tungaanut alloriarnertut isigineqarsinnaavoq. Taamaattoq siunnersuutip kinguneqaatigisinnaasai pillugit piffissami matumani tamakkiisumik nassuiaasoqarsinnaannginnera ataatsimiititaliamit maluginiarneqarpoq. Tamanna EU-mik isumaqatigiinniarnissami Naalakkersuisut eqqumaffigissagaat ataatsimiititaliap kaammattuutigissavaa.

Taama oqaaseqarluni Ilaqutariinnermut Peqqissutsimullu Ataatsimiititaliap isumaqatigiittup siunnersuutip ilusimisut iluseqartup aappassaaneerneqarnermini akuerisassanngorlugu inassutigaa.

 

	Agathe Fontain, Siulittaasup tullia
Ole Thorleifsen		Enos Lyberth
Godmand Rasmussen		Astrid Fleischer Rex