Nakorsaatit pillugit kisitsisitigut paasissutissiineq pillugu Namminersornerullutik Oqartussat nalunaarutaat nr. 30, 14. november 2005-imeersoq

Nakorsaatit pillugit inatsisartut peqqussutaanni nr. 1-imi, 12. maj 2005-imeersumi § 23, naapertorlugu aalajangersarneqarput:

 

Kisitsisitigut paasissutissiinermut akisussaasoq

§ 1. Nuna tamakkerlugu nakorsaasiortoq peqqinnissaqarfimmi nakorsaatinik atuineq pillugu ukiumoortumik kisitsisitigut paasissutissaliussaaq, nakorsaatit pillugit peqqussummi § 23-mi oqaaseqatigiit siulliit naapertorlugit.

 

Imarisai ilusaalu

§ 2. Kisitsisitigut paasissutissanut ilaassapput nakorsaatit peqqinnissaqarfimmit pisiarineqartut tunniunneqartullu.
Imm. 2. Najukkani peqqinnissaqarfiit, Dronning Ingridip Napparsimmavissua nakorsiartarfillu nakorsaatit pillugit kisitsisitigut paasissutissiinermut atorneqartussanngorlugit paasissutissanik pisariaqartinneqartunik nuna tamakkerlugu nakorsaasiortumut tunniussissapput.

§ 3. Kisitsisitigut paasissutissat najukkani peqqinnissaqarfikkuutaarlugit naatsorsorneqassapput.

§ 4. Kisitsisitigut paasissutissat naatsorsorneqassapput, minnerpaamik nakorsaatinut makkununga agguarlugit:
1) nakorsaatit innersuussutigineqartussaasut nalunaarutigineqartussaasullu,
2) nakorsaatit innersuussutigineqartussaasut,
3) uumasunut nakorsaatit, aamma
4) nakorsaatit niuertarfinni pisiassat peqqinnissaqarfimmit tunniunneqartut.

§ 5. Kisitsisitigut paasissutissat nakorsaatinik atuinerup ineriartorneranik erseqqissumik takussutissiissapput.

 

Atuutilerfia

§ 6. Nalunaarut atuutilerpoq 1. januar 2006.

Namminersornerullutik Oqartussat, ulloq 14. november 2005

Asii Chemnitz Narup

/

Søren Rendal