Nakorsaasiussanut allattuiffiit aamma nakorsaatissanut allagartat pillugit Namminersornerullutik Oqartussat nalunaarutaat nr. 28, 14. november 2005-imeersoq

Nakorsaatit pillugit inatsisartut peqqussutaanni nr. 1-imi 12. maj 2005-imeersumi § 16, imm. 3, naapertorlugu aalajangersarneqarput:

 

Atuuffia

§ 1. Nalunaarummi aalajangersakkat inunnik nakorsaatissiisarnermi taamaallaat atuupput.

 

Nalunaajarneqarnera uppernarsaasussaatitaanerlu

§ 2. Nakorsaatissiineq imatut paasineqassaaq pisumi aalajangersimasumi napparsimasumut aalajangersimasumut nakorsaammik aalajangersimasumik atuinissaq pillugu aalajangerneq. Aalajangerneq taamaallaat atortussaatinneqassaaq peqqinnissaqarfimmi sulisumit piginnaatitaasumit taassuma piginnaatitaaffiata iluani aalajangiiffigineqarsimappat.

§ 3. Nakorsaatissiineq sunaluunniit napparsimasup journaliani takuneqarsinnaassaaq.
Imm. 2. Nakorsaasiussanut allattuiffik atorneqarpat nakorsaatissiiineq napparsimasumut nakorsaasiussanut allattuiffimmut allanneqassaaq, nalunaarummi matumani malittarisassat naapertorlugit.
Imm. 3. Nakorsaasiussanut allattuiffik atorneqanngippat, peqqinnissamik sulisumit nakorsaatissiisumit nakorsaammik napparsimasumut ingerlaannartumik tunniussisoqanngippat nakorsaatissanut allagartaq nakorsaatissiinerit tamaasa atorneqartassaaq.

 

Nakorsaasiussanut allattuiffik

§ 4. Nakorsaasiussanut allattuiffiit qarasaasiakkut immersugassiarluunniit Peqqissutsimut Pisortaqarfimmit akuerineqarsimasoq atorlugu allattorneqassapput.
Imm. 2. Napparsimasut tamarmik immikkut nakorsaasiussanut allattuiffilerneqartassapput allattuiffillu taanna napparsimasup journalianut ilaatillugu toqqortarineqassalluni.

§ 5. Nakorsatissiinerit tamaasa napparsimasumut nakorsaasiussanut allattuiffimmi makku allanneqartassapput:
1) ulloq nakorsaatissiiffik,
2) peqqinnissaqarfimmi sulisup nakorsaatissiisup aqqa, atorfia immersugassiallu pappiaqqat atorneqartillugit taassuma atsiornera,
3) nakorsaatip suunera nioqqutissialluunniit taaguutaa,
4) atorneqarnissaa annertussusilerneqarneralu,
5) sakkortussusia annertussusialu,
6) pisariaqartinneqarnera, aamma
7) nakorsaatip qasseriarlugu qanorlu akuttussuseqartillugu tunniunneqartarnissaa pillugu paasissutaasinnaasut.
Imm. 2. Nakorsaatissiineq naappat naaffia atorunnaarsinneqarnerata ullua ilanngullugu nakorsaasiussanut allattuiffimmut allanneqassapput.
Imm. 3. Nakorsaatissiineq killilimmik piffissaligaanngitsoq imaluunniit atorunnaarsitaasimanngitsoq nakorsaatissiinerup ullulerneqarneraniit ukioq ataaseq atuutissaaq.

 

Nakorsaatissanut allagartat

§ 6. Nakorsaatissanut allagartat qarasaasiakkut immersugassiarluunniit Peqqissutsimut Pisortaqarfimmit akuerineqarsimasoq atorlugu allattorneqassapput.
Imm. 2. Nakorsaatissanut allagartat erseqqissumik atuaruminartumillu allaffissiamut ataatsimut allataassapput. Nakorsaatissanut allagartat naalisaanernik imaluunniit ilisarnaatinik paasinninnissamut nalornissutaasinnaasunik imaluunniit nakorsaatissanut allagartaliisup aamma nakorsaammik tunniussisup akornanni qanoq isumaqatigiittoqarsimaneranik apeqqusiisoqartariaqarfiusunik imaqassanngillat.

§ 7. Nakorsaatissanut allagartaq paasissutissanik makkuninnga imaqassaaq:
1) ulloq nakorsaatissiiffik,
2) nakorsaatissiisup aqqa, atorfia atsiorneralu,
3) napparsimasup aqqa aamma CPR. normua, imaluunniit napparsimasoq CPR. normoqanngippat inuuia,
4) nakorsaatip suunera nioqqutissialluunniit taaguutaa,
5) atorneqarnissaa annertussusilerneqarneralu,
6) sakkortussusia annertussusialu,
7) pisariaqartinneqarnera, aamma
8) nakorsaatip qasseriarlugu qanorlu akuttussuseqartillugu tunniunneqartarnissaa pillugit paasissutaasinnaasut.
Imm. 2. Nakorsaatissanut allagartaq nakorsaatissiinerup ullulerneqarneraniit ukioq ataaseq atuutissaaq.

§ 8. Nakorsaatissanut allagartaq nakorsaatit amerlanerusut taanna atorlugu tunniunneqarsinnaajunnaarpata atorunnaarnera pillugu uppernarsarlugu atsiorneqaassaaq.

 

Atuutilerfia

§ 9. Nalunaarut atuutilerpoq ulloq 1. januar 2006.

Namminersornerullutik Oqartussat, ulloq 14. november 2005

Asii Chemnitz Narup

/

Søren Rendal