Nakorsaatit pillugit ataatsimiititaliaq pillugu Namminersornerullutik Oqartussat nalunaarutaat nr. 25, 14. november 2005-imeersoq
Nakorsaatit pillugit inatsisartut peqqussutaanni nr. 1-imi, 12. maj 2005-imeersumi § 3, imm. 4, naapertorlugu aalajangersarneqarput:
Nakorsaatit pillugit ataatsimiititaliap ilaasortai
§ 1. Nakorsaatit pillugit ataatsimiititaliaq 7-iniit 11-nut ilaasortaqarpoq, Naalakkersuisunit toqqarneqartunik. Ilaasortat peqqinnissaqarfimmi atorfeqartuussapput.
Imm. 2. Sinniisussanik toqqaasoqassanngilaq. Ilaasortaq ilaasortaajunnaarpat Naalakkersuisut ilaasortassamik nutaamik toqqaassapput.
Nakorsaatit pillugit ataatsimiititaliap sulinera
§ 2. Nakorsaatit pillugit ataatsimiititaliaq minnerpaamik ukiumut sisamariarluni ataatsimiittassaaq.
Imm. 2. Nakorsaatit pillugit ataatsimiititaliami ataatsimiinnerit tamanut ammasuunngillat.
Imm. 3. Pissutsit immikkut ittut atuutsillugit nakorsaatit pillugit ataatsimiititaliap siulittaasua suliatigut ilisimasalimmik aggersaasinnaavoq, tassaasinnaasumik nakorsaq peqqinnissakkut nakkutilliisuutitaq, uumasunut nakorsaaneq, Dronning Ingridip Naparsimmavissuani nakorsaanerit immikkut ilisimasallit, Nuummi nakorsaaneq imaluunniit kigutit nakorsaanerat.
Imm. 4. Nakorsaatit pillugit ataatsimiititaliap siulittaasua ataatsimiigiaqqusilluni aggersaassaaq. Aggersaaneq allakkatigut naleqquttumillu piffissaliilluni ilisimatitsinikkut pissaaq.
Imaqarniliortussaatitaaneq
§ 3. Nakorsaatit pillugit ataatsimiititaliap ataatsimeereernerisa kingorna imaqarniliortoqassaaq oqaluuserisani ataasiakkaani nakorsaatit pillugit ataatsimiititaliap suliarinninneranik oqaluttuarinnittumik. Imaqarniliat nakorsaatit pillugit ataatsimiititaliamit akuerineqareernerisigut nakorsaatit pillugit ataatsimiititaliap ilaasortaanut, Peqqissutsimut Naalakkersuisumut, Peqqissutsimut Pisortaqarfimmut, nuna tamakkerlugu nakorsaasiortumut, Dronning Ingridip Napparsimmavissuani aqutsisunut, Peqqissaaveqarfinnik Aqutsivimmut, Peqqinnissakkut Nakkutilliisoqarfimmut aamma uumasut nakorsaanerannut nassiunneqassapput.
Suleriaaseq
§ 4. Nakorsaatit pillugit ataatsimiititaliap suleriaasissani nammineq aalajangersassavaa.
Atuutilerfia
§ 5. Nalunaarut atuutilerpoq 1. januar 2006.
Namminersornerullutik Oqartussat, ulloq 14. november 2005
Asii Chemnitz Narup/
Søren Rendal