Eqalunniarneq pillugu Namminersornerullutik Oqartussat nalunaarutaat nr. 20, 25. august 2005-imeersoq

Aalisarneq pillugu Inatsisartut inatsisaanni nr. 18-imi, ulloq 31. oktober 1996-imeersumi, ki-ngullermik Inatsisartut inatsisaatigut nr. 28, 18. december 2003-meersukkut allanngortinneqartumi, § 23, § 26, § 33, imm. 2, aamma § 34, imm. 3 naapertorlugit aalajangersarneqarpoq:

 

Nalunaarutip atuuffia

§ 1. Nalunaarummi uani eqalunniarneq (Salvelinus alpinus) pineqarpoq.

 

Piniutit

§ 2. Eqalunniarnermi taamaallaat qarsorsat nuannariinnarlugu aalisarnermi atortakkat, qalut naatsunguamik ipullit qassutillu nigartunerat tasillugit minnerpaamik 100 mm-usut, piniutitut atorneqarsinnaapput.
Imm. 2. Qassutit eqalunniarnermi atorneqartut 30 meter sinnerlugu takissuseqassanngillat.
Imm. 3. Qassutit piginnittup aqqanik, angallatip aqqanik angallatilluunniit normuanik nalunaaqutsersimassapput.
Imm. 4. Qassutit ningisimatillugit nakkutigineqartuassapput. Eqalunniarfik qimanneqarpat piffissaq apeqqutaatinnagu piginnittup qassutini qaqissavai.

§ 3. § 2, imm. 1 naapertorlugu eqalunniarnermi atoqqusaanngillat:
1) Sanninngaariniarneq,
2) qassutit tissukartittakkat, ungusilluni qalusiniutit (vod) qalorsuillu (trawl),
3) innaallagiaq atorlugu qupinnguallatsitsineq, aallaasit,
4) qaartartut toqunartullu, aamma
5) pullatit, taamaattoq imm. 2 takuuk.
Imm. 2. Imm. 1, nr. 5-imi aalajangersagaq apeqqutaatinnagu kommunalbestyrelse kommunip pineqartup killeqarfiisa iluanni eqalunniarnermi pullatit atorneqarnissaannut akuersissuteqarsinnaavoq.
Imm. 3. Imm. 2 naapertorlugu akuersissutinut kommunalbestyrelse erseqqinnerusunik piumasaqaasiorsinnaavoq, tassunga ilanngullugit pullatit ilusissaat, piffissaq sumiiffillu atorneqarsinnaaffiat kiisalu pullasersorluni eqalunniarniaraanni qinnuteqaateqaqqaartoqartarnissaa pillugit.

 

Qassusersornermi malittarisassat

§ 4. Kuunni taakkualu tasinngortaanni qassusersorluni eqalunniarneq tamarmi inerteqqutaavoq.

§ 5. Tatsini eqalunniarnermi kuuit tatsimut akuaniit kuuillu aariaanniit 100 m-init qaninnerusumut qassuserneq inerteqqutaavoq.
Imm. 2. Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.

§ 6. Kuup akuani nalinginnaasumik ulinnerpaaffianiit kuup immallu naapiffianniit illugiinnik kuuk 150 m-init qaninnerullugu, kuup sinaa aallaavigalugu uuttorlugu, qassusersorneq inerteqqutaavoq. Ungasissusissamit tassannga alimasinnerusukkut kommuni qassusersorfissap killissaanik nalunaaqutsiisimappat, nalunaaqutsikkap iluani qassusersorneq inerteqqutaavoq.
Imm. 2. Qassutit timaatungaat ulinnerani immap angusagaanut attuumasunngorlugit nivin-ngarneqartassapput.
Imm. 3. Qassutit imartap ikertussusiata pingajorarterutaa sinnerlugu takissuseqassanngillat.
Imm. 4. Qassutit narlusuumik nunamiit avammoorlugit nivinngarneqassapput. Amerlanaarlugit pisaqarnissaq siunertaralugu qassutit allatut ilusilerlugit nivinngarnissaat inerteqqutaavoq.
Imm. 5. Qassutit eqalunniutit qassutinut tullernut minnerpaamik 30 meterinik akunnilerlugit nivinngarneqartassapput.

§ 7. Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfeqalerlugit ammarneqassapput.

 

Piffissaq qassusersorluni eqalunniarfiusinnaasoq

§ 8. Qassutit atorlugit eqalunniartoqarsinnaavoq taamaallaat juunip ulluisa 15-ianniit septembarip ulluisa 25-iat ilanngullugu.

 

Kommunit ileqqoreqqusaat

§ 9. Ukiut tallimakkaarlugit eqaloqarfitsialaat aalisarnerup annertuallaarneranit uloriarnartorsiortinneqarnerpaatut nalilerneqartut kommunalbestyrelsip nalunaarsortassavai. Nalunaarsuusiaq Aalisarnermut Piniarnermullu Pisortaqarfimmut nassiunneqassaaq.
Imm. 2. Kommunalbestyrelse ukiut tallimakkaarlugit ileqqoreqqusakkut kommunip ilaani sumiiffinnik eqaloqarfilinnik arlaliusinnaasunik ukiuni tallimani atuuttussamik eqqissisimatitaliortassaaq. Kommunit ileqqoreqqusaat Aalisarnermut Piniarnermullu Naalakkersuisumit atulersinneqartassapput.
Imm. 3. Sumiiffiit imm. 2-imi taaneqartut imaq eqaluit kuunnit eqqissisimatitaneersut sisusimatillutik najortarunagaat toqqammavigalugu killilerneqartassapput. Killiliinermi imm. 1 naapertorlugu eqqissisitsinerup sunniutissaa annerpaaq anguniarneqassaaq, saniatigullu piniarnermi nakkutilliisunik allanilluunniit nakkutiginnittussatut Naalakkersuisut toqqarsimasaannik politiinillu nakkutilliiffigiuminarnissaa anguniarneqassalluni.
Imm. 4. Kommunalbestyrelsip sumiiffinnik eqqissisimatitassanik toqqaanermini, siusinneru-sukkut Eqalunniarneq pillugu Namminersornerullutik Oqartussat nalunaarutaat nr. 11, 18. juni 1997-imeersoq tunngavigalugu toqqarsimasani toqqaqqissinnaavai.
Imm. 5. Kommunit ileqqoreqqusaat nalluutit qissattuutillu atorlugit eqaloqarfínni eqqissisimatitaasuni eqalunniarsinnaatitsisinnaapput, eqaloqarfiit qangaaniilli qasuersaarfiusartut pi-ngaarutaat pigiinnarneqaqqullugu.
Imm. 6. Kommunalbestyrelse kommunimi ileqqoreqqusaliunngippat Naalakkersuisut nalunaarutikkut kommunimi pineqartumi eqaloqarfimmik eqaloqarfinnilluunniit eqqissisitsisinnaapput.

§ 10. Kommunalbestyrelse eqalunniarneq eqqarsaatigalugu § 2, imm. 2-mi aamma §§ 5-imiit 8-mut aalajangersakkanit sakkortunerusunik kommunip ileqqoreqqusaatigut aalajangersaasinnaavoq, pissutsit immikkut ittut tamanna pisariaqartippassuk. Kommunalbestyrelsip kommunip ileqqoreqqusaatigut piumasaqaatit § 3, imm. 3-mi taaneqartut aalajangersarsinnaavai.

 

Immikkut akuersissuteqarneq

§ 11. Ilisimatusarnikkut siunertanut nalunaarummi aalajangersakkat atortinneqannginnissaat Naalakkersuisut immikkut akuersissutigisinnaavaat.
Imm. 2. Kommunit ataasiinnarmik kuummik eqaloqarfillit Naalakkersuisunut qinnuteqarsin-naapput § 9-mi aalajangersakkap atuutsinneqanngissaanik.
Imm. 3. Imm. 2 naapertorlugu aatsaat immikkut akuersissuteqartoqarsinnaavoq uppernarsarneqarpat kommune kuup eqaloqarneranut illersuiniutinik allanik iliuuseqarsimasoq, imaluunniit kommunimi kuunnik eqaloqarfeqanngitsoq.

 

Pineqaatissiinerit

§ 12. §§-inik 2-miit 8-mut unioqqutitsisoq akiliisitsinermik pineqaatissinneqarsinnaavoq.
Imm. 2. §§ 2-miit 6-mut aamma § 8 unioqqutillugit eqaluttat arsaarinnissutaasinnaapput.
Imm. 3. Imm. 1 aamma 2 pillugit suliassat aalisarneq pillugu inatsimmi malittarisassat malillugit suliarineqassapput.
Imm. 4. Qassutit ningisimasut ateqanngitsut allatulluunniit nalunaaqutserneqarsimanngitsut politiinit aalisarnermillu nakkutilliisunit peerneqarsinnaapput, takuuk § 2, imm. 3.

§ 13. §§ 9-10 naapertorlugit ileqqoreqqusani, ileqqoreqqusani aalajangersakkanik unioqqutitsineq akiliisitsissutaasinnaasoq aalajangersarneqarsinnaavoq.

 

Atulersitsineq

§ 14. Nalunaarut atuutilerpoq ulloq 1. oktober 2005. Peqatigalugu Eqalunniarneq pillugu Namminersornerullutik Oqartussat nalunaarutaat nr. 11, 18. juni 1997-imeersoq aamma Namminersornerullutik Oqartussat nalunaarutaat nalunaarummut nr. 23 26. maj 1994-meersumut allannguut Kalaallit Nunaanni eqalunniarneq pillugu atuukkunnaarsinneqarput.
Imm. 2. Eqalunniarneq pillugu Namminersornerullutik Oqartussat nalunaarutaat nr. 11, 17. juni 1997-imeersoq malillugu kommunit ileqqoreqqusaat atuukkallassapput, nalunaarut una tunngavigalugu kommunit ileqqoreqqusaliaat atuuttussanngortinneqarneranni taarserneqarnissaasa imaluunniit atorunnaarsinneqarnissaasa tungaannut.

Namminersornerullutik Oqartussat, ulloq 25. august 2005

Hans Enoksen

/

Amalie Jessen