Kalaallit Nunaata Radioanut (KNR) ileqqoreqqusat pillugit Namminersornerullutik Oqartussat nalunaarutaat nr. 17, 1. juli 2005-imeersoq

Radiukkut tv-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 32, imm. 4 naapertorlugu aalajangersarneqarput:

 

Ateq, angerlarsimaffik siunertarlu

§ 1. Kalaallit Nunaata Radioa (KNR) pisortat suliffeqarfiutigaat namminersortoq.
Imm. 2. KNR Nuup kommuniani angerlarsimaffeqarpoq.

§ 2. KNR-ip siunertarai radiukkut tv-kkullu aallakaatitsisarneq kiisalu internettikkut toqqaannartumik attavigineqarsinnaasukkut aallakaatitsisarneq.
Imm. 2. Aallakaatitsineq radioqarfiit, matumani aamma satellittit, imaluunniit antennit ataatsimoorussat kiisalu attaveqaatit elektroniskiusut allat, soorlu internetti assigisaaluunniit atorlugit pisinnaavoq.
Imm. 3. Radiukkut tv-kkullu aallakaatitassiat sullissinerillu imarisaat KNR-imit aallakaatitassiaasinnaapput avataaniilluunniit pisiaasinnaallutik.

 

KNR-ip ingerlatsinera

KNR-ip innuttaasunik kiffartuussinera

§ 3. KNR suliffeqarfiuvoq innuttaasunik kiffartuussisoq, tak. Inatsisartut peqqussutaanni nr. 6, 14. november 2004-meersumi §§-it 20-miit 26-mut.
Imm. 2. KNR-ip innuttaasunik kiffartuussinermini pisussaaffittut naammassisassaasa annertussusii qanorlu ittuuneri Naalakkersuisut aamma KNR-ip innuttaasunik kiffartuussinermik isumaqatigiissutaanni erseqqinnerusumik aalajangersarneqartassapput, tak. peqqussummi § 28.
Imm. 3. Isumaqatigiissut imm. 2-mi taaneqartoq taamaallaat KNR-ip innuttaasunik kiffartuussineranik imaqarpoq, tassalu KNR-ip ingerlataanut allamut tunngassuteqarani, tak. § 5 aamma peqqussummi § 29.
Imm. 4. KNR innuttaasunik kiffartuussineq pillugu isumaqatigiissummik naammassinninneq pillugu nassuiaammik kultureqarnermut pisortaqarfimmut aamma Radio- tv-lu pillugit aalajangiisartunut nassiunneqartartussamik ukiut tamaasa suliaqartassaaq, tak. peqqussummi § 28, imm. 5.
Imm. 5. Nassuiaat imm. 4-mi taaneqartoq pissusiviusunik oqaluttuartuussaaq tamakkiisuussallunilu, aamma kultureqarnermut pisortaqarfiup pisussaaffigaa pissutsit anguniakkanut isumaqatigiissummi taaneqartunut naapertuutinngitsut ingerlaavartumik uparuartassallugit.

§ 4. Aallakaatitat aningaasalersorneqartut, radiukkut tv-kkullu aallakaatitsisarneq pillugu Inatsisartut peqqussutaanni kiisalu radiumi tv-milu pilerisaarutit aallakaatitassianillu aningaasalersuisarnerit pillugit Namminersornerullutik Oqartussat nalunaarutaanni maleruagassat malillugit KNR-ip innuttaasunik kiffartuussilluni aallakaatitsisarnerani ilaasinnaapput.

 

Ingerlataq alla

§ 5. KNR allanik aallakaatitassiornermik ingerlataqarsinnaavoq, matumani aamma suliffeqarfiup tusagassiornermik ingerlatat iluanni immikkut paasisimasalittaasa il.il. iluaqutigineqarnissaat siunertaralugu, tak. radiukkut tv-kkullu aallakaatitsisarneq pillugu Inatsisartut peqqussutaat.
Imm. 2. Ingerlataq imm. 1-imi taaneqartoq unammilleqatigiinnermi atugassarititaasut tun-ngavigalugit ingerlanneqassaaq.
Imm. 3. KNR ilinniarfiit pioreersut unammillerlugit ilinniartitsinermik ingerlataqarsinnaanngilaq.

§ 6. Pilerisaarutit aallakaatitanillu aningaasalersuisarnerit, radiukkut tv-kkullu aallakaatitsisarneq pillugu Inatsisartut peqqussutaanni kiisalu radiumi tv-milu pilerisaarutit aallakaatitassianillu aningaasalersuisarnerit pillugit Namminersornerullutik Oqartussat nalunaarutaanni maleruagassat malillugit KNR-ip allanik aallakaatitassiornermik ingerlatsinerani ilaasinnaapput.

 

KNR-ip aaqqissuussaanera

Siulersuisut

§ 7. KNR siulersuisunit 7-inik ilaasortaqartunit siulersorneqarpoq, siulersuisuni siulittaasoq ilaasortarlu alla ataaseq Naalakkersuisunit toqqagaasarlutik. Ilaasortat sinneri Inatsisartut peqqussutaanni § 31-mi maleruagassat naapertorlugit inassuteqartoqarneratigut Naalakkersuisunit toqqarneqartarput.
Imm. 2. Siulersuisut tamarmiullutik tusagassiorneq, kultureqarneq, pisortatut aqutsineq inuussutissarsiornerlu paasisimasaqarfigissavaat, tak. radiukkut tv-kkullu aallakaatitsisarneq pillugu Inatsisartut peqqussutaanni § 31, imm. 4, oqaaseqatigiit siulliit.
Imm. 3. Siulersuisuni ilaasortat, siulittaasoq kisiat pinnagu, tamarmik immikkut sinniisussaannik toqqaasoqartassaaq. Siulersuisuni ilaasortaq tunuarpat, soraarsitaappat piffissamiluunniit sivisuumi peqanngippat taassuma sinniisussaa siulersuisuni ilaasortaq taarserlugu ilanngutissaaq. Sinniisussatut toqqagaasoq siulersuisuni aalajangersimasumik ilaasortanngorpat sinniisussamik nutaamik toqqaasoqassaaq.
Imm. 4. Naalakkersuisut siulittaasoq tunuarpat soraarsitaappalluunniit siulittaasumik nutaamik toqqaassapput.
Imm. 5. Naalakkersuisut siulersuisuni ilaasortaq sinniisussarluunniit ilanngussimasoq piffissami toqqagaaffimmi soraarsissinnaavaat, pineqartup siulersuisutut akisussaaffini annertuumik sumiginnarpagu allatulluunniit siulersuisuni issianissaminut imminut piukkunnarunnaarsissimappat.
Imm. 6. Siulersuisut radiukkut fjernsynikkullu aallakaatitsisarneq pillugu Inatsisartut peqqussutaanni nr. 3, 17. maj 1990-imeersumi maleruagassat malillugit toqqarneqarsimasut siulersuisunik nutaanik ullormi 1. november 2005-imi toqqaasoqarnissaata tungaanut issiaannassapput, tak. radiukkut tv-kkullu aallakaatitsisarneq pillugu Inatsisartut peqqussutaanni § 62.

§ 8. Siulittaasoq imaluunniit taanna peqanngippat siulittaasup tullia siulersuisut sinnerlugit atsiortassaaq.

§ 9. Siulersuisut KNR-ip siulersuisorai qullerpaat. Siulersuisut suliffeqarfiup ingerlatsinera pillugu aalajangersakkat malinneqarnissaannut akisussaanerpaapput, matumani aamma KNR-ip innuttaasunik kiffartuussinermut isumaqatigiissummik eqquutsitsisinissaanut akisussaallutik.
Imm. 2. Siulersuisut aallakaatitsisarnermut nalinginnaasumut aallakaatitassianulluunniit ataasiakkaanut akuliussinnaanngillat, suliffeqarfiulli ingerlatsinerani malittarisassanik pingaarnernik aalajangersaasussaallutik.
Imm. 3. Siulersuisut pisortamik atorfinitsitsisartuullutillu soraarsitsisartuupput.

§ 10. Siulersuisuni ilaasortat, Kalaallit Nunaata Radioani siulersuisut kajumissaatisiaqartinneqartarnerat aningaasartuutiminnullu taartisiaqartinneqartarnerat pillugu Namminersornerullutik Oqartussat nalunaarutaanni maleruagassat naapertorlugit kajumissaatisiaqartinneqartarput siulersuisunilu sulinermut atatillugu aningaasartuutiminnut, matumani ilaatigut angalanernut, nerisaqarnermut najugaqarnermullu taartisiaqartinneqartarlutik, taanna radiukkut tv-kkullu aallakaatitsisarneq pillugu Inatsisartut peqqussutaat tunngavigalugu maleruagassiornikkut taarserneqarserlugu atorunnaarsinneqarserluguluunniit.

 

Siulersuisut ataatsimiittarneri il.il.

§ 11. Siulersuisut aalajangigassatik siulersuisut ataatsimiinnerini aalajangertassavaat.
Imm. 2. Siulersuisut aalajangiussaat amerlanerussuteqarnikkut aalajangerneqartassapput. Taasinerit naligiitsillugit siulittaasup taasinera aalajangiisuusassaaq.
Imm. 3. Siulersuisut kvartalimut minnerpaamik ataasiarlutik ataatsimiittassapput.

§ 12. Siulersuisuni ilaasortat affaat sinnerlugit najuuppata siulersuisut aalajangiisinnaassuseqassapput. Suliassalli aalajangiiffigissallugit utaqqinneqarnissaat annertuumik akornutaassatillugu ilaasortat ikinnerusut najuutsillugit aalajangiisoqarsinnaavoq. Suliap qanoq inerneqarsimanera siulittaasup tullissaanik ataatsimiinnermi nalunaarutigissavaa.
Imm. 2. Suliassaq aalajangiisinnaassuseqannginneq pissutigalugu kinguartinneqarsimasoq tullissaanik ataatsimiinnermi aalajangiiffigineqarsinnaavoq, siulersuisut imm. 1 naapertorlugu aalajangiisinnaassuseqanngikkaluarpataluunniit.

§ 13. Siulersuisut ataatsimiinnissaannut piffissat sumilu pinissaat siulersuisut siulittaasuata aalajangertassavai, ataatsimiinnerni oqaluuserisassat aalajangersartarlugit ataatsimiinnerillu aqullugit.
Imm. 2. Siulersuisuni ilaasortat ikinnerpaamik pingasut imaluunniit pisortap tamanna piumasarippassuk, siulittaasoq ataatsimiinnissamik kissaatigisap tunngavilersorneqartup saqqummiunneqarneraniit kingusinnerpaamik ullut 14-it qaangiunneranni ataatsimiigiaqqusissaaq.
Imm. 3. Siulersuisut siulittaasuat siulersuisut ataatsimiinnerini peqataasinnaanngikkaangat siulittaasup tullia siulittaasuusassaaq.

§ 14. Siulersuisut ataatsimiinneri matoqqasuupput, taamaattorli tak. imm. 2.
Imm. 2. Siulersuisuni ilaasortat ikinnerpaamik sisamat tamanna piumasarippassuk ataatsimiinneq ammasuussaaq.
Imm. 3. Pisortaq siulersuisut ataatsimiinnerini najuuttassaaq, isumaqatigiinniarnernilu peqataasinnaatitaalluni. KNR-imi sulisuusut allat siulersuisuni siulittaasup pisortallu isumaqatigiissuteqareernerisigut aatsaat peqataasinnaapput.
Imm. 4. Siulersuisut siulittaasuata aalajangertassavaa suliassaq aalajangersimasoq, suliassat suliarineqartarnerat pillugu inatsit naapertorlugu nipangiussisussaatitaaneq pillugu maleruagassani ilaatinneqarnersoq.
Imm. 5. Siulersuisut aalajangertassavaat ilaasortaq inulluunniit siulersuisut ataatsimiinnerini peqataasoq, suliassat suliarineqartarnerat pillugu inatsit naapertorlugu tutsuiginanngissuseq pillugu maleruagassani ilaatinneqarnersoq.

§ 15. Siulersuisut ataatsimiinneri imaqarniliorneqartassapput, kalaallisuui qallunaatuuilu imaqarniliat akuersissutigivinneqarnerisa kingorna kingusinnerpaamik sap.ak. 2-t qaangiunneranni kultureqarnermut pisortaqarfimmut ilisimatitsissutitut nassiunneqartassallutik.
Imm. 2. KNR siulersuisut ataatsimiinnerini allatseqartitsisassaaq.

§ 16. Siulersuisut aammattaaq suleriaasissatik nammineq aalajangersartassavaat. Suleriaasissat kultureqarnermut pisortaqarfimmut ilisimatitsissutitut nassiunneqassapput.

 

Pisortaq

§ 17. KNR-p pisortaata aallakaatitsisarneq nalinginnaasoq akisussaaffigaa, KNR-illu nali-nginnaasumik aningaasatigullu aqunneqarnera isumagalugu. Suliffeqarfimmut maleruagassat atuuttut aamma malittarisassat siulersuisunit aalajangersarneqartut naapertorlugit aqutsisoqarnissaa pisortap qulakkiigassaraa, tak. radiukkut tv-kkullu aallakaatitsisarneq pillugu Inatsisartut peqqussutaanni § 33, imm. 1.
Imm. 2. KNR-ip nalinginnaasumik ingerlanneqarneranut malittarisassat erseqqinnerusut pisortap aalajangersassavai.

§ 18. Pisortaq siulersuisut sinnerlugit KNR-ip aningaasaataanik, tassunga periarfissarititatut aalajangersakkat iluanni aqutsissaaq KNR-ilu sinnerlugu atsiorsinnaalluni, matumani aamma isumaqatigiissuteqartoqartillugu.
Imm. 2. Pisortap aalajangersassavaa KNR-ip pigisai nammineq sinnerluni kimit aqunneqarsinnaanersut, tak. imm. 1. Aammattaaq bilaginik atsiorsinnaanermut akuersisinnaanermullu maleruagassat pisortap aalajangersassavai.

§ 19. Pisortaq KNR-imi sulisuusunik, matumani aamma pisortat sinnerinik, atorfinitsitsisartuullunilu soraarsitsisartuuvoq.

§ 20. Pisortaq makku pillugit siunnersuutinik siulersuisut aalajangiiffigisassaannik saqqummiussisassaaq:
1) KNR-ip ingerlatsineranut maleruagassanik nalinginnaasunik aalajangersaanissaq, tak. § 9, imm. 2.
2) Missingersuutinut siunnersuutit, tak. § 29, imm. 1, ukiunut tulliuttunut sisamanut missi-ngersuutaagallartut, tak. § 29, imm. 3, ukiumoortumik naatsorsuutit, tak. § 32, missingersuutit, tak. § 31 aamma aningaasaatitigut sillimmatit.
3) KNR-ip naatsorsuusiornissaanut ilitsersuut, tak. § 32, imm. 2, matumani aamma KNR-ip aningaasaataasa inissinnissaannut maleruagassat KNR-ip aningaasaqarnikkut aqutsineranut naatsorsuusiortarneranullu malittarisassanik pingaarnernik aalajangersaasut.
4) Sulisuusut siulersuisuni ilaasortassamik toqqaasarnissaannut maleruagassat, tak. radiukkut tv-kkullu aallakaatitsisarneq pillugu Inatsisartut peqqussutaanni § 31, imm. 1, nr. 5.
5) Ileqqoreqqusani allannguutissat pillugit siunnersuutit, tak. § 35.
6) Suliassat pisortap siulersuisunit aalajangiiffigisariaqartutut pingaaruteqarsorisai.
Imm. 2. Pisortaq aammattaaq suliassanut siulersuisunit suliarineqartartunut tamanut tunngasut pillugit siulersuisunut siunnersuuteqartarsinnaavoq, suliassat pisortamik atorfinitsitsinermut soraarsitsinermullu tunngasut kisiisa pinnagit.

§ 21. Pisortap suliat siulersuisunut ilisimatitsissutigisariaqartutut pingaaruteqarsorisani siulersuisunut ilisimatitsissutitut saqqummiuttassavai.

 

Naammagittaalliuutit il.il.

§ 22. KNR-ip suliassani suliffeqarfiup ingerlatsineranut tunngasuni aalajangiineri allaffeqarfikkoortumik oqartussaasunut allanut naammagittaalliuutigineqarsinnaanngillat, taamaattorli tak. § 23 aamma § 24, imm. 3-miit 5-imut.

§ 23. KNR-ip suliassani torersumik tusagassiornissaq akissuteqarsinnaanerlu pillugit aalaja-ngiineri, tak. § 24, imm. 1 aamma 2, tusagassiornermi akisussaaneq pillugu inatsimmi taakku pillugit maleruagassat malillugit Kalaallit Nunaanni Tusagassiuutit pillugit aalajangiisartunut suliassanngortinneqarsinnaapput.
Imm. 2. KNR-ip pilerisaarutinut aallakaatitanullu aningaasalersuisoqartarneranut tunngatillugu periusii pillugit naammagittaalliuutit, ilanngussap aallakaatitalluunniit allakaatinneqarneraniit kingusinnerpaamik sap.ak. 4-t qaangiunneranni Radio- tv-lu pillugit aalajangiisartunut suliassanngortinneqarsinnaapput, tak. radiukkut tv-kkullu aallakaatitsisarneq pillugu Inatsisartut peqqussutaat.

§ 24. Tusagassiornermi akisussaaneq pillugu inatsisip tusagassiuutit imarisaasa periusiisalu torersumik tusagassiortarnissamut naapertuuttuunissaannik aalajangersagaasa KNR-imit unioqqutinneqarneri pillugit naammagittaalliuutit tamanut tusarliussinermiit kingusinnerpaamik sap.ak. 4-t qaangiunneranni KNR-imut nassiunneqassapput.
Imm. 2. Akissuteqarsinnaanermik qinnuteqaat paasissutissat piviusut akissuteqarfiginiakkat tamanut tusarliunneqarneranniit kingusinnerpaamik sap.ak. 4-t qaangiunneranni pisortamut allakkatigut saqqummiunneqassaaq.
Imm. 3. Akissuteqarsinnaanermik itigartitsissut akissuteqarsinnaajumalluni qinnuteqartumut allakkatigut sapinngisamik piaarnerpaamik nalunaarutigineqassaaq, ilisimatillugu itigartitsissut itigartitsinerup nalunaarutigineqarneraniit kingusinnerpaamik sap.ak. 4-t qaangiunneranni Kalaallit Nunaanni Tusagassiuutit pillugit aalajangiisartunut suliakkiutigineqarsinnaasoq.
Imm. 4. Tamakkiisuunngitsumik akissuteqarneq pillugu naammagittaalliuut, taassuma tamanut tusarliunneqarneraniit kingusinnerpaamik sap.ak. 4-t qaangiunneranni Kalaallit Nunaanni Tusagassiuutit pillugit aalajangiisartunut suliakkiutigineqarsinnaavoq.
Imm. 5. Naammagittaalliornissamut maleruagassat erseqqinnerusut tusagassiornermi akisussaaneq pillugu inatsisip Kalaallit Nunaanni atuutilersinneqarnera pillugu peqqussummi kapitali 5-imiit 7-imut atuarneqarsinnaapput.

§ 25. Aallakaatitat tamarmik assilineqarnerisa qaammatini pingasuni isumannaatsumik toqqortarineqarnissaat pisortap qulakkiigassaraa.
Imm. 2. Naammagittaalliortoqarsimappat imaluunniit aallakaatitap imarisaa pillugu suliakkiisoqarsimappat piffissaliussaq imm. 1-imi taaneqartoq qaangiutereeraluarpalluunniit, aallakaatitap assilineqarnera suliassap naammassillugu aalajangiiffigineqarnissaa tikillugu toqqortarineqassaaq.

§ 26. Naammagittaalliuutit tiguneqarnerminni sapinngisamik piaarnerpaamik, nalinginnaasumillu naammagittaalliuutit KNR-imut takkunneranniit sap.ak. 4-t ingerlaneranni suliarineqartarnissaat pisortap akisussaaffigaa, tusagassiornermi akisussaaneq pillugu inatsimmi allatut allassimasoqanngippat.

§ 27. KNR-ip isiginnaartartut tusarnaartartullu saaffiginnissutaannik, matumani aamma aallakaatitat sullissinerillu pillugit naammagittaalliuutinik suliaqartarnermini malittarisassat tamanut saqqummiutissavai.

 

Aningaasalersugaaneq, missingersuutit naatsorsuutillu

Aningaasalersugaaneq

§ 28. KNR-ip ingerlatsinera landskarsimit tapiissutit, pilerisaarutit, aallakaatitat aningaasalersorneqartut aamma ingerlatamit allamit isertinneqarsimasinnaasut aqqutigalugit aningaasalersugaavoq, tak. radiukkut tv-kkullu aallakaatitsisarneq pillugu Inatsisartut peqqussutaanni § 35, imm. 1.
Imm. 2. Landskarsimit ukiumoortumik tapiissutit ukiup aningaasanut inatsiseqarfiup tulliani aningaasanut inatsisissap akuersissutigineqarnerani Inatsisartunit aalajangersarneqartarput, tak. radiukkut tv-kkullu aallakaatitsisarneq pillugu Inatsisartut peqqussutaanni § 35, imm. 2.

 

Missingersuutit

§ 29. Siulersuisut, piffissaliussap Naalakkersuisunit aalajangersarneqarsimasup qaangiutinnginnerani, ukiumut aningaasanut inatsiseqarfiusumut tullermut missingersuutinut siunnersuummik isertitariumaagassatut, aningaasartuutigiumaagassatut sanaartornermullu aningaasartuutigiumaagassatut kiisalu ukiut nikinneranni pigisat akiitsullu annertussuseriumaagassaasut naatsorsuutigisanik imaqartumik kultureqarnermut pisortaqarfimmut ukiut tamaasa tunniussisassapput. Siulersuisut landskarsip ukiumut aningaasanut inatsiseqarfiusumut taaneqartumut tapiissutissaasut siunnersuut tassunga ilutigitillugu tunniuttassavaat, tak. radiukkut tv-kkullu aallakaatitsisarneq pillugu Inatsisartut peqqussutaanni § 36, imm. 1.
Imm. 2. Siulersuisut missingersuutinut siunnersuutaat Namminersornerullutik Oqartussat missingersuusiornermut maleruagassiaat taakkulu pillugit aalajangersakkat allat sukkulluunniit atuuttut naapertorlugit suliarineqartassaaq. Nammineq isertitariumaagassatut taakkunun-ngalu atasumik aningaasartuutigiumaagassatut naatsorsuutigisat immikkut nassuiaatigineqartassapput.
Imm. 3. Missingersuutinut siunnersuutip imarissavaa missingersuutinut kingullerpaanut sanilliullugu aammalu siusinnerusukkut missingersuutaagallartunut sanilliullugu allannguutit pillugit nassuiaat. Siunnersuut ukiunut tulliuttunut sisamanut missingersuutaagallartunik ilaqartinneqassaaq. Missingersuutinut siunnersuut missingersuutaagallartullu, missingersuusiornermi tunngavigisat makku pillugit nassuiaammik imaqassapput:
1) Sanaartornermi aningaasartuutinut tunngatillugu nalunaarneqassaaq aningaasartuutit KNR-ip piffissami missingersuusiorfiusumi tamarmiusumi aningaasaliissuteqarnissaanut pilersaarutinut qanoq ittumik ilaatinneqarnersut.
2) Ingerlatsinermut aningaasartuutinut tunngatillugu piffissamut missingersuusiorfiusumut tamarmiusumut, ukiumoortumik naatsorsuutinut kingullerpaanut sanilliussilluni nalunaarneqassapput aallakaatitsisarnissatut pilersaarutigineqartut pingaarnersaasa immikkoortunut pingaarnernut agguataarneqarneri.
3) Kiisalu missingersuutaagallartuni immikkut naliliiffigineqassaaq nammineerluni isertitariumaagassatut naatsorsuutigisat qanoq ineriartussangatinneqarnerat.
Imm. 4. Sanaartornermi aningaasartuutinut imm. 1-imi aamma imm. 3, nr. 1-imi taaneqartunut ilaanngillat illuliornermut aningaasartuutit.

§ 30. Siulersuisut missingersuutinut siunnersuutip tamarmiusup ilaatut tunniutissavaat allatut aallakaatitsisarnissamut missingersuutinut aamma ingerlatamik allamik ingerlataqarnissamut missingersuutinut immikkut siunnersuut, matumani ingerlatamik allamik ingerlataqarnerit assigiinngitsut ataasiakkaat pillugit immikkut missingersuutit, tak. radiukkut tv-kkullu aallakaatitsisarneq pillugu Inatsisartut peqqussutaanni § 36, imm. 2.

§ 31. Tapiissutit Inatsisartunit akuersissutigineqartut qissimigaarlugit ukiumut aningaasanut inatsiseqarfiusumut missingersuutit siulersuisunit suliarineqartassapput. Missingersuutit ukiup aningaasanut inatsiseqarfiusup aallartinnginnerani kultureqarnermut pisortaqarfimmut ilisimatitsissutitut nassiunneqassapput.

 

Naatsorsuutit kukkunersiuinerlu

§ 32. KNR-ip ukioq naatsorsuusiorfia tassaavoq ukioq aningaasanut inatsiseqarfik. KNR-ip missingersuusiorneq, naatsorsuuserineq naatsorsuutinillu saqqummiussineq pillugit Namminersornerullutik Oqartussat sukkulluunniit aalajangersagaat malissavai, tak. radiukkut tv-kkullu aallakaatitsisarneq pillugu Inatsisartut peqqussutaanni § 37, imm. 1.
Imm. 2. KNR-ip naatsorsuuserinermut ilitsersuutai siulersuisut aalajangersassavaat.
Imm. 3. Naatsorsuutit KNR-ip innuttaasunik kiffartuussilluni ingerlatsineranut, allatut aallakaatitassiorneranut kiisalu ingerlatamik allamik ingerlatsineranut immikkut naatsorsuutinik, matumani aamma ingerlatamik allamik ingerlataqarnerit assigiinngitsut ataasiakkaat pillugit immikkut naatsorsuutinik imaqassapput, tak. radiukkut tv-kkullu aallakaatitsisarneq pillugu Inatsisartut peqqussutaanni § 37, imm. 2.

§ 33. Pisortap ukiumoortumik naatsorsuutit suliarisassavai, akuerisassanngorlugillu siulersuisunut saqqummiuttassallugit.
Imm. 2. Ukiumoortumik naatsorsuutit siulersuisunit akuerineqarsimasut Namminersornerullutik Oqartussat kukkunersiuisuannit kukkunersiorneqartassapput, tak. radiukkut tv-kkullu aallakaatitsisarneq pillugu Inatsisartut peqqussutaanni § 37, imm. 4.
Imm. 3. Siulersuisut kukkunersiuisut nalunaarusiaat pisortallu tassunga oqaaseqaatigiunnagai isummerfigisassavaat.
Imm. 4. Siulersuisut, piffissaliussap Naalakkersuisunit aalajangersarneqartup nallinginnerani ukiumoortumik naatsorsuutit kukkunersiorneqarsimasut kukkunersiuisup oqaaseqaataanik ilaqartillugit kultureqarnermut pisortaqarfimmut, Naalakkersuisunut akuerisassanngorlugit saqqummiussisussamut nassiuttassavaat. Naalakkersuisut tamatuma kingorna ukiumoortumik naatsorsuutit ilisimatitsissutitut Inatsisartunut nassiuttassavaat, tak. radiukkut tv-kkullu aallakaatitsisarneq pillugu Inatsisartut peqqussutaanni § 37, imm. 5.
Imm. 5. Siulersuisut naatsorsuutinik Naalakkersuisunut saqqummiussinerminnut ilutigitillugu naatsorsuutit tamanut tusarliutissavaat, tak. radiukkut tv-kkullu aallakaatitsisarneq pillugu Inatsisartut peqqussutaanni § 37, imm. 6.

 

Isumaqatigiissutit il.il.

§ 34. Aningaasaqarnermut Pisortaqarfiup isumaqatigiissutissanik isumaqatiginninniuteqartarnermut immikkoortortaata isumaqatigiissutissanik isumaqatiginninniuteqartarneq Naalakkersuisut sinnerlugit isumagisassavaa.
Imm. 2. Isumaqatigiissutit naapertorlugit atorfinitsinneqarsimasunut tjenestemandinullu akissarsiatigut isumaqatigiissutitigullu atugassarititaasut nalinginnaasut kattuffiit isumaqatiginninniussisinnaasut isumaqatigiissuteqarfiginerisigut aalajangersarneqartassapput.
Imm. 3. Atorfinitsitsisoqarnerani soraarsitsisoqarneranilu malinneqartassapput atorfinitsitsisarnermi tunngavissat nalinginnaasut aamma suliassat suliarineqartarnerat pillugu inatsisip kiisalu paasitinneqarsinnaatitaaneq pillugu inatsisip pisortat ingerlatsinerat pillugu maleruagassartaat.

 

Ileqqoreqqusanik allanngortitsineq

§ 35. Ileqqoreqqusat uku allanngortinneqarnissaat pillugu siunnersuummik siulersuisut Naalakkersuisunut saqqummiussisinnaapput.

 

Atortuulerfik

§ 36. Nalunaarut una ulloq 1. august 2005-imi atortuulissaaq. Tassunga ilutigitillugu atorunnaarsinneqarpoq Kalaallit Nunaata Radioanut ileqqoreqqusat pillugit Namminersornerullutik Oqartussat nalunaarutaat nr. 2, 24. januar 1991-imeersoq.

Namminersornerullutik Oqartussat, ulloq 1. juli 2005

Henriette Rasmussen

/

Lise Lennert Olsen