Ilisimatusarfimmi Ilinniaatsinut Institutimi kandidatimut ilinniarnerit pillugit Namminersornerullutik Oqartussat nalunaarutaat nr. 14, 19. maj 2005-imeersoq.

Ilisimatusarfik pillugu Inatsisartut inatsisaanni nr. 16-imi, 31. oktober 1996-imeersumi § 18, nr. 1 aamma 2 kiisalu § 19, nr. 3, Ilisimatusarfimmillu innersuussuteqarneq malillugit Naalakkersuisunit aalajangersarneqarput:

 

Kapitali 1
Ilinniagaqarnerit siunertaat aaqqissugaanerallu.

§ 1. Ilisimatusarfimmi Ilinniaatsinut Institutimi kandidatimut ilinniarnerit ilisimatuutut periaatsit, ilisimasat piginnaassutsillu tunngavigalugit pisortat aamma namminersortut suliffeqarfiini, atorfeqarfinni aamma kattuffinni sulinissamut ilinniartut piukkunnassuseqalersissavaat.

§ 2. Naalakkersuisut Ilisimatusarfiup innersuussineratigut akuerissavaat ilinniagassat suut iluini, piffissallu qanoq sivisutigisup iluani, nalunaarut una malillugu ilinniagaqarnerit neqeroorutigineqarsinnaanersut.

§ 3. Ilisimatusarfimmi Ilinniaatsinut Institutimi kandidatimut ilinniarnerit atorfeqarfiit / ilinniarfiit allat ilinniarnernik ingerlaqqiffiusunik assingusunik ingerlataqartut suleqatigiissutigisinnaavaat, tassunga atatillugu akuerineqarsinnaalluni ilinniarfinni allani taamatut suleqatigiiffiusuni ilinniarnerup ingerlanneqarsinnaaneri.

§ 4. Ilisimatusarfimmi Ilinniaatsinut Institutimi kandidatimut ilinniarnerit ilinniartup ukiuni pingasuni ilinniarneratut sivisussuseqarput.
Imm. 2. Ilinniartup ukiumi ataatsimi ilinniarnera tassaavoq ilinniartup ukiumi ataatsimi sulinera.
Imm. 3. Ilinniartup ukiumi ataatsimi ilinniarnera 60 pointinik naleqarpoq European Credit Transfer System (ECTS-points) naapertorlugit.

§ 5. Kandidatimut ilinniarnerit Ph.D.-gradimik angusaqarniarluni ukiuni pingasuni ilisimatusarnermik taperneqarsinnaapput.

§ 6. Ilisimatusarfimmi Ilinniaatsinut Institutimi ilinniarnerup ilinniartut fagit/ilinniakkat innersuussutigineqartut ilisimasassartaannik imaluunniit ilisimasassartaasa teoriivinik taakkunanilu periaatsinik tamatigoortumik paasisimasaqalersissavai pisinnaalersissallugillu sammisanik nassuiaasinnaalernissamut, oqaatiginnissinnaalernissamut, paasiniaaqqissaarsinnaalernissamut ilinniaqqinnissamut imaluunniit inuussutissarsiummik ingerlatsisinnaalersinneqarnermut tunngavissinneqarluni.

§ 7. Kandidatimut ilinniarnerit ilinniartut ilinniartitsisumut, professionsbachelorimut aamma bachelorimut ilinniarnerminni ilisimaligaat ilaartussavaat aammalu suleriaatsinut teorimullu tunngasutigut piginnaassusii kiisalu paasissutissiisinnaassusiat nammineersinnaassusiallu annertusassallugit.

 

Kapitali 2
Ilinniarnernut qinnuteqarnissamut piumasaqaatit

§ 8. Kandidatimut ilinniarnissanut qinnuteqarnissamut piumasaqaataavoq qinnuteqartup meeqqat atuarfianni ilinniartitsisumut, naleqquttumut professionsbachelorimut, naleqquttumut akunnattumik sivisussusilimmik ingerlaqqiffiusumik ilinniarnermut imaluunniit naleqquttumut akademisk bachelorimut ilinniarsimanissaa.
Imm. 2. Ilinniagassat aaqqissuunneqarneranni aalajangersarneqassapput, professionsbachelorimut ilinniarnerit suut, akunnattumik sivisussusilimmik ingerlaqqiffiusumik ilinniarnerit suut imaluunniit akademisk bachelorimut ilinniarnerit suut kandidatimut ilinniarnissanut isissutaasinnaanersut.

§ 9. Qinnuteqartut ilinniartitsisumut imaluunniit naleqquttumut akunnattumik sivisussusilimmik ingerlaqqiffiusumik ilinniarnermut ilinniarsimasut ilinniarnertik semesterimi siullermi aallartittassavaat.
Imm. 2. Qinnuteqartut pædagogik-imi diplomimut, professionsbachelorimut imaluunniit akademisk bachelorimut ilinniarnermik naammassinnissimasut ilinniarnerit semesteriini pingajuanni aallartittassapput.
Imm. 3. Qinnuteqartut masterimik ilinniarnermik naammassinnissimasut ilinniarnerit semesteriini tallimaanni aallartittassapput.

§ 10. Ilisimatusarfimmi rektori studienævnip inassuteqarneratigut ilinniarnerni ilinniartunngornissamut qinnuteqartunut akuersissuteqartassaaq. Qinnuteqartut kikkut akuerineqassanersut nalilerniarneranni qinnuteqartumit immikkut isiginiarneqartassapput
1) ilinniarsimassutsikkut piginnaasat,
2) suliffeqarnikkut misilittakkat aamma
3) ilinniarnermut qinnuteqarnermi tunngavilersuutit.

 

Kapitali 3
Ilinniakkat imassaat aaqqissuunneqarnissaallu

§ 11. Kandidatimut ilinniarnerit tassaapput ilinniartitsisumut ilinniarnermik, professionsbachelorimik ilinniarnermik, naleqquttumik akunnattumik sivisussusilimmik ingerlaqqiffiusumik ilinniarnermik imaluunniit naleqquttumik akademisk bachelorimik ilinniarnermik ingerlaqqiffiupput.

§ 12. Kandidatimut ilinniarnermi ilaavoq namminersuutaasumik annertujaamik allaaserisaqarneq (specialeqarneq), pædagogikkimi ilinniakkap iluani annertujaamik allaaserisaqarsinnaaneq (specialeqarneq) imaluunniit namminersuutaasumik annertujaamik allaaserisaqarneq (specialeqarneq) atuarfiup iluani atuartitsissutit qanitariissut tallimaasut ilaannit ataatsimit toqqagaq imaluunniit immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarnermit toqqagaq.
Imm. 2. Specialikkut uppernarsarneqassaaq ilinniartup ilinniakkamut tunngasunik ilisimasaqarnera aamma piginnaasaqarnera ilinniakkaminullu killiliilluni qulequtamik aalajangersimasumut tunngasumik sammisaqarnermini ilisimatuutut teoriinik periaatsinillu atuilluarsinnaanera.
Imm. 3. Specialimik allaatiginninneq killilerneqassaaq suliarinera naammassineqarsinnaanngorlugu ukiumut sammisat suliarisarnerisa affaattut sivisutigisumik. Speciali pillugu erseqqinnerusumik aalajangersakkat ilinniarnerup aaqqissuunnerani aalajangersarneqassapput.
Imm. 4. Specialimi allaatigisassaq Ilisimatusarfimmi Ilinniaatsinut Institutimit akuerineqartassaaq, qaqugulu tunniunneqarnissaa tassanissaaq aalajangerneqartassalluni.

§ 13. Tamatigoortumik pædagogikkimi kandidatimut soraarummeersimasunut taaguutitut akuerineqarpoq candidatus imaluunniit candidata pædagogiæ (cand. pæd.).
Imm. 2. Tamatigoortumik pædagogikkimi kandidatimut ilinniarneq ilinniagassap pædagogikkip iluani 180 ECTS pointinik ilisimatusarnertut naleqarpoq.

§ 14. Didaktikkimi kandidatimut ilinniarneq ilinniagassap pædagogikkip iluani ilisimatusarneruvoq atuarfimmi atuartitsissutit qanitariissut tallimat akornanni ataatsimi atuartitsissutit akimorlugit imaluunniit immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarnermik ilisimatusarnermik taperneqarsimasoq. Didaktikkimi kandidatimut soraarummeersimasunut taaguutitut akuerineqarpoq candidatus imaluunniit candidata pædagogiæ (cand. pæd.).
Imm. 2. Didaktikkimi kandidatimut ilinniarneq ilinniagassap pædagogikkip iluani 60 ECTS pointinik ilisimatusarnertut naleqarpoq aamma atuarfimmi atuartitsissutit qanitariissut tallimat akornanni ataatsimi atuartitsissutit akimorlugit imaluunniit immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarnermik 120 ECTS pointinik didaktikkimi ilisimatusarnertut naleqarluni.

§ 15. Ilinniartut kandidatimut ilinniarnermi soraarummeernernik 60 ECTS pointinik naleqartunik naammassisaqarsimasut akademisk diplomitut ilinniarnermik naammassinnissimasutut uppernarsaammik allagartartaartinneqarsinnaapput.
Imm. 2. Ilinniartut tamatigoortumik pædagogikkimi 60 ECTS pointinik pissarsisimasut akademisk diplomitut allagartamik tunineqarsinaapput.
Imm. 3. Ilinniartut ilinniagassap pædagogikkip iluani 20 ECTS pointinik pissarsisimasut aamma atuarfimmi atuartitsissutit qanitariissut tallimat akornanni ataatsimi atuartitsissutit akimorlugit imaluunniit immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarnermik ilisimatusarnermik 40 ECTS pointinik pissarsisimasut didaktikkimi akademisk diplomitut allagartamik tunineqarsinnaapput.
Imm. 4. Ilinniartut ilinniagassap pædagogikkip iluani 20 ECTS pointinik pissarsisimasut aamma atuarfimmi aqutsinermik ilinniakkanik 40 ECTS pointinik pissarsisimasut atuarfimmi aqutsinermik akademisk diplomitut allagartamik tunineqarsinnaapput. Tuluttut: Academic Diploma in School Administration.

§ 16. Ilinniartut tamatigoortumik pædagogikkimi 120 ECTS pointinik pissarsisimasut tamatigoortumik pædagogikkimi masteritut ilinniarnermik naammassinnissimasutut allagartamik tunineqarsinnaapput.
Imm. 2. Ilinniartut ilinniagassap pædagogikkip iluani 40 ECTS pointinik pissarsisimasut aamma atuarfimmi atuartitsissutit qanitariissut tallimat akornanni ataatsimi atuartitsissutit akimorlugit imaluunniit immikkut ittumik atuartitsineq aamma allatut immikkut perorsaanikkut ilinniartitsinikkullu ikiorsiisarnermik ilisimatusarnermik 80 ECTS pointinik pissarsisimasut didaktikkimi masteritut ilinniarnermik naammassinnissimasutut uppernarsaammik allagartartaartinneqarsinnaapput.

 

Kapitali 4.
Naliliineq

§ 17. Kandidatimut ilinniagaqarnerni pisinnaasassatut angusat misilitsinnikkut uppernarsarneqassapput, tamakkununnga suliassiissut specialillu nalilerneqarnerat ilanngullugit.
Imm. 2. Ilinniagaqarnerit ilaat imarisamikkut aaqqissuussaanermikkullu soraarummeerutissaqqinngitsut uppernarsaaserneqarsinnaapput ilinniartup ilinniarnermi peqataaneratigut imaluunniit allaatigisaqartinneratigut. Taamaaliorsinnaaneq ilinniagaqarnerup aaqqissuussaanerani malittarisassiuunneqassaaq.
Imm. 3. Misileeriaatsini sianigineqassaaq ilinniartitsinerup siunertaa aammalu ilinniartut tamarmik immikkut naliliivigineqarnissaat.

§ 18. Kandidatimut ilinniarnerni misilitsinnerit avataaneersumit nalileeqataaffigineqartassapput, uppernarsaaserneqarlutillu. Misilitsinnerit ilinniakkat imaat annertuut, problemstillingit sammineqarsimasut aammalu periaatsit atorneqarsimasut tamakkiisumik misiliiffigissavaat.
Imm. 2. Misilitsinnerit nalilerneqassapput soraarummeersitsisumit (-sunit) nalileeqataasumillu (-sunillu) ilinniartitaanermut pisortaqarfiup toqqagaanit nalilerneqassapput.
Imm. 3. Karakteriliiniarnermi soraarummeersitsisoq (-sut) nalileeqataasorlu (-sullu) kisimik najuussinnaapput.
Imm. 4. Sulilluni sungiusarneq angalaarlunilu misissuinerit ilinniagassat aaqqissuunneranni malittarisassat najoqqutaralugit uppernarsarneqassapput.

§ 19 Naliliinermi atorneqassaaaq 13-skala takuuk karakteriliisarnermi naleqassutsinik tulleriinnilersuineq allatullu naliliisarneq pillugit Namminersornerullutik Oqartussat nalunaarutaat nr. 14, 9. april 2001-imeersoq.

§ 20. Misilitsinnerit aaqqissuunneqassapput inuit ataasiakkaarlutik misilitsinnerisut.
Imm. 2. Kisianni ilinniagassat aaqqissuunneranni aalajangerneqarsinnaavoq misilitsinnissat aalajangersimasut ilaat aaqqissuunneqartassasut inunnit arlalinnit ataatsimut suliarineqartussatut, ataatsimut naliliiffigineqaatigisassaannik.
Imm. 3. Arlallit misilitsinnermik suleqatigiinnerat imatut aaqqinneqassaaq misilitsittut tamarmik immikkut nalilerneqarsinnaasunngorlugit.
Imm. 4. Ilinniagassat aaqqissuunneranni aalajangersarneqassaaq taamatut inuit arlallit misilitsissinnaaneranni amerlanerpaamik qassit peqataasinnaanersut.

§ 21. Inuit arlallit suleqatigiillutik oqaluttarissanik soraarummeersinneqarnerat ingerlanneqarsinnaavoq ilinniartut, soraarummeersitsisoq (-sut) aamma nalileeqataasussaq (-sat) oqaloqatigiissillugit. Peqataasut tamarmik immikkut soraarummeersinneqarnerat ilaasassaaq.
Imm. 2. Inuit arlallit suleqatigiillutik allattarissanik soraarummeersinneqarneranni inuup ataatsip suliaa malugineqarsinnaassaaq, suleqatigiillu tamarmik immikkut naliliiffigineqartassapput. Taamaattorli ilinniagassat aaqqissuunneranni aalajangerneqassaaq suleqatigiit tamarmik immikkut naliliiffigineqarnerat pisinnaassasoq allaatigisaq tunngavigalugu itisilerilluni oqaloqatigeereernermi. Taava immikkut naliliiffiginninneq pissaaq oqaloqatigiilluni soraarummeersitsineq tunngavigalugu.
Imm. 3. Ilinniagassat aaqqissuunneranni aalajangersarneqarsinnaavoq specialimi allaatigisaq oqaloqatigiissutissanngortinneqartassanersoq. Taamaassagaangat taava naliliineq pisassaaq allaatigisamik oqaloqatigiinnermillu ataatsimut qanoq isiginninneq tunngavigalugu.

§ 22. Misilitsinnerit naliliiffigineqarnerilluunniit allat tamarmik immikkut angusiffigineqassapput. Misilitsinnerit angusiffiusut misilitseqqiffiusinnaanngillat.
Imm. 2. Ilinniartoq amerlanerpaamik pingasoriarluni kandidatinngorniarnermut misilitsinnissanut naliligassanullu aallanut akuerineqarsinnaavoq. Ilisimatusarfiup sisamassaaneernissaq immikkut pissutissaqartillugu akuerisinnaavaa.

§ 23. Soraarummeernissamut allakkatigut nalunaartarnissaq kingusinnerpaamik pisassaaq soraarummeernissap nalunaarfigisap aallartiffissaa qaammammik ataatsimik sioqqullugu. Ilinniartup nammineerluni misilitsiffissaminut nalunaarnissani akisussaaffigaa.
Imm. 2. Soraarummeernissamik nalunaarutigeriikkamik taamaatitsiniarneq allakkatigut nalunaarutigineqassaaq kingusinnerpaamik soraarummeernissap ullulerneqarfia sapaatip-akunnerinik marlunnik sioqqullugu. Soraarummeerumanani nalunaarneq taassumannga kingusinneruppat soraarummeersussarluunniit malittarisat malillugit iluamik nalunaarsimanani takkutinngitsoorpat, tamanna angusinngitsoorluni soraarummeernertut nalilerneqassaaq.

§ 24. Kinaluunniit Ilisimatusarfimmi Ilinniaatsinut Institutimi ilinniartitsisutut akuerisaq aamma tassani soraarummeersitsisinnaavoq.
Imm. 2. Ilisimatusarfimmi Ilinniaatsinut Institutimi soraarummeersitsisinnaaneq ilitsersuisinnaanerlu immikkut pissutissaqartillugu soraarummeersitsisussamut ilitsersuisussamullu avataaneersunut nalunaarutigisinnaavai.

§ 25. Soraarummeerneq kalaallit, qallunaat imaluunniit tuluit oqaasii atorlugit ingerlanneqarsinnaavoq. Ilisimatusarfimmi Ilinniaatsinut Institutilli piumasarisinnaavaa soraarummeerneq oqaatsit pingasut taaneqartut arlaannaat atorlugit ingerlanneqaqqullugu soraarummeersitsisussap imaluunniit nalileeqataasussap oqaatsit allat atorsinnaanngippagit.
Imm. 2. Ilisimatusarfimmi Ilinniaatsinut Institutilli soraarummeerniartoq allakkatigut qinnuteqarpat aalajangersinnaavaa Ilisimatusarfimmi Ilinniaatsinut Institutip oqaatsit piumasarisaanit allaanerusut atorneqarsinnaasut. Qinnuteqaat Ilisimatusarfimmi Ilinniaatsinut Institutimit tiguneqareersimassaaq soraarummeersitsisussat allattorsimaffiata tamanut saqqummiunneqarneranni kingusinnerpaamik ullut arfineq-marluk kingorna.

§ 26. Ilisimatusarfimmi Ilinniaatsinut Institutimi soraarummeernerit nalinginnaasumik pissassapput juunimi januaarimilu.
Imm. 2. Ilisimatusarfimmi Ilinniaatsinut Institutip akuerisinnaavaa misilitsinnerit, aamma napparsimalluni misilitsinnissaq, soraarummeernerup nalinginnaasumik piffissaata saniatigut pisinnaasut.
Imm. 3. Napparsimaneq pissutigalugu soraarummeernissamik qinnuteqaatit tamarmik nakorsap nalunaarutaanik uppernarsaatitaqassapput, kingusinnerpaamik soraarummeerfissaagaluaq ullunik sisamanik kingoqqullugu tunniunneqarsimasussanik.
Imm. 4. Napparsimaneq pissutigalugu immikkut soraarummeernissaq taamaallaat akuerineqarsinnaavoq soraarummeertussaq
1) soraarummeerfissamini napparsimasutut nalunaarutigineqarpat,
2) soraarummeernerup nalaani napparsimalerpat,
3) napparsimanini pillugu soraarummeerianngitsoorpat, imaluunniit
4) nammineq napparsimanermi saniatigut immikkut illuinnartumik uppernarsarneqarsinnaasumik pissuteqarluni soraarummeerianngitsoorpat.
Imm. 5. Napparsimalluni soraarummeerneq soraarummeernissamut soraarummeerniartup nalunaarfigisimasaraluanut taarsiuttutut nalilerneqassaaq.

 

Soraarummeersimanermut uppernarsaat

§ 27. Ilisimatusarfimmit soraarummeerneq naammassineqartoq pillugu uppernarsaat atsiorneqassaaq. Uppernarsaatip inussaata aqqa oqartussaasorlu atsiuisoq pillugit paasissutissanik imarisami saniatigut minnerpaamik imarissavai:
1) taaguut soraarummeernikkut atorneqarsinnaalersoq,
2) ilinniagassat misilitsiffigineqartut,
3) naliliussat anguneqartut,
4) ilinniakkat ilagisaat allatut uppernarsaateqartinneqartut,
5) ilinniakkami ataatsimi ilinniarnermi qanoq peqataatigineq,
6) misilitsinnerit allami qaqisiffigisimasat kiisalu
7) ilinniagaqarnerup taaguutaa kalaallisut, qallunaatut aamma tuluttut.
Imm. 2. Soraarummeersimanermut uppernarsaat allassimassaaq kalaallisut, qallunaatut tuluttullu.
Imm. 3. Ilinniarfinni arlalinni naammassillugit ilinniarsimanernut ataatsimoortumik uppernarsaat allagarserneqassaaq ilinniarfimmit ilinniagaqarnerup immikkoortuata kingulliup naammassineqarfigisaanit.
Imm. 4. Ilinniartumut, ilinniarnerminik naammassinagu qimatsisussamut, ilinniagaqarnerup ilaanut qaqisiffigisanut uppernarsaat Ilisimatusarfimmi Ilinniaatsinut Institutip atsiussavaa.

 

Kapitali 5
Ilinniagassat aaqqissuunneqarnerat

§ 28. Ilisimatusarfik ilinniagassat ataasiakkaat pillugit ilinniagassat aaqqissuunneqarneranni malittarisassaliussaaq, tak. Ilisimatusarfik pillugu Inatsisartut inatsisaat nr. 16, 31. oktober 1996-imeersoq, § 11, imm. 1 aamma § 14, imm. 3 aamma imm. 4.
Imm. 2. Ilinniagassat aaqqissuunneqarneranni malittarisassaliorneqassapput
1) ilinniagaqarnerup ilaasa ataasiakkaat anguniagassartaat, imarisassaat sivisussusissaallu,
2) ilinniartitseriaasissat, tamakkununnga ilanngullugu sulilluni sungiusarneq ilaatinneqassanersoq,
3) kursusernerit tulleriiaarneranni pituttusimaffiusinnaasut,
4) soraarummeernissamut piumasarisat immaqalu misilitsittarnerit aalajangersimasumik inissinneqassanersut,
5) misileeriaatsit (sivisussusissat, nakkutilliisoqartitsineq, allattarissanik angerlaallugit suliaqarneq, najoqqutassaqartitsineq, piareersarfissat, misilitseqqittarnerit, akuleriissitsinissamut periarfissat il.il.),
6) nalileeriaatsit, tamakkununnga ilanngullugit misilitsinnerit suut karakteerilerneqartassasut, kiisalu allattariarsornerni naliliinissamut piffissamik killiliisarnissat,
7) misilitsinnerit qassiusarnissaat misilitsinnernilu ataasiakkaani karakteeriliussanik nalilersuisarneq,
8) speciali,
9) ilinniartup ilinniarnissamut piffissarititap iluani Ilisimatusarfiunngitsumi ilinniartitsissutinik sammisaqarnissamut periarfissaqartinneqarsinnaanera, aamma
10) soraarummeernermut atuarsimasassat aalajangersarneqarnissaat imaluunniit atuarsimasassanut missingersuusiornissaq, kiisalu soraarummeernernut atasumik atuarsimasassanik aalajangiivinnissamut piffissaliussassat.
Imm. 3. Ilisimatusarfimmi Ilinniaatsinut Instituti ilinniagassat aaqqissuunneqarneranni malittarisassanit taamaallaat ilinniarfimmit aalajangersarneqarsimasunit allaasumik iliortoqarnissaanik akuersisinnaavoq.
Imm. 4. Ilinniagassanik aaqqissuussinissaq atortussanngortinneqartinnagu ilinniagassanillu aaqqissuussinermik annertuumik allanngortitsisoqartillugu ilinniarfiup ilinniartunik tigusissussat sinniisuat, tassunga ilanngullugu nalileeqataasartut siulittaasuat, atassuteqarfigissavai. Ilinniarfiit allat ilisimatinneqassapput ilinniakkami imaluunniit ilinniakkani pineqartuni ataqatigiissaarinissaq eqqarsaatigalugu.
Imm. 5. Ilinniagassanik aaqqissuussinerit taakkunanilu annertuumik allanngortitsinerit atortuulertassapput ukiup ilinniarfiusup aallartinnerani.
Imm. 6. Ilinniagassanik aaqqissuussinerit ilinniagassanillu aaqqissuussinernik allanngortitsinerit ilinniartitaanermut pisortaqarfimmut, ilinniarfinnut allanut nalileeqataasartunullu paasissutissatut nassiunneqassapput.

§ 29. Ilisimatusarfimmi Ilinniaatsinut Institutip tamatigut imaluunniit ilinniagassat aaqqissuunneqarneranni aalajangersakkatigut nalinginnaasutigut akuerisinnaavaa nalunaarut manna malillugu uppernarsaateqartunik misilitsinnerit, ilinniarfimmi allami qaqisiffiusut, ilinniarfimmi misilitsinnernut naligititaanissaat.
Imm. 2. Ilisimatusarfimmi Ilinniaatsinut Institutip tamatigut imaluunniit ilinniagassat aaqqissuussaaneranni aalajangersakkatigut nalinginnaasutigut akuerisinnaavaa Danmarkimi imaluunniit nunami allami ilinniarfimmi qaffasinnerusumi fagip imaluunniit ilinniagassap iluani ilinniagaqarnerup ilaanik naammassisimasat ilinniagassat ilaannut nalunaarummi matumani ilaatinneqartunut taarsiunneqarsinnaanerat.
Imm. 3. Ilinniagaqarnerup ilaanik imm. 2-mi taaneqartunik naliliinerit nuunneqartassapput Angusinertut imaluunniit 13-skala malillugu karakteerisut, tak. § 20. 13-skala malillugu karakteerinik nuutsisoqarsinnaavoq ilinniakkap ilaa pineqartoq ilinniarfinni arlariinni skala taanna malillugu nalilerneqarsimappat ilinniarfiillu pineqartut allatut isumaqatigiissuteqarsimanngippata.

 

Kapitali 6
Malittarisassanit immikkoortumik akuersinissaq, naammagittaalliorneq atortuulerfissarlu.

§ 30. Ilinniartitaanermut Pisortaqarfiup nalunaarummit matumannga allaassuteqartitsinissaq misiliinermut ilaasumik akuerisinnaavaa. Tamanna peqatigalugu misiliinissap sivisussusissaa qanorlu nalunaarusiortarnissaq aalajangersarneqassapput.
Imm. 2. Ilinniartitaanermut Pisortaqarfik nalunaarummi uani aalajangersakkanit allatut iliortoqarnissaanut akuersisinnaavoq pissutsinik nalinginnaanngitsunik patsiseqartumik.

§ 31. Nalunaarut una malillugu Ilisimatusarfimmi Ilinniaatsinut Institutip aalajangiineri pillugit naammagittaalliuutit Ilisimatusarfimmut tunniunneqassapput. Ilisimatusarfiup aalajangiineri pillugit naammagittaalliuutit inatsisiliornermut tunngasuugaangata Naalakkersuisunut suliassanngortinneqarsinnaapput, Ilisimatusarfik pillugu Inatsisartut inatsisaanni nr. 16-imi, 31. oktober 1996-imeersumi § 23 naapertorlugu.

§ 32. Nalunaarut una atortuulerpoq 20. maj 2005-imi.

Namminersornerullutik Oqartussat, ulloq 19. maj 2005.

Hans Enoksen

/

Lise Lennert Olsen