Arfernik angisuunik piniarneq pillugu Namminersornerullutik Oqartussat nalunaarutaat nr. 10, ulloq 13. april 2005-imeersoq

Piniarneq aallaaniarnerlu pillugit Inatsisartut inatsisaanni nr. 12-imi 29. oktober 1999-imeersumi §§-it 8, 12, 13 aamma 17, aamma Pinngortitap illersorneqarnera pillugu Inatsisartut inatsisaanni nr. 29-mi 18. december 2003-meersumi §§ 5, 35, 36 aamma 60 malillugit aalajangersarneqarpoq:

 

§ 1. Nalunaarummi matumani "arferit angisuut" tassaapput tikaagulliit, tikaagulliusaat arferillu soqqallit allat tikaagullinnit anginerusut, kiisalu kigutilissuit.

§ 2. Imartani Kalaallit Nunaata aalisarnikkut oqartussaaffigisaani arferit angisuut aallaaneqarnissaat pisarineqarnissaallu inerteqqutaavoq, taamaattorli imm. 2 takuuk.
Imm. 2. Tikaagulliusaat aamma tikaagulliit nalunaarummi matumani maleruagassat malillugit imm. 1-imi inerteqqummut ilaatinneqanngillat.
Imm. 3. Arfernik angisuunik annertuumik ikilikkanik toqulersunik, qassutini aalisarnermulluunniit atortuni allani ilagussimasunik sassaasunilluunniit toqutsineq siumut Aalisarnermut Piniarnermullu Naalakkersuisoqarfimmit akuersissuteqarfigineqareerluni pisinnaavoq, taamaattorli § 7, imm.1 takuuk.
Imm. 4. Maleruaqqusanik unioqqutitsinani tikaagulliusaamik tikaagullimmilluunniit pisaqarnermi, pisaq inunnit nerissallugu piukkunnanngitsoq paasinarsissagaluarpat, pisap nappaateqarnera imaluunniit allamik pissuteqartumik, Aalisarnermut Piniarnermullu Naalakkersuisoqarfik akuersissuteqarsinnaavoq, pisaq toqutsinertut isigineqarsinnaasoq. Pisaqarnermi tikaagullinnissamut akuersissut atorneqarsimappat taanna atuutiinnassaaq.
Imm. 5. Imm. 3 aamma imm. 4 malillugit arferit toqunneqartut atorneqarnissaannut piumasaqaatit Aalisarnermut Piniarnermullu Naalakkersuisoqarfimmit aalajangersarneqassapput.

 

Tikaagulliusaat

§ 3. Aalisarnermut Piniarnermullu Naalakkersuisoqarfiup ukiut tamaasa KNAPK aamma KANUKOKA tusarniaavigereerlugit nalunaarutigisassavaa qaammatisiutit malillugit ukiumi tassani Kalaallit Nunaata Kitaani tikaagulliusaat qassit pisarineqarsinnaanersut.
Imm. 2. Ukiumi pineqartumi akuersissummut atatillugu arfanniarnermut piumasaqaatinik erseqqinnerusunik Aalisarnermut Piniarnermullu Naalakkersuisoqarfik aalajangersaasinnaavoq, ilaatigut siunertaralugu piniariaatsit sunniutaasa naliliivigineqarnissaat.

§ 4. Tikaagulliusaat 15,2 meterinit takinerusut kisimik inunnit tikaagulliusaarniarnissamut atortulinnit § 13-ilu naapertorlugu kommunimit akuersissummik peqartunit aallaaneqarlutillu pisarineqarsinnaapput. Tikaagulliusaarniarnissamut atortut suliffeqarfimmit Aalisarnermut Piniarnermullu Pisortaqarfimmit tamatumunnga piginnaatinneqarsimasumit akuerineqarsimassapput.
Imm. 2. Tikaagulliusaat piaqqisartillugit arnavissat piaqqalluunniit aallaaneqaqqusaanatilluunniit pisarineqaqqusaanngillat.

 

Tikaagulliusaanik piniarnermut atortut

§ 5. Angallatit tikaagulliusaarniarsinnaatitaasut makkuupput:
1) Angallat ataaseq minnerpaamik 36 fodsinik angissusilik.
2) Tikaagulliusaamut ataatsimut angallatit marluk tamarmik immikkut minnerpaamik 30 fodsinik angissusillit.
Imm. 2. Angallatit imm. 1-imi taaneqartut GR-normu, radiukkut attaveqarnermi ilisarnaat kiisalu angallammik piginnittoq nalunaarsorsimasoq atorlugit Imarsiornermik Aqutsisoqarfimmi, Søfartsstyrelsimi, nalunaarsorsimassapput.
Imm. 3. Angallatit imm. 1-imi taaneqartut qamutilinnik tuukkartalinnik aamma ningittakkanut qalorsuarnulluunnit amoorutinik minnerpaamik tonsinik tallimanik qaqitsisinnaassusilinnik saattuarniutinulluunniit amoorutinik atortoqassapput. Angallatit tamarmik aleqassapput sioqarlutillu avataqassallutillu pisarineqartup kivisinnginnissaanut naammattunik.
Imm. 4. Tikaagulliusaarniarnermut taamaallaat atorneqarsinnaapput qamutillit tuukkartallit min-nerpaamik 50 mm-inik kaliberillit tuukkallu nuuatigut ikkuttakkanik qaartartortallit. Qaartartut Aalisarnermut Piniarnermullu Naalakkersuisoqarfimmit akuerineqarsimassapput.
Imm. 5. Tikaagulliusaarniarnerit tamaasa tuukkamik qaartartortalimmik allamik piareersimatit-sisoqassaaq.
Imm. 6. Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaallutillu passussisinnaapput.
Imm. 7. Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 6 naapertorlugu atuuttumik uppernarsaammik, kiisalu ukiumut pineqartumut akuersissummik atuuttumik takutitsisoqarneratigut.
Imm. 8. Tikaagulliusaaq aallaaneqartoq toqunneqanngitsorli sapinngisamik piaartumik toqunneqassaaq. Toqutsineq pissaaq tuukkaq qaartartortalik atorlugu tikaagulliusaaq niaquatigut aallaallugu.

 

Tikaagulliit

§ 6. Aalisarnermut Piniarnermullu Naalakkersuisoqarfiup ukiut tamaasa nalunaarutigisassavaa tikaagulliit qassit qaammatisiutit malillugit ukiumi tassani amerlanerpaamik Kalaallit Nunaata Kitaani aamma Kalaallit Nunaata Tunuani pisarineqarsinnaanersut.
Imm. 2. Taamatuttaaq Aalisarnermut Piniarnermullu Naalakkersuisoqarfiup ukiut tamaasa KNAPK aamma KANUKOKA tusarniaavigereerlugit qaammatisiutit malillugit ukiumi Kalaallit Nunaata Kitaani aamma Kalaallit Nunaata Tunuani kommunini ataasiakkaani tamani tikaagulliit qassit amerlanerpaamik pisarineqarsinnaanersut nalunaarutigisassavaa.
Imm. 3. Aalisarnermut Piniarnermullu Naalakkersuisoqarfiup ukiumi pineqartumi akuersissummi arfanniarnermut piumasaqaataasut erseqqinnerusumik aalajangersarsinnaavai, ilaatigut piniariaatsit sunniutigisartagaasa naliliivigineqarnissaat siunertaralugu.

§ 7. Tikaagulliit taamaallaat piffissami apriilip ulluisa aallaqqaataanniit decembarip ulluisa 31-annut ullut taaneqartut ilanngullugit aallaaneqarlutillu pisarineqarsinnaapput. Tikaagulliit piaqqisartillugit arnavissat piaraalluunniit aallaaneqaqqusaanatilluunniit pisarineqaqqusaanngillat. Taamaattorli tikaagulliit sassaasut ukioq naallugu aallaaneqarlutillu pisarineqarsinnaapput.
Imm. 2. Inuit akuersissummik pigisaqartut kiisalu arfanniarnissamut atortumikkut akuerineqarsimasut kisimik tikaagullinniarsinnaapput, tak. §§-it 8, 9 aamma 13.

 

Tikaagullinnik piniarnermut atortut

§ 8. Angallatit tuukkartalimmik qamutilillit tikaagullinniarnermut peqataasut 70 fodsinit naannerussapput aamma ningittakkanut qalorsuarnulluunniit amoorutinik minnerpaamik tonsinik marlunnik qaqitsisinnaassusilinnik saattuarniutinulluunniit amoorutinik atortoqassapput.
Imm. 2. Angallatit GR-normu, radiukkut attaveqarnermi ilisarnaat kiisalu angallammik piginnittoq nalunaarsorsimasoq atorlugit Imarsiornermik Aqutsisoqarfimmi, Søfartsstyrelsimi, nalunaarsorneqarsimassapput.
Imm. 3. Tikaagullinniarnermut taamaallaat atorneqarsinnaapput qamutillit tuukkartallit minnerpaamik 50 mm-imik kaliberillit qaartartorlu tuukkap nuuanut ikkuttagaq. Qaartartut Aalisarnermut Piniarnermullu Naalakkersuisoqarfimmit akuerineqarsimassapput, taamaattorli § 11 takuuk..
Imm. 4. Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaapput passussisinnaallutillu.
Imm. 5. Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 4 naapertorlugu atuuttumik uppernarsaammik, kiisalu ukiumut pineqartumut akuersissummik atuuttumik takutitsisoqarneratigut.
Imm. 6. Tikaagullik aallaaneqartoq toqunneqanngitsorli sapinngisamik piaartumik toqunneqassaaq. Toqutsisoqassaaq qaartartumik tuukkap nuuanut ikkuttakkamik imaluunniit qoorortuunik minnerpaamik 7,62 mm-imik (30.06) kaliberilinnik inngigissunik aqerlulinnik (helmantel) niaquatigut aallaallugu.

 

Qamutillit tuukkartallit ataatsimut isigalugit

§ 9. Qamutillit tuukkartallit tikaagulliusaarniarnermut tikaagullinniarnermullu atorneqartut teknikikkut atorsinnaassutsimikkullu akornuteqassanngillat, taamaalilluni inuit ajoquseriataarnissaannut ulorianartorsiortitsissanatik. Taamatuttaaq piniarnermut atortut imatut siunertarineqartunut naleqqutsigissapput arfermik toqusaaneq sapinngisamik sukkanerpaamik pisinnaassalluni.
Imm. 2. Qamutilimmik tuukkartalimmik angallammut ikkussineq tamatigut suliffeqarfimmit Aalisarnermut Piniarnermullu Pisortaqarfimmit tamatumunnga piginnaatinneqarsimasumit akuersissutigineqarsimassaaq.

§ 10. Qamutillit tuukkartallit tamarmik suliffeqarfimmit Aalisarnermut Piniarnermullu Pisortaqarfimmit tamatumunnga piginnaatinneqarsimasumit 31. marts 1994 siullermik nalunaarsorneqarfianniit misissorneqarneranniillu atuutilersumik ukiut marlunngorneri tamaasa misissorneqassapput akuersissutigineqarlutillu.
Imm. 2. Qamutilinnik tuukkartalinnik imm. 1 naapertorlugu siullermeertumik misissuineq tunngavigalugu siunertarineqartunut naleqqussaaneq aamma isumannaallisaanikkut nutarterineq kingusinnerpaamik 31. december 2005 misissortikkiartoqqusinikkut pissaaq.

 

Ataatsimoorluni tikaagullinniarneq

§ 11. Aalisarnermut Piniarnermullu Naalakkersuisoqarfik akuersissuteqarsinnaavoq ataatsi-moorluni piniarnermi amerlanngitsunik qamutilimmik tuukkartalimmik sakkoqanngikkaluarluni tikaagullittoqarsinnaaneranut. Taamatut akuersissuteqartoqarsinnaavoq piniarneq nunaqqatigiinnut annertuumik pingaaruteqarpat aamma nunaqqatigiit angallatinit tuukkartalinnik qamutililinnit neqinik nutaanik naammattumik pilersorneqarsinnaanngippata.
Imm. 2. Aalisarnermut Piniarnermullu Naalakkersuisoqarfiup ukiumi pineqartumi akuersissummi ataatsimoorluni piniarnermut erseqqinnerusumik piumasaqaatit aalajangersarsinnaavai, ilaatigut piniariaatsit sunniutigisartagaasa naliliivigineqarnissaat siunertaralugu.
Imm. 3. Aalisarnermut Piniarnermullu Naalakkersuisoqarfiup ataatsimoorluni tikaagullinniarnermut immikkut akuersissutit aalajangersarneqarsimasut kommuninut agguaatissavaat KNAPK aamma KANUKOKA isumasioqatigereerlugit, nunamut tamarmut pisassat tamarmiusut agguaannerannut peqatigitillugu.
Imm. 4. Kommunip ataatsip iluani ataatsimut piniarnermut akuersissutit agguaanneqarneranni nunaqarfiit tulliullugillu illoqarfiit tuukkartalinnik qamutililinnik angallateqanngitsut sallerpaatinneqassapput.
Imm. 5. Taamaallaat inuussutissarsiutigalugu piniartut umiatsiaaqqamik pigisallit ataatsimoorluni tikaagullinniarsinnaanermut akuersissummik tunineqarsinnaapput.
Imm. 6. Aalisarnermut Piniarnermullu Naalakkersuisoqarfiup akuersissuteqarnera piumasaqaatitaqarpoq
1) piniarneq aaqqissuunneqassasoq ataatsimoorluni piniarnertut ikinnerpaamik umiatsiaaqqat tallimat piniarnerni ataasiakkaani peqataatillugit.
2) angallatit tuukkartalinnik qamutileqanngitsut 30 fodsit tikillugit angissusillit ataatsimoorluni piniarnermut peqataasinnaapput, kisiannili angallatitut siuttuutinneqassanatik.
3) piniartoqassaaq qoorortuut minnerpaamik 7,62 mm-imik (30.06) kaliberilinnik inngigissunik aqerlullit (helmantel) atorlugit. Qoorortuut eqqarasuartaatit eqittaannartakkallu umiatsiaaqqamiit piniarnermut atorneqaqqusaanngillat,
4) umiatsiaaqqat tamarmik unaaqassapput alertalinnik avataqassallutillu pisap kivisinnginnissaanut naammattunik,
5) angallatit ataatsimoorluni piniarnermut peqataasut taamatuttaaq ningittakkanut qalorsuarnulluunniit amoortaateqassapput minnerpaamik tonsinik marlunnik qaqitsissutaasinnaasunik saattuarniutinulluunniit amooruteqassallutik,
6) piniarneq ingerlanneqassasoq naalakkamit agguaanermut atatillugu najukkami aalisartut piniartullu peqatigiiffiannit kommunimillu umiatsiaaqqanik piginnittut akornannit toqqarneqartumit umiatsiaaqqanillu piginnittunit tamanit ilisimaneqartumit aqunneqarluni,
7) piniarneq aallartinneqassanngilaq ataatsimoorluni piniarnermut peqataasussat akuersissummik piginneqataasut tamarmik piniarnerup aallartinnissaanik kalerrinneqareertinnagit,
8) tikaagullik sapinngisamik pilertortumik toqusarneqassaaq, aamma
9) akuersissummik piginneqataasut pisaqarnermut peqataasut pisap agguarneqarnerani peqataassapput.

 

Pisamik iluaqutiginninneq

§ 12. Kikkulluunniit tikaagullimmik tikaagulliusaamilluunniit pisaqartut pisarineqartup nerineqarsinnaasortai tamaasa iluaqutigissallugit pisussaapput. Pisarineqartoq tamakkerlugu atorneqarsinnaanngippat tunineqarsinnaananiluunniit pisaqartoq pisussaavoq sinneruttut pisaqarfiusumi najugaqartunut tunniutissallugit.
Imm. 2. Arfermik pilanneq kiisalu arferup sinneruttuinik eqqaaneq inuussutissalerinermi nakkutilliinermik inatsisit avatangiisillu illersorneqarnissaat pillugu inatsisit malillugit pissaaq.

 

Akuersissutit nakkutilliinerlu

§ 13. Kommunalbestyrelsi § 6 naapertorlugu Naalakkersuisut pisassatut aalajangersimasaasa iluanni normulersukkanik akuersissutinik agguaassissaaq, akuersissummik piginnittumut angallammik aqqatigut taasamik imaluunniit erseqqinnerusumik suussusilikkamik angallateqarluni akuersissutip normuanut ataatsimut, tikaagullimmik ataatsimik pisaqarnissamut.
Imm. 2. Kommunalbestyrelsi Naalakkersuisut pisassatut aalajangersimasaasa iluanni akuersissuteqassaaq, piginnittumut angallat aqqatigut taasaq erseqqinnerusumilluunniit suussusiligaq atorlugu, § 3 naapertorlugu tikaagulliusaanik pisaqarsinnaanermut.
Imm. 3. Tikaagullinniarsinnaanermut akuersissutit qinnuteqaateqartoqarneratigut kommunalbestyrelsimit agguaanneqassapput nunaqarfinni aqutsisut najukkamilu aalisartut piniartullu peqatigiiffiat tusarniaavigereerlugit. Akuersissutit agguaanneqassapput allattuiffissat normulersukkat Aalisarnermut Piniarnermullu Naalakkersuisoqarfiup kommunalbestyrelsimut nassiussugai atorlugit.
Imm. 4. Kommunimi akuersissutit agguaanneqartut qinnuteqaatinit tiguneqarsimasunit ikinnerussagaluarpata tikaagullinniarnissamut agguaassisoqassaaq tulleriiaarilluni, ukiumi siuliani pisarineqarsimasut kiisalu akuersissutit atorneqanngitsut eqqarsaatigalugit.

§ 14. Kommunimut pisassiissutit tamarmiusut ataatsikkut agguaanneqassapput.
Imm. 2. Kommunalbestyrelsi tikaagullinniarnissamut akuersissuteqarsinnaavoq inunnut inuussutissarsiutigalugu piniarnermut atuuttumik allagartalinnut, aammalunniit
1) akuerisaasumik tuukkartalimmik qamutililimmik angallatilinnut, aammalu piginnittoq nammineerluni imaluunniit inuttaasoq qaartartumik tuukkap nuuanut ikkuttakkamik atuinissamut pikkorissartitsinermut peqataasimanermut atuuttumik uppernarsaateqassaaq imaluunniit
2) § 11 naapertorlugu ataatsimoorluni piniarnissamut immikkut akuersissuteqarfigineqarsimassalluni.
Imm. 3. Kommunalbestyrelsi tikaagulliusaarnissamut akuersissuteqarsinnaavoq inunnut inuussutissarsiutigalugu piniarnermut atuuttumik allagartalinnut, aamma akuerisaasumik tuukkartalimmik qamutililimmik angallatilinnut. Angallammik piginnittoq nammineerluni imaluunniit inuttaasoq qaartartumik tuukkap nuuanut ikkuttakkamik atuinissamut pikkorissartitsinermut peqataasimanermut atuuttumik uppernarsaateqassaaq. Akuersissut tassaavoq allagaq kommunip qinnuteqartumut tikaagulliusaarnissamut piumasaqaatinik naammassinnissimasumut tunniussaa.
Imm. 4. Kinaluunniit angallammut tuukkartalimmik qamutililimmut imaluunniit ataatsimoorluni piniarnissamut ataatsikkut akuersissummik tunineqarsinnaangilaq
Imm. 5. Ataatsimoorluni piniartoqassatillugu piniarnermut naalakkatut toqqarneqartumut akuersissuteqartoqassaaq. Ataatsimoorluni piniarnermut peqataasussat allat aqqi akuersissutip tunuani allanneqassapput.
Imm. 6. Akuersissutit qaammatisiutit ukiuanut ataatsimut atuupput, taamaattorli tak. § 16, imm. 4.

§ 15. Kommunalbestyrelsi nunaqarfimmi aqutsisut aamma najukkami aalisartut piniartullu peqatigiiffiat tusarniaaffigereerlugit kommunip ileqqoreqqusaatigut piumasaqaatinik aalajangersaasinnaavoq, § 14, imm. 2 aamma 3-mit sukanganerusunik.
Imm. 2. Kommunip ileqqoreqqusai Aalisarnermut Piniarnermullu Naalakkersuisoqarfimmit atortussangortinneqassapput.

§ 16. Kommunalbestyrelsi tikaagullinniarnissami pisassanut naapertuuttunik akuersissuteqareeriarpat kommunalbestyrelsip Aalisarnermut Piniarnermullu Naalakkersuisoqarfimmut nassiutissavai akuersissuteqarfigineqartut aqqi, inuttut normui, akuersissutit normui aamma GR-normut pillugit paasissutissat kingusinnerpaamik kommunalbestyrelsip akuersissutinut immersuiffissanik pisortaqarfimmiit tigusaqarnerata kingornatigut qaammat ataaseq qaangiutsinnagu.
Imm. 2. Tikaagullimmik pisaqarnissamut akuersissut Kalaallit Nunaata Kitaani atorneqassaaq tikaagullik pisarineqarpat pissanneqarpalluunniit.
Imm. 3. Kalaallit Nunaata Tunuani tikaagullimmik pisaqarnissamut akuersissut atorneqassaaq tikaagullik pisarineqarpat.
Imm. 4. Akuersissut ukiakkut pisassanik sinneruttunik agguaasseqqittoqartinnagu atorneqarsimanngitsoq pisassanut agguaateqqitassanut ingerlaannartumik ilanngunneqassaaq, tamatumalu kingornatigut akuersissummik piginnittuusimasumit atorneqarsinnaassanani.
Imm. 5. Aalisarnermut Piniarnermullu Naalakkersuisoqarfiup ukiumi pineqartumi imaluunniit tulliuttumi kommunimi pisassat ikilisissinnaavaat paasineqassagaluarpat
1) kommunimi akuersissuteqartoqartinnagu tikaagulliusaartoqarsimasoq tikaagulliusaamilluunniit pissaasoqarsimasoq,
2) akuersissuteqartoqartinnagu tikaagullittoqarsimasoq imaluunniit pissaasoqarsimasoq imaluunniit
3) qaammatisiutit ukiuanni akuersissutigineqartunit amerlanerusunik tikaagullittoqarsimasoq imaluunniit pissaasoqarsimasoq imaluunniit tikaagulliusaartoqarsimasoq. Tikaagullinnik taamatullu tikaagulliusaanik pisassat ikilisinneqarsinnaapput apeqqutaatinnagu sorliit sipporneqarsimanersut.
Imm. 6. Arfernik eqqissisimatitanik pisaqarneq aallaarsarinninnerluunniit ukiumi pineqartumi ukiumiluunniit tulliuttumi kommunimi inatsisinik unioqqutitsiviusumi pisassat ikilisinneqarnerannik kinguneqarsinnaavoq. Pisassanik ikilisitsineq tikaagullittassat tikaagulliusaartassaalluunniit ikilisinneqarnerisigut pisinnaavoq.

 

Akuersissutinik agguaasseqqinneq

§ 17. Kommunalbestyrelsi najukkami aalisartut piniartullu peqatigiiffiat tusarniaavigereerlugu aalajangiisinnaavoq akuersissut tunniunneqarsimasoq imaluunniit akuersissutit tunniunneqarsimasut kommunip iluani nuunneqassasut imaluunniit atorunnaassasut tamanna pillugu allakkatigut telefaxikkulluunnit, radiukkut, aviisitigut, atuagassiatigut assigisaasigulluunniit piffissamit nalunaaruteqarfiusumiit atuutilersumik. Aalisarnermut Piniarnermullu Naalakkersuisoqarfik tamatuminnga immikkut nalunaarfigineqassaaq.
Imm. 2. Nalunaaruteqartoqareerpat akuersissummik piginnittup imaluunniit akuersissutinik piginnittut akuersissut, imaluunniit akuersissutit kommunalbestyrelsimut tunniutissavaat.
Imm. 3. Aalisarnermut Piniarnermullu Naalakkersuisoqarfiup kommunalbestyrelsi piumaffigisinnaavaa imm. 1 naapertorlugu akuersissutit tunniunneqarsimasut atorunnaarseqqullugit, tassa kommunalbestyrelsi piffissaq eqqorlugu arfernik pisanik pissatanillu nalunaarutiginnittarneq pillugu Namminersornerullutik Oqartussat nalunaarutaanni maleruagassat malillugit arferit pisat pissatallu pillugit naalakkersuisoqarfimmut nalunaaruteqarsimanngippat.
Imm. 4. Aalisarnermut Piniarnermullu Naalakkersuisoqarfiup KNAPK-mut aamma KANUKOKA-mut siumut tusarniaareerluni radio tusagassiorfiillu allat aqqutigalugit nalunaaruteqarsinnaapput, akuersissutit atortussanngortinneqarsimasut kommunimut allamut nuunneqartut imaluunniit atorunnaarsinneqartut piffissaq nalunaaruteqarfiusoq aallarnerfigalugu. Akuersissutit taamaalippat utertinneqassapput, tak. imm. 2.

 

Pisassanik agguaasseqqinneq

§ 18. Aalisarnermut Piniarnermullu Naalakkersuisoqarfiup KNAPK aamma KANUKOKA tusarniaavigereerlugit tikaagulliusaat tikaagulliillu pisassat sinneruttut agguaateqqissavai. Kingusinnerpaamik taamatut agguaasseqqittoqassaaq qaammatisiutit ukiuini tamani septembarip ulluisa 15-ianni. Arfanniarneq inerteqqutaavoq agguaasseqqinnissaq ullormik ataatsimik sioqqullugu aatsaallu aallarteqqinneqarsinnaalluni kommunalbestyrelse najukkami aalisartut peqatigiiffiat tusarniaavigereerlugu nutaamik agguaasseqqereerpat tamanullu nalunaaruteqareerpaat.
Imm. 2. Agguaasseqqinneq tamatumanilu piumasaqaatit pillugit nalunaarut tamanut tusarliunneqassaaq sapinngisamik radio tusagassiorfiillu allat aqqutigalugit.
Imm. 3. Piffissami septembarip ulluisa aallaqqaataanniit agguaasseqqinnissap tungaanut arfanniartoqarnissaa eqqarsaatigalugu kommunalbestyrelsit ataasiakkaat pisassaminnik sinneruttunik akunnerminni agguaasseqqissinnaapput. Agguaasseqqinneq pissaaq kommunini pineqartuni najukkani aalisartut piniartullu peqatigiiffii tusarniaavigereerlugit.
Imm. 4. Ammassaliup aamma Ittoqqortoormiit kommunii aggustip ulluisa 15-iata kinguninnguatigut Tunumi tikaagullittassat agguaateqqereersinnaavaat.
Imm. 5. Imm. 3 aamma 4 naapertorlugu kommunini taaneqartuni agguaasseqqinneq pillugu aalajangiinerit allakkatigut kingusinnerpaamik agguaasseqqinnissaq sapaatip akunneranik ataatsimik sioqqullugu Aalisarnermut Piniarnermullu Naalakkersuisoqarfimmut nalunaarutigineqassapput. Taamatuttaaq pisassanik sinneruttumik agguaasseqqinnerup inernera nalunaarutigineqassaaq.
Imm. 6. Aalisarnermut Piniarnermullu Naalakkersuisoqarfiup KNAPK aamma KANUKOKA tusarniaaffigereerlugit radio tusagassiorfiilluunnit allat aqqutigalugit nalunaaruteqarsinnaavoq akuersissutitut tunniunneqarsimasut kommunimut allamut nuunneqartut imaluunniit ullormi nalunaarutip naalunaarutigineqarneraniit atorunnaartut. Tamatuma kingorna akuersissutit utertinneqassapput.

 

Pisanik tuniniaaneq

§ 19. Tikaagulliusaat tikaagulliilluunniit pisarineqartut tuniniarneqalissanngillat kommunip allaffia taassumaluunniit immikkoortortaqarfia akuersissummi naqitsimmik naqissusiilluni pisarineqartunik nalunaarsuereertinnagu.
Imm. 2. Qamutilimmik tuukkartalimmik piniarnissamut akuersissummik piginnittoq naqitsimmik naqissusiisoqartinnagu pisussaavoq tuukkarmik qaartartortalimmik pisiami allagartaa takutissallugu kiisalu qaartartut atoriikkani takutissallugit normuisa misissorneqarnissaat siunertaralugu.
Imm. 3. Pisamik imaluunniit ilaanik tuniniaallunilu pisisoqassanngilaq akuersissummik piginnittoq akuersissutip assilineranut uppernarsaatitut atsiortinnagu. Assilinerani takuneqarsinnaassaaq, pisaq kommunimi oqartussaasunit nalunaarsorneqarsimasoq.
Imm. 4. Taamaattorli allaffiup ammanerata avataatigut tuniniaasoqalersinnaavoq, allaffiup ammarnerata kingornatigut piaartumik nalunaarsuisoqassappat.

 

Misissugassat

§ 20. Kinaluunniit arfermik angisuumik pisaqarsimasoq pisussaavoq pisap mattaanik aamma neqaanik anginngitsunik misissugassanik kommunip allaffianut tunniussissalluni pilannerup kingornatigut piaartumik pisap suunera, ulloq sumilu pisarineqarsimanera nalunaarutigalugit. Misissugassat Pinngortitaleriffiup plastikkimik puussarititaanut tunniunneqarsimasumut asiunaveersaammik imerpalasortalimmut ikineqassapput.
Imm. 2. Misissugassat paasissutissallu tunniunneqartut kommunip allaffiata Pinngortitaleriffimmut, Box 570, 3900 Nuuk, tigunerisa kingornatigut erniinnaq ingerlateqqillugit nassiutissavai.

 

Immikkut akuersissuteqartarneq

§ 21. Aalisarnermut Piniarnermullu Naalakkersuisoqarfik ilisimatusarnermut atugassanik nalunaarummi matumani aalajangersakkanik immikkut saneqqutsisoqarnissaanut akuersissuteqarsinnaavoq.

 

Nunanut allanut tuniniaaneq pineqaatissiissutillu

§ 22. Arferit angisuut neqaat niuernikkut iluanaarniuteqarnermik siunertaqartumik nunanut allanut anniseqqusaanngilaq. Taamaattorli arferit angisuut § 21 naapertorlugu pisarineqartut ilamerngi nunanut allanut anninneqarsinnaapput.

§ 23. Pillaammik akiliisitsisoqarsinnaavoq § 2-mik, §§ 4-5-imik, §§ 7-10-mik, § 11-mi imm. 5-imik, § 12-imik, § 16-imi imm. 4-mik, § 17-imi imm. 2-mik, §§ 19-20-imik kiisalu § 22-mik unioqqutitsisumut.
Imm. 2. Akiliisitsinernik suliat piniarneq aallaaniarnerlu pillugit Inatsisartut inatsisaanni malittarisassat malillugit suliarineqartassapput.

 

Atuutilernera

§ 24. Nalunaarut ulloq 1. maj 2005 atuutilerpoq.
Imm. 2. Peqatigitillugu arfernik angisuunik piniarneq pillugu Namminersornerullutik Oqartussat nalunaarutaat nr. 12, 3. april 1998-imeersoq atorunnaarsinneqarpoq.
Imm. 3. Akuersissutit nalunaarutip atuutilernerani suli atuuttut nalunaarummi matumani aalajangersakkat naapertorlugit ingerlaannassapput.

Namminersornerullutik Oqartussat, ulloq 13. april 2005.

Rasmus Frederiksen

/

Amalie Jessen