Nunaqqatigiit Siunnersuisoqatigiivinut ilaasortassanik qinersisarneq pillugu Namminersornerullutik Oqartussat nalunaarutaat nr. 8, 21. marts 2005 -imeersoq
Kommunit aggornerisa avataanniittuni Nunaqqatigiit Siunnersuisoqatigiivi pillugit Inatsisartut inatsisaanni nr. 13-imi, 20. oktober 1988-imeersumi § 2, imm. 2 naapertorlugu aalajangersarneqarput:
Nunaqqatigiit Siunnersuisoqatigiivi, qinersisinnaatitaaneq qinigaasinnaanerlu
§ 1. Kommunit aggornerisa avataanni Pituffik immikkut nunaqqatigiinnut siunnersuisoqatigeeqarfiuvoq. Nunaqqatigiinnut siunnersuisoqatigeeqarfik qinersiviuvoq ataaseq.
§ 2. Nunaqqatigiinnut siunnersuisoqatigeeqarfimmi Nunaqqatigiit Siunnersuisoqatigiivinut ilaasortat pingasut imaluunniit tallimat qinerneqartassapput.
Imm. 2. Nunaqqatigiit Siunnersuisoqatigiivisa tunuartussat piffissami qinigaaffiup atuuffiani tullermi ilaasortat amerlassusissaat aalajangertassavaat.
Imm. 3. Nunaqqatigiit Siunnersuisoqatigiivini ilaasortat ukiuni sisamani atasussanngorlugit qinerneqartassapput, ilaasortallu tamarmik ataatsikkut tunuartassapput. Piffissaq qinigaaffiup atuuffia 1. junimit naatsorsuunneqartassaaq. Naalakkersuisut ulloq qinersiffissaq aalajangiiffigisassavaat.§ 3. Nunaqqatigiit Siunnersuisoqatigiivinut qinersisinnaatitaapput:
1) Kikkulluunniit qallunaatut innuttaassuseqartut, Folketingimut qinersisinnaanermut ukiussarititaasunik naammasinnissimasut qinersinissarlu sioqqullugu sivikinnerpaamik qaammatini arfinilinni qinersivimmi aalajangersimasumik najugaqarsimasut.
2) Kikkulluunniit finskisut, islandimiutut, norskisut svenskisulluunniit innuttaassusillit, Folketingimut qinersisinnaanermut piumasaqaatinik naammassinnissimasut qinersinissarlu sioqqullugu sivikinnerpaamik ukiuni pingasuni aalajangersimasumik naalagaaffimmi qaammatinilu arfinilinni qinersivimmi najugaqarsimasut.
Imm. 2. Inuit Kalaallit Nunaanni eqqartuunneqarnermikkut nammineersinnaajunnaarsitaasimasut qinersisinnaatitaanngillat.
Imm. 3. Kinaluunniit qinersisartut allassimaffiannut ilanngunneqarsimatinnani qinersisinnaatitaanngilaq.§ 4. Nunaqqatigiit Siunnersuisoqatigiivinut qinigaasinnaatitaapput kikkulluunniit § 3 naapertorlugu tassunga qinersisinnaatitaasut, pineqartoq ukiut kingulliit tallimat ingerlaneranni inaarutaasumik eqqartuussissutikkut akiliisitaanermilluunniit akuersinikkut pinerluuteqarsimasutut pineqaatissinneqarsimanngippat imaluunniit ukiut kingulliit pingasut ingerlaneranni pinerluuteqarsimanermut pineqaatissinneqarsimanngikkuni nalinginnaasumik isigineqarnermini Nunaqqatigiit Siunnersuisoqatigiivini ilaasortaanissaminut naleqqukkunnaassutigisaminik. Piffissaliussat ullormit qinersivimmit naatsorsuunneqassapput.
Imm. 2. Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaanni nr. 10-mi ulloq 31. oktober 1996-imeersumi §§ 50-imit 53-imut qinigaasinnaanerup annaanneqartarnera pillugu aalajangersakkat aammattaaq Nunaqqatigiit Siunnersuisoqatigiivinut ilaasortanut atuupput.
Qinersinermik siulersuisut aamma qinersisussat allassimaffii
§ 5. Qinersineq qinersinermik siulersuisunit piareersarneqarlunilu siulersorneqassaaq. Qinersinermik siulersuisuni ilaasortaapput Nunaqqatigiit Siunnersuisoqatigiivini siulittaasoq aamma Nunaqqatigiit Siunnersuisoqatigiivinut ilaasortat marluk, taakku akornannit toqqarneqartut. Nunaqqatigiit Siunnersuisoqatigiivini siulittaasoq qinersinermik siulersuisunut siulittaasuuvoq. Qinersinermik siulersuisut taasinermik aqutsisussamik toqqaassapput.
§ 6. Ulloq qinersiffissaq kingusinnerpaamik ullunik 22-inik sioqqullugu qinersinermik siulersuisut inuit qinersivimmi najugallit ullormi qinersiffissami qinersisinnaatitaasut allassimaffiat suliarisassavaat.
Imm. 2. Qinersinermik Siulersuisut qinersisinnaatitaasut allassimaffiannik suliarinnittarsimasumut suliarinnitsitsisinnaapput.§ 7. Qinersisussat allassimaffianni qinersisussat aqqi aamma ulloq ukiorlu inuuiat allassimassapput. Aammattaaq qinersisussat allassimaffianni Nunaqqatigiit Siunnersuisoqatigiivinut qinersinermi krydsiliiffissaqassaaq.
§ 8. Qinersisussat allassimaffii suliarineqareerniariaraangamik ulluni marlunni qinersivimmi kikkunnilluunniit orninneqarsinnaasumi saqqumitinneqartassapput.
Imm. 2. Inuk qinersisussat allassimaffiannut ilanngunneqarsimasoq qinersisussat allassimaffiata suliarineqarnerata kingorna toqukkut qimaguppat qinersiviulluunniit avataani aalajangersimasumik najugaqalerpat qinersisussat allassimaffiannit peerneqartassaaq.§ 9. Qinersinermik siulersuisut qinersisussat allassimaffiata qaqugu sumilu saqqumitinneqarnissaa nalunaarutigisassavaat.
Imm. 2. Kinaluunniit isumaqaruni nammineq allassimaffimmi pissutissaqanngitsumik ilanngunneqarsimanani imaluunniit inuk alla pissutissaqanngitsumik ilanngunneqarsimanngitsoq qinersisussat allassimaffiata saqqumitinneqarnerata naammassinerata kingorna kingusinnerpaamik ullut marluk qaangiunnerisigut qinersinermik siulersuisunut allakkatigut naammagittaalliuuteqarsinnaavoq, tassanilu naammagittaalliornerminut pissutigisani naatsumik taassallugit.
Imm. 3. Qinersisussat allassimaffiat pillugu naammagittaalliuutit qinersinermik siulersuisunit ataatsimiinnermi qinersinermik siulersuisunit ataatsimiinnermi ullut tulliuttut arfinillit ingerlaneranni ingerlanneqartumi aalajangiiffigineqartassapput. Qinersisussat allassimaffii tamatuma kingorna iluarsineqarsimasut qinersinermik siulersuisut siulittaasuannit atsiorneqartassapput.
Imm. 4. Kinaluunniit ataatsimiinnermi imm. 3-mi taaneqartumi qinersisussat allassimaffiannit peerneqartoq imaluunniit nammineq ilanngunneqarsimannginnini inuulluunniit allap ilanngunneqarsimannginnera pillugu naammagittaallioraluarluni itigartitaasoq tamanna pillugu qinersinermik siulersuisunit allakkatigut nalunaarfigineqassaaq.
Imm. 5. Inuup qinersisinnaatitaannginnerminik naammaginninngitsup qinersisussat allassimaffiata imm. 3 malillugu iluarsineqarnerata kingorna ullut arfinillit qaangiutsinnagit apeqqut Naalakkersuisunut suliassanngortissinnaavaa, taakkulu aalajangiinerat inaarutaasumik aalajangiinerussaaq. Naalakkersuisut naammagittaalliortoq qinersinermillu siulersuisut pineqartut aalajangiinerminnik nalunaarfigissavaat, tamatumalu kingorna qinersisussat allassimaffianni iluarsisassaalersussat qinersinermik siulersuisunit iluarsineqassapput.
Imm. 6. Qinersisussat allassimaffiat imm. 3 aamma imm. 5 naapertorlugit qinersinermik siulersuisunit iluarsineqareerluni allatigut allanngortinneqarsinnaanngilaq.
Qinigassanngortitanik nalunaarutit
§ 10. Qinigassanngortitanik nalunaarutit ulloq qinersiffissaq sioqqullugu kingusinnerpaamik ullut qulinganni nal. 18.00 qinersinermik siulersuisut siulittaasuannut tunniunneqarsimassapput.
Imm. 2. Qinigassanngortitamik nalunaarut qinersivimmi qinersisartunit qinigassanngortitsisunit ikinnerpaamik tallimanit amerlanerpaamillu qulinit atsiorneqarsimassaaq.
Imm. 3. Qinigassanngortitap nalunaarutiginerani kukkusoqarsimappat qinersinermik siulersuisut taassuma qinigassanngortitsisui kukkunerup aaqqinneqarnissaanut ullunik marlunnik piffissalissavaat.
Imm. 4. Tamatuma kingorna qinersinermik siulersuisut kingusinnerpaamik qinersinissaq ullunik arfinilinnik sioqqullugu, nalunaarutit tunniunneqarsimasut atorsinnaasutut akuersissutigineqassanersut aalajangissavaat.
Taasinerit
§ 11. Naalakkersuisut pappiarat taasivissat pisariaqartut kalaallisut qallunaatullu "Nunaqqatigiit Siunnersuisoqatigiivinut qinersineq"-mik allassimasussat pissarsiarinissaat, ilusilernissaat agguaannissaallu pillugit erseqqinnerusumik aalajangersaasassapput.
§ 12. Qinersisartut taasinissamut piffissallliussat iluanni taasiartorfimmukarsinnaanngitsut imaluunniit pisarissersungaatsiaqqaarlutik taasiartorfimmukarsinnaasut allakkatigut taasisinnaapput. Siusinnerpaamik ulloq qinersiffissaq sapaatip akunnerinik arfinilinnik sioqqullugu allakkatigut taasisoqarsinnaavoq.
Imm. 2. Qinersivimmi qinersisussat allassimaffiannut ilanngunneqarfigisimasami qinersinermik siulersuisunut aamma taaguinermik aqutsisumut allakkatigut taasisoqarsinnaavoq. Allakkat puui pappiaranik allakkatigut taasivinnik imallit taaguinermik aqutsisumit taaguineq aallartitsinnagu tiguneqareersimassapput.
Imm. 3. Pappiarat taamatut taasinermi pisariaqartut Naalakkersuisunit pissarsiarineqassapput.
Imm. 4. Kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaammi nr. 10-mi, ulloq 31. oktober 1996-imeersumi §§-it 32-mit 35-imut allatigut atorneqassapput Naalakkersuisunit pisariaqartitsineq naapertorlugu aallannguuteqartinneqartumik.
Ataatsimut aalajangersakkat
§ 13. Nunaqqatigiinnut Siunnersuisoqatigeeqarfimmi qinersinerit ingerlanneqarnera, qinersinerit inernerisa naatsorsorneqarneri nalunaarutigineqarnerilu eqqarsaatigalugit kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit Inatsisartut inatsisaanni nr. 10, 31. oktober 1996-imeersumi kapitali 1-imi malittarisassat atuutissapput Naalakkersuisunit pisariaqartitsineq naapertorlugu allannguuteqartinneqartumik.
§ 14. Qinersinermik siulersuisut aalajangiineri Naalakkersuisunut suliassanngortinneqarsinnaapput.
§ 15. Naqitertitanut, nalunaarutinut pappiaranullu taasivinnut aningaasartuutit Nunatta karsianit akilerneqartassapput. Nunaqqatigiit Siunnersuisoqatigiivinut qinersinerup ingerlanneqarneranut aningaasartuutit allat Nunaqqatigiit Siunnersusiqatigiivinit akilerneqartassapput.
§ 16. Nalunaarut 1. april 2005 aallarnerfigalugu atuutilerpoq. Tamatumunnga peqatigitillugu atorunnaarsinneqarpoq Nunaqqatigiit Siunnersuisoqatigiivinut ilaasortassanik qinersisarneq pillugu Namminersornerullutik Oqartussat nalunaarutaat nr. 6, 16. februar 2000-imeersoq.
Namminersornerullutik Oqartussat, ulloq 21. marts 2005.
Hans Enoksen/
Kaj Kleist