POST Greenlandip ingerlatsinera, allakkanik ingerlatitseqqittarnera, allakkanik ammaasarnera aamma allakkanut nakkartitsisarfinnik pilersuinera pillugu Namminersornerullutik Oqartussat nalunaarutaat nr. 6, 14. marts 2005-imeersoq
Allakkerineq pillugu Inatsisartut peqqussutaanni nr. 8-mi, 14. november 2004-imeersumi § 4, imm. 2, § 11, imm. 2, § 16, imm. 3, § 22 aamma § 42 naapertorlugit aalajangersarneqarput:
Kalaallit Nunaanni Allakkeriveqarfiit ingerlanneqarnerat
§ 1. Illoqarfinni ilanngussaq 1-imi allassimasuni allakkanik nalinginnaasunik aalajangersimasumik akuttussusilimmik agguaassisarneq pisassaaq, ikinnerpaamik sapaatit akunnerannut marloriarluni. POST Greenlandip aalajangersassavaa, sapaatit akunneranni ulluni sorlerni allakkanik nalinginnaasunik agguaassisoqartassanersoq.
Imm. 2. Nunaqarfinni allakkanik nalinginnaasunik agguaassisoqarneq ajorpoq.
Imm. 3. Illoqarfinni nunaqarfinnilu allakkanik nalinginnaasunik agguaassiviusanngitsuni, allakkat nalinginnaasut POST Greenlandip suleqatigisartagaanut aaneqarsinnaassapput.
Allakkanik ingerlatitseqqittarneq
§ 2. Nassiussat qaatiguuliukkat Danmarkimeersut, Savalimmiuneersut nunanillu allaneersut, nassiussisup Kalaallit Nunaanni najugaqartup, imaluunniit Kalaallit Nunaanni najugaqartoq sinnerlugu inuup allap Danmarkimiit, Savalimmiuniit imaluunniit nunanit allaniit Kalaallit Nunaanni tigusisussamut ingerlateqqinneqarnissaa siunertaralugu nassiussassatut tunniussai Allakkerineq pillugu Nunarsuaq tamakkerlugu Isumaqatigiissummi tamanna pillugu malittarisassat naapertorlugit POST Greenlandimit itigartinneqarsinnaapput, tamatumani:
1) nassitsisup allakkeriviulluunniit allakkanik Kalaallit Nunaannut ingerlateqqitassanik isumaginnittuusup uppernarsarsinnaanngippagu, nassiussat ilumut Kalaallit Nunaanniit nassiussisumit Kalaallit Nunaanni tigusisussamut nassiussaanngitsut, imaluunniit,
2) nassitsisup allakkeriviulluunniit pineqartup nassiussassanut pineqartunut nunap iluani akit atuuttut malillugit akiliinissaq akuerippagu, imaluunniit nassiussat taamaattut pillugit allakkerivimmut pineqartumut isumaqatigiissutaasimasinnaasut malillugit akiliinissaq akuerippagu.
Imm. 2. Nassitsisup allakkeriviulluunniit allakkanik Kalaallit Nunaanni ingerlateqqitassanik isumaginnittuusup imm. 1, nr. 2-mi allassimasut malillugit nassiussat akilerumanngippagit, nassiussaq allakkerivimmut isumaginnittuusumut utertinneqassanersoq imaluunniit suujunnaarsinneqassanersoq POST Greenlandip aalajangissavaa.
Allakkanik ammaasarneq
§ 3. Nassiussat matoqqasut POST Greenlandimit isumagineqartut apuunneqarsinnaanngitsut, allatut iliornikkut nassiussisumut tigusisussamulluunniit ingerlateqqinneqarsinnaanngitsut, inunnit taamaaliornissamut POST Greenlandip qullersaqarfianit immikkut toqqakkanit ammarneqarsinnaapput misissorneqarsinnaallutillu.
Imm. 2. Pisariaqarpat nassiussap qanoq annertutigisumik ajoqusersimanera aalajangiiffiginiarlugu imaluunniit ajoqusernerup killilersimaarneqarnissaa anguniarlugu POST Greenlandip nassiussat ammarsinnaavai.
Imm. 3. Inuit imm. 1-imi taaneqartut uppernarsaammik atsiugaqassapput, tassanilu nassiussami ammarneqartumi nassiussisup imaluunniit tigusisussap aqqata najugaatalu saniatigut imaanik allanik piaaralutik atuagaqarsimannginnertik, kiisalu taamatut iliornerminni ilisimalikkatik susassaqanngitsunut allanut ilisimatitsissutigissanagit uppernarsassavaat.
Allakkanik nakkartitsisarfiit, allakkanik nakkartitsisarfeqarfiit aamma matunut allakkanik nakkartitsivissatut ivertitat nassuiarneqarneri
§ 4. Allakkanik nakkartitsisarfittut isigineqarput, allakkanik nakkartitsisarfiit sukanut, iikkanut, sallilikkanit ungalulianut assigisaannulluunniit naatitassanngorlugit ikkutaasut.
Imm. 2. Allakkanik nakkartitsisarfittut isigineqarput, inissiani quleriinni allakkanik nakkartitsisarfeqarfiit, allakkanik tunniussivissanut tamanut immikkut nakkartitsisarfillit.
Imm. 3. Allakkanik nakkartitsisarfittut isigineqarput, allakkanik nakkartitsisarfiit kipparissut, tunniussivissat matuinut allakkanik nakkartitsivissatut ivertitat, aammalu allakkanik nakkartitsisarfinnut ataasiakkaanut allakkanik nakkartitsivissatut ivertitat.
Allakkanik nakkartitsisarfinnut aamma matunut allakkanik nakkartitsivissatut ivertitanut piumasaqaatit
§ 5. Allakkanik nakkartitsisarfiit paarnaarneqarsinnaassapput.
Imm. 2. Allakkanik nakkartitsisarfiit imaluunniit matuni allakkanik nakkartitsivissatut ivertitat ataasiakkaat atit allagartaanik ikkussuivigineqassapput.
Imm. 3. POST Greenland allakkanik nakkartitsisarfiit inissiffissaasa, ikkunnissaasa atillu allagartaannik pilersornissaasa aaqqissuunnissaannut malitassanik sukumiinerusunik aalajangersaassaaq.
Allakkanik nakkartitsisarfiit, allakkanik nakkartitsisarfeqarfiit aamma matunut allakkanik nakkartitsivissatut ivertitat ikkussuunnissaannut maleruagassat
§ 6. Allakkanik nakkartitsisarfiit inoqutigiit ataasiakkaat najugaannut isaariat eqqaannut inissinneqassapput.
Imm. 2. Illumi pineqartumi namminerisamik najugaqarfiit arlaliuppata, namminerisamik najugaqarfiit tamarmik immikkut allakkanik nakkartitsisarfinnik pilersorneqassapput.
Imm. 3. Ilaqutariinnut ataatsinut illu imaluunniit inissiaq najugaqarfissiaq ataaseq inoqutigiinnit arlalinnit najorneqarpat, inoqutigiillu taakku ataatsimut isaariaqarpata, allakkanik nakkartitsisarfik ataaseq inoqutigiinnit marluusunit amerlanerusunilluunniit ataatsimut atorneqarsinnaavoq, tamatumani najugaqaqatigiit tamanna isumaqatigiissutigisimappassuk. Allakkanik nakkartitsisarfik inoqutigiit tamarmik immikkut atiisa allagartaannik ivertitsivigineqarsimassaaq.
Imm. 4. Allakkanik nakkartitsisarfiit marluk amerlanerusulluunniit sanileriissillugit ikkunneqarsimassapput.§ 7. Illuni pingasut sinnerlugit tunniussivissaqartuni, 1. april 2005-ip kingorna sanaartornissamut akuersissut malillugu sananeqartuni allakkanik nakkartitsisarfeqarfinnik ikkussisoqassaaq.
Imm. 2. Allakkanik nakkartitsisarfeqarfiit sapinngisamik inini allerni illumut isaarissamut pingaarnermut qanittumut, agguaasussap ajornaatsumik akornusersorneqaranilu iserfigisinnaasaanut, aammalu akornuteqarani allakkanik nakkartitsisarfeqarfimmut issoraaffigisinnaasaanut inissinneqassapput.
Imm. 3. Allakkanik nakkartitsisarfeqarfinni allakkanik nakkartitsisarfiit ataasiakkaat inissiat ataasiakkaat quleriiaarneri tulleriiaarnerilu malillugit inissititerneqassapput. Inini allerni inissiamut saamerlermut allakkanik nakkartitsisarfik, allakkanik nakkartitsisarfeqarfimmi allermut saamerlermut inissinneqassaaq. Inini qullerni inissiamut talerperlermut allakkanik nakkartitsisarfik, allakkanik nakkartitsisarfeqarfimmi qullermut talerperlermut inissinneqassaaq.
Imm. 4. Illumi piginnittup illumut isaariaq pingaarneq allakkanik nakkartitsisarfeqarfimmut isaariaasoq paarnaaqqasartunngorlugu iluarsisimappagu, allakkanik nakkartitsisarfeqarfik agguaassisussap matu ammaqqaanngikkaluarlugu silamiit allakkanik issoraavigisinnaasaanut ikkunneqassaaq.
Imm. 5. Allakkanik nakkartitsisarfeqarfinnik ikkussuinissamut akisussaaffik illumik piginnittup isumagisassaraa.§ 8. POST Greenland allakkanik nakkartitsisarfiit inissiffissaannut ikkunnissaannullu malitassanik sukumiinerusunik aalajangersaassaaq.
§ 9. Matu isaariaq innermut pitarnaveeqqutaappat, allakkanik nakkartitsisarfimmik ikkussinissaq inerteqqutaavoq.
Imm. 2. Matunut allakkanik nakkartitsivissanik ikkussuinissamut akisussaaffik illumik piginnittup isumagisassaraa.§ 10. Illuni pingasut sinnerlugit tunniussivissaqartuni, 1. april 2005-ip kingorna sanaartornissamut akuersissut malillugu sananeqartuni tunniussivissat tamarmik 31. december 2005 nallertinnagu allakkanik nakkartitsisarfinnik matukkulluunniit allakkanik nakkartitsisarfinnik pilersorneqassapput, imaluunniit § 6 malillugu allakkanik nakkartitsisarfeqarfilersorneqassallutik.
Imm. 2. 31. december 2005 nallertinnagu ilaqutariinnut ataatsinut illuni, illuni affarleriinni, illuni sanileriiaani/uiguleriiaani il.il. allakkanik nakkartitsisarfinnik matukkulluunniit allakkanik nakkartitsisarfinnik pilersuisoqassaaq.§ 11. § 7-imi, imm. 1-imi aamma § 10-imi aalajangersakkat taamaallaat illoqarfinnut, allakkanik nalinginnaasunik agguaassiffiusartunut atuutsinneqarput, tak. ilanngussaq 1.
Allakkanik tunniussisarnermut maleruagassat
§ 12. POST Greenlandip inoqutigiit, allakkanik nakkartitsisarfeqarfinnik/allakkanik nakkartitsisarfinnik/matukkut allakkanik nakkartitsisarfinnik ikkussuinissamut piumasaqaatinik naammassinnissimanngitsut allakkanik agguaassisarnermi minissinnaavai.
§ 13. Inuit angallarluttut allallu innarluutillit, namminneerlutik allakkanik nakkartitsisarfimminnik imaarsiartorsinnaanngitsut allakkat inigisaminnut toqqaannartumik tunniunneqartarnissaannik immikkut akuersissuteqarfigineqarsinnaapput.
Imm. 2. Immikkut akuerineqarnissamut qinnuteqaat najukkami allakkeriviup pisortaanut tunniunneqassaaq.
Maalaaruteqarsinnaaneq
§ 14. Nalunaarummi matumani aalajangersakkat malinneqarnissaat Ineqarnermut Attaveqarnermullu Pisortaqarfimmit nakkutigineqarpoq.
Imm. 2. Nalunaarut manna naapertorlugu POST Greenlandip aalajangiineri Ineqarnermut Attaveqarnermullu Pisortaqarfimmut maalaarutigineqarsinnaapput. Maalaarutinik tunniussinissamut piffissarititaasoq, aalajangiinerup maalaarutigineqartup tiguneraniit sapaatit akunnerinik sisamanik sivisussuseqartinneqarpoq.
Pineqaatissiinerit
§ 15. § 3, imm. 3-mik unioqqutitsinerit Kalaallit Nunaanni pinerluttulerinermut inatsit naapertorlugu pillaatitut akiliisitsiviusinnaapput.
Atuutilernera
§ 16. Nalunaarut 1. april 2005-imi atuutilerpoq.
Namminersornerullutik Oqartussat, 14. marts 2005
Jens Napãtôk
/
Dorthe Johannsen