Inatsisartut inatsisissaattut siunnersuummut oqaaseqaatit
Oqaaseqaatit nalinginnaasut
Siunnersuutip tunuliaqutaa:
Ataatsimiinnermi matumani ilinniagaqarnersiat pillugit Inatsisartut inatsisissaattut siunnersuut Naalakkersuisut saqqummiutissavaat. Siunnersuummi § 30-mi allassimavoq ilinniagaqarnersiaqalersitaaneq pillugu aalajangiinerit Naalakkersuisunut suliassanngortinneqarsinnaasut Ilinniagaqarnersiat pillugit Maalaaruteqarfimmut maannamut atorunnaartussatut siunnersuutigineqartumut taarsiullugu.
Ilinniagaqarnersianit akiitsut taarsersornissaannut tapiissutit pillugit Inatsisartut inatsisaat malillugu aalajangiinerit pillugit naammagittaalliutit, takuuk § 11, Maalaaruteqartarfimmut suliassanngortinneqarsinnaapput. Inatsisartut inatsisaat taanna malillugu naammagittaalliutit kisiisa pillugit Maalaaruteqartarfiup attatiinnarnissaa pissusissamisoornavianngilaq, taamaattumillu inatsit malillugu naammagittaalliutit aamma Naalakkersuisunut suliassanngortissinnaanissaat siunnersuutigineqarpoq.
Allannguut ilinniagaqarnersianut tunngatillugu Ilinniagaqarnersiat pillugit Nassuiaammi maj 2002-imeersumi tapersersorneqarpoq. Tamatumunnga pissutaavoq naammagittaalliutit maalaaruteqartarfimmut suliassiissutigineqartartut ilinniagaqarnersianut maleruagassat inatsisilerinikkut nassuiarnissaat pineqarajuttarmat, tassanilu inatsisilerinermik ilinniagaqarsimanngitsut imaaliallaannaq atorfissaqartinneqartaratik. Aamma oqaatigineqassaaq naammagittaalliutit ingerlatsiviginerat eqaallisarneqassammat sullissisartumit inatsisilerituumit kisimi nalileqqinneqartalerpata sullissinerlu sivikinnerulissalluni.
Tunngavilersuutit taakkorpiaat ilinniagaqarnersianit akiitsut taarsersornissaannut tapiissutit pillugit aalajangiinernut naammagittaalliutinut aamma tunngavilersuutigineqarput.
Aningaasatigut allaffissornikkullu kingunissat:Naammagittaalliuuteqartarfiup atorunnaarsinneratigut annikitsumik sipaaruteqartoqassaaq. Tassani ukiumut ataasiarluni Sisimiuniit Nuummut uterlugulu angalaneq inummut ataatsimut najugaqartinneqarnerlu pineqarpoq kiisalu inunnut sisamanut ataatsimiinnersiutit ukiumut ulloq ataaseq. 2002 2003-imilu Naammagittaalliuuteqarfimmut aningaasartuutit 110.000,- kr.-iupput. Naammagittaalliuuteqartarfiup atorunnaarsinnera aningaasartuutit amerlaqataanik sipaarutaassanngilaq, naammagittaalliuutit suliarineranut suli aningaasartuuteqassammat.
Siunnersuutip akuerineqarnera allaffissornikkut sunniuteqassanngilaq.
Tusarniaaneq:Siunnersuut tusarniaassutissatut nassiunneqarsimanngilaq, tassa Naalakkersuisut ilinniagaqarnersiutit pillugit inatsisissatut siunnersuummi maalaaruteqarfissatut siunnersuutigineqarsimammata Naammagittaalliuuteqarfillu atorunnaartussatut siunnersuutigineqarsimalluni, siunnersuullu taanna tusarniaassutigineqareerluni.
Inatsisissatut siunnersuummi aalajangersakkanut ataasiakkaanut oqaseqaatit
§ 1-imut
§ 11, imm. 1-imut
§11, immik. 1 inatsisitigut tunngavissiivoq ilinniagaqarnersianit akiitsut taarsersornissaannut tapiissutit pillugit aalajangiinerit pillugit allakkatigut naammagittaalliutit Naalakkersuisunut suliassanngortinnissaannut.
Manna tikillugu aalajangiussat Ilinniagaqarnersiat pillugit Maalaaruteqarfimmut saqqummiunneqarsinnaasarsimapput taannalu atorunnaarsinneqassasoq siunnersuutigineqarpoq.
Naammagittaalliornissamut killiliussaq aamma allanngorneqarpoq, tassa siunissami aalajangiinerup kingorna sapaatit akunnerinut 6-nut sivitsorneqarmat maannamut aalajangiinerup kingorna tigoreerneraniit sapaatit akunneri sisamaasimagaluartut.
Malugeqquneqarpoq maalaarnissamut killiliussaq annertusineqarsimammat siusinnerusukkut sapaatit akunneri sisamaasimagaluarlutik maanna sapaatit akunneri arfinilinngorsimammata killiliussarlu maanna ulloq aalajangiiffiusumiit naatsorsorneqartalermat siusinnerusukkut aalajangiussap nassiussarsiaralugu tiguneraniusimagaluartoq. Taamatut allannguisoqarneranut pissutaavoq siusinnerusukkut aalajangiussaq nassiunneqarsimatillugu, allakkatigut tammatsaalisanngorlugu nassiunneqarsimanngikkaangat, tigusisup qangarpiaq tigusimaneraa uppernarsassallugu ajornartorsiutigineqartarsimammat. Taamaattoq taamatut periuseqarneq allaffissorneq eqqarsaatigalugu pisarissersuutaaqisutut isigineqarpoq frimærkitigullu akiligassat annertusisussaasammata tamanna annertoorsuarmik aningaasartuutaalertussaavoq.
Maalaarut killiliussaq kingoqqullugu tunniunneqarpat tigujumaneqanngissinnaavoq.
§ 11, imm 2-mutImmikkut akuerineqarsinnaanermut aalajangiussaq eqqunneqarsimavoq ilinniartup inatsisitigut pisinnaatitaaffii innarlerneqaqqunagit. Ilinniartoqariataarsinnaagami maalaarfissap killiliunneqarfia qaangiutsinnagu aalajangiussamik tigusinngitsoorsimasumik.
Immikkut akuersissutit tunniunneqarsinnaapput, ilinniartup uppernarsarsinnaaguniuk qularnaallisarluguluunniit maalaarfissap killiliunneqarsimanera assersuutigalugu angalanini pissutigalugu killililuffissaq eqqorlugu maalaarsinnaasimanngikkuni.
§11, imm 3-mutNutaartarissavaa Naalakkersuisut maalaarsinnaanerup ingerlaaseqarnissaa pillugu ersarinnerusumik malittarisassiorsinnaanissaat periarfissaliunneqarsimammat tassanilu maalaarutit pillugit ingerlaasissaq qanoq ittuussanersoq.
§ 2-mut
Imm 1-imut
Inatsisartut inatsisaat atuutilissaaq ilinniagaqarnersiat pillugit Inatsisartut peqqussutaani aalajangersakkap atuutilernissaanut peqatigitillugu. Siunnersuutigineqarpoq inatsisartut peqqussutaat atuutilissasoq 1. januar 2005.
Imm. 2-mutTassunga atatillugu ersarissarneqassaaq Ilinniagaqarnersiutit pillugit Naammagittaalliuuteqartarfiup maalaarutit 1. januar 2005 tikitsinnagu tiguneqarsimasut suliaralugit naammassereersimassagai.