8. oktober 2004 UKA 2004 / 37
Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisaata allanngortinneranik Inatsisartut inatsisaannut nr. xx.-imut yy. 2004-meersumut siunnersuut.
(Unnuisarfiliornissamut taarsigassarsisitsiniartarfittut aningaasaateqarfiup ("Unnuisa-fonden") atorunnaarsinneqarnera).
(Inuussutissarsiornermut, Nunalerinermut Suliffeqarnermullu Naalakkersuisoq)
Saqqummiussissut
Aappassaaneerineq
Naalakkersuisut Inuussutissarsiutinut Ataatsimiititaliaq "Unnuisa-fonden"ip atorunnaarsinneqarnissaa pillugu inatsisissatut siunnersuummik peqqissaartumik suliaqarsimaneranut qutsavigaat naammagisimaarlugulu maluginiarlugu Inuussutissarsiutinut Ataatsimiititalip isumaliutissiissummini tamarmiulluni siunnersuut aammalu tamatumunnga malitsigitillugu aalajangernerit siunissami ullutsinnut naleqqussakkamik inuussutissarsiutinik siuarsaanerup ilusilersugaanissaanut pissutissaqalersitsisut isumaqatigisinnaammagit. Naalakkersuisut naammagisimaarlugu paasivaat Inuussutissarsiutinut Ataatsimiititaliap inuussutissarsiutinik ineriartortitsinissamut atugassarititat pitsanngorsarneqarnissaannik suliaq tapersersormagu.
Inuussutissarsiutinut Ataatsimiititaliaq isumaliutissiissummini allappoq ataatsimiititaliap paasigaa ingerlatseqatigiiffimmik aningaasaliissutinik isumaqatiginninniartarfimmik siunertarineqartoq tassaasoq ukiuni siullerni ernialersugaanngitsunik niuernikkut piumasaqaatit naapertorlugit aningaasaliisarnissaq. Tamanna ilumoorpoq, ilassutitullu nalunaarutigisinnaavara tamatuma saniatigut aammattaaq siunissami takornariartitsisarnermik inuussutissarsiuteqartunut TAT-mik aaqqissuussinermik taaneqartartup ataani tapiissutit qularnaveeqqusiinerillu pissarsiarineqarsinnaasut, tassunga aammattaaq unnuisarfiit ilanngullugit.
Naalakkersuisut sinnerlugit periarfissamut tamatumunnga qujassutigaara ilaatigut Inuussutissarsiutinut Ataatsimiititaliaq ilaatigullu Aningaasaqarnermut Ataatsimiititaliaq isumasioqatigalugit inuussutissarsiutit ilusilersugaanerisa ullutsinnut naleqqussarnissaanut pilersaarutit erseqqissarsinnaagakkit. Nutaamik aaqqissuussinerup ataatsimut isigalugu aammattaaq unnuisarfiit aningaasalersornissaannut tunngasut allanngortinneqarnerat kingunerissavaa. Tamatumani takornariartitsisarnermik inuussutissarsiuteqartut aammalu nunami inuussutissarsiutinik taaneqartartut akornanni tapiiffigineqarnissamut periarfissatigut annertuumik
naligiissitsineqarpoq. Tamanna inuussutissarsiutit ilusilersugaaneranni tapiissutitigut aaqqissuussinerni assigiinngitsunik pissuteqartumik equngasoorutinik annikillisaaqataassaaq aammalu inuussutissarsiuteqartunut tapiiffigeqatigiittarnerup annikinnerulerneranik nassataqassalluni, suliassatut pilersaarutini ataasiakkaani politikkikkut akuliunnertaqanngitsumik.
Naalakkersuisut periarfissaq tamanna Inuussutissarsiutinut Ataatsimiititaliamut – aammalumi Inatsisartunut – uppernarsaanermut atorsinnaavaat, tassalu inuussutissarsiutinik siuarsaanermi ilusissamik nutaamik peqqissaartumik suliaqarnissaq suli pineqartoq. Naalakkersuisut aaqqissuussinerup nutaap ukiualunnguit ingerlaneranni nunatsinni maani inuussutissarsiutit ineriartortinneqarnerannut pitsaasunik kinguneqarumaarnissaa qularinngilaat.
Taamatut oqaaseqarnikkut siunnersuut Inatsisartunut akuersaartumik oqaluuserisassanngorlugu ingerlatinneqarpoq.