20. september 2004 UKA 2004 / 37
Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisaata allanngortinneranik Inatsisartut inatsisaannut nr. xx. yy 2004-meersumut siunnersuut.
(Unnuisarfiliornissamut taarsigassarsisitsiniartarfittut aningaasaateqarfiup ("Unnuisa-fonden") atorunnaarsinneqarnera).
(Inuussutissarsiutinut, Nunalerinermut Suliffeqarnermullu Naalakkersuisoq)
Saqqummiussissut
Siullermeerineq
Inuussutissarsiutinik siuarsaanermi aaqqissuussinerup nutarterneqarnissaa pillugu aalajangernermut atatillugu "Unnuisa-fonden"-ip, 1997-imiilli pingaartumik takornarianut unnuisarfiliornissanut tapiissuteqartarsimasup, atorunnaarsinneqarnissaa Naalakkersuisut naleqquttuusoraat. Aningaasaateqarfiup sulinera ukiuni marlussunni kingullerni uninngatinneqarsimavoq. Ukiut ingerlaneranni katillugit 30 mio. kr.-it missaannik tapersiissuteqartoqartarsimavoq.
Inuussutissarsiutinik siuarsaanermi aaqqissuussineq nutaaq 2004/05-imi ukiut nikinneranni atuutilersussaq ilaatigut SULISA A/S-ip ingerlatseqatigiiffittut aningaasaliissutinik isumaqatiginninniartarfittut kiisalu Greenland Tourism A/S-ip inuussutissarsiutit siuarsarneqarnissaannut ingerlatseqatigiiffittut, takornariartitsinermut tunngasumik suliaminik ingerlatitsiinnartussap tamatumali peqatigisaanik aammattaaq nunami inuussutissarsiutini suliffinnik aallarnisaaniartunut suliffeqarfinnullu siunnersuisarnermik isumaginnittussap allanngortinneqarnissaannik imaqarpoq.
Inuussutissarsiutinik siuarsaanermi aaqqissuussinerup allanngortinneqarnissaani tunngavittut isuma tassaavoq aningaasat taakkua atorlugit inuussutissarsiutit ineriartortinneqarnerunissaat. Allanngortiterinermi Nunatta Karsianit ingerlatsinermut aningaasaliissutit amerlineqarnissaat piumasarineqanngilaq, kisiannili ilinniartitaanermik inuussutissarsiutinillu siuarsaanermik suliaqarfiiit aqqutigalugit aningaasanut inatsisikkut ingerlatseqatigiiffimmut aningaasaliissutinik isumaqatiginninniartarfimmut kiisalu nutaamik suliniutit aallartinneqarnissaannut, siullermik suliffinnik aallarnisaaniartunut suliffeqarfinnullu nutaamik ineriartortitsinissap pilersinneqarnissaannik siunertaqartumik iluaqutissatut nuunniarneqarput.
"Unnuisa-fonden"-ip atorunnaarsinneqarnissaanik Naalakkersuisut siunnersuutaat takornarianut allanullu unnuisarfiliornissamut tapiissuteqartarnissamut periarfissap peerneqarnissaanik kissaateqarnermik ersersitsinerunngilaq, pisariillisaanissamilli kissaateqarnermik ersersitsinerulluni, tassami ingerlatseqatigiiffinnut nutaanut marlunnut sinaakkusiussat iluanni siunertamut tamatumunnga suli taarsigassarsisitsisoqarsinnaassammat.
Aningaasaateqarfiup atorunnaarsinnerani aningaasaateqarfiup aningaasaatai Nunatta Karsianut nakkartinneqassapput aammalu aningaasaateqarfiup pisinnaatitaaffiinut pisussaaffiinullu Namminersornerullutik Oqartussat isumaginnittunngussallutik. Aningaasaateqarfiup aningaasaataasa aamma aningaasaateqarfiup pisinnaatitaaffiisa pisussaaffiisalu, matumanittaaq aningaasaateqarfiup taarsigassarsiariteriigasa, ingerlatseqatigiiffimmut aningaasaliissutinik isumaqatiginninniartarfimmut 1. januar 2005-ip kingornagut suliassanik taakkuninnga isumaginnilersussamut, ataatsikkut nuunneqarnissaat tunngavissaatitaavoq.
Siunnersuutip Inatsisartut Inuussutissarsiutinut Ataatsimiititaliaanni inuussutissarsiutinik siuarsaanermi aaqqissuussinerup allanngortinneqarnissaanik siunnersuummik tigusaqareersimasumi oqaluuserineqarnissaa Naalakkersuisut siunnersuutigaat.
Taamaalilluni Naalakkersuisut inassuteqaataat Inatsisartunit akuersortumik oqaluuserisassanngortinneqarpoq.