16. september 2004 UKA 2004 /37
ILUARSIISSUTIT
(Taarserpaa siunnersuut nassuiaatitalik ulloq 6. august 2004-meersoq)
Inatsisissatut siunnersuummut nassuiaatit
Nalinginnaasumik nassuiaatitInuussutissarsiutit siuarsarneqarnissaannik aaqqissuussinerup 1. januar 2005 aallarnerfigalugu allannguuteqartinnissaanik ilimasaarinermut atatillugu, tamatumalu kingorna inuianni inuussutissarsiutit siuarsarneqarnissaannik aaqqissuussineq inuussutissarsiutit siuarsaavigineqarnissaannut ingerlatseqatigiiffikkut siunnersuinermik aningaasanillu tapiissuteqartarnermik kiisalu ingerlatseqatigiiffimmik aningaasaliissutinik ukiuni siullerni ernialersugassaanngitsunik isumaqatiginninniartarfiusumik ilaqartillugu aqqutissiuunneqartussanngormat, unnuisarfiliornissanut taarsigassarsiniartarfittut aningaasaateqarfik pilersinneqarsimasoq pisariaaruttussaavoq, taarsigassarsisitsisarneq tamanna ingerlatseqatigiiffiit nutaat marluusut killiliussaasa iluanni isumaqatiginninniutigineqarsinnaalissammat.
Namminersornerullutik Oqartussat aningaasaliiffigisaannik aningaasaliinernik assigiinnik aaqqissuussinerit, tamatumalu malitsigisaanik allaffitsigut aqutsinermi pisariaqavinngikkaluamik aningaasartuuteqarfiusut pinngitsoorniarlugit, aningaasaateqarfiup atorunnaarsinnissaa siunnersuutigineqarpoq. Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisaanni atuuttumi § 10, imm. 9 naapertorlugu aningaasaateqarfik Inatsisartut inatsisaatigut atorunnaarsinneqartussaavoq.
Aningaasaateqarfiup suliani 1997-imiilli ingerlappaa, aatsaalli aningaasalersuinikkut tapersiisarneq pillugu Inatsisartut inatsisaatigut nr. 15-ikkut 31. oktober 1996-imeersukkut, kingornalu Inatsisartut inatsisaatigut matumuuna suliarineqartukkut inatsisitigut tungavissinneqarluni. Aningaasaateqarfik takornarianut unnuiffissat pilersinnissaannut, allilernissaannut nutarternissaannullu taarsigassarsisitsisinnaasarsimavoq. Taarsigassarsisitsinissamik aalajangernissaq tunngaveqartinneqartarpoq suliassatut pilersaarut aningaasaqarnikkut imminut napatissinnaanersoq, suliassatut pilersaarut Naalakkersuisut takornariartitsinermut politikkiannut tulluartuunersoq, suliassatut pilersaarut ani-ngaasaliissutinut naleqqiullugu ineeqqanik amerlasuunik kinguneqassanersoq aammalu isumatuumik aqqissuussinermik tunngaveqarnersoq apeqqutaatillugit.
Aningaasaateqarfimmut 1997-98-imi katillugit 28 mio. kr.-ingajaat aningaasaliissutigineqarput. 1999-imi 2000-imilu aningaasaliisoqanngilaq aammalu 2001-02-mi ukiumut 0,5 mio. kr.-iinnaat aningaasaliissutigineqarlutik, taakkunannga 0,2 mio. kr.-it allattoqarfiup sulineranut (Grønlandsbankenimik allaffissornikkut siulersuinissamut isumaqatigiissut) atugassanngortinneqarlutik. Taamaattumik aningaasaateqarfiup suliniutai ukiuni kingullerni tunngaviatigut 0-imi inissisimapput.
Katillugit 30 mio. kr.-it missaanniittut tapiissutigineqarput.
Aningaasaateqarfiup atorunnaarsinnerani aningaasaateqarfiup aningaasaatai Nunatta Karsiata pigilissavai, taamatullu Namminersornerullutik Oqartussat aningaasaateqarfiup pisinnaatitaaffii pisussaaffiilu tigussallugit, tak. Inatsisartut inatsisaanni § 10, imm. 9. Aningaasaateqarfiup aningaasaatai pigisassanngortinneqassasut aammalu aningaasaateqarfiup pisussaaffii suliassaalu ingerlatseqatigiiffimmut aningaasaliissutinik isumaqatiginninniartarfiusumut, inuussutissarsiutit siuarsarneqarnissaannik aaqqissuussinerup allanngortinneqareerneratigut 1. januar 2005-ip kingornatigut suliassanik isumaginnittussamut isumagisassanngortinneqassasut naatsorsuutigineqarpoq. Allattoqarfittut suliassamut aningaasaliissutit inuussutissarsiutit siuarsarneqarnissaannik aaqqissuussinerup allan-ngortinneqarneranut atasumik isumaqatiginninniartarfittut ingerlatseqatigiiffiup pilersinneqartup suliassaanut malinnaatinneqassasut naatsorsuutigineqarpoq.
Siunnersuut Namminersornerullutik Oqartussat qitiusumik allaffissornikkut aqutsisoqarfiannut ki-nguneqassanngilaq, aningaasaateqarfiup atorunnaarsinneqarneranut atasumik allaffissornikkut suliassaq naatsorsuutigissanngikkaanni.
Aningaasaateqarfiup atorunnaarsinnera inuussutissarsiuteqartunut aningaasaqarnikkut allaffissornikkulluunniit aqutsinikkut pitsaanngitsunik imatorsuaq kinguneqassanngitsoq naliliisoqarpoq, akerlianik tamanna pitsaaqutitut isigineqartariaqarpoq, tassa suliassaq aningaasaateqarfiup naammassisimasaa ingerlatseqatigiiffimmut aningaasaliussanik isumaqatiginninniartarfiusumut/ingerlatseqatigiiffimmut ukiuni siullerni ernialersugaanngitsunik aningaasaliissuteqartartumut isumagisassanngortinneqassammat, taamatullu inuussutissarsiutit siuarsaavigineqarnissaannut ingerlatseqatigiiffik pilersinneqaqqammersoq peqatigalugu inuussutissarsiuteqartunut siunnersuinikkut aningaasaliissuteqarnissamillu kiffartuussinikkut pitsaanerulersitsilluni.
Siunnersuut avatangiisinut pinngortitamullu tunngasutigut imaluunniit innuttaasunut allanulluunniit allaffissornikkut aqutsinikkut kinguneqassanngitsoq naatsorsuutigineqarpoq.
Siunnersuut 5. juni 2004 tusarniaassutigalugu nassiussuunneqarpoq oqaaseqaatissanik nassiussinissamut 16. juni 2004 killiliullugu.
Siunnersuut Greenland Tourism a/s-imut - Takornariaqarneq pillugu Siunnersuisoqatigiinnut, Ingerlatseqatigiiffinnut allattoqarfimmut, DcR-imut, SULISA A/S-imut, Unnuisa-fondenimi siulersuisunut, Akileraartarnermi Pisortaqarfimmut aamma Aningaasaqarnermut Pisortaqarfimmut tusarniaassutigalugu nassiussuunneqarpoq.
Greenland Tourism a/s isumaqarpoq siunnersuut inuussutissarsiutit siuarsarneqarnissaannik aaqqissuussinermut pisussamut naapertuuttoq. Ingerlatseqatigiiffinnut allattoqarfik, oqaaseqaatit teknikkimut tunngasut ilanngunneqartut saniatigut oqaaseqaaseqanngilaq. Aningaasaqarnermut Pisortaqarfik, Akileraartarnermi Pisortaqarfik, DcR aamma Sulisa A/s oqaaseqaateqanngillat. Aningaasaateqarfiup atorunnaarsinneqarnissaanik siunnersuut Unnuisa-fondenip tusaatissatut tiguaa.
Siunnersuummi aalajangersakkanut ataasiakkaanut nassuiaatit
§ 1-imut
Nr. 1-imut
Kapitali taaneqartoq paragraffinik taaneqartunik imalik, aningaasaateqarfik maanna atorunnaartussaq pillugu aalajangersakkanik taamaallaat imaqarpoq. Siunnersuummi aalajangersakkat nalinginnaasut innersuunneqarput. Aningaasaateqarfimmit taarsigassarsisitsinissamik neriorsuuteqarnissaq il.il. maanna Inatsisartut inatsisaanni kapitali 3-kkut inatsisitigut tunngaveqartinneqartoq 1. januar 2005-ip kingornagut atuutiinnassaaq.
Nr. 2-mut
Unnuisa-fondenip atorunnaarsinnissaanik taamalu inatsisiliamit peerneqarnissaanik siunnersuutip allanngortiternerata kinguneranik iluarsiinerit tunngaveqartinneqarput. Siunnersuummi aalajangersakkat nalinginnaasut innersuunneqarput. Inuussutissarsiutit siuarsaavigineqarnissaannut ingerlatseqatigiiffik pilersinneqaqqammersoq aammalu ingerlatseqatigiiffik aningaasaliussanik isumaqatiginninniartarfik aaqqissuussinerit allaffitsigut aqunneqarnissaanni kiffartuunneqarnissamik isumaqatigiissuteqarfigineqassasut naatsorsuutigineqarpoq.
Nr. 3-mut
Paragraffi maannanut § 20-mut, imm. 2-mut naapertuuppoq suliassanngortitseqqittarnerlu pillugu aalajangersakkanik aammalu naammagittaalliuuteqarnissamut piffissarititaq pillugu paasissutissanik imaqarluni. Qinnuteqartup aalajangiinermik tigusaqarneraniit sap. akunnerinik sisamanik piffissaqartitsineq naatsorsuutigineqarpoq.
Nr. 4-mut
Allanngortitsinerup kinguneranik iluarsiinerit pineqarput, tamatumani aalajangersagaq § 20-mut, imm. 1-imut nuunneqarluni.
§ 2-mut
Piffissaliussaq toqqarneqarpoq aningaasaateqarfimmik atorunnaarsitsinerup inuussutissarsiutit siuarsarneqarnissaannik aaqqissuussinerup allanngortinneqarfissaatut ilimasaarinermut peqatigitinneqarnissaa qulakkeerniarlugu, taamaalilluni suliassat aningaasaateqarfiup manna tikillugu suliarisimasai oqartussaaffimmi allami aaqqinneqarsinnaalerniassammata.