8. September 2004 UKA 2004/35
Inuussutissarsiummik Ingerlataqartunik Nalunaarsuiffik pillugu Inatsisartut inatsisaata allanngortinneqarneranik Inatsisartut inatsisissaattut siunnersuut
Saqqummiussissut
Siullermeernera
Inuussutissarsiummik ingerlataqartunik Nalunaarsuiffik pillugu Inatsisartut inatsisaata allanngortinneqarneranik inatsisartut inatsisissaattut siunnersuut Naalakkersuisut matumuuna saqqummiuppaat.
Siunnersuut Namminersornerullutik Oqartussat inunnik, suliffeqarfinnik il.il. inuussutissarsiummik ingerlataqartunik nalunaarsuinerisa allanngortitsivigineqarneranut atatillugu Inuussutissarsiummik Ingerlataqartunik Nalunaarsuiffiup allaffissornermi nalunaarsuiffittut Naatsorsueqqissaartarfimmiit Naalakkersuisut Allattoqarfiannut nuunneqarnissaa pissusissamisoortutut isigineqarsinnaavoq. Nalunaarsuiffiup aqunneqarnera naalakkersuisoqarfimmut aqutsisuusumut isumagisassanngortinneqassaaq.
Allanngortitsinikkut siunertarineqarpoq paasissutissanik ullumikkut Namminersornerullutik Oqartussat iluanni arlalinni nalunaarsorneqartartunik pitsaanerusumik iluaquteqarsinnaanerup aqqutissiuunneqarnissaa peqatigitillugulu innuttaasunik suliffeqarfinnillu pisariinnerusumik nalunaarsuisinnaalernissaq.
Inuussutissarsiummik Ingerlataqartunik Nalunaarsuiffiup Naatsorsueqqissaartarfimmiit Naalakkersuisut Allattoqarfiannut nuunneqarnissaani inatsisip allanngortinneqarnissaa aammalu nalunaarsuinermut malittarisassanik allanngortitsinissaq piumasaqaataapput.
Nalunaarsuiffiup nuunneqarnerani maannamut nalunaarsuiffiup allaffissorneranut, ingerlatsineranut malinnaasitsineranullu aningaasaliissutaasartut Naatsorsueqqissaartarfimmiit naalakkersuisoqarfimmut susassaqartumut nuunneqarnissaat tunngavissaatitaavoq.
Naatsorsueqqissaartarfimmiit naalakkersuisoqarfimmut susassaqartumut nuussinermut atatillugu sulisut ullumikkut Naatsorsueqqissaartarfiup nalunaarsuiffiani sulisuusut nooqataanissaat tunngavissaatitaavoq.
Taamaattumik siunnersuut amerlanerusunik aningaasaliisariaqalernissamik imaluunniit amerlanerusunik sulisoqalertariaqarnermik nassataqassangatinneqanngilaq, tassa qulaani taaneqareersutut suliassamik nuussinermut atatillugu Namminersornerullutik Oqartussat Qitiusumik Aqutsisoqarfiata iluani nuussinikkut tamanna naammassineqassammat.
Siunnersuut Namminersornerullutik Oqartussat qarasaasialeriffiannut, Naatsorsueqqissaartarfimmut, Naalakkersuisut Allattoqarfiannut, Nunami Namminermi Pissutsinut Allaffimmut aamma Aningaasaqarnermut Pisortaqarfimmut tusarniaassutigineqarsimavoq. Tusarniaanermut akissuteqaatit pisariaqarnerat malillugu inatsisissatut siunnersuummi ilanngunneqarsimapput.
Taamatut oqaaseqarlutik siunnersuutip Inatsisartut oqaluuseralugulu akuerissagaat Naalakkersuisunit inassutigineqarpoq.