07. oktober 2004

UKA2004/35

 

Inuussutissarsiummik Ingerlataqartunik Nalunaarsuiffik pillugu

Inatsisartut inatsisaata allanngortinneqarneranik

Inatsisartut inatsisissaattut nr. xx ulloq xx 2004-meersumut siunnersuut
(Inuussutissarsiummik Ingerlataqartunik Nalunaarsuiffimmik Naatsorsueqqissaartarfimmit Naalakkersuisut Allattoqarfiannut nuussineq)

pillugu

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartunut ilasortaq Ole Dorph, Siumut, siulittaasoq
Inatsisartunut ilasortaq Ane Hansen, Inuit Ataqatigiit, siulittaasup tullia
Inatsisartunut ilasortaq Otto Jeremiassen, Siumut
Inatsisartunut ilasortaq Finn Karlsen, Atassut
Inatsisartunut ilasortaq Per Skaaning, Demokraatit

Inatsisartut Inuussutissarsiornermut Ataatsimiititaliaata ulloq 5. oktober 2004-mi siullermeerinerup kingorna Naalakkersuisut inatsisissatut siunnersuutaat misissuataarpaa.

 

Aallaqqaasiut
Inuussutissarsiornermik ingerlatsisut inuit, suliffeqarfiit il.il. pillugit Namminersornerullutik Oqartussat nalunaarsuiffiata allanngortiterneqarneranut siunnersuut ilaavoq.

Namminersornerullutik Oqartussani ullumikkut nalunaarsukkat piffinni arlaqartuniittut paasissutissartaat pitsaanerusumik atorneqarsinnaanerat allanngortiterinikkut ugguuna anguniarneqarpoq.

Inatsissatut siunnersuutip imarisaa
Inuussutissarsiummik Ingerlataqartunik Nalunaarsuiffik allaffissornikkut nalunaarsuiffittut Naatsorsueqqissaartafimmit Naalakkersuisut Allattoqarfiannut nuunneqarnissaa allannguutissatut siunnersuutikkut anguniarneqarpoq. Naalakkersuisoqarfimmut ingerlatsisuusumut nalunaarsuiffiup allaffissornikkut ingerlanneqarfia inissinneqassaaq.

Ataatsimiititaliap suliarinninnera
Siunnersuut tusarniaassutigalugu ulloq 7. juni 2004-mi nassiunneqarpoq akissutissat ulloq 16. juni 2044-mut killilerlugit Namminersornerullutik Oqartussat Qarasaasiaqarfiannut, Kalaallit Nunaanni Naatsorsueqqissaartarfimmut, Naalakkersuisut Allattoqarfiannut, Nunatsinni pissutsinut Allaffimmut aammalu Aningaasaqarnermut Pisortaqarfimmut. Inuussutissarsiornermut Ataatsimiititaliap akissutaasimasut tiguvai.

Naalakkersuisut naapertorlugit allanngortitsinissap siunertaraa inuit inuussutissarsiummik ingerlatsisut suliffeqarfiit ilaalu ilanngullugit ullumikkut Namminersornerullutik Oqartussat assigiinngitsunut nalunaarosrneqartartut pillugit paasissutissat pitsaanerusumik atorneqartarnissaat ammaatissallugu.

Siunnersuutip siullermeerneqarnerani pineqartup Naalakkersuisunit itisilerneqarnissaa ujartorneqarpoq. Tamatumunnga atatillugu Inuussutissarsiornermut Ataatsimiititaliamit ataatsimiinnissamut aggersarneqassaguni immikkoortumut pineqartumut isumaliutigisani pillugit nassuiaateqarnissaminut Naalakkersuisoq piareersimanerarpoq.

Taamaattumik apeqqut taannarpiaq pillugu akissuteqarfigineqaqqullugu Inuussutissarsiornermut, Nunalerinermut Suliffeqarnermullu Naalakkersuisoq Johan Lund Olsenip ataatsimeeqatigineqarnissaanut Inuussutissarsiornermut Ataatsimiititaliap aggersarpaa.

Aggersaat apeqqutertalik Naalakkersuisullu akissutai ilanngunnikuupput.

Ataatsimiititaliaq isumaqatigiittoq siunnersuummut ima oqaaseqaateqarumavoq:

- Siunnersuut atortorisatigut iluarsiinertut ataatsimiititaliap isumaqarfigaa. Namminersornerullutik Oqartussat ullumikkut nalunaarsukkat piffinni arlaqartuniittut paasissutissartaat pitsaanerusumik eqaannerusumillu atorneqarsinnaanerat inuussutissarsiutinut nalunaarsuiffiup nuunneqarneratigut anguniarneqarmat siunnersuut ataatsimiititaliamit tapersersornartutut isigineqarpoq.

- Nalunaarsuiffimmit matumannga paasissutissat – nalunaarsuiffinnut allanut taputartuussinikkut, assersuutigalugu Suliaq – Inuussutissarsiummik Ingerlataqartunut Nalunaarsuiffiup nuunneqarneratigut Naalakkersuisut pitsaanerusunik toqqammavissinneqartalernissaat ataatsimiititaliamit neriuutigineqarpoq.

Taamaalilluni saqqummiunneqartut tunngavigalugit siunnersuutip Inatsisartunit taperserneqarnissaa ataatsimiititaliap isumaqatigiittup inassutigaa.

Taama oqaaseqarluni Inatsisartut Inuussutissarsiornermut Ataatsimiititaliaata siunnersuut aappassaaniigassanngortippaa.

 

	Ole Dorph, Siumut, siulittaasoq
Ane Hansen, Inuit Ataqatigiit, siulittaasup tullia		Otto Jeremiassen, Siumut
Augusta Salling, Atassut		Per Skaaning, Demokraatit

 

Ilanngussaaq 1

Ilanngussaaq 2