Oqaaseqaatit nalinginnaasut

 

Namminersornerullutik Oqartussat inunnik, suliffeqarfinnik il.il. inuussutissarsiummik ingerlataqartunik nalunaarsugaasa allanngortinneqarnerannut uiggiullugu pissusissamisoortutut isigineqarsimavoq Inuussutissarsiummik Ingerlataqartunik Nalunaarsuiffiup allaffissornermi nalunaarsuiffittut Naatsorsueqqissaartarfimmiit Naalakkersuisut allaffissornikkut aqutsisoqarfiannut nuunneqarnissaa. Nalunaarsuiffiup allaffissornikkut aqunneqarnera naalakkersuisoqarfimmut Inatsisartut inatsisaanni tassani aalajangersarneqarsimasut malillugit allaffissornikkut aqutsisuusumut suliassanngortinneqassaaq.

Allanngortitsinikkut siunertarineqarpoq paasissutissanik ullumikkut Namminersornerullutik Oqartussat iluanni arlalinni nalunaarsorneqartartunik pitsaanerusumik iluaquteqarsinnaanerup aqqutissiuunneqarnissaa.

Nuussisoqassappat soorunalimi pisariaqassaaq Datatilsynip nalunaarsuiffiup nalunaarsuinermut malittarisassaanik nutaanik akuersissuteqarsinnaanissaa.

Inuussutissarsiummik Ingerlataqartunik Nalunaarsuiffik Naalakkersuisut allaffissornikkut aqutsisoqarfiannut nuunneqassappat inatsimmik nalunaarsuinermullu malittarisassanik allanngortitsisoqartariaqarpoq.

Pisortanut aningaasaqarnikkut allaffissornikkullu kingunerisassai.

Nalunaarsuiffiup nuunneqarnerani maannamut nalunaarsuiffiup allaffissorneranut, ingerlatsineranut malinnaasitsineranullu aningaasaliissutaasartut Naatsorsueqqissaartarfimmit naalakkersuisoqarfimmut suliassanut akisussaasumut nuunneqartariaqassapput. Tamakku saniatigut immikkut aningaasaliisoqarnissaa pisariaqartinneqarsorinanngilaq.

Naatsorsuutigineqarpoq Naatsorsueqqissaartarfimmit naalakkersuisoqarfimmut suliassanut akisussaasumut nuussinermut atatillugu sulisut ullumikkut Naatsorsueqqissaartarfiup nalunaarsuiffiani sulisuusut nooqataassasut.

Taamaammat siunnersuuteqarnikkut aningaasaliissutinik sulisunilluunniit amerlisitsinissaq pisariaqassanngilaq siuliinimi taaneqareersutut tamakku suliassat nuunneqarnerannut atatillugu Namminersornerullutik Oqartussat Qitiusumik Aqutsisoqarfianni nuussinikkut aaqqiivigineqartussaammata.

Namminersortunut il.il. aningaasaqarnikkut allaffissornikkullu kingunerisassai.

Sunniuteqassanngilaq.

Avatangiisinut pinngortitamullu tunngatillugu kingunerisassai.

Sunniuteqassanngilaq.

Innuttaasunut allaffissornikkut kingunerisassai.

Sunniuteqassanngilaq.

Allanut pingaarutilimmik kingunerisinnaasai.

Sunniuteqassanngilaq.

Naalagaaffeqatigiinnermut namminersornermullu pissutsit.

Sunniuteqassanngilaq.

Oqartussaasunik kattuffinnillu il.il. tusarniaaneq.

Siunnersuut ulloq 7. juni 2004-mi tusarniaassutigalugu nassiussuunneqarpoq ulloq 16. juni 2004-mut killilerlugu oqaaseqarfigisassanngorlugu.

Siunnersuut Namminersornerullutik Oqartussat qarasaasialeriffiannut, Naatsorsueqqissaartaarfimmut, Naalakkersuisut Allattoqarfiannut, Nunami Namminermi Pissutsinut Allaffimmut aamma Aningaasaqarnermut Pisortaqarfimmut tusarniaassutigalugu nassiussuunneqarpoq.

Nunami Namminermi Pissutsinut Allaffik siunnersuummut ataasiinnarmik oqaaseqaateqarpoq, tassani isorineqarluni Inuussutissarsiummik Ingerlataqartunik Nalunaarsuiffiup Inuussutissarsiornermut, Nunalerinermut Suliffeqarnermullu Naalakkersuisoqarfimmut pituttorneqarnissaa, Naalakkersuisoqarfimmi allanngortiterneqarsinnaanerat sillimaffigeqquneqassasoq ammatinneqarusummat.

Naalakkersuisut Allattoqarfiat arlalinnik oqaaseqaateqarsimavoq maannakkut siunnersuummut saqqummiunneqartumut ilanngullugit suliarineqartunik.

Aningaasaqarnermut Pisortaqarfik siunnersuummut oqaaseqaatissaqarsimanngilaq siunnersuut Namminersornerullutik Oqartussanut aningaasaqarnikkut allaffissornikkullu taasarialinnik kinguneqassanngippat, siusinnerusukkullu allaaserineqareersutut taamaappoq.

Namminersornerullutik Oqartussat qarasaasialeriffiat Naatsorsueqqissaartarfillu siunnersuummut oqaaseqaatissaqarsimanngillat.

 

Aalajangersakkanut ataasiakkaanut oqaaseqaatit

§ 1- imut

 

Nr. 1-imut

Allanngortitsinikkut Inuussutissarsiummik Ingerlataqartunik Nalunaarsuiffiup ingerlanneqarneranut akisussaaffik Naatsorsueqqissaartarfimmiit Naalakkersuisut allattoqarfiannut nuunneqassaaq. Allaffissornikkut aqutsinerup inissinneqarnissaa suliassaqarfinnik agguataarinermut atatillugu naalakkersuisut siulittaasuannit aalajangerneqassaaq.

Nr. 2-mut

Allanngortitsinikkut Inuussutissarsiummik Ingerlataqartunik Nalunaarsuiffiup normuutaanik inatsisilerinermut taamatullu ingerlatsinermut tunngatillugu agguaassisarneq Naatsorsueqqissaartarfimmiit Naalakkersuisoqarfimmut suliassanut akisussaasumut nuunneqassaaq.

Nr. 3-mut

Allanngortitsinikkut qulakkeerneqassaaq Inuussutissarsiummik Ingerlataqartunut Nalunaarsuiffimmut aqutsisoqatigiit imatut katitigaassasut Naatsorsueqqissaartarfimmeersunik taamatullu Naalakkersuisoqarfimmit suliassanut akisussaasuneersunik ilaasortaqartussanngorlugit taamaaliornikkut aqutsisoqatigiinni suliamut allaffissornermullu ilisimasat aalaakkaasunngorsinnaaqqullugit.

Nr. 4-mut

Allanngortitsinikkut nalunaarsuiffimmi paasissutissanik malinnaasitsinermut akisussaaffik Naatsorsueqqissaartarfimmiit Naalakkersuisoqarfimmut suliassanut akisussaasumut nuunneqassaaq.

Nr. 5-imut

Allanngortitsinikkut qulakkeerneqassaaq naalakkersuisoqarfiup akisussaasup inatsisilerinermut immikkoortortaqarfiit tunngaviusumik paasissutissat, §§ 8 aamma 9 naapertorlugit nalunaarsorneqartut malinnaatinneqartullu, pillugit paasiniaavigisinnaalissammagit.

Nr. 6-imut

Allanngortitsineq nalunaarsuiffiup Naatsorsueqqissaartarfimmit Naalakkersuisunut nuunneqarnerata kinguneraa.

 

§ 2-mut

Piffissaq atuutilerfissaa nalunaarsuiffiup pilersaarutigineqartutut tunniunneqarnera peqatigalugu pissaaq.