11. oktober 2004

UKA 2004/26

 

Qamutit motorillit akileraarutaat pillugit Inatsisartut inatsisaata allanngortinneqarneranik Inatsisartut inatsisaannut siunnersuut

pillugu

Inatsisartut Akileraartarnermut Akitsuusiisarnemullu Ataatsimiititaliaata

ISUMALIUTISSIISSUTAA

siunnersuutit aappassaaneerneqarneranni saqqummiunneqartoq

 

Inatsisartut ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Kalistat Lund, Siumut, Siulittaasoq
Inatsisartunut ilaasortaq Agathe Fontain, Inuit Ataqatigiit, Siulittaasup tullia
Inatsisartunut ilaasortaq Augusta Salling, Atassut
Inatsisartunut ilaasortaq Per Skaaning, Demokraatit
Inatsisartunut ilaasortaq Ole Thorleifsen, Siumut

 

Inatsisartut Akileraartarnermut Akitsuusiisarnermullu Ataatsimiititaliaata siunnersuut una UKA 2004-mi siullermeerneqareermat nassuiaatai ilanngullugit misissorpaa.

Siunnersuutip imarisaa
Qamutit motorillit savaatilinnit tuttuutilinnillu pigineqartut landskarsimut akitsuummik akiliisitsissutaasannginnerat ileqquusimavoq, qamutimmi motorillit taakku nunatsinni aqqusinermi angallanneq pillugu inatsit naapertorlugu siusinnerusukkut nalunaarsoneqartussaatitaanngimmata. September 2003-imili qamutit motorillit tamakku nalunaarsorneqartalernissaat politiit aalajangerpaat, taamaaliornikkullu qamutit motorillit akileraarutaat pillugit Inatsisartut inatsisaanni nr. 3, 16. juni 1987-imeersumi § 1-imut siunertarineqanngitsumik taakku ilanngutitinneqarlutik.

Siunertarineqanngitsumik savaatilittut tuttuutilittullu inuussutissarsiortunut aningaasatigut kinguneqaatit qulaani taaneqartut illuatungilernissaat siunertaralugu Naalakkersuisut siunnersuut manna aqqutigalugu qamutit motorillit akitsuusigassaanngitsunut ilaasut amerlineqarnissaat kissaatigaat. Taamaalilluni qamutit motorillit illoqarfiit nunaqarfiillu avatanni savaatillinnit, tuttuutillinnit allanillu taakkununnga assigusunik ingerlataqartunit pigineqarlutillu inuussutissarsiornermut atatillugu atorneqartut amerlanerpaamillu 15-inik amerlassuseqartut akitsuusiivigineqartussaanngitsunut ilanngutitsinneqarput.

Inatisartut inatsisaat siuliani taaneqartoq ilanngullugu oqaasertalerneqarnermigut erseqqissaavigineqassasoq siunnersutigineqarpoq, taamaalilluni qamutit motorillit bus-itut atorneqartartut, bus-inik ingerlatsineq siumut aalajangeriikkamik tamanullu takussassiarineqartoq tunngavingalugu ingerlanneqartillugu, akitsuummik akiliisartussaanngitsutut inissinneqarsinnaalissallutik. Piffinni ataasiakkaani attartornissamik pisariaqartitsoqartillugu bus-ip taamatutut atorneqartarnerata kingunerisaanik akitsuusiinnginnissaq mattunneqarsinnaanngilaq.

Tusarniaanermit akissutisiat
Ataatsimiititaliap siunnersuutip oqaluuserineqarneranut atatillu tusarniaanermit akissutisiat nuutinneri piniarpai. Tusarniaanermit akissutisiat immikkut oqaaseqarnissamut pissutissaqalersitsinngillat.

Siunnersuutip ilusiligaanera
Siunnersuummi amigaatit naleqqutinngitsullu pillugit Inatsisartut Inatsisissanik Nalilersuisarfiannit allakkiamik ataatsimiititaliaq pissarsivoq. Ataatsimiititaliap iluarisimaarlugu maluginiarpaa siullermeerinissaq sioqqullugu Naalakkersuisut allakkiami kaammattuutigineqartunut naapertuuttumik siunnersuummik iluarsiisimanerat.

Aningaasatigut kinguneqaatissat
Illoqarfiit nunaqarfiillu avatanni savaatillit, tuttuutilliit allallu taakkununnga assigusunik ingerlataqartut qamutinik motorilinnik pigisaqarlutillu inuussutissarsiornermut atatillugu atugaqartut ulloq 1. april 2004 allarnerfigalugu akitsuummik akiliisinneqartalersimammata, siunnersuutip matuma akuersissutigineqarnerata kingunerissavaa akiligassanngortinneqarsimasut 20.000 kr.-inik naleqartut utertinneqarnissaat. Siunnersuulli manna akuersissutigineqanngippat Akileraartarnermut Pisortaqarfik naapertorlugu qamutit mortorillit taakku akitsuutaat ukiumut 120.000 kr-it 150.000 kr.-illu akornanni isertitaqarnermik kinguneqassaaq.

Ataatsimiititaliaq isumaqatigiittoq siunnersuut pillugu ima oqaaseqassaaq:
Qamutinik motorillinnik illoqarfiit nunaqarfiillu avatanni savaatillinnit, tuttuutillinnit allanillu taakkununnga assigusunik ingerlataqartunit pigineqarlutillu inuussutissarsiornermut atatillugu atorneqartunik taamatut ukiumoortumik akitsuusiisarneq naleqquttuunanilu naammaginan-ngitsoq Akileraartarnermut Akitsuusiisarnermullu Ataatsimiititaliaq isumaqarpoq. Tamanna tunngavingalugu siunnersuummut matumunnga tapersiinini ataatsimiititaliap oqaatigissavaa.

Aammattaaq siunnersuut matumani pineqartoq akuersissutigineqareerpat qamutit motorillit akileraarutaat pillugit Inatsisartut inatsisaata nr. 3-p, 16. juni 1987-imeersup allannguutai ilanngullugit nalunaarusiunneqarnissaa ataatsimoortunngortinneqarnissaaluunniit ataatsimiititaliap Naalakkersuisunut kaammattuutigissavaa.

Tamanna tunngavingalugu Akileraartarnermut Akitsuusiisarnermullu Ataatsimiititaliap siunnersuut Inatsisartunit akuersissutigineqassasoq inassutigaa.

Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut aappassaanigassanngortippaa.

 

	Kalistat Lund Siulittaasoq
Agathe Fontain Siulittaasup tullia		Augusta Salling
Per Skaaning		Ole Thorleifsen