16. september 2004
UKA 2004/26
Inatsisissatut siunnersuummut oqaaseqaatit
Oqaaseqaatit nalinginnaasut
Siunnersuutip tunuliaqutaa:
Qamutit motorillit Kalaallit Nunaanni aqqusinikkut angallannermut inatsit naapertorlugu nalunaarsorneqartussaasut Landskarsimut akileraarummik akiliisussaapput. Inatsisinik atortitsinermut Ministeriaqarfiup Kalaallit Nunaanni aqqusinikkut angallannermut inatsimmi periarfissaq atorlugu Kalaallit Nunaata avannaani kangianilu (Qaanaap kommuniani aamma Ittoqqortoormiit kommuniani) qamutit motorillit nalunaarsorneqartussaajunnaarsissimavai.Kalaallit Nunaanni Politimestereqarfiup 2003-mi septemberimi aalajangerpaa savaateqarfinni tuttuuteqarfinnilu qamutit motorillit nalunaarsorneqassasut, taassumalu kingunerivaa qamutit motorillit taakkua, qamutit motorillit akileraarutaat pillugit Inatsisartut inatsisaanni maleruagassat naapertorlugit Landskarsimut akileraarummik ingerlaannaq akiliisussanngortinneqarnissaat.
Siunnersuutip imarisaa:
Qamutit motorillit savaateqarfinni tuttuuteqarfinnilu illoqarfiit nunaqarfiillu avataanni inissisimasuni atorneqartartut Landskarsimut akileraarummik akiliisussanngortinneqarnissaat Naalakkersuisut naapertuuttuusorinngilaat. Taamaattumik qamutit motorillit taakkua, akileraarummik akiliisussaajunnaarsinneqarnissaasa inatsimmi ilanngunneqarnissaa siunnersuutigineqarpoq.Ilanngullugu erseqqissaatigineqassaaq bussit akileraarummik akiliisussaatitaanngitsutut taamaallaat bussit ingerlaarnissamut siumut aalajangeriikkat malillugit ingerlaartartut pineqarmata.
Aningaasatigut sunniutissai:Qamutinut motorilinnut akiliinnginnissamik akuersissuteqarsinnaaneq, qamutit motorillit akileraarutaannut maannamut akiliisussaasimanngitsunut atorneqartussatut naatsorsuussaammat, siunnersuutip Landskarsip isertitassatigut ukiumut missangersuusiorfimmi 2005-imut 43 mio. kr.-iusunit annaasaqarnissaanik kinguneqarnavianngilaq. Ukiumi aningaasanut inatsiseqarfimmi 2005-mi taassumalu kinguneratigut ukiuni tulliuttuni annaasaqaatigisassat naatsorsuutigineqarput 120.000 kr.-iniit 150.000 kr.-t tunngaannut annertussuseqarsinnaassasut. Akileraarummut akiliutaasimasinnaasunik § 2, imm. 2 naapertorlugu utertitsisoqarsinnaanera naatsorsuutigineqanngilaq 20.000 kr.-inik annertussuseqarnerunissaat.
Allaffissornermut sunniutissai:Siunnersuutigineqartoq allaffissornermut sunniuteqarnavianngilaq.
Tusarniaaneq:Inatsisissatut siunnersuut makkununnga tusarniaassutigineqarnikuuvoq: Ineqarnermut Attaveqarnermullu Pisortaqarfik, Aalisarnermut Piniarnermullu Pisortaqarfik, Inuussutissarsiornermut Nunalerinermut Suliffeqarnermullu Pisortaqarfik, Allattoqarfik, Aningaasaqarnermut Pisortaqarfik, KANUKOKA, KNAPK, Savaatillit Peqatigiit Suleqatigiissut. Tusarniaavigineqartuni Savaatillit Peqatigiit Suleqatigiissut saniatigut allat siunnersuummut akissutiminni immikkut ittunik oqaaseqaateqarsimanngillat. Savaatillit Peqatigiit Suleqatigiissut nalunaaruteqarput, sillimmaniarneq eqqarsaatigalugu nummerpladenik ikkussuinermi pilersuineq naammagisimaarlugu, taamatullu savaatillit qamutinut motoorilinnut akileraaruserneqannginnissamut periarfissinneqarnerat iluarisimaarlugu.
Inatsisissatut siunnersuummi aalajangersakkanut ataasiakkaanut oqaaseqaatit
§ 1, nr. 1-imut
Inatsisissamut siunnersuummi oqaatsit atukkat Kalaallit Nunaanni aqqusinikkut angallannermut inatsimmi aalajangersaalluni oqaasertaliussanut naapertuupput. Qamutit motoorillit, Kalaallit Nunaanni aqqusinikkut angallannermut inatsit naapertorlugu nalunaarsorneqartussaanngitsut, qamutit motoorillit akileraarutaannut ilaatinneqanngillat.
Qamutit motoorillit ikuallattoornermi aamma annaassiniarnermi ingerlassissutit imaluunniit ambulancit, taakkua ima ilusiligaappata aammalu siunertaminnut taakkununngarpiaq taamaallaat atorneqarpata. Siunnersuutigineqarpoq qamutit motoorillit ikuallattoornermi aamma annaassiniarnermi ingerlassissutit tamarluinnarmik akileraarummut akiliuteqannginnissamut ilaatinneqassasut, taakkua piginnittui apeqquteqaatinnagit.
Qamutit motoorillit akileraarummik akiliuteqannginnissaannut aalajangersakkami, naalagaaffinni takornartani maani aallartitaat imaluunniit konsuleqarfinni atorfillit il.il. atassuteqartuusut, Wien-imi naalagaaffiit isumaqatigiissutaanni maleruagassanut naapertuupput.
Siunnersuutigineqarpoq qamutit motorillit akileraarutaannut akiuliuteqannginnissamik akuersissutigineqartut aammattaaq qamutit motorillit savaatillit tuttuutillillu sulinerannut atorneqartartut, savaateqarfiit tuttuuteqarfiillu illoqarfiit nunaqarfiillu avataanni inissisimasut sumiiffinnilu taakkunani qamutit motorillit arlaqanngitsuinnaat pigineqarpata akileraaruteqartussaanngitsunut ilanngunneqassasut.
Savaateqarfik tuttuuteqarfilluunniit illoqarfiup nunaqarfiulluunniit avataaniittutut isigineqassaaq ingerlatsiviup illoqarfiup nunaqarfiulluunniit killeqarfiata avataani inissisimappat, soorlumi kommunini ataasiakkaani pilersaarutit assigalugit taakku inissisimappata.
Piffinni ingerlatsiviusuni qamutinik motorilinnik arlaqanngitsuinnarnik peqarfittut isigineqarneranut aalajangiiniartilluni aallaavigineqassaaq qamutinik motorilinnik qassinik piffinni ataasiakkaani nalunaarsorneqarsimanersoq, taakkulu aqquserngitigut uani ilanngullugit assakaasut illerngi aqqutigalugit ingerlatsivimmiit ingerlatsivinnut allanut atassuteqartuunersut. Illoqarfiit nunaqarfiillu piffinnut ataasiakkaanut naatsorsuutigineqassanngillat.
Ingerlatsiviup isorartussutsimigut angissusia apeqqutaatillugu qamutit motorillit 15-it ataallugit amerlassuseqarpata arlaqanngitsuinnarnik peqarfiusutut naatsorsuunneqassaaq.
Innarluutilinnut qamutit motoorillit paasineqassapput, qamutit motoorillit piginnittuusup/atuisuusup timimigut innarluuteqarnerata immikkut ittumik qamutip sananeqaammigut ilusiligaasimanissaat. Akileraarummik akiliuteqanngitsitsiumalluni aalajangiisoqassagaluarpat, aalajangiilersigani qinnuteqartup angerlarsimaffittut kommunerisaani kommunalbestyrelsemut oqaaseqaammik piniartoqaqqaassaaq.
Qamutit motoorillit illerfinnik assartuutit paasineqassapput, qamutit motoorillit immikkut ittumik sananeqaammikkut ilusiligaasimanissaat taamaasillutik toqusimasunik ilisisoqalersillugu assartuutitut il.il. atugassiaassallutik taamaallaallu taama assartuutitut atugassiaassallutik. Aalajangiilersigani qinnuteqartup angerlarsimaffittut kommunerisaani kommunalbestyrelsemut oqaaseqaammik piniartoqaqqaassaaq.
Erseqqissaatigineqassaaq qamutinik motoorillinnik bussinik ingerlassineq paasineqassaammat, akiliuteqarnikkut ingerlasussatut aalajangikkat taamaasillutik aquttoq ilanngullugu inunnik imminnut attuumassuteqanngitsunik qulingiluanik assartuutitut ingerlaartartut pineqarmata, aammalu pisortatigoortumik ingerlaarnissamut siumut aalajangeriikkat malillugit ingerlaartartut pineqarmata. Bussinik ingerlassinerup pisortatigoortumik ingerlaarnissamut siumut aalajangeriikkat malillugit ingerlaartartut, saniatigut inuiaqatigiinni ataasiakkaatigut attartortillugit ingerlassineqaraangat akiliuteqannginnissamut mattussissanngilaq.
Aalajangiilersigani qinnuteqartup angerlarsimaffittut kommunerisaani kommunalbestyrelsemut oqaaseqaammik piniartoqaqqaassaaq.
Akileraartarnermi Pisortaqarfiup qamutit motoorillit akileraarutaannik akiliuteqannginnissamik akuersissutilinnut nakkutilliisinnaanera, ilaatigullu akileraarummut akiliuteqannginnissamut piumasaqaataasut kinguneratigut malinneqarnersut qulakkeerumallugu, pisortaqarfiup politiinit qamutit motoorillit piginnittuinik allannguuteqartoqartillugu nalunaarfigineqarnermikkut pisassaaq, taamaasilluni qamutit motoorillit siusinnerusukkut akileraarummik akiliuteqannginnissamik akuersissutigineqarsimasut, qamutinik motoorilinnik piginnittunngortumut nutaamut akileraarut akilersinniarneqassammat.
§ 2, nr. 1-imut
Siunnersuutaavoq inatsit 1. januar 2005-miit atuutilissasoq.
§ 2, nr. 2-imut
Qamutit motoorillit savaatillit tuttuutillillu pigisaannik politiit 1. april 2004-imiit aallartiffeqartumik nalunaarsuilersimanerat peqqutigalugu siunnersuutigineqarportaaq, ukiup affaanut, piffissami 2004-mi 1. aprilimiit 31. decemberimut tunngasumi, qamutinik motoorilinnik piginnittut § 1, imm. 2, nr. 4 naapertorlugu akileraarummik akiliuteqannginnissamik akuersissutillinnut, piffissami tassani akiliutigineqarsimasunik utertitsisoqassasoq.