12. oktober 2004 UKA 2004/25
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaannut siunnersuut.
(Aningaasanut Nunallu allanut Naalakkersuisoq)
Akissuteqaat
(Aningaasanut Nunallu allanut Naalakkersuisoq)
Aappassaaneerinninneq
Naalakkersuisut sinnerlugit Akileraartarnermut Akitsuusiisarnermullu Ataatsimiititaliaq, siunnersuummut annertuumik peqqissaartumillu suliaqarsimaneranut siunnersuummullu isumaqatigiissumik tapersiineranut qujassuteqarfigerusuppara.
Siusinnerusukkut nalunaarutigineqareersutuut Naalakkersuisut matumuuna allannguutissamut siunnersuummik saqqummiussaqarput. Allannguutissatut siunnersuutip kingunerissavaa pisariaqavissuinnarnut annertusisamik ikiorsiissutit akileraarutit naatsorsorneqarneranni ilanngunneqartalernissaat, pisariaqavissuinnarnut ikiorsiissutit assigalugit. Tamanna pissuteqarpoq pisariaqavissuinnarnut annertusisamik ikiorsiissutit siullermik naatsorsuutigisatuut pisariaqavissuinnarnut ikiorsiissutinut tapertaasussaanngitsut paasinarsimmat taakkununngali taarsiutaasussaasut.
Inatsisit nalunaarusiuunneqarnissaat imaluunniit aningaasarsianit akileraarutit pillugit Inatsisartut inatsisaat katersorlugit naqiterneqarnissaat siunnersuutillu pineqartup akuersissutigineqarnerata kingorna allannguutissat ilanngullugit ataatsimiititaliamit kaammattuutigineqartut Naalakkersuisunit maluginiarneqarput. Tassunga atatillugu ilisimatitsissutigissavara Akileraartarnermi Pisortaqarfiup periarfissaq siulleq atorlugu aningaasarsianit akileraarutit pillugit Inatsisartut inatsisaat nu-taanngorlugit ataatsimoortillugit naqiterteqqinniarmatigit.
Ataatsimiititaliap akileraartarnikkut allaffissornerup pisariillisaavigineqarnissaanut pisariaqartitsi-neraanera Naalakkersuisut ilalerpaat, tassunga ilanngullugu pisariaqassappat Naalakkersuisut nangaanatik akileraarusiineq tamakkiisumik ilaanilluunniit qitiusumik ingerlanneqalernissaanik siunnersuuteqassapput, paasinarsissagaluarpat kommunit akornanni suleqatigiinnerit pilertortumik naammaginartumillu ingerlanneqanngitsut.
Naalakkersuisut kingusinnerpaamik 2006-imi upernaakkut ataatsimiinnissamut suleqatigiinniarnerit pillugit naliliinermik Akileraartarnermut Akitsuusiisarnermullu Ataatsimiititaliamut saqqummiussaqassapput pisariaqassappallu inatsisissamik siunnersuummik saqqummiussissallutik.
Taamatut oqaaseqarlunga Naalakkersuisut sinnerlugit inassutigissavara allannguutissatut siunnersuutip matuma pingajussaaneerneqarnissaanut taamatut isikkoqartillugu ingerlateqqinneqarnissaa.