1. august 2004 UKA 2004/25
Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaannut siunnersuut.
(Aningaasaqarnermut nunanullu allanut Naalakkersuisoq)
Saqqummiussissut
(Aningaasaqarnermut nunanullu allanut Naalakkersuisoq)
Siullermeerneqarnera
Naalakkersuisut sinnerlugit matumuuna saqqummiutissavara aningaasarsianit akileraarutit pillugit Inatsisartut inatsisaata allanngortinneqarneranik siunnersuut.
Siunnersuut manna akileraartarnikkut allaffeqarfeqarnerup pitsanngorsarneqarnissaanik innuttaasullu inatsisitigut illersugaanerisa annertusarneqarnissaanik siunertaqarnerusoq akileraartarnermik aaqqissuusseqqinnissamik Naalakkersuisut 2004-mi upernaakkut aallartitaannik, aammalu Inatsisartut inummut ilanngaatip ilanngaatillu aalajangersimasup aammalu kommuninut ataatsimut akileraarusiissutip qaffanneqarnissaannik akuersissuteqarfigisaannik nangitsineruvoq.
Kommunini kommissionit akileraarusiisartut ukiut ingerlanerini pingaaruteqarluartumik suliaqarsimapput, ilaatigulli teknikkikkut ineriartornerup kingunerisaanik paasissutissat nalunaarutigineqartut akileraaruseriffinnit pilertortumik misissorneqarsinnaalersimapput, taamaattumillu kommissionit akileraarusiisartut akileraarusiinermi maanna pisariaarussimammata atorunnaarsinneqarnissaat siunnersuutaavoq.
Akileraarusiinerup kukkunersiuinerullu pitsaasuunissaat qulakkeerniarlugu siunnersuutaavoq suliaq taanna Skatterådip ukiumoortumik pilersaarusiaa, sumiiffinni ataasiakkaani kommunalbestyrelsit qullersaallutik akisussaaffigisassaat naapertorlugu ingerlanneqartalissasoq. Tamanna ima isumaqanngilaq kommunalbestyrelsit suliassanut ataasiakkaanut akuliuttassasut. Taakkununnga akisussaasuussaaq inuk, akileraaruseriffiup akileraarusiinermik kukkunersiuinermillu suliaqarnerani qullersaalluni akisussaasuusussatut kommunalbestyrelsimit toqqarneqarsimasoq.
Aamma akileraaruseriffiit pitsanngorsarneqarnissaannik anguniagaq kommunit akileraaruseriffikkoortumik kommuninik allanik imaluunniit Akileraartarnermut Pisortaqarfimmik suleqateqarsinnaanerannik periarfissiissuteqarnikkut anguniarneqarpoq.
Naalakkersuisut isumaqarluinnarput suleqatigiinnissamut periarfissat taakku kommuninit atorluarneqassasut, akileraaruserinermimi ilisimasanik amerlisitsillutillu annertusaassammata, tassungalu ilutigitillugu aamma pitsaassuseq annertunerulissalluni. Aamma isertitassanik qulakkeerinissaq pisariaqartoq eqqaamaneqassaaq. Naalakkersuisut isumaqarput suleqatigiinnissamut aaqqissuussinerit taakku tamakkiisumik atorneqanngippata tamanna pillugu toqqaannartumik inatsisiliortoqartariaqartoq.
Suliassat pilertornerusumik suliarineqarnissaat siunertaralugu aammattaaq siunnersuutigineqarpoq kommunini akileraaruseriffiit paasissutissanik nutaanik saqqummertoqartillugu akileraarutissanik angissusiliinermik, piffissap akileraarusiiffiusup qaangiunnerata kingorna ukioq ataaseq tikillugu sivisussuseqartumi allanngortitsisinnaassasut, tassa Skatterådimit piginnaatinneqarnissamik qinnuteqaqqaanngikkaluarlutik, soorluttaaq aamma akileraarutissanik angissusiliinerup kukkusuunera ersarissuuppat akileraaruseriffiup angissusiliinermik allanngortitsisinnaanissaa Skatterådip naammagittaalliummik suliaqarnerminut atatillugu piginnaatitsissutigisinnaassagaa.
Digitaliusumik ingerlanerup periarfissiinera pisortat ingerlatsinerannik pitsanngorsaanissamut annertuunik periarfissiissaaq. Taamaattumik akileraaruseriffiit, Skatterådip aamma Akileraartarnermut Pisortaqarfiup, pisuni periarfissap taassuma atorneqarnissaa innuttaasumit pineqartumit akuerineqarsimatillugu digital atorlugu attaveqartarnissaannut Naalakkersuisut akileraartarnerup iluani malittarisassiuussinissamut piginnaatinneqarnissaat siunnersuutigineqarpoq.
Innuttaasut inatsisitigut illersugaanerat annertusarniarlugu siunnersuutigineqarpoq naammagittaalliortarnerup ingerlanneqartarnera sivikillisinneqassasoq, tassa kommunini akileraaruseriffiit aalajangiineri Skatterådimut Kalaallit Nunaata Eqqartuussivianut ingerlateqqinneqarsinnaasunik aalajangiisartumut ingerlaannaq naammagittaalliuutigineqarsinnaalersillugit, soorluttaaq Skatterådimut naammagittaalliuut ukiup ataatsip qaangiutinnginnerani rådimit aalajangiiffigineqarsimanngitsoq, Skatterådip aalajangiinissaa utaqqeqqaanngikkaluarlugu Kalaallit Nunaata Eqqartuussivianut suliassanngortinneqarsinnaalissasoq. Taamaaliornikkut innuttaasut akileraarutiminnut tunngatillugu suliassaatiminnik maannakkornit pilertornerungaartumik aalajangiiffigititsisalernissaat Naalakkersuisunit naatsorsuutigineqarpoq.
Innuttaasut atuinermut periarfissaat pitsaanerusumik naleqqiussinnaajumallugit kiisalu isumaginninnikkut tapiissutinik, soorlu ineqarnermut tapiissutinik, meeqqanut tapiissutinik il.il. tunineqarnissamut naatsorsuinermi tunngavissat naapertuuttuunerunissaat qulakkeerumallugu Naalakkersuisut siunnersuutigaat annertussusileriikkamik ikiorsiissutit pisariaqartitsinerlu naapertorlugu tunngaviusumik tunniunneqartartut aningaasarsiat akileraaruteqaataasussat naatsorsorneqarneranni ilanngunneqartarnissaat.
Aammami annertussusileriikkamik ikiorsiissutit pisariaqartitsinerlu naapertorlugu ikiorsiissutit isumaginninnermi ikiorsiissutit allat aningaasarsianut akileraaruteqaataasussanut ilaareersut, soorlu utoqqalilluni siusinaartumillu soraarnerussutisiat, sungiusaqqinneqarnermi sulinngiffeqarnermilu tapiissutit kiisalu ilinniagaqarnersiutit, assigalugit pineqalissapput.
Annertussusileriikkamik ikiorsiissutinik pisariaqartitsinerlu naapertorlugu ikiorsiissutinik pissarsisartut aningaasarsiaasa atorsinnaasaasa annertuumik appariaateqarnissaat Naalakkersuisut siunertarinngimmassuk aammattaaq Naalakkersuisut ukiaanerani ataatsimiinnermi matumani siunnersuuteqarput annertussusileriikkamik ikiorsiissutit aningaasarsiat minnerpaaffissaasa 90 procentiisut annertussuseqalersillugit qaffanneqassasut, kiisalu pisariaqartitsineq naapertorlugu ikiorsiissutit akileraarutinut akileraarnissamik kinguneqartassanngitsut, tassa akileraarutissat tamarmiusut isertitap taassuma akileraarutitaasut annertutigisunik appartinnerisigut.
Aammattaaq kinguaariit nikinneri oqilisaassiffigiumallugit iluanaarutisianik akileraarusiisarnerup arlalitsigut teknikkikkut allannguuteqarnissaa Naalakkersuisut siunnersuutigaat, tassa siunnersuutigineqarmat kinguaariit nikinnissaannut atatillugu aningaasaatinik appartitsisoqartillugu aningaasaatinik agguaassinermi iluanaarutisiat nikingassutaannik akileraarusiisoqartalernissaa. Tamatuma aamma selskabit sulisorisamik aktiaataannik tuniniaqqitassatut utertitsillutik pisineranni kiisalu selskabit aningaasanik niuerfinni nalunaarsortissimasut nammineq aktiaatiminnik utertitsillutik pisineranni atuuttarnissaa siunnersuutaavoq.
Kiisalu iluanaarniartoqarnissaa pinngitsoortinniarlugu Naalakkersuisut siunnersuutigaat, iluanaarutisiat nikingassutaannik akileraarusiisarneq aamma atuutissasoq selskabip atorunnaarsinnerani iluanaarutinut, tassa selskabimi tassani aktianik amerlanerpaanik piginnittuusoq pigisanik selskabimut allamut aamma aktianik amerlanerpaanik piginnittuuffigisaminut tunisaqarsimatillugu.
Teknikkikkut allannguutinut taakkununnga tunngatillugu aammattaaq innersuussutigissavakka siunnersuummut oqaaseqaatit.
Taamatut oqaaseqarlunga aningaasarsianit akileraarutit pillugit Inatsisartut inatsisaata allanngortinneqarneranik siunnersuut Naalakkersuisut sinnerlugit Inatsisartunut suliassanngortippara, aammalu Akileraartarnermut Akitsuutinullu ataatsimiititaliamit suliarineqareerpat aappassaaniigassanngortillugu.