Ilaqutariinnermut Pisortaqarfik
Akileraartarnermi Pisortaqarfik
Ulloq 25. september 2004
J.nr. 24.01.01-00008

 

Annertussusileriikkanik ikiorsiissutit aammalu pisariaqavissuinnarnut annertusisamillu ikiorsiissutit aningaasarsianut akileraaruteqaataasussanut naatsorsuunneqartalernissaannut atatillugu sunniutissat pillugit allakkiaq.

Ikiorsissutit pineqartut aningaasarsianut akileraaruteqaataasussanut naatsorsuunneqartalernerini aammalu siunnersuutigineqartup sunniutissai, siunnersuutip siunnersuutigineqarneratuut iluseqartillugu akuersissutigineqassappat, siunnersuummut isumaliuutigineqartut allakkatigut matumuunakkut saqqummiunneqarput. Ilaatigut assersuutinik arlaqartunik saqqummiussinikkut, uani ilanngunneqartutut.

Kalaallit Nunaata aningaasarsiorneranut Siunnersuisoqatigiittut ataatsimiititap, Nunatsinni akileraarusersueriaatsip nunanut allanut sanilliullugu ataatsimiititap aamma arlaqartut, pisortanit ikiorsiissutitut tunniunneqartartut maannakkutut maleruagassatigut allannguuteqartinnagit ataqatigiinneqartitsinikkut aammalu kajujuummisitsilernissamut ajornartorsiortitsineri erseqqissaatigisarpaat, taamaasilluni inunnut arlaqaqisunut piffissami aalajangersimasumi annertussusileriikkanik ikiorsiissutinik pisartagaqartarneq sulinermit inuussutissarsiuteqarnermut sanilliullugu imminut akilersinnaanerulertarluni.

Ajornartorsiut taanna inunnut akissaatikinnerusunuinnaanngitsoq atuuppoq, taamaalilluni assersuutigalugu assistenti, overassistenti pisortat isumaqatigiissutaat naapertorlugit akissaatillit aamma perorsaasut pisuni assigiinngitsuni ajunnginnermik atugaqarlutik piffissap ilaani suliffissaarusimasarlutik ilinniarsimanngitsutut sulisinnaasut akissaatit minnerpaaffissaannnik akissarsiaqarlutik . Maleruagassat maannamut atuuttut inunnut arlaqartunut piffissap ilaani suliffissaarusimaannarnermiititsiinnaratik aamma ilinniagaqalernissamut kajumilersitsinngillat. Ajornartorsiutaasoq kisimiittunut aappariittunullu atuuppoq, taamaattorli kisermaanut kisimiillutik meeqqanut pilersuisuusunut annertunerusumik atuulluni.

Naggataatigullu naatsorsueqqissaartarnerup tunngaatigut ersersinneqartarpoq maannamut isertitat naatsorsoqqissaarnerini, aningaasarsiat akileraaruteqaataasussat agguataarneqarneranni annertoorujussuarnik assigiinngitsoqartoq. Assigiinngissutsit inunni ataasiakkaani atuisinnaanermut periarfissaasunut tamatigut takussutissiisanngikkaluartut. Naalakkersuisulli erseqqissassavaat nunatsinni suli isertitatigut assigiinngitsoqarnera annertuallaarmat, naatsorsueqqissaarnerillu pissutsinik piviusunik takussutissiinngitsut taasariaqarmat.

Naalakkersuisut siunnersuutaat akuersaarneqassagaluarpat atuuttuutinneqalernerata kingunerissavaa, annertussusileriikkanik ikiorsiissutitut tunniunneqartut aningaasarsianut akileraaruteqaataasussanut naatsorsuunneqartalissasut, peqatigisaanik akeq atuuttoq ilinniagaqarsimanngitsunut akissaatit minnerpaaffissaata 55%-aniit 90%-anut qaffatsinneqassalluni, ikiorsiissutilli pisariaqavissuinnarnut ikiorsiissutitut tunniunneqartut aningaasarsianut akileraaruteqaataasussanut naatsorsuunneqassapput, taakkuali akileraaruserneqassanngillat. Ikiorsiissutinik taakkunannga marlussunnik pisartunut allannguuteqartitsinerit aningaasatigut nammineq atorsinnaasatigut allannguuteqartitsinermik kinguneqarnavianngillat.

Taamaattorli pineqartunut ikiorsiissutit ukiumi tunniussivigineqarnerini aningaasarsiat akileraaruteqaataasussat naatsorsorneqarnerini amerleriaateqartitsisoqarneranik kinguneqartitsissaaq maannamut maleruagassaasunut sanilliutissagaanni, tamannalu ikiorsiissutinik pisartagaqarnermut sunniuteqassaaq soorlu ineqarnermut tapiissutit, meeqqanut tapiissutit aamma paaqqinnittarfinnut akiliutaasussat annertussusilerneqarnerani, tassami ukiut marluk sioqqullugit aningaasarsiat akileraaruteqaataasussatut isertitaasimasut ikiorsiissutit pineqartut tunniunneqalernerini tunngaviusarmata.

Taamaaliornikkut siunertaanngilaq inuit ataasiakkaat sulinermikkut/ikiorsiissutinit pisartagaqarnermikkut isertaasa annikillisarniarnissaat, kisiannili ukiut marluk qaangiutereernerisigut ajornartorsiutaasarsinnaasut aaqqiissuteqarfigerusullugit iliuuseqarfiulluni, aningaasarsiat akileraaruteqaataasussat naatsorsuiffigineqarnerini isertat ataasiakkaat ilanngunneqassanngippata.

Pisuni assigiinngitsuni takussutissanik suliaqartoqarsimavoq, suliat taakkua takutippaat inuit ataasiakkaat atugassariumaagaasa annertussusaat, taakkua ineqarnerminnut aamma meeqqerivinnut akiliuteqareernerisigut aammalu pisortanit meeqqanut tapiissutisereernermi, kisermaanut aappariinnullu pissutsini assigiinngitsuni pisoqarnerani.

Malugeqquneqarpoq takussutissiani assersuutitut ilanngussani inuit ataasiakkaat inuuneranni pissutsit piffissani allannguuteqartarsimasinnaaneri eqqarsaatigineqanngimmata, soorlu pineqartoq katissimappat/avissimappat, akissaatilunnermut suliffittaarpat imaluunniit akissaatiginnermut suliffittaarpat, meeqqat perorneri meeqqerivinniikkunnaarnerinik kinguneqartumik il.il. Kisermaanuttaaq naatsorsuusiornerni meeqqanut akilersuutaasimasinnaasut ilanngullugit naatsorsuutaasimanngillat, taakkua annertussusaat assigiimmata apeqqutaatinnagu kisermaajulluni pilersuisoq akissaatit minnerpaaffiannik akissaasersorneqarnersoq perorsaasutulluunniit akissarsiornersoq.

Tulliuttuni pissutsini assigiinngitsuni pisoqarnerani, naatsorsuutit kisermaat atuisinnaassusaannut takussutissiisut eqqartorneqassapput, ilaatigut maleruagassat maannamut atuuttut tunngavigalugit ilaatigullu Naalakkersuisut allannguutissatut siunnersuuteqarnerat tunngavigalugu naatsorsuutit, tassami aappariinnut naatsorsuinerit assigiimmagit.

Assersuutigineqartuni naatsorsuinerni akissaateqarfiit assigiinngitsut marluk aallaavigineqarput:

1. Akissaatit minnerpaaffissaat akunnermut 66 kr., qaammammusiat 11.400 kr.-t nalingat.
2. (perorsaasoq) akissaatit akunnermut 90 kr., qaammammusiat 15.600 kr.-t nalingat.

Taakkununnga naatsorsuutigineqarpoq sulinngiffeqarnerminni akissarsiaqartartut aamma sulinermikkut isertitamik 1,5%-anik sulinngiffeqarnissamut ajunngitsorsianik pissarsisartut.

Qulaani inuit pineqartut qitornaqarput 0, 1 imaluunniit 2-nik meeqqerivimmiittartunik aamma sap. akunnerini 0, 6½ imaluunniit 13-ini suliffeqaratik piffissanilu taakkunani annertussusileriikkanik ikiorsiissutinik pisartagaqartarlutik. Ineqarnermut tunngassuteqartut inoqutigiit amerlassusaannut naapertuupput, ineqarnermullu tapiissutit maannamut maleruagassat atuuttut naapertorlugit naatsorsugaallutik.

Meeqqerivinnut akiliutaasartut Nuummi 2004-imi atuuttuusut naapertorlugit naatsorsugaapput. Meeqqerivinniititat meeqqat arlaliutillugit meeqqerivinnut akiliutaasartup appasinnerpaap affaanik nalilerlugu qatanngutinut ilanngaasiinikkut akiliuteqartitsisoqarpoq.

Kiisalu naatsorsuinermi akileraartarnermut allannguuteqartitsinerit 2004-imi ukiakkut ataatsimiinnermi aalajangiunneqartut eqqarsaatigineqareerput, taamaasillutik 2005-imiit atuutilersumik kisermaanut inummut ilanngaatip aamma ilanngaatip naliginnaasup 58.000 kr.-inut qaffanneqarnerisigut aappariinnullu marloriaataanik, aammalu 2005-imiit atuutilersumik akileraarut unerartinneqartussaq tamakkiisoq 40%-imiit 42%-imut qaffannerisigut.

Ataani naatsumik naatsorsuinermi pingaarnertut ersiutaasut arlallit nassuiarneqassapput.

Maannamut maleruagassaasut atuutsillugit, qitornaqaraanni qitornaqanngikkaanniluunniit, piffissap ilaani annertussusileriikkanik ikiorsiissutinik pisartagaqartuunissaq kisermaanut tamanut aningaasatigut imminut akilersinnaajuarpoq.

Ullumikkut maleruagassat atorlugit kisermaap marlunnik qitornallip tamakkiisumillu suliffeqartup akissaatit minnerpaaffissaanni akissarsiortup (akunnermut 66 kr.), akileraareerluni ineqarnerminullu akiliuteqareerluni aamma meeqqerivinnut akiliuteqareerluni 2004-imi 79.704 kr.-nit atugassarissavai, 2007-imi 85.377 kr.-inut qaffassallutik, tak. ilanngussaq 1. Kisermaap pineqartup akissaatit minnerpaaffissaanni akissarsiortup ukiumut sap. akunnerini 13-ini suliffeqanngitsup annertussusileriikkanillu ikiorserneqartup 2004-imi 99.459 kr.-nit atugassarissavai, 2007-imut 103.789 kr.-inut qaffassallutik, tak. ilanngussaq 2. Maleruagassat allanngussanngikkaluarpata atugassaritinneqartut 2007-imi, ukiumut 18.000 kr.-nit missaat, imaluunniit qaammammut 1.500 kr.-nit assigiinngissutaallutik.

Perorsaasumut (akunnermut 90 kr.) marlunnik qitornaqartumut pissutsit assingupput, taamaattorli assigiinngissut annikinnerulluni. Taamaasilluni perorsaasup tamakkiisumik suliffeqartup 2004-imi 91.385 kr.-nit atugassarissavai 2007-mi 92.745 kr.-inut qaffassallutik, tak. ilanngussaq 4. Inuk pineqartoq sap. akunnerini 13-ini suliffissarsiortutut inissisimasimaguni annertussusileriikkanik ikiorsiissutinik pisartagaqarluni, maleruagassat allanngussanngikkaluarpata 2004-imi 99.640 kr.-inik atugassaqassaaq 2007-imut 101.949 kr.-inut qaffassallutik, tak. ilanngussaq 5.

Perorsaasoq kisermaaq tamakkiisumik suliffeqartoq marlunnillu qitornalik ukioq 2007-imi taamaasilluni ukiumut 11.044 kr.-inik ikinnerusunik atugassaqartinneqassaaq, kisermaamut ilinniagaqanngitsumut akissaatit minnerpaaffissaanni akissarsialimmut, marlunnillu qitornaqartumut ukiumullu sap. akunnerini 13-ini suliffissarsiortutut inissisimasumut naleqqiutissagaanni, maannamullu maleruagassaasut atuutsinneqarpata. Naalakkersuisut isumaqarput, maleruagassat taama aaqqissuussat inunnut ataasiakkaanut ilinniagaqartitserusulernermik imaluunniit tamakkiisumik suliffissaqartitserusulernermut kajumissaataanngilluinnartut.

Naalakkersuisut siunnersuutaat akuersissutigineqassappata tamatuma kingunerissavaa tamakkiisumik suliffeqartunut tamanut qitornarisat amerlassusaat apeqqutaatinnagit maannamut maleruagassanut atuuttunut sanilliullugu aningaasat atugassat allannguuteqassanngitsut, illuatungaanili kisermaaq marlunnik qitornalik akissaatit minnerpaaffiannik akissaateqarluni sulisuusoq aammalu sap. akunnerini 13-ini suliffissarsiortuusoq piffissamilu tassani annertussusileriikkanik ikiorsiissutinik pisartagaqartoq ukiuni aningaasarsiorfiusuni 2005 aamma 2006-imi aningaasat atugassai qaffariaateqalaassapput, tassa ilanngaatit qaffaavigineqarnerisa kinguneranik.

2007-imi meeqqerivinnut, meeqqanut tapiissutit aamma ineqarnermut tapiissutit naatsorsorneqalerpata 2005-imi aningaasarsiat akileraaruteqaataasut tunngavigineqassapput pineqartullu pisortanit ikiorsiissutitut tunniussat allanngungaarnagit tigusassavai atuisinnaaneralu kisermaamut akissaatit minnerpaaffissaanni akissarsiortumut tamakkiisumillu suliffeqartumut, marlunnik qitornalimmut sanilliullugu allaanerungaarnaviaratik.

Inunnut ikiorsiissutinik, pisortanit ikiorsiissutit pillugit Inatsisartut peqqussutaanni kapitel 5 aamma 6-imi taaneqartunik pisartut (pisariaqavissuinnarnut aamma annertusisamik ikiorsiissutit) eqqarsaatigissagaanni, Naalakkersuisut siunnersuutaat allannguuteqartitsissanngilaq, tassami ineqarnermut, meeqqerivinnut il.il. akitsutaasinnaasut, inuit pineqartut piffissani taakkunanerpiaq ikiorsiissutinik pisartagaqartillugit, pisortanit matussuserneqartussaammata.

Piffissami sivikitsumi inuup ikiorsiissutinik pisartagaqartuusup taamaallaat ikiorsiissutinik pisartillugu, pisuni ataasiakkaani annertunngikkaluamik pisoqartarsinnaavoq ikiorsiissutit assigiinngitsuusut aaqqiissuteqarfigilersillugit allannguuteqartitsisumik tassami aningaasarsiat akileraaruteqaataasussat aallaavigalugit ikiorsiissutit tunniunneqartarmata, pingaartumik ineqarnermut tapiissutit, taannaammammi procentinngorlugu annikitsunnguamilluunniit nikeriartoqartillugu sunniuteqalersinnaasartoq.

Meeqqanut tapiissutit aamma meeqqerivinnut akiliutaasartut annertussusaat eqqarsaatigigaanni, isertitatigut killissarititaasut takutiinnarpaat, annertusiartuaartumik isertitatigut killissarititalersuineq illersorneqarsinnaalluartoq. Annertusiartuaartumik isertitatigut killissarititaliisimaneq inuit allat akissarsiorlutik aningaasarsiaasa akileraaruteqaataasussat assigalugit maleruunnikkut naleqqussartuarnerisigut. Nuummi meeqqerivinnut akiliuteqalersarneq aatsaat aallartittarpoq ukiumut aningaasarsiat akileraaruteqaataasussat 100.000 kr.-inngorsimatillugit. Akiliutigineqartussaq annertusiartortarpoq isertitarisat annertusiartornerat naapertorlugu. Meeqqanut tapiissutit meeqqamut ataatsimut ukiumut 5.610 kr.-iuvoq, ukiumut aningaasarsiat akileraaruteqaataasussat 130.000 kr.-iuppata taakkualuunniit ataaniippata. Ukiumut aningaasarsiat akileraaruteqaataasussat 130.001 aamma 180.000 akornginiitsillugit meeqqamut tapiissutit meeqqamut ataatsimut 3.990 kr.-iuvoq, aningaasarsiallu akileraaruteqaataasussat 180.000 kr.-t qaangersimatillugit meeqqamut tapiissutit 2.370 kr.-iulluni, aningaasarsiallu akileraaruteqaataasussat 280.000 kr.-t qaangersimatillugit tapiissutinik tunniussisoqarsinnaajunnaartarluni .

 

Takussutissiaq 1: Qarasaasiatigut pigineqanngilaq
Kisermaap marlunnik qitornallip aammalu akissaatit minnerpaaffianni akissaateqarluni tamakkiisumik sulisup, maannamut malerugassat atuuttut naapertorlugit atugassaqarnissaminut periarfissai.

Takussutissiaq 2: Qarasaasiatigut pigineqanngilaq
Kisermaap marlunnik qitornalik aammalu akissaatit minnerpaaffianni akissaateqarluni sulisup aamma sap. ak. 13-ini suliffissaaleqinermi annertussusileriikkanik ikiorsiissutinik pisartagaqarsimasup maannamut malerugassat atuuttut naapertorlugit atugassaqarnissaminut periarfissai.

Takussutissiaq 3: Qarasaasiatigut pigineqanngilaq
Kisermaap marlunnik qitornallip aammalu akissaatit minnerpaaffianni akissaateqarluni sulisup aamma sap. ak. 13-ini suliffissaaleqinermi annertussusileriikkanik ikiorsiissutinik pisartagaqarsimasup, malerugassat nutaat naapertorlugit atugassaqarnissaminut periarfissat.

Takussutissiaq 4: Qarasaasiatigut pigineqanngilaq
Kisermaap marlunnik qitornallip aammalu akunnermut 90 kr.-inik akissaateqarluni sulisup malerugassat maannamut atuuttut naapertorlugit atugassaqarnissaminut periarfissai.

Takussutissiaq 5: Qarasaasiatigut pigineqanngilaq
Kisermaap marlunnik qitornallip aammalu akunnermut 90 kr.-inik akissaateqarluni sulisup aamma sap. ak. 13-ini suliffissaaleqinermi annertussusileriikkanik ikiorsiissutinik pisartagaqarsimasup malerugassat maannamut atuuttut naapertorlugit atugassaqarnissaminut periarfissai.

Takussutissiaq 6: Qarasaasiatigut pigineqanngilaq
Kisermaap marlunnik qitornallip aamma akunnermut 90 kr.-inik akissaateqarluni sulisup aamma sap. ak. 13-ini suliffissaaleqinermi annertussusileriikkanik ikiorsiissutinik pisartagaqarsimasup malerugassat nutaat naapertorlugit atugassaqarnissaminut periarfissai.