07. apriili 2004

UPA 2004/38

 

Tipsernermit lottornermillu iluanaarutinit agguaassisarneq pillugu Inatsisartut inatsisaata allanngortinneqarneranik Inatsisartut inatsisissaannut nr. xx, xx. xx 2004-meersumut siunnersuut

 

 

Oqaaseqaatit nalinginnaasut

1. Siunnersuutip siunertaa

A. Imarisaa pingaarneq

Siunnersuutikkut erseqqissarniarneqarpoq aningaasat, Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqataasa siunertanut, tipsernermit lottornermillu iluanaarutinit agguaassisarneq pillugu Inatsisartut inatsisaanni aalajangersakkat malillugit agguaanneqarfigisagaannit allaanerusunut atorneqarsinnaanissaat.

B. Siunnersuutip tunuliaqutaa

Pinnguaatit, eqqorniaasitsinerit eqquiniunnerillu ilaat pillugit danskit inatsisaat 2003-mi upernaakkut allanngortinneqarmat (inatsit nr. 204, 26. marts 2003-meersoq) Kalaallit Nunaanni tipsernermi lottornermilu kaaviiaartinneqartartunit naalagaaffimmut akitsuummut akilerneqartartut (ukiumut 8 mio. kr.-it missingi) 2004 aallarnerfigalugu akilerneqartussaajunnaarput. Tassunga taarsiullugu naalagaaffiup ataatsimut tapiissutai taakku annertoqataanik appartinneqassapput (ukiumut 8 mio. kr.-it missinginik). Inatsisip allanngortinneqarneratigut tipsernermi lottornermilu kaaviiaartitanit sinneqartoorutinik agguaassisarnerup aaqqissuuteqqinneqarnissaa Folketingimit atuutilersinneqarpoq.

Ataatsimoortumik tapiissutit appariaataat matussuserniarlugit Namminersornerullutik Oqartussat Tipstjenestip sinneqartoorutaanit pissarsiarisartagaannit (konto pingaarneq 24.11.21) 8 mio. kr.-it 2004-mut aningaasanut inatsit aqqutigalugu Landskarsimut nuunneqarput. Allannguinerup Landskarsimut annaasaqaataannginnissaa tassuunakkut qulakkeerneqarpoq.

Matumuuna allannguineq suleriaatsimut tunngassuteqarpoq. Allannguineq naalagaaffimmut, Namminersornerullutik Oqartussanut aammalu tipsernermit lottornermillu iluanaarutinit tapiissutinik pissarsisartunut aningaasatigut malunniuttussaanngilaq.

Allannguisimaneq tipsernermit lottornermillu iluanaarutinit agguaassisarneq pillugu Inatsisartut inatsisaanni ilaanngilaq. Tamanna maanna siunnersuutikkut aaqqinniarneqarpoq, tassa aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqataasa siunertanut allanut atorneqarsinnaanerat Inatsisartut inatsisaanni allassimalersussanngorlugu.

2. Siunnersuummi immikkoortut pingaarnerit

A. Inatsit atuuttoq

Kalaallit Nunaanni tipsernermit lottornermillu kaaviiaartitat danskit naalagaaffiannut akitsuummik 16 pct.-imik maannamut akitsuuserneqartarput. Tipsernermit lottornermillu kaaviiaartitat 2001-imi 49 mio. kr.-it missaanniissimapput naalagaaffimmullu akitsuut 7,8 mio. kr.-it missaanniissimalluni.

Namminersornerullutik Oqartussat tipsernermit lottornermillu pissarsiarisartagaat Tipstjenestip sinneqartoorutaasa ilagaat. Sinneqartoorutit taakku tipsernermit lottornermillu kaaviiaartitat eqqugassiissutinik, allaffissornermut il.il. ilanngaatinik ilanngareerlugit pinngortarput. Tipstjenestip 2001-imi 1.354 mio. kr.-it sinneqartoorutigai, taakkunanngalu 12,2 mio. kr.-it missingi Namminersornerullutik Oqartussanit pissarsiarineqarput.

Pinnguaatit, eqqorniaasitsinerit eqquiniunnerillu ilaat pillugit inatsit naapertorlugu Namminersornerullutik Oqartussat Tipstjenestip sinneqartoorutaanit pissarsiatik siunertanut tamat iluaqutissaannut atugassatut agguaattussaavaat. Tamanna naapertorlugu tipsernermit lottornermillu iluanaarutinit agguaassisarneq pillugu Inatsisartut inatsisaanni § 1, imm. 1-imi aalajangersarneqarpoq, pinnguaatit, eqqorniaasitsinerit eqquiniunnerillu ilaat pillugit inatsit naapertorlugu aningaasat ukiumoortumik Kalaallit Nunaanni atugassanngortinneqartartut siunertanut tamat iluaqutissaannut assigiinngitsunut Naalakkersuisunit agguaanneqartassasut.

Pinnguaatit, eqqorniaasitsinerit eqquiniunnerillu ilaat pillugit inatsit 2003-mi upernaakkut allanngortinneqarmat, Kalaallit Nunaanni tipsernermit lottornermillu sinneqartoorutit siunertanut tamat iluaqutissaannut Naalakkersuisunit agguaanneqartarnissaannik piumasaqaat atuutitiinnarneqarpoq. Nutaatulli aalajangerneqarpoq aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqatai ukiumoortumik ataatsimoortumik tapiissutinit ilanngaatigineqartut siunertanut allanut Namminersornerullutik Oqartussanit atorneqarsinnaasut.

Tassa aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqatai Namminersornerullutik Oqartussat siunertanut, siunertanit tamat iluaqutissaannit allaanerusunut siunissami atorsinnaalissavaat.

B. Naalakkersuisut isummersuutaat

Naalagaaffimmut akitsuutip 2004-mi atorunnaarsinneqartup annertussusia Tipstjenestip aatsaat 2005-imi naatsorsorsinnaavaa. Taassuma kingorna aamma ukiuni aggersuni ataatsimoortumik tapiissutit appariaatissaasa annertussusii, aammalu ataatsimoortumik tapiissutit appariaataat matussuserniarlugit Namminersornerullutik Oqartussat Landskarsimut nuuttagassaasa annertussusii ilisimaneqalissapput. Assersuutigigaanni naalagaaffimmut akitsuut 2004-mi atorunnaarsinneqartoq 8 mio. kr.-iusoq, taava 2004-mi ukiunilu aggersuni ataatsimoortumik tapiissutissat 8 mio. kr.-inik appartinneqassapput. Tassunga ilutigitillugu Namminersornerullutik Oqartussat 2004-mi ukiunilu aggersuni Kalaallit Nunaata Tipstjenestip sinneqartoorutaanit pissarsiarisagaanit 8 mio. kr.-it Landskarsimut nuuttassavaat.

Pinnguaatit, eqqorniaasitsinerit eqquiniunnerillu ilaat pillugit inatsisip allanngortinneqarneratigut allannguineq qanorluunniit pisoqaraluarpat ukiut arlallit qaangiunneranni Kalaallit Nunaannut aningaasatigut pitsaaquteqassaaq. Aningaasat Kalaallit Nunaata Tipstjenestip sinneqartoorutaanit pissarsiarisagaanit Landskarsimut nuunneqartartussat annertussusii 2004-p kingorna aalajangersimasumik annertussusilerneqartussaammata allannguinerup kingunerissavaa, tipsernermit lottornermillu kaaviiaartitat qaffariaataasa tapiissutinik pissarsisussanut agguaassassat amerlanerulernissaat. Naatsorsuutigisalli akerlianik 2004-p kingorna tipsernermit lottornermillu kaaviiaartitat appariaateqassagaluarpata, aningaasanut inatsisissap suliarineqarneranut atatillugu isummerfigineqarsinnaavoq aningaasat 2004-imisut annertutigisut Landskarsimut nuunneqartarnissaat ingerlaannassanersoq imaluunniit aningaasat tapiissutinik pissarsisussanut tunniunneqartussat ikilisikkumanagit nuunneqartartussat ikilisinneqassanersut.

Oqaatigineqareersutulli Naalakkersuisut naatsorsuutigaat tipsernermit lottornermillu kaaviiaartitat ukiut arlallit ingerlaneranni suli qaffakkiartorumaartut, taamaalillutillu aningaasat siunertanut tamat iluaqutissaannut, tipsernermit lottornermillu iluanaarutinit agguaassisarneq pillugu Inatsisartut inatsisaanni allassimasunut atugassatut agguaanneqartussat amerliumaartut.

C. Inatsisissatut siunnersuut

Pinnguaatit, eqqorniaasitsinerit eqquiniunnerillu ilaat pillugit danskit inatsisaata allanngortinneqarnerata, 2004-mut aningaasanut inatsisip aammalu tipsernermit lottornermillu iluanaarutinit agguaassisarneq pillugu Inatsisartut inatsisaata ataqatigiissuunissaat siunnersuutikkut qulakkeerneqarpoq.

Siunnersuummi aalajangerneqarpoq aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqatai ataatsimoortumik tapiissutit ilanngarneqarnerannut matussutissatut Landskarsimut nuunneqarsinnaasut.

3. Pisortanut aningaasatigut allaffissornikkullu sunniutissai

Siunnersuut pisortanut aningaasatigut allaffissornikkulluunniit sunniuteqartussaanngilaq.

4. Inuussutissarsiortunut il.il. aningaasatigut allaffissornikkullu sunniutissai.

Siunnersuut inuussutissarsiortunut, peqatigiiffinnut, kattuffinnut il.il. aningaasatigut allaffissornikkulluunniit sunniuteqartussaanngilaq.

Allannguinerulli tipsernermit lottornermillu isertitat, ilaatigut tapiissutinik pissarsisussanut agguaanneqartussat piffissap ingerlanerani amerliartornissaannik kinguneqarnissaa naatsorsuutigineqarpoq.

5. Avatangiisinut sunniutissai

Siunnersuut avatangiisinut sunniuteqartussaanngilaq.

6. Innuttaasunut allaffissornikkut sunniutissai.

Siunnersuut innuttaasunut allaffissornikkut sunniuteqartussaanngilaq.

7. Naalagaaffeqatigiinnermut namminersulernissamullu tunngasut

Siunnersuut oqaatigineqareersutuut pinnguaatit, eqqorniaasitsinerit eqquiniunnerillu ilaat pillugit danskit inatsisaata allanngortinneqarneranut attuumassuteqarpoq.

Taassuma saniatigut naatsorsuutigineqanngilaq siunnersuutip naalagaaffeqatigiinnermut namminersulernissamulluunniit ikaarsaariartuaarnissamut sunniuteqarnissaa.

8. Oqartussaasut kattuffiillu tusarniaavigineqartut.

Siunnersuut oqartussaasunut kattuffinnullu makkununnga tusarniaassutigineqarnikuuvoq:

Kalaallit Nunaanni Timersoqatigiiffiit Kattuffiat

Team Grønland

Sorlak

Naalakkersuisut Allattoqarfiat

Aningaasaqarnermut Pisortaqarfik

Akileraartarnermut Pisortaqarfik

Ilaqutariinnermut Pisortaqarfik

Attaveqaqatigiinnermut Ineqarnermullu Pisortaqarfik

Attaveqaqatigiinnermut Ineqarnermullu Pisortaqarfik, Akileraartarnermi Pisortaqarfik, Aningaasarsionermut Pisortaqarfik, Ilaqutariinnermullu Pisortaqarfik tusarniaanermut akissuteqarput, siunnersuummullu oqaaseqaatissaqaratik.

Inatsisileriffiup inatsisip suleriaatsimut tunngasortaanut oqaaseqaatai siunnersuutip suliarineqarnerani ilanngunneqarput.

 

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut

Nr. 1-imut.

Siunnersuutaavoq aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqataasa siunertanut, tipsernermit lottornermillu iluanaarutinit agguaassisarneq pillugu Inatsisartut inatsisaanni § 1, imm. 1-imi taaneqartunit allaanerusunut atorneqarsinnaanissaat.

Siunnersuutip pinnguaatit, eqqorniaasitsinerit eqquiniunnerillu ilaat pillugit inatsisip allanngortinneqarneranik inatsimmi nr. 204, 26. marts 2003-meersumi § 6 I, oqaaseqatigiit aappaannik tunngaveqartup periarfissiissutigissavaa, aningaasat Kalaallit Nunaanni tipsernermit lottornermillu naalagaaffimmut akitsuutip 2004-mi atorunnaarsinneqartup annertoqqataasa Kalaallit Nunaata Tipstjenestip sinneqartoorutaanit pissarsiarisagaanit, ukiumoortumik aningaasanut inatsisit aqqutigalugit Landskarsimut nuunneqartarnissaat.

 

§ 2-mut

Inatsisartut inatsisaata ullormi 1. maj 2004-mi atuutilernissaa siunnersuutaavoq.

Tassunga ilutigitillugu siunnersuutaavoq Inatsisartut inatsisaata ulloq 1. januar 2004-miit atulernissaa, tassa piffissaq 2004-mut aningaasanut inatsisip atortuulerfia assigalugu atuutilernissaa qulakkeerniarlugu. Allannguut 2004-mut aningaasanut inatsisip aalajangiunneqareersup kingunerimmagu siunnersuutip ulloq 1. januar 2004-miit atulersinnissaa akornutissaqartinneqanngilaq.