20. september 2004 UKA 2004/27
Inissiani attartortittakkani ineqarnermut tapiissutit pillugit inatsisartut peqqussutaata allanngortinneqarneranik inatsisartut peqqussutissaattut siunnersuut.
Saqqummiussissut.
(Ilaqutariinnermut Peqqissutsimullu Naalakkersuisoq)
Siullermeerneqarnera.
Aallaqqaammut maluginiaqqussavara siunnersuut nassuiaatitaalu aaqqitat 17. september 2004-imik ullulikkat agguaanneqarsimammata, siunnersuummut siusinnerusukkut agguaanneqartumut 3. august 2004-imi ullulerneqarsimasumut taartissatut.
Allannguutissatut siunnersuutip saqqummiunneqarneratigut Naalakkersuisut anguniagaat tassaavoq, ineqarnermut akiliutit allanngortinneqarnerisa peqatigisaanik ineqarnermut tapiissutit iluarsiivigine-qartarnissaat. Ilanngullugu Naalakkersuisut kissaatigisimavaat inatsisitigut tunngavigineqartut erseqqissarneqarlutillu pisariillisarnissaat.
Ineqarnermut akiliutit allanngortinneqassappata qaammatisiutit ukiuata ingerlanerani ineqarnermut tapiissutit iluarsiivigineqarnissaat peqqussutip allanngortinneqarnissaanik siunnersuummi periarfissinneqassaaq. Tassuunakkut attartortup inatsisitigut inissisimanera pitsanngortinneqassaaq, ine-qarnermut akiliut qaffassagaluarpat peqatigisaanik ineqarnermut tapiissutit iluarsiivigineqarnissaat tassuunakkut qulakkeerneqassammat, massakkutut qaammatisiutit ukiuat malillugu aatsaat ine-qarnermut tapiissutit iluarsiivigineqartarunnaarlutik.
Inatsisartut Ombudsmandiata maleruagassat ullumikkut atuuttut isornartorsiorsimavai, tamatumani ineqarnermut tapiissutit ukiumoortumik iluarsiivigineqartarnerata annertussusianut atatillugu ine-qarnermut tapiissutisisartut inoqutigiit amerlassusii, katitigaaneri isertitanullu tunngasut pillugit paasissutissartalimmik nutaamik qinnuteqaammik nassitsisarmata. Isornartorsiuinermi pineqarpoq paasissutissat uani pineqartut tassaammata kommunip pigereertussaasai.
Ukiut tamaasa nutaamik qinnuteqannginneq ullumikkut kinguneqartarpoq pineqartup ineqarnermut tapiissutinik pinngitsoorneranik. Allannguutissatut siunnersuummi qulakkeerneqassaaq kommunit ukiumoortumik ineqarnermut tapiissutinik iluarsiiviginninneranni nutaamik qinnuteqaateqartoqartassanngimmat.
Taamaattorli ineqarnermut tapiissutisisartut paasissutissanik nutaanik ineqarnermut tapiissutinut pingaaruteqarsinnaasunik suli paasissutissiisussaatitaapput. Kommunini misilittakkat takutippaat, paasissutissat kommunimi pigineqartut allannguteqarsimannginnerisa qulakkeerneqartarnissaat pisariaqartoq.
Siunnersuut allaffissornikkut kommuninut oqilisaataassaaq innuttaasunullu malunnaatilimmik oqilisaataassalluni, taakkua imminut tunngasunik allanngortoqarsimatinnagu ukiut tamaasa nutaamik qinnuteqartariaarutissammata.
Ineqarnermut tapiissutit ukiumoortumik iluarsiivineqartarnerat taamaalilluni kommunit ingerlattalissavaat, paasissutissat kommunip pigeriigai kiisalu attartortup inuttut atukkamini allannguutit pillugit paasissutissiissutai aallaavigalugit.
Ineqarnermut tapiissutit qaammatisiutit ukiuannik malinnaasussaanerinut ullumikkut maleruagassat kingunerisartagaat tassaavoq najugaqaqatigiiffiit qaammatisiutit ukiuata naanerani naatsorsuutinik ukiumoortunik tunniussisartussaammata. Najugaqaqatigiiffiit tamatumunnga pinngitsaalineqanngillat, kisiannili attartortut eqqarsaatigalugit taamaaliortarlutik, ineqarnermut akiliutit allanngorneranni peqatigisaanik ineqarnermut tapiissutit iluarsiivigineqartussaasanngimmata. Periuseq tamanna inissiaatileqatigiiffiinnut aammali Namminersornerullutik Oqartussat Kommunillu kukkunersiuisuinut annertuumik sulerulutsitsisarpoq. Taamaalilluni ullormi ataatsimi missingersuutinik naatsorsuutinillu tunniussisartussat najugaqatigiiffiit 100-nit amerlanerupput, soorluttaaq tamarmik avataanit kukkunersiuisumit uppernarsaatinik pissarsisartussaasut. Allannguut najugaqatigiiffinnut allaffissornikkut oqilisaataassaaq
Allannguutissatut siunnersuutip kingunerisassaa tassaavoq, najugaqaqatigiiffiit qaammatisiutit ukiuannit allaanerusumik naatsorsuutinik ukiumoortunik tunniusserusussappata, ineqarnermut akiliutit allanngortinneqarneranni peqatigisaanik ineqarnermut tapiissutit allanngortinneqarsinnaalissasut.
Naalakkersuisut naatsorsuutigaat ineqarnermut tapiissutinut aningaasartuutit maannakkutut annertussuseqaannassasut.
Siunnersuut susassaqartunut tusarniaffigineqartussanut tusarniaassutigineqareerpoq, tusarniaanermilu akissuteqaatit inaarutaasumik peqqussutissatut siunnersuummut ilanngunneqarsimapput.
Taamatut oqaaseqarlutik Naalakkersuisut siunnersuut Inatsisartuni oqaluuserisassanngortippaat.