17. september 2004 UKA2004/27
Inatsisartut peqqutissaattut siunnersuummut nassuiaatit.
Nalinginnaasumik nassuiaatit
1. Aallaqqaasiut:
A/S Inissiaatileqatigiiffik INI-mit aamma Inatsisartut Ombudsmandiannit saaffiginnissutit tunngavigalugit allannguutissatut siunnersuut Naalakkersuisut saqqummiuppaat. Tamanna tunngavigalugu inatsisitigut tunngavigineqartunik erseqqissaanissaq, tamatumalu peqatigisaanik ineqarnermut akiliutit allanngortinneqarneranni ineqarnermut tapiissutit iluarsiivigineqarnissaannut attartortut qulakkeerivigineqarnissaat Naalakkersuisut kissatigaat.
2. Siunnersuummut pingaarnertut tunngavigineqartut:Pequssummut allannguutissatut siunnersuut ineqarnermut akiliut allanngorneqassappat ukiup naatsorsuuteqarfiusup ingerlanerani ineqarnermut tapiissutit iluarsiivigineqarnissaannik periarfissiivoq. Tamatuma attartortut inatsisitigut inissisimanerat pitsanngoriartippaa, ineqarnermut akiliut qaffassimappat peqatigisaanik ineqarnermut tapiissutinut aaqqiissuteqarnissaq qulakkeerivigineqassammat.
Ineqarnermut tapiissutisisaannarnissamut inatsisitigut tunngavigisat erseqqinnginerat pillugu Inatsisartut Ombudsmandiat Naalakkersuisunut oqaaseqaateqarsimavoq. Ombudsmandip maanna periaaseq uparuarpaa, tamatumani ineqarnermut tapiissutit ukiumoortumik iluarsiivigineqartarnerata annertussusianut atatillugu ineqarnermut tapiissutisisartut inoqutigiit amerlassusii, katitigaaneri isertitanullu tunngasut pillugit paasissutissartalimmik nutaamik qinnuteqaammik nassitsisarmata. Nutaamik qinnuteqannginneq pineqartup ineqarnermut tapiissutinik pinngitsoorneranik (annaasaqarneranik) maannakkut kinguneqartarpoq.
Inatsisartut Ombudsmandiata uparuarpaa, maanna periaaseq inatsisartut peqqussutaanni § 9, imm. 2-mut naapertuutinngitsoq, taanna ineqarnermut tapiissutinik iluarsiisarnermut taamaallaat atuummat. Taamaalilluni suliatigut paasissutissiisarnermut malittarisassanik tunngaveqarluni aalajangerneqarsinnaanngilaq innuttaasoq tapiissutinik inatsisit malillugit pisinnaasaanik mattunneqassasoq.
Ombudsmandittaaq ilisimatitsissutigaa paasissutissat kommunip pigereertussaasai tassani pineqartut.
Ombudsmandip paasinninnera Naalakkersuisut isumaqatigaat inatsisitigullu tunngavigisamik erseqqissaanissaq kissaatigalugu, tamanna Ombudsmandip kaammattuutaanut naapertuuttun-ngorlugu. Allannguut kommunit ineqarnermut tapiissutinik ukiumoortumik iluarsiissuteqarnerini nutaamik qinnuteqartoqartarunnaarneranik kinguneqassaaq. Taamaattorli ineqarnermut tapiissutisisartut paasissutissanik nutaanik ineqarnermut tapiissutinut pingaaruteqarsinnaasunik suli paasissutissiisussaatitaapput. Kommunini misilittakkat takutippaat, paasissutissat kommunimi pigineqartut allannguteqarsimannginnerisa qulakkeerneqartarnissaat pisariaqartoq.
Najugaqatigiiffiit ukiumoortumik naatsorsuutinik tamarmik ataatsikkut tunniussisarnissaat tulluartuunngitsoq A/S Inissiaatileqatigiiffik INI-p Ilaqutariinnermut Pisortaqarfimmut oqaatigisimavaa, tamanna inissiaatileqatigiiffiinnaanngitsumut aammali Namminersornerullutik Oqartussat Kommunillu kukkunersiuisuinut annertuumik ulaperulutsitsisarmat. Taamaalilluni ullormi ataatsimi missingersuutinik naatsorsuutinillu tunniussisartussat najugaqatigiiffiit 100-nit amerlanerupput, soorluttaaq tamarmik avataanit kukkunersiuisumit uppernarsaatinik pissarsisartussaasut. Allannguut najugaqatigiiffinnut allaffissornikkut oqilisaataassaaq.
Allannguutip siunnersuutigineqartup kingunerisaanik najugaqatigiiffiit ukiumoortumik naatsorsuutiminnik qanoq ilisukkut tunniussinissartik namminneq aalajangersinnaalissavaat.
Najugaqatigiiffiit ukioq naatsorsuuteqarfia nalinginnaasumik tassaasarpoq qaammatisiutit malillugit qaammatit aqqaneq-marluk, takuuk Namminnersornerullutik Oqartussat kommunillu inissiaataannik attartortitsisarneq pillugu nalunaarut. Tamannali saneqqunneqarsinnaavoq najugaqatigiiffiup ukiumoortumik naatsorsuuteqarfini allanngortippagu.
3. Aningaasaqarnikkut allaffissornikkullu pisortanut kingunerisassat.Siunnersuut allaffissornikkut kommuninut oqilisaataassaaq. Naalakkersuisut naatsorsuutigaat ineqarnermut tapiissutinut aningaasartuutit maannakkutut annertussuseqaannassasut.
4. Innuttaasunut allaffissornikkut kingunerisassat.Siunnersuut innuttaasunut malunnaatilimmik oqilisaataasaaq, imminut tunngasunik allanngortoqarsimatinnagu ukiut tamaasa nutaamik qinnuteqartariaarutissammata.
5. Oqartussaasoqarfiit peqatigiiffiillu tusarniaavigineqarneri.Siunnersuut oqartussaasoqarfinnut peqatigiiffinnullu makkununnga tusarniaassutiginneqarpoq:
KANUKOKA, SIK, Kalaallit Nunaanni Sulisitsisut Peqatigiiffiat, A/S Inissiaatileqatigiiffik INI, Ombudsmandeqarfik, ISI, Ineqarnermut Attaveqarnermullu Pisortaqarfik, Inuussutissarsiornermut, Nunalerinermut Suliffeqarnermullu Pisortaqarfik, Akileraartarnermut Pisortaqarfik kiisalu Aningaasaqarnermut Pisortaqarfik.
Tusarniaanermi qulaani pineqartut akissuteqarnerisa kingunerisaanik § 9, imm. 1, uniffiit aappaat Naalakkersuisut allanngortippaat, imatullu allassimalerpoq inissiani attartortittakkani najugaqatigiiffimmut ilaasuni ineqarnermut tapiissutip ukiuata najugaqatigiiffiup ukioq naatsorsuuteqarfia malissagaa. Inissiaq attartortittagaq najugaqatigiiffimmut attuumassuteqan-ngippat, ineqarnermut tapiissutit ukiuata qaammatisiutit ukiuat malissavaa.
Aammattaaq Naalakkersuisut siunnersuummi § 9, imm. 2 allanngortippaat taamaalilluni ineqarnermut tapiissutisisartut ineqarnermut tapiissutinik annertussusiliinermut pissutsinik pingaaruteqartunik inuttut imaluunniit aningaasaqarnikkut allannguuteqartoqarsimatillugu kommunimut nalunaaruteqarnissamik pisussaaffeqalerlutik.
Tusarniaanermik akissuteqaatit allanik siunnersuummut allannguuteqartitsisariaqarnermik nassataqanngillat.
Aalajangersakkanut ataasiakkaanut nassuiaatit.
§ 1-imut
Nr. 1-imut
Iluarsiissutit kingunerisaannik ineqarnermut tapiissutisisartut ineqarnermut akiliutit allan-nguutaannut ineqarnermut tapiissutit malinnaanissaannik qulakkeerutissavaat. Malittarisassat nutaat malillugit ineqarnermut akiliutit allanngorneranni ineqarnermut tapiissutit iluarsiivigineqartassapput, ukiup ineqarnermut tapiissuteqarfiusup naaneraniinnaanngitsoq.
Tamatumunnga peqatigitillugu najugaqatigiiffiit ataasiakkaat piffissap ukiumoortumik naatsorsuutit tunniussiviusussap allanngornissaanut periarfissinneqarput. Maannakkut najugaqatigiiffiit tamarmik ukiup nikinnerani ukiumoortumik naatsorsuutinik tunniussinissaminnut pisussaaffeqarput.
Inatsisartut Ombudsmandiata uparuaaneranik akuersaarumallutik Naalakkersuisut malittarisassat allanngortinneqarnissaat kissaatigisimavaat, taamaalilluni Ombudsmandip kaammattuutaanut naapertuuttunngorlugit. Siunnersuummi nalinginnaasumik nassuiaatit innersuussutigineqarput.
Allannguutip kingunerisaanik kommunit ineqarnermut tapiissutinik ukiumoortumik iluarsiissuteqarneranni nutaamik qinnuteqartoqartarunnaassaaq. Taamaattorli ineqarnermut tapiissutisisartut ineqarnermut tapiissutit annertussusilernissaannut pingaaruteqarsinnaasunik ineqarnermut akiliutip, inuttut aamma aningaasaqarnikkut allannguutit pillugit kommunimut nalunaaruteqarnissaminnik pisussaaffeqarput. Assersuutigalugu tassaasinnaapput paasissutissat inoqutigiit annertussusaannik, katitigaanerannik aamma isertitaannut tunngassuteqartut
Qulaani paasissutissat pineqartut tunniunneqannginnerisa kingunerisinnaavat, kommunip missingersuilluni paasissutissanik pisariaqartunik aalajangersaasariaqarnera. Paasissutissanik pisariaqartunik tunniussinnginneq pissutigalugu ineqarnermut tapiissutinik annertuvallaanik tunniussisoqarsimatillugu kommunimit inissianni attartortikkani ineqarnermut tapiissutit pillugit Inatsisartut peqqussutaanni § 12 malillugu utertillugit akiliinissamik kommuni aalajagiisinnaavoq.
Attartortup pisussaafigaa najugaqatigiiffiup ukiumoortumik naatsorsuuteqarfia malinnaafigissallugu. Namminnersornerullutik Oqartussat kommunillu inissiaataannik attartortitsisarneq pillugu nalunaarut malillugu attartortoq ukiumoortumik naatsorsuutinik nassinneqartussaatitaavoq.
§ 2-mut
Allannguutit 1. januar 2005-imi atuutilernissaat siunnersuutigineqarpoq.