1. september 2004 UKA 2004/31
Peqqinnissaqarfiup sullissineri il.il. pillugit Inatsisartut peqqussutaata nr. 15-ip 6. november 1997-imeersup allanngortinneranik Inatsisartut peqqussutaannut nr. xx xx 2005-imeersumut siunnersuut.
(Ilaqutariinnermut Peqqissutsimullu Naalakkersuisoq)
Saqqummiussissut
Siullermeerinninneq
Peqqinnissaqarfiup sullissineri pillugit Inatsisartut peqqussutaannut allannguutissatut siunnersuuteqarnikkut Naalakkersuisut kissaatigaat meeqqat inuusuttullu meeqqerisumit misissorneqartarnissaannut Naalakkersuisut maleruagassanik aalajangersaasinnaanissaannut tunngavissiisoqarnissaa.
Meeqqerisumit misissorneqartarneq pillugu maanna maleruagassani, peqqinnissaqarfiup sullissineri pillugit Inatsisartut peqqussutaanni § 11-mi aamma § 12-imi allassimasuni taamaallaat aalajangersaavigineqarput meeqqat inuusuttullu meeqqerisumit misissorneqartarnissaat tassaassasut peqqinnissaq pillugu nalinginnaasumik ilitsersuinerit, meeqqap peqqissusianut tunngasut maluginiarneqartarnissaat aammalu angajoqqaanut immikkut ilitsersuisarnissaq ikiorsiisarnissarlu.
Naalakkersuisut kissaatigaat meeqqat qanoq akulikitsigisumik akeqanngitsumillu meeqqerisumit misissorneqartarnissaannut, meeqqerisumit misissorneqarnerup qanoq ittuunissaanut meeqqerisumillu misissorneqarnerup qanoq aaqqissuunneqarnissaanut maleruagassanik sukumiinerusunik aalajangersaasoqarnissaa, taamaalilluni nunat tamalaat piumasarisaat Nunatta naammasisinnaaniassammagit.
Taamaattumik Naalakkersuisut sinnerlugit Inatsisartut kissaateqarfigissavakka allannguutissatut siunnersuutip oqaluuserineqarnerani ilaliinissaannik.