1. september 2004 UKA 2004/31
Peqqussutissatut siunnersuummut nassuiaatit
Nalinginnaasumik nassuiaatit
1. Allannguutissatut siunnersuutip siunertaa
Meeqqat inuusuttuaqqallu peqqinnissakkut sullinneqarnerat pillugu maleruagassiat erseqqinnerusut nalunaarutitut iluseqartinneqarsinnaanissaat Naalakkersuisut kissaatigaat. Taamaattumik Peqqinnissaqarfiup sullissineri il.il. pillugit peqqussummi § 11 aamma § 12 atorunnaarsinneqassasut peqqinnissakkullu sullinneqarneq pillugu maleruagassanik nalunaarutikkut Naalakkersuisut aalajangersaasinnaanissaannut inatsisitigut tunngavissat pilersinneqassasut siunnersuutigineqarpoq.
2. Allannguutissatut siunnersuutip imai pingaarneritAllannguutissatut siunnersuutip kingunerissavaa peqqinnissakkut sullinneqarneq pillugu maleruagassat nalunaarutitut ilusilerlugit Naalakkersuisunit aalajangersarneqarsinnaanerinut inatsisitigut tunngavissat pilersinneqarnissaat.
§§ 11 aamma 12 atorunnaarsinneqassapput, tamatumalu kingorna Kapitali 4-p imarilissallugit meeqqat inuusuttuaqqallu peqqissusaannik misissuinissamik, peqqinnissakkut sullinneqarnissamik akiuussutissinneqartarnissamillu neqerooruteqartarnissat, tamatumanilu maleruagassat erseqqinnerusut Naalakkersuisunit aalajangersarneqarsinnaalissallutik.
3. Allannguutissatut siunnersuutip aningaasaqarnikkut allaffissornikkullu kingunissaiAllannguutissatut siunnersuut aningaasaqarnikkut allaffissornikkullu kinguneqassanngilaq.
4. Pisortani oqartussat kattuffiillu il.il. tusarniaavigineqarneratAllannguutissatut siunnersuut ukunani tusarniaassutigineqarpoq:
Aningaasaqarnermut Pisortaqarfik
Aqutsinermut Pisortaqarfik
Kultureqarnermut, Ilinniartitaanermut Ilisimatusarnermut Ilageeqarnermullu Pisortaqarfik
Aalisarnermut, Piniarnermut Nunaqarfinnullu Pisortaqarfik
Ilaqutariinnermut Pisortaqarfik
Peqqinnissaqarfiup Peqqissaaveqarfinnik Aqutsivia
Dronning Ingridip Napparsimmavissua
Peqqinnissakkut Nakkutilliisoqarfik
Peqqissaanermik Ilinniarfik (PI)
KANUKOKA
Peqqinnissaq Pillugu Kattuffiit (PK/PPK)
Kalaallit Nunaanni Nakorsat Peqatigiiffiat
Kigutilerisut Peqatigiiffiat
Kalaallit Nunaanni Perorsaasut ilinniarsimasut Peqatigiiffiat (PiP)
Kalaallit Nunaanni Ilinniartitsisut Peqatigiiffiat (IMAK)
Kalaallit Nunaanni Sulisitsisut Peqatigiiffiat
Tusarniaavigineqartut oqaaseqaateqanngillat.
Peqqussutissatut siunnersuummi aalajangersakkanut ataasiakkaanut nassuiaatit
§ 1-imut
Nr. 1-imut 2-mullu.
Siunnersuutigineqarpoq Peqqinnissaqarfiup sullissineri il.il. pillugit peqqussummi atuuttumi § 10 imm. 1-ip kingornatigut immikkoortumik nutaamik ilanngussisoqassasoq, tamatumani meeqqat inuusuttuaqqallu aammalu suli atualinngitsut atuartussaatitaasutullu ukiullit peqqinnissakkut sullinneqarnissamut akiliutitaqanngitsumik neqeroorfigineqalissallutik. Taamatut neqerooruteqarneq maannamut § 11-mi aamma § 12-imi maanna atorunnaarsinneqartuni nassuiarneqarpoq.
Meeqqat inuusuttuaqqallu peqqinnissakkut sullinneqarnissaminnut pisinnaatitaanerat ajornerulersinneqassasoq siunertarineqanngimmat peqqissutsimik misissuinissaq peqqinnissakkullu sullinneqarnissaq pillugit maleruagassanik imaqartumik Naalakkersuisut aalajangersaasinnaanerat § 10, imm. 3-mi inatsisitigut tunngavissinneqassaaq. Peqqinnissakkut sullinneqarneq pillugu malittarisassanik Naalakkersuisut aalajangersaasinnaanissaat siusinnerusukkut inatsisitigut tunngavissaqarsimanngilaq. Tamatumunnga malittarisassat taamaallaat § 11-mi aamma § 12-imi maanna atorunnaarsinneqartuni aalajangersarneqarput.
§ 2-mut
Siunnersuutigineqarpoq allannguutissatut siunnersuut 1. februar 2005-imi atuutilersinneqassasoq.