17. september 2004 UKA 2004/28
Annertussusileriikkanik ikiorsiissutit pillugit Inatsisartut peqqussutaata allanngortinneranik Inatsisartut peqqussutissaattut siunnersuut.
Saqqummiussissut.
(Ilaqutariinnermut Peqqissutsimullu Naalakkersuisoq)
Siullermeernera.
Naalakkersuisut allannguutissatut siunnersuutaat akileraartarneq pillugu iluarsartuusseqqinnerup ilagaa annertussusileriikkanillu ikiorsiissutit akileraaruteqaataasussanngornerisa kingunerisaanik allannguutaalluni. Tamatumunngattaaq tunngaviuvoq annertussusileriikkanik ikiorsiissutisisartut akissarsiortut allat assigalugit akileraartarnermikkut inuiaqatigiinnut tapersersueqataanissaat.
Siunnersuutigineqartoq malillugu S.I.K.-p Naalakkersuisullu akornanni isumaqatigiissutit malillugit ilinniarsimanngitsut akissarsiaasa minnerpaaffiata 90%-ia annertussusileriikkamik ikiorsiissutaasalissaaq maannakkutut akissarsiat minnerpaaffiata 55%-iatut annertussuseqartitsinermut taarsiullugu. Annertussusileriikkanik ikiorsiissutinik pisartangaqartut qaffaassuteqarnissamut siunnersuut malillugu siusinnerusukkut pisartangarineqartartut annertussusaat missiliorlugit tigusartagaqassapput, tamatumani matuma peqatigisaanik akileraartarnermut inatsimmi akileraarusiinissamut inatsisitigut tunngavissaliisoqassammat, taamaalilluni ikiorsiissutigineqartartut akileraaruteqaataasussanngussallutik.
Ullumikkut isumaginninnermi ikiorsiissutitut tunniunneqartartut, tassaasut utoqqalinermi aamma siusinaartumik pensionisiat, piginnaanngorsaaqqinnermi aamma sulinngiffeqarnermi tunniunneqartartut kiisalu ilinniagaqarnersiutit isertitatut akileraaruteqaataasussaareerput. Taamaattumik Naalakkersuisut isumaqarput annertussusileriikkanik ikiorsiissutit akissarsiallip akissarsiassaraluinut annaasanut soorlu suliffeerunnermi aamma napparsimanermi taarsiullugit tunniunneqartartut taamatulli isertitanut akileraaruteqaataasussanut ilaatinneqarnissaat pissusissamisoortoq.
Annertussusileriikkanik ikiorsiissutit allanngortinneqarnerata saniatigut siunertarineqarpoq nammaqatigiinnissamik anguniagaqarnerup pitsanngorsaavigineqarnissaa, isumaginninnikkut isumannaallisaatit akornanni ataqatigiinneqartitsinikkut ajornartorsiutit aaqqiivigineqarnissaat taamatullu sulerusussusseqarnerulersitsinissaq.
Namminersornerullutik Oqartussat kommunillu 2005-imut ataatsimoortumik tapiissutit pillugit isumaqatigiissutaanni allaaserineqarpoq, annertussusileriikkanik ikiorsiissutip akileraaruserneqartalernissaata kommunit karsiinut aningaasartuutaanerulinnginnissaa pillugu Naalakkersuisut qanoq takorluugaqarnersut
Akileraarusiisalernerup nassatarissavaa annertussusileriikkanik ikiorsiissutisisartunut ataasiakkaanut isertitat akileraaruteqaataasussat qaffannerat. Tamanna ikiorsiissutinut isertitat akileraaruteqaataasussat tunngavigalugit naatsorsorneqartartunut sunniuteqartussaassaaq. Akileraartarneq akitsuutillu pillugit iluarsartuusseqqinnermik Naalakkersuisut suliaqarnerminnut ilanngullugu misissueqqissaaqatigiittussanik pilersitsipput, taakkua isertitat apeqqutaatillugit tunniunneqartartut, assersuutigalugu meeqqanut tapiissutit ineqarnermullu tapiissutit, misissoqqissaarlugillu nalilersuiffigeruttulerpaat innuttaasut sanngeereersut siunertaanngitsumik eqqugaannginnissaat qularnaarniarlugu.
Siunnersuut tusarniaaffigineqartussanut tusarniaassutigineqareerpoq tusarniaanermullu akissutit peqqussutissatut siunnersuummi inaarutaasumi ilanngullugit suliarineqarput.
Taamatut oqaaseqarlutik Naalakkersuisut siunnersuut Inatsisartuni oqaluuserisassanngortippaat