3. august 2004

UKA 2004/28

 

Peqqussutissatut siunnersuummut nassuiaatit

 

Nalinginnaasumik nassuiaatit

1. Aallaqqaasiut:

Naalakkersuisut allannguutissatut siunnersuutaat akileraartarnermut iluarsaaqqinnerup ilagaa Ani-ngaasaqarnermut Pisortaqarfiup, Akileraartarnermut Pisortaqarfiup Ilaqutariinnermullu Pisortaqarfiup suleqatigiillutik pilersissimasaat. Allannguutissatut siunnersuut annertussusileriikkanik ikiorsiissutit akileraaruteqaataasussanngornerisa kingunerisaanik allannguutaavoq. Siunnersuutikkut qularnaarneqassaaq sulinerup kikkunnulluunniit imminut akilersinnaassuseqarnissaa kiisalu akissarsiortut tamarmik akileraartarnermikkut inuiaqatigiinnut ikiuuteqataanissaat

2. Siunnersuuteqarnermi tunngavigineqartut:

Siunnersuut isumaqarpoq annertussusileriikkanik ikiorsiissutit SIK-p Naalakkersuisullu isumaqatigiissutaat malillugu suliamik ilinniagaqarsimanngitsumut akissarsiat minnerpaat 90 %-attut annertussuseqalissasut, maannakkutut akissarsiat minnerpaat 55 %-iattuut annertussuseqartitsinermut taarsiullugu. Annertussusileriikkanik ikiorsiissutinik pisartangaqartut qaffaassuteqarnissamut siunnersuut malillugu siusinnerusukkut pisartangarineqartartut annertussusaat missiliorlugit tigusartagaqassapput, tamatumani matuma peqatigisaanik akileraartarnermut inatsimmi akileraarusiinissamut inatsisitigut tunngavissaliisoqassammat, taamaalilluni ikiorsiissutigineqartartut akileraaruteqaataasussanngussallutik.

Ullumikkut isumaginninnermi ikiorsiissutitut tunniunneqartartut, tassaasut utoqqalinermi aamma siusinaartumik pensionisiat, piginnaanngorsaaqqinnermi aamma sulinngiffeqarnermi tunniunneqartartut kiisalu ilinniagaqarnersiutit isertitatut akileraaruteqaataasussaareerput. Taamaattumik Naalakkersuisut isumaqarput annertussusileriikkanik ikiorsiissutit akissarsiallip akissarsiassaraluinut annaasanut soorlu suliffeerunnermi aamma napparsimanermi taarsiullugit tunniunneqartartut taamatulli isertitanut akileraaruteqaataasussanut ilaatinneqarnissaat pissusissamisoortoq.

Annertussusileriikkanik ikiorsiissuti allanngortinneqarnerata saniatigut siunertarineqarpoq nammaqatigiinnissamik anguniagaqarnerup pitsanngorsaavigineqarnissaa, isumaginninnikkut isumannaallisaatit akornanni ataqatigiinneqartitsinikkut ajornartorsiutit aaqqiivigineqarnissaat taamatullu sulerusussusseqarnerulersitsinissaq.

3. Aningaasatigut allaffissornertigullu kingunerisassat:

Namminersornerullutik Oqartussat kommunillu 2005-imut ataatsimoortumik tapiissutit pillugit isumaqatigiissutaanni annertunerusumik allaaserineqarpoq, annertussusileriikkanik ikiorsiissutip akileraaruserneqartalernissaata kommunit karsiinut aningaasartuutaanerulinnginnissaa pillugu Naalakkersuisut qanoq takorluugaqarnersut. Ataatsimoortumik tapiissutit pillugit isumaqatigiissummi naatsorsuutigineqarpoq annertussusileriikkanik ikiorsiissutip akileraaruteqaataalernissaata peqatigisaanik inatsitigut allannguutissatut siunnersuutip matuma Inatsisartunit akuerineqarnissaa.

4. Oqartussaasoqarfiit peqatigiiffiillu tusarniaavigineqarneri:

Siunnersuut oqartussaasoqarfinnut peqatigiiffinnullu makkununnga tusarniaassutigineqarsimavoq:

KANUKOKA, SIK, Kalaallit Nunaanni Sulisitsisut Peqatigiiffiat, AK, IMAK, HST, PIP, Naalakkersuisut Allattoqarfiat, Akileraartarnermi Pisortaqarfik, Aqutsinermut Pisortaqarfik Aningaasaqarnermullu Pisortaqarfik.

Tusarniaanermi akissutigineqarsimasut siunnersuutip allanngortinneqartariaqarneranik kinguneqarsimanngillat.

 

Peqqussutissatut siunnersuummi alajangersakkanut ataasiakkaanut nassuiaatit

 

§ 1-imut

Nr. 1-imut

Siunnersuutip kingunerissavaa annertussusileriikkanik ikiorsiissutit SIK-p Naalakkersuisullu isumaqatigiissutaat malillugu suliamik ilinniagaqarsimanngitsumut akissarsiat minnerpaat 90 %-attut annertussuseqalissammat maannakkut atuuttumut akissarsiat minnerpaat 55 %-iattut annertussutsimut taarsiullugu.

 

§ 2-mut

Allannguutit 1. januar 2005-imi atuutilernissaat siunnersuutigineqarpoq.