Inatsisartut Ilaqutariinnermut Peqqissutsimullu Ataatsimiititaliaannut
Allakkiaq
Tupa avatangiisinillu tupatorfiunngitsunik isumannaarineq, kiisalu tupanik nioqqutissiat nalunaaqutserneqartarneri pillugit Inatsisartut peqqussutisaattut siunnersuut
UKA 2004/32
pillugu
Naalakersuisut 23. september 2004-mi naqqiutaat misissuataareerlugit Inatsisartut Inatsisissanik nalilersuisarfiata makku ataatsimiititaliamit maluginiaqquvai:
Tupa pillugu peqqussutip atuuttup sukaterneqarnissaa Naalakkersuisut peqqussutissatut siunnersuuteqarnermikkut anguniarpaat. Meeqqat atuarfiini, timersortarfinni, naluttarfinni, meeqqanut inuusuttuaqqanullu ulloq unnuarlu angerlarsimaffinni pujortartarnerup inerteqqutaaluinnarnera peqqussummi ilaavoq, siunnersuutillu ilaatigut peqqussummi imarivaa pisortat illuutaanni pujortartarneq inerteqqutaasoq. Matumanilu pisortat angallassissutaat kiisalu Namminersornerullutik Oqartussat suliffeqarfiini pissutsit naapertorlugit pujortaqqusinnginneq ilatinneqarput.
Siunnersuutillu imaraattaaq inunnut 18-iliineqanngitsunut tupanik tunisaqarnissaq inerteqqutaasoq.
Siunnersuutip § 14-iani allassimavoq:
§ 14. § 8-mi, imm. 1 aamma 2-mi, § 9-mi, § 10-mi imm. 1-imi, § 11-mi, § 12-imi imm. 1 aamma 2-mi aamma § 13-imi aajangersakkanik unioqqutitsinermi akiliisitaasussanngortitsilluni pineqaatissiisoqarsinnaavoq.Imm. 2. aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik taamaaqataalluunniit im. 1-imi pineqartumik unioqqutitsippat ingerlateqatigiiffik immini unioqqutitsinermut akiliisitaasussanngorlugu akisussaatinneqarsinnaavoq. Namminersornerullutik oqartussat, kommuni imaluunniit kommunit ataatsimoorlutik ingerlassaqarfii unioqqutitsisimappata Namminersornerullutik Oqartussat, kommunalbestyrelse imaluunniit kommunit ataatsimoorlutik ingerlassaqarfii taamatut akiliisitaasussanngorlugit akisussaatinneqarsinnaapput.
Taamaalilluni §§ 3-7-imi(tassa pujortaqqusinnginneq pillugu malittarisassat) avatangiisinut tupatorfiunngitsunut inatsimmi malittarisassat unioqqutinneqarsimatillugit inatsit naapertorlugu akiliisitaasoqarsinnaanngilaq. Matumani apeqqutaalerpoq inatsisip qanoq ililluni piviusumik atorneqarsinnaanera. Peqqussutissatut siunnersuummi oqaasertaliunneqartut apeqqummi matumani nassuiarneqanngillat. Marlunnik periarfissaqarunartoq nalilerpara:1) Suliffimmi avatangiisit eqqarsaatigalugit pujortartarnermi maleruagassat ilaatigut pilersinneqarmata akuutissat ulorianaatillit allat, inerteqqutaasut killissaqartinneqartulluunniit il.il. nakkutilliivigineqartarneratuulli suliffeqarfinni putsumit akornusersuutinik nakkutilliineq suliinni avatangiisinut oqartussaasunit ingerlanneqartarnissaat takorloorneqarsinnaavoq. Pujortartarnermi malittarisassat suliffimmi avatangiisit maleruagassartaannut ilaatinneqartutut oqaatigineqarsinnaavoq, tassami suliffinnut avatangiisit pillugit piffissap ilaani misissuinernik assigisaanillu ingerlalluartumik peqartoqareermat. Aammattaaq nalunaartarnissamut aaqqissuussinermik kiisalu inatsimmik sulisunut unnerluutiginnittunut illerssuutaasussamik peqareerpoq.
Suliffimmi avatangiisinut oqartussaasut pujortartarnermi inatsisimmi maleruagassat ilaannik atuutsitsisussaassanersut imaaliinnarlugu naatsorsuutigineqarsinnaanngilaq, assersuutigalugu silami piffinni aaliangersimasuni pujortartoqarsimappat imaassinnaavoq suliffimmi avatangiisinut oqartussat susassaqarfiisa avataaniittoq.
Suliffinni pujortartarnermut inatsisiliornermi suliffimmi avatangiisinut oqartussat akisussaaffii pillugit apeqqutit inatsisissatut siunnersuummi oqaasertaliunneqartuni eqqaaneqarsimanngillat, taamaattumillu aaqqinneqarsimasutut oqaatigineqarsinnaanatik.
2) Suliffeqarfinni ataasiakkaani pujortaqqusaaffiunngitsuni pisortat aqqutigalugit pujortartarnermi malittarisassat atuutsinneqarsinnaanerat eqqarsaatigineqarsinnaavoq. Pisortat suliffeqarfii kisimik pineqarsimappata, assersuutigalugu Namminersornerullutik Oqartussat pisortaqarfiat ataaseq inatsisit atuuttut eqqortinneqarnersut nakkutiginissaannut pisortat suliffigisaminnut atatillugu pisussaaffilerneqaratarsinnaapput. Assersuutigalugu pisortat angallassissutaanni pujortartoqarsimatillugu atuutsitsinissamut pisussaaffik qularnarneruvoq. Taamaalilluni malittarisatut siunnersuutigineqartumi bussini ingerlatitsisut, sinerissami ilaasunik angallassissutit naalagaat imaluunniit kommunalbestyrelsi akisussaaffigisamik iluani pujortaqusinnginnerup unioqqutinneqarneratigut qanoq akisussaatinneqalersinnaanissaat nalorninarsivoq.
26. september 2004 Naja Joelsen