12. oktober 2004 UKA 2004/39
Ilinniagaqarnersiutit pillugit Inatsisartut peqqussutissaattut siunnersuut.
(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)
Akissuteqaat
Aappassaaneerinninneq
Inatsisartut peqqussutissaattut siunnersuutip Inatsisartuni siullermeerneqareernerani Inatsisartut Kultureqarnermut, Ilinniartitaanermut Ilageeqarnermullu Ataatsimiititaliaat isumaliutissiissummik saqqummiussaqarpoq.
Isumaliutissiissummi ataatsimiititaliap, Inatsisartut Inatsisileriffiata inassuteqarnerata kingorna, kaammattuutigaa, ulluliussap 1. august 1996-ip 1. august 2005-inngortillugu allanngortinneqarnissaa. Allannguutissatut siunnersuummut patsisaatinneqarpoq, § 36-mi 1. august 1996-itut ulluliussaq pissutaalluni § 21-mi aamma § 22-mi ernialersuinermik naatsorsuisarnermut malittarisassat siunertaanngitsumik ima kinguneqalissallutik § 36 malillugu ilinniarnermi taarsigassarsianut ernialersuinerit tamarmik ukiut arfineq pingasut affarlu kingumoortumik atuutilersinneqassallutik.
Naalakkersuisut naammagisimaarlugu maluginiarpaat, ataatsimiititaliap siunnersuut taamaatsillugu akuersissutigineqarnissaa inassutigimmassuk, inatsisileriffimmi allagaqaammi kaammattuutit naapertorlugit Naalakkersuisut allannguutissatut siunnersuut saqqummiutereerpassuk.
Naalakkersuisut maluginiarpaat, ataatsimiititaliami ikinnerussuteqartut Demokratiusut Danmarkimi ilinniagaqartunut ilinniagaqarnersiutit utertillugit akilerneqartarnissaat aammalu ilinniagaqarnersiutit annertussusaasa assigiingissuteqarnissaat pillugit ikinnerussuteqarlutik oqaaseqaateqarsimanerat. Ikinnerussuteqartunit oqaaseqaat Naalakkersuisut isumaqatigisinnaanngilaat.
Tamatuma kingorna Naalakkersuisut inassutigissavaat peqqussutissatut siunnersuut allannguutissatut siunnersuutigineqartutut taamaatsillugu akuersissutigineqarnissaa.