3. august 2004 UKA 2004/39
Ilinniagaqarnersiutit pillugit Inatsisartut Peqqussutissaattut siunnersuut
(Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq)
Saqqummiussineq.
Siullermeerneqarnera.
Ilinniagaqarnersiutit pillugit Inatsisartut Peqqussutissaattut siunnersuut Naalakkersuisut matumuuna saqqummiuppaat.
Ilinniagaqarnersiutit pillugit Inatsisartut Peqqussutissaattut siunnersuutip suliarineqarnerani pingaarnertut "Ilinniagaqarnersiutinik Iluarsaaqqinneq pillugu Nassiuaat" tunngavigineqarpoq. Siunnersuut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit majimi 2002 suliarineqarpoq. Nassuiaat suliarineqarpoq suleqatigiissitap Pisortaqarfimmit, Ilinniagaqarnersiutinik Allattoqarfimmit, Aningaasaqarnermut Pisortaqarfimmit aammalu ilinniagaqartut kattuffiinit ilaasortaaffigineqartup suliaa tunngavigalugu. Siunnersuummut tunuliaqutit aammalu nassuiaammi inassuteqaatinik itisiliinerit pillugit siunnersuummi oqaaseqaatit nalinginnaasut innnersuussutigineqarput.
Siunnersuutigineqarpoq ilinniagaqarnersiutit pillugit aaqqiissuussinerup maannakkut atuuttup nutarterneqarnissaa. Qulliunerusumik isigalugu pisariillisaanissaq siunnersuutigineqarpoq. Taassuma saniatigut pingaarnerusutut anguniagaavoq ilinniagaqartut ilinniarnerminnik ingerlatsinerminni kiisalu aningaasanik tunniunneqartunik atuinerminni akisussaaffeqarnerulernissaat.
Nutarterinermi qulliunerusumik anguniakkat tunngavigalugit siunnersuutigineqarpoq klippekortsystemimik taaneqartartup atorneqalernissaa. Taanna imatut isumaqarpoq ilinniagaqartut ilinniakkat pisinnaasaqartitsilersut ingerlannissaannut tapiissutinut qiorsinernik aalajangersimasunik amerlassusilinnik tunineqartassasut.
Taassuma saniatigut immikkut tapiissutit arlallit atorunnaarsinneqassapput taakkununngalu taarsiullugu ilinniagaqarnersiutit aammalu qaffasinnerusunik ilinniagaqartut aningaasanik atorsinnaanerinut periarfissat qaffanneqartussaapput. Aammattaaq taaneqassaaq siunnersuutigineqartoq ilinniagaqarnissamut piareersarluni atuarnermi atuartut ilinniagaqarnersiutaat annertuumik allanngortinneqartussaammata. Allannguutit taakku 2005-imut aningaasanut inatsimmut siunnersuummiipput aammalu ilinniagaqarnersiutit pillugit nalunaarutip atuuttup nutarternerani ilan-ngunneqartussaallutik.
Ilinniagaqartut kattuffii aningaasat atorneqarsinnaasut ilinniagaqarnersiutillu annertussusaasa aningaasanut inatsimmi aalajangersarneqarnissaannut peqataanissaat qulakkeerniarlugu siunnersuutigineqarpoq Naalakkersuisut ilinniagaqartullu kattuffii taakku pillugit isumasioqatigiissasut. Naalakkersuisut ilimagaat taamaaliornikkut ilinniagaqartut kattuffiinik suleqateqarneq nukittorsarneqassasoq. Taamaaliornikkut ilinniagaqartut kattuffii ilaasortamik soqutigisaannik aallussinissamut pitsaanerusumik periarfissinneqassapput aammalu tassunga ilaliullugu qulakkeerneqassalluni aningaasanik qaqugukkulluunniit tullerissaannerni ilinniagaqartut namminneq siunnersuutaasa aallaavigineqartarnissaat.
Siunnersuut suliamut soqutigisaqartunut tusarniaassutigineqarpoq. Tusarniaanermi akissutit siunnersuutip tassungalu oqaaseqaatit ataasiakkaatigut allanngortinneqarnerannik kinguneqarpoq. Aammattaaq siunnersuummut oqaaseqaatini tusarniaanermi akissutini oqaaseqaatit pingaarnerit nassuiarneqarput, taamaammallu taanna innersuussutigineqarpoq.
Siunnersuut tassungalu oqaaseqaatit innersuussutigalugit siunnersuut Inatsisartunut suliassanngortinneqarpoq.