Ilinniagaqarnersiutit pillugit Inatsisartut peqqussutissaattut siunnersuut UKA 2004/39
pillugu
Inatsisartut Kultureqarnermut Ilinniartitaanermullu
Ataatsimiititaliaannut Allakkiaq
Naalakersuisut 23. september 2004-mi naqqiutaat misissuataareerlugit Inatsisartut inatsisissanik nalilersuisarfiata makku ataatsimiititaliamit maluginiaqquneqarput:
Peqqussutip aalajangersimasumik siunertaqarfii 1. august 1996-mi atuutilernatik 1. januar 2005-mili atuutilernissaat Naalakkersuisut § 35-imi § 37-imilu aalajangersakkat ilaatigut naqqiutini iluarsivaat, tamannalu inatsisissatut siunnersuutaaqqaartumi takuneqarsinnaavoq. Kulturimut Ilinniartitaanermut Ilisimatusarnermut Ilageeqarnermullu Pisortaqarfimmut Inatsisartut inatsisissanik nalilersuisarfiata 30. august 2004-meersutigut allakiaani oqaaseqaatit naqqiutikkut annertunerpaartaat naammassineqarput. Naqqiutilli § 36 pillugu oqaaseqaatit taamaaqataanik iluarsiiviginngilai, maannakkut taamatut iluseqarnermini imatut oqaasertaqartoq:
§ 36. ilinniagaqarnersiutit tigusassarinagit 1. august 1996 sioqqullugu tiguneqarsimasut taamanikkut malittarisassat atuuttut malillugit ernialersorneqassapput. Ilinniagaqarnersiutit tamatuma kingornatigut tigusassarinagit tiguneqarsimasut § 21-mi aamma § 22-mi malittarisassat malillugit ernialersorneqalissapput.
Ernianut naatsorsuinermut maleruagassani § 21-miittut § 22-miittullu ilinniartuunermi akiitsut tamarmik kingumoortumik ukiuni 8½-ini atuutilertarnissaat aalajangersakkap nasatarivaa, § 36-milu ilaatinneqarput (tunniussinerit, taamaattussaanngikkaluit kingusinnerusukkut paasisat). Tamatuma kingunerissavaa:
- Ernialersuinermut kisitseriaatsimi maleruagassat nutaat § 36-mi akiitsoqarfinnut tamanut 1. august 1996-imiilli pinngorsimasunut atorneqarsinnaapput, naak piffissap tamatuma iluani taakku utertillugit akilerneqarsimagaluarpataluunniit.
- Maleruagassat nutaat aallaavigalugit ilinniartut atukkamikkut ajorseriaateqassappata, aningaasat amigaatigineqartut akilersinniarneqarneranni aamma maleruagassat nutaat ilinniartunik pitsaanerusumik atugassaqalersitsissappata aningaasat erniaannit sinneqartoorutigineqartut utertinneqassapput.
Oqarasuaatikkut apeqquteqarnermi nalinginnaasumik kinguneqaateqarnissaa naatsorsuutigineqanngitsoq pisortaqarfiup ilisimatitsissutigaa, tassami Pisortaqarfiup paasinninnera naapertorlugu ernianut malittartisassat nutaat imarisamikkut nutaanngitsoq assigaa. Aalajangersakkat kingumoortumik atuutsinneqalersinnaanerat piviusorsiortumik siunertaqarnersoq pisortaqarfiup ilisimatitsissutigisinnaanngilaa.
Taamatuttaaq innuttaasut inatsisitigut illersugaanerat eqqarsaatigalugu inatsisip atuutilerfissaa § 36-mi taaneqartoq inatsisip atuutilerfissaanut, tassa ulloq 1. januar 2005-imut, naapertuuttunngorlugu aaqqinneqartariaqartoq Inatsisartut inatsisissanik nalilersuisarfiat naliliivoq. Taamaalilluni inatsisip oqaasertalerneqarnera innuttaasunut § 36 malillugu akiitsoqartunut akiitsoqarsimasunulluunniit, ukiunilu kingullerni inatsit atuuttoq naapertorlugu aningaasaqarnerminnik ingerlatsisimasunut nalornisitsilernermik kinguneqassanngilaq.
Pisortaqarfiup allassimasaatut aalajangersakkat kingumoortumik pisortatigoortumik atuutilersinneqarnera innuttaasunut nalinginnaasumik kinguneqassanngitsoq ilumoorpat, tamanna Inatsisartut inatsisissanik nalilersuiffiup aalajangersakkamik allanngortitsinissamut pingaarnertut tunngavigisaanut naapertuuppoq.
28. september 2004 Stefan Krehbiel