7. maj 2004 FM 2004/37, ILANNGUSSAT
Katersugaasiveqarneq pillugu Inatsisartut peqqussutaata allannguutissaatut Inatsisartut peqqussutissaannut siunnersuut UPA 2004/37
pillugu
ilassutitut allakkiaq
Naalakkersuisut ulloq 19. april 2004 naqqiutaat tunngavigalugu Inatsisartut Allattoqarfiata inatsisissanik nalilersuisarfiata peqqussutissatut siunnersuut misissuataaqqippaa ataanilu oqaatigineqartutut oqaaseqarfiginissaa pisariaqartissimallugu.
Oqaatigineqassaaq ilassutitut allakkiaq una inatsisissanik nalilersuisarfiup ulloq 24. marts 2004 allakkiaatigut inatsiliornikkut kaammattuutigineqartunut, ilaatigut Naalakkersuisut naqqiutaannut ilanngunneqartunut, nangitsinerummat.
a) Peqqussutip taaguutaanut uiguliussaq pillugu:Peqqussutissap taaguutaanut uiguliussami oqaaseqatigiit naallugit allanneqarsimanngillat ataanilu 1)-imi allannguutissatut siunnersuummut naapertuuttumik iluarsineqartariaqarlutik.
b) Katersugaasiveqarneq pillugu inatsimmi pineqartunik inunnik inatsimmi pineqartunik Namminersornerullutik Oqartussat pinerluuteqarsimasumut akisussaatitsisinnaanerat pillugu:Naalakkersuisut kissaatigaat inuit inatsimmi pineqartut (ass. umiarsuaatillit sulliviilluunniit allat) § 33, imm. 2 naapertorlugu akiliisitaanermik pineqaatissinneqarsinnaassasut.
Taamatulli aalajangersagaliornikkut Namminersornerullutik Oqartussat inatsisiliortutut oqartussaanerannut inatsisitigut killissarititaasut qaangerneqarnissaata aarleqqutigineqarsinnaaneranut apeqqut pillugu Inatsisartut Allattoqarfiat Naalakeersuisullu inatsisissamik naliliinerminni isumaqatigiissinnaasimanngillat.
Katersugaasiveqarneq pillugu inatsimmi inunnut inatsimmi pineqartunut akiliisitsilluni pineqaatissiinermut maleruagassanik Namminersornerullutik Oqartussat atuutilersitsisinnaanersut suli nalorninaateqartoq Inatsisartut Allattoqarfiat naliliivoq, piginnaatitaanermi taamaattoq kissaatiginartutut erseqqitsigisumik pinerluttulerineq pillugu inatsimmi inatsimmiluunniit allatami allami allassimanngimmat.
Naalakkersuisut isumaqarunarput taamatut nalornissuteqarnissamut tunngavissaqartoqanngitsoq.
Taamaammat isumaqatigiinngissutigisatut tikkuarneqartoq tunngavigalugu Inatsisartut Allattoqarfiata inatsisissanik nalilersuisarfiata inassutigaa aalajangersagaq isumaqatigiinngissutigineqartoq mianersortumik periuseqarnissaq tunngavigalugu ataani taaneqartutut allannguutissatut siunnersuummut naapertuuttumik peerneqassasoq. Taamatut alloriartoqarpat peqqussutip atuussinnaassuseqarnerata sunniivigineqarnissaa ilimagineqanngilaq.
c) Siunnersuutip sulisoqarnikkut atuuffigisinnaasaanut tunngatilluguSiunnersuutip sulisoqarnikkut atuuffigisinnaasaanut tunngatillugu Inatsisartut Allattoqarfiata inatsisilerinikkut kaammattuutai Naalakkersuisut killilimmik malitseqartissimavaat. Siunnersuut eqqartuussisarnermi oqartussaasunut (Politimesterimut, Nunatta Eqqartuussivianut) tusarniaassutigineqarsimanngimmat siunnersuutip maannakkut ilusiligaanera eqqartuussummik atuutitsinermi naleqquttuunngitsoq kingusinnersukkut paasinarsissanersoq imaaliinnarlugu erseqqinnerusumik paasinarsarneqarsinnaanngilaq. Taamaammat peqqussutip maannakkut ilusiligaanermisut qanoq naleqqutsigineranik Naalakkersuisut naliliinerat ilisimatitsinermut tunngaviusoq tusaatissatut tiguneqartariaqarpoq.
d) Nassaanik qulakkeerinninnermut allanngutsaaliuinermullu aningaasartuutinik taarsiisarnermut tunngatilluguNassaamik pisariaqarneratut qulakkeerinninnermut toqqortarinninnermullu inuttaasut aningaasartuutinik naammaginartumik angissusilinnik taarsiivigineqarsinnaannginnerannut atatillugu Naalakkersuisut isummernerminnut tunngaviutippaat aningaasarpassuusinnaasut inatsimmik tunngaveqanngitsumik nassaartumit piumasaqaatigineqarsinnaanerisa pinngitsoortinneqarnissaanik kissaateqarnerminnik. Nassaat allanngutsaaliorneqarnissamut il.il. piukuunnarnersut ungasianiit naliliivigissallugit aammattaaq ajornakusoorsinnaavoq.
Nunatta Katersugaasivianut peqqussutigineqartutut tunniussinnginnermi nassaap qulakkeerneqarnissaanut toqqortarineqarnissaanullu nassaartup nammineerluni aningaasaatiminik akilerlugu pisariaqartutut iliuuseqarusunnginnera pissutigalugu immap naqqani kulturikkut eriagisassat annaaneqarsinnaanerannik aarleqquteqarsinnaanermut sanilliullugu Inatsisartut tamanna oqimaalutartariaqassavaat.
e) Nassaanut akissarsisitsisoqarsinnaaneranut periarfissamut tunngatilluguNassaanut immikkut qaqutigoorutilinnut kulturikkullu oqaluttuarisaanikkut eriagisarialinnik tunniussinermut Naalakkersuisut nassaanut akiliuteqarsinnaannginnerannut tunngatillugu tamanna immap naqqani kulturikkut kingornutanut ajoqutaasumik "erlinnartunik ujaasinerit" aarleqqutigineqarsinnaanerisa pinngitsoorneqarnissaanik Naalakkersuisut kissaateqarnerannik tunngaveqarsorinarpoq.
Innuttaasup nassaamik eriagisariaqarluinnartumik ajornaatsumillu tunineqarsinnaasumik assersuutigalugu tunniussineranut atatillugu pissutsit erseqqissumik naleqqutinngitsut pisinnaanerannut ilaatigut aarleqquteqartoqarsinnaanera tamatuma kingorna Inatsisartut isumaliutigiumanerlugu aalajangigassarilissavaat. Innuttaasoq nammineerluni aningaasaatini atorlugit Katersugaasivimmut tunniussinissaq sioqqullugu nassaamik qulakkeerinninnissamut toqqortarinninnermullu nersortarialimmik alloriaateqarsimappat nassaanut akiliuteqarsinnaaneq pissutsinut naleqqutinngitsunut aammattaaq iluarsiissutaasinnaavoq.
Tigussaasumik allannguutissatut siunnersuutQulaani oqaaseqaatit tunngavigalugit allannguutissatut siunnersuummik tigussaasumik tulliani taaneqartumik isumaliutiissumminut ilanngussinissamik Kultureqarnermut Ilinniartitaanermullu Ataatsimiititaliaq isumaliuteqarumappat tamanna Inatsisartut Allattoqarfiata inatsisissanik nalilersuisarfiata pissusissamisoortutut isigissavaa:
1.Peqqussutissatut uiguliussami ungaluutip iluani "allannguutit" ilanngunneqassaaq.
2.
Peqqussutissatut siunnersuutip imm. 5-iat peerneqassaaq.
27. april 2004 Stefan Krehbiel