6. maj 2004

UPA 2004/36

 

Ulluunerani paaqqinnittarfiit, ulluunerani angerlarsimaffimmi paaqqinniffiit il. il. pillugit
Inatsisartut peqqussutaata allanngortinneqarneranik Inatsisartut peqqussutissaattut siunnersuut
(atuisut aningaasarsiaat tunngavigalugit akiliuteqartarneq)

 

pillugu

 

Inatsisartut Inatsisit Atortinneqarnerannut Ataatsimiititaliaata

 

ISUMALIUTISSIISSUTAA

 

siunnersuutip aappassaaneerneqarnerani saqqummiunneqartoq

 

Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:

 

Inatsisartunut ilaasortaq Ane Hansen, Inuit Ataqatigiit, siulittaasoq
Inatsisartunut ilaasortaq Isak Davidsen, Siumut, siulittaasup tullia
Inatsisartunut ilaasortaq Enos Lyberth, Siumut
Inatsisartunut ilaasortaq Ellen Christoffersen, Atassut
Inatsisartunut ilaasortaq Marie Fleischer, Demokraatit

 

Inatsisartut Inatsisit Atortinneqarnerannut Ataatsimiititaliaata UPA 2004-mi siullermeerinerup kingorna peqqussutissatut siunnersuut nassuiaatitai ilanngullugit misissuataarpaa.

Tusarniaanermit akissutisiat

Siunnersuutip matuma ataatsimiititaliamit suliarineqarnerata nalaani tusarniaanermit akissutit nuutinneqarneri pigineqarput.

Siunnersuutip tuaviuussassaanera pissutigalugu tusarniaanerup sivikitsumik piffissaqartitsilluni ingerlanneqarnissaa aalajangersarneqarsimasoq ataatsimiititaliamit paasineqarpoq.

Siunnersuutip imarisaa.

Ulluunerani paaqqinnittarfinniitsitsisarnermi kommuninilu angerlarsimaffinnilu paaqqinniffinniitsitsisarnermi angajoqqaat akiliutaasa isertitat naapertorlugit iluarsiiffigineqartarnerisa inatsisitigut erseqqissumik tunngavissinneqarnissaanik Inatsisartut Ombudsmandiata 16. marts 2004-mi kaammattuuteqarnerata kingunerisaanik siunnersuut saqqummiunneqarpoq.

Inatsisartut Ombudsmandianit kaammattuutip malitseqartinneqarnissaa Naalakkersuisut erngerlutik suliniutigisimammassuk ataatsimiititaliamit iluarisimaarneqarluni maluginiarneqarpoq. Inatsisartut Naalakkersuisunut qanoq annertutigisumik piginnaatitsissuteqarsinnaanerat pillugu nalornissutigineqarsinnaasut tamarmik siunnersuutikkut nalorninarunnaarsinneqarput taamaalilluni ombudsmandip oqaaseqaataa tamakkiisumik malinneqarpoq.

Ulluunerani paaqqinnittarfimmiitsitsisarnermi angerlarsimaffinnilu paaqqinniffinniitsitsisarnermi isertitat aallaavigalugit atuisunik akiliuteqartitsisarneq pillugu maleruagassanut tunngatillugu aaqqissuussinerup ukiorpassuarni atorneqarsimasup attatiinnarneqarnissaanut inatsisiliortup piumassuseqarnera peqqussutip allannguutissaata uuma akuersissutigineqarneratigut uppernarsarneqarpoq. Isumaginninnermik iluarsaaqqinnermut ataatsimiititaliarsuup siusinnerusukkut kaammattuutai naapertorlugit aaqqissuussinikkut inuiaqatigiit nammatassaasa naapertuilluartumik tamanillu akuersaarneqarsinnaasumik agguaanneqarsissaat tassuuna qulakkeerneqarpoq.

Pineqartup nutaamik iluarsartuussiffigineqarneratigut kommunit piginnaatitaaffiinik annikilliliinermik malitseqartinneqassanngitsoq kommunit tusarniaaffigineqartut assigalugit Inatsisit Atortinneqarnerannut Ataatsimiititaliap naatsorsuutigaa.

Tamanna tunngavigalugu Naalakkersuisut peqqussutissatut siunnersuutaat ataatsimiititaliamit isumaqatigiittumit taperserneqarpoq.

Taama oqaaseqarluni Inatsisartut Inatsisit Atortinneqarnerannut Ataatsimiititaliaata peqqussutissatut siunnersuut inatsisartunut aappassaaniigassanngortippaa.

 

	Ane Hansen, Siulittaasoq
Isak Davidsen		Ellen Christoffersen
Enos Lyberth		Marie Fleischer