Nunaqarfigisami radioqarfinnut tv-qarfinnullu il.il. tapiissutit pillugit Namminersornerullutik Oqartussat nalunaarutaat nr. 21, 30. december 2004-meersoq.
Radiukkut tv-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 39, imm. 2 aamma § 42, imm. 1 aamma 2, aamma § 59, imm. 2 aamma 3 naapertorlugit aalajangersarneqarput:

 

Tapiissutit il.il.

§ 1. Naalakkersuisut nunaqarfigisami radiukkut tv-kkullu aallakaatitsisarnermut tapiissutinik, aningaasanut inatsimmi tassunga aningaasaliissutitut immikkoortinneqarsimasunit tunniussisassapput.

§ 2. Nunaqarfigisami radiukkut tv-kullu aallakaatitsisarnermut aningaasatigut tapiissutit imatut tunniunneqarsinnaapput:
1) Tunngaviusumik tapiissutit nunaqarfigisami radioqarfiit tv-qarfiillu ingerlanneqarnerannut tunniunneqartartut.
2) Aallakaatitassiornissamut tapiissutit nunaqarfigisami tv-qarfinnuinnaq tunniunneqartartut.
3) Kattuffimmut tapiissutit sinerissami takusassiiviit tusagassiiviillu kattuffiata (STTK-p) ingerlanneqarneranut tunniunneqartartut.
4) Nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutit.
Imm. 2. Tunngaviusumik tapiissutit, tak. imm. 1, nr. 1, aamma aallakaatitassiornissamut tapiissutit, tak. imm. 1, nr. 2, qinnuteqartoqarneratigut tunniunneqarsinnaapput.
Imm. 3. Tapiissutinik qinnuteqartoqarnerani, tak. imm. 2, tapiissutinik agguaasartuusut, tak. §§-it 4 aamma 13, nalilissavaat aallakaatitsivik nammineerluni namminerisamillu aallakaatitassiortarluni ingerlanersoq.

 

Tapiissutit agguataarnerat

§ 3. Aningaasaliissutinit § 1-imi taaneqartunit 400.000 kr.-it kattuffimmut tapiissutitut immikkoortinneqariissapput, tak. § 2, imm. 1, nr. 3.
Imm. 2. Aningaasaliissutinit § 1-imi taaneqartunit 100.000 kr.-it nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutitut immikkoortinneqariissapput, tak. § 2, imm. 1, nr. 4.
Imm. 3. Aningaasaliissutit sinnerinit pingajorarterutit marluk (2/3-it) tunngaviusumik tapiissutinut, tak. § 2, imm. 1, nr. 1, pingajorarterutillu (1/3-it) aallakaatitassiornissamut tapiissutinut, tak. § 2, imm. 1, nr. 2, atorneqassapput.

 

Tunngaviusumik tapiissutit

§ 4. Tunngaviusumik tapiissutit STTK-mit aqunneqarlutillu tunniunneqartassapput. Tunniunneqarnerat kvartalimi qaammatip siulliup naannginnerani pisassaaq.
Imm. 2. Tapiissutit imm. 1-imi taaneqartut aqunneqarnerat tunniunneqartarnerallu kultureqarnermut pisortaqarfiup nakkutigissavaa.

§ 5. Tunngaviusumik tapiissutit STTK-p nunaqarfigisami aallakaatitsivinnut nutaanut marlunnut, tapiiffigineqarnissamut piumasaqaatinik naammassinninnermik kingorna kvartali tulliuttoq aallarnerfigalugu tapiissutinik tunineqarsinnaasunut aningaasanik immikkoortitsereerneratigut aningaasaliissutigineqartassapput.
Imm. 2. Nunaqarfigisami aallakaatitsiviit marlunnit amerlanerusut qinnuteqareernermikkut aningaasanik immikkoortinneqareersunik pisinnaappata, tak. imm. 1, aallakaatitsiviit marluk tunngaviusumik tapiissutinik tunineqarnissamut piumasaqaatinik naammassinneqqaartut kisimik tapiiffigineqassapput, tak. § 6, imm. 1-imiit 3-mut.
Imm. 3. STTK-p tunngaviusumik tapiissutit sinneri, tak. imm. 1, nunaqarfigisami radioqarfiit tv-qarfiillu tapiiffigineqarsinnaasut sinnerinut assigiimmik agguataassavai.

§ 6. Piumasaqaatit radiukkut tv-kkullu aallakaatitsisarneq pillugu peqqussummi taaneqartut saniatigut tunngaviusumik tapiissutinik tunineqarnissamut piumasaqaatit makkua naammassineqarsimassapput:
1) Tunngaviusumik tapiissutinik qinnuteqaat ukiumi qinnuteqaatip attuumassuteqarfigisaani kingusinnerpaamik ulloq 5. januar STTK-mit tiguneqareersimassaaq, taamaattorli tak. § 5, imm. 2.
2) STTK-p qaammatisiutit malillugit ukiumi qinnuteqaatip attuumassuteqarfigisaani missingersuutit kingusinnerpaamik ulloq 5. januar tigoreersimassavai. Missingersuutit siulersuisut siulittaasuannit siulersuisunilu ilaasortanit minnerpaamik marlunnit atsiorneqarsimassapput.
3) Qaammatisiutit malillugit ukiumi qaangiuttumi Namminersornerullutik Oqartussanit tapiissutit tamarmiusut minnerpaamik 150.000 kr.-iusimappata aammattaaq STTK-p qaammatisiutit malillugit ukiumi qinnuteqaatip attuumassuteqarfigisaani anguniakkatut iliuusissatullu pilersaarutit kingusinnerpaamik ulloq 5. januar tigoreersimassavai. Anguniakkatut iliuusissatullu pilersaarutit siulersuisut siulittaasuannit siulersuisunilu ilaasortanit minnerpaamik marlunnit atsiorneqarsimassapput.
Imm. 2. STTK-p tapiiffigineqarnissamik qinnuteqaatip kingusinnerpaamik tiguneqarsimaffissaa ilutigalugu piffissamut qinnuteqaatip attuumassuteqarfigisaanut missingersuutit nunaqarfigisami aallakaatitsivinnit nutaanit, tak. § 5, imm. 1 aamma 2, tigusimassavai. Missingersuutit siulersuisut siulittaasuannit siulersuisunilu ilaasortanit minnerpaamik marlunnit atsiorneqarsimassapput.
Imm. 3. Aallakaatitsisinnaanermut akuersissut inummut ataatsimut imaluunniit inunnut arlalinnut ataatsimoortunut tunniunneqarsimappat naatsorsuutit, missingersuutit aamma anguniakkatut iliuusissatullu pilersaarutit aallakaatitsisinnaanermut akuersissutip piginnittuanit imaluunniit piginnittuinit atsiorneqarsimassapput.
Imm. 4. Radioqarfiit tv-qarfiillu STTK-mut ilaasortaanngitsut paasissutissat imm. 1, nr. 2-miit 3-mut kiisalu imm. 2-miit 3-mut taaneqartut, piffissarititat piumasaqaatillu allanut atuuttut malillugit kultureqarnermut pisortaqarfimmut nassiutissavaat.

§ 7. Tunngaviusumik tapiissutinik tunineqarnissami piumasaqaatit makku atuupput:
1) Aallakaatitsiviup siulersuisuisa, qaammatisiutit malillugit ukioq qaangiuttoq pillugu ukiumoortumik nalunaarutaat STTK-p kingusinnerpaamik ulloq 1. juni tigoreersimassavaa. Ukiumoortumik nalunaarut siulersuisunit tamarmiusunit atsiorneqarsimassaaq, taamaattorli tak. imm. 4.
2) Aallakaatitsiviup, qaammatisiutit malillugit ukiumi qaangiuttumi ukiumoortumik naatsorsuutai STTK-p kingusinnerpaamik ulloq 1. juni tigoreersimassavai, taamaattorli tak. imm. 4.
3) STTK-p kingusinnerpaamik qaammatit ulluisa 5-ianni tigoreersimasassavaa aallakaatitsiviup tapiissutinik pissarsisartup qaammammi qaangiuttumi aallakaatissimasaasa allattorsimaffiat. Aallakaatitassiat tamarmik, nunaqarfigisami nutaarsiassanut aallakaatitanullu innuttaasut oqaaseqarsinnaatitaaffigisaannut agguataakkat taaguutaat, minutsit amerlassusii, oqaatsit imarisaallu nalunaarneqartassapput. Aammattaaq qaammammi nammineerluni aallakaatitassiat tamarmiusut kiisalu nipilersuutit atorneqartut, pilerisaarutit aammalu satellit-tv -radiuluunniit atorneqarpata taakku minutsinngorlugit nalunaarneqartassapput.
Imm. 2. Qaammatisiutit malillugit ukiumi qaangiuttumi Namminersornerullutik Oqartussanit tapiissutit tamarmiusut minnerpaamik 150.000 kr.-iusimappata naatsorsuutit kukkunersiuisumit nalunaarsorneqarsimasumit imaluunniit naalagaaffimmit akuerisaasumit kukkunersiorneqarsimassapput. Naatsorsuutit aamma siulersuisunit tamarmiusunit akuerineqarsimallutillu atsiorneqarsimassapput aammalu kukkunersiuisut oqaaseqaataat ilanngunneqassapput. Ukiumi qaangiuttumi tapiissutit Namminersornerullutik Oqartussanit aningaasaliissutigineqarsimasut naatsorsuutini ersarissumik takuneqarsinnaassapput.
Imm. 3. Qaammatisiutit malillugit ukiumi qaangiuttumi Namminersornerullutik Oqartussanit tapiissutit tamarmiusut 150.000 kr.-init ikinnerusimappata naatsorsuutit nammineq kukkunersiuisorisamit imaluunniit kukkunersiuisumit nalunaarsorneqarsimasumit kukkunersiorneqarsimassapput. Naatsorsuutit aamma siulersuisunit tamarmiusunit akuerineqarsimallutillu atsiorneqarsimassapput aammalu kukkunersiuisut oqaaseqaataat ilanngunneqassapput. Ukiumi qaangiuttumi tapiissutit Namminersornerullutik Oqartussanit aningaasaliissutigineqarsimasut naatsorsuutini ersarissumik takuneqarsinnaassapput.
Imm. 4. Aallakaatitsisinnaanermut akuersissut inummut ataatsimut imaluunniit inunnut arlalinnut ataatsimoortunut tunniunneqarsimappat ukiumoortumik nalunaarut aamma naatsorsuutit aallakaatitsisinnaanermut akuersissutip piginnittuanit imaluunniit piginnittuinit atsiorneqarsimassapput.
Imm. 5. Radioqarfiit tv-qarfiillu STTK-mut ilaasortaanngitsut paasissutissat imm. 1-imiit 4-mut taaneqartut, piffissarititat piumasaqaatillu allanut atuuttut malillugit kultureqarnermut pisortaqarfimmut nassiutissavaat.

§ 8. Tunngaviusumik tapiissutinik tunineqarnissaq STTK-mut ilaasortaanissamik piumasaqaatitaqanngilaq.
Imm. 2. Tunngaviusumik tapiissutinik tunineqarnissami piumasaqaataapput qinnuteqartup aallakaatitsisinnaanermut akuersissummik atuuttumik peqarnissaa, aammalu qinnuteqartup radiukkut tv-kkulluunniit aallakaatitanik aallakaatitsisarnissaa.

§ 9. STTK-p tunngaviusumik tapiissutinik qinnuteqaat missingersuutilluunniit kvartalimi qaammatip siulliup ulluisa 5-iata kingorna aatsaat tigusimappagit, tunngaviusumik tapiissutinik aatsaat kvartalimi tulliuttumi tunniussisoqarsinnaavoq.
Imm. 2. STTK aallakaatitsiviup aallakaatissimasaasa allattorsimaffiannik tigusaqarsimanngippat, imaluunniit STTK-p kvartalikkaartumik nalunaarutaani allassimappat aallakaatitsivik aallakaatitanik aallakaatitsisimanngitsoq imaluunniit aallakaatitsivik tapiiffigineqarnissamut maleruagassanik allatigut ersarissumik unioqqutitsisimasoq, taava aallakaatitsivik kvartalimi tulliuttumi tapiissutinik tunineqassanngilaq.
Imm. 3. Tapiissutinik tunineqarnissamut maleruagassanik unioqqutitsisoqarpat, tak. § 6-imiit 7-imut, imaluunniit tapiissutinik pissarsisup tapiissutit aningaasaliissutigineqarneranni siunertaannit allaasunut atorsimappagit, STTK-p tapiissutinik pissarsisartumut tunniussisarneq sukkulluunniit unitsissinnaavaa, tapiissutinillu tunniunneqarsimasunik tamakkiisumik ilaannakuusumilluunniit utertitsinissaq piumasarisinnaallugu.
Imm. 4. Aallakaatitsivik imm. 1-imiit 2-mut pineqartoq aatsaat tapiissutinik pissarsisaleqqissinnaavoq § 6-imi piumasaqaatit naammassisimaleqqikkunigit aammalu § 7-imi piumasaqaatit eqquutsikkunigit.
Imm. 5. Tapiissutit tunniunneqanngitsoorsimasinnaasut tunniunneqassanngillat, kisiannili nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutitut immikkoortitanut nuunneqassallutik, tak. § 2, imm. 1, nr. 4

§ 10. Tunngaviusumik tapiissutinik qinnuteqaammut itigartitsinerit, kiisalu tapiissutinik tunniussisarnerup unitsinneqarnissaanik imaluunniit tapiissutinik tunniunneqarsimasunik tamakkiisumik ilaannakuusumilluunniit utertitsinissamik § 9, imm. 2-miit 3-mut naapertorlugit aalajangiinerit, aalajangiinerup qinnuteqartumut nalunaarutigineqarneraniit sap.ak. 4-t qaangiutsinnagit kultureqarnermut pisortaqarfimmut naammagittaalliuutigineqarsinnaapput.

§ 11. STTK-p tunngaviusumik tapiissutitut atunngitsoorneqarsimasinnaasut nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutitut immikkoortitanut nuussavai, tak. § 2, imm. 1, nr. 4.

 

Aallakaatitassiornissamut tapiissutit

§ 12. Tunngaviusumik tapiissutit aallakaatitassiornissamut tapiissutinik ilaneqarsinnaapput, taamaalillutik nunaqarfigisami tv-qarfiit aallakaatitassianut aallakaatitassianulluunniit tulleriiaartunut tapiiffigineqarnissamik qinnuteqarsinnaallutik.

§ 13. Aallakaatitassiornissamut tapiissutit Radio- tv-lu pillugit aalajangiisartunit aqunneqarlutillu tunniunneqartassapput. Tunniunneqarnerat aallakaatitsiviit ataasiakkaat nammineerlutik aallakaatitassiaat akuerisaasut nalunaaquttap akunneranut agguataakkat, aallakaatitassiornissamut tapiissutitut aningaasaliissutigineqartunik kvartalinut 4-nut agguataakkanik agguarneri tunngavigalugit kvartalit tamarmik naanerisa kingorna pisassaaq.
Imm. 2. Kvartalimut qaangiuttumut tunngatillugu aallakaatitassiornissamut tapiissutinik qinnuteqaat Radio- tv-lu pillugit aalajangiisartut kingusinnerpaamik ulluni 5. april, 5. juli, 5. oktober aamma 5. januar tigoreersimassavaat.

§ 14. Aallakaatitassiornissamut tapiissutinik qinnuteqaat paasissutissanik makkuninnga imaqassaaq:
1) Aallakaatitassiap aallakaatitassialluunniit tulleriiaartut taaguutaat.
2) Aallakaatitsinerit amerlassusiat.
3) Aallakaatitat ataasiakkaat sivisussusiat.
4) Aallakaatitassiap aallakaatitassialluunniit tulleriiaartut tamakkiisumik aningaasalersorneqarnerat.
5) Aallakaatitassiap aallakaatitassialluunniit tulleriiaartut aallakaatitassianut makkununnga agguataarlugit imarisaat: Meeqqanut inuusuttunullu aallakaatitassiaq, nutaarsiassanik soqutiginartunillu aallakaatitassiaq, inuiaqatigiit pillugit oqallinnermillu aallakaatitassiaq, timersorneq pillugu aallakaatitassiaq, kulturi pinngortitarlu pillugit aallakaatitassiaq.
6) Aallakaatitassiornikkut sullikkumasat.
7) Suleqatigisimasinnaasat.

§ 15. Aallakaatitassiornissamut tapiissutit taamaallaat nunaqarfigisami tv-qarfiit nammineerlutik aallakaatitassiorneranni atugassatut tunniunneqarsinnaapput, taamaattorli tak. imm. 2-miit 4-mut.
Imm. 2. Aallakaatitassiornissamut tapiissutinik bingortitsinernut, angallanneq pillugu nalunaarutinut assigisaannullu atugassanik tunniussisoqarneq ajorpoq.
Imm. 3. Aallakaatitassiornissamut tapiissutinik piffissamut aallakaatitsivimmut, taamaallaat aallakaatitsiviup ilisarnaataanik, paasissutissiissutinik kaaviteruusaakkanik, tekst-tv-mik, aallakaateqqitanik, pilerisaarutinik, info-kanalinik taaneqartartunik taamaaqataannillu aallakaatitsinernik allanik imaqartumut atugassanik tunniussisoqarneq ajorpoq.
Imm. 4. Aallakaatitassiornissamut tapiissutinik assiliissutit aalajangersimasumut inissillugit, soorlu timersornernit imaluunniit naalagiarnernit aallakaatitsinissanut atugassanik tunniussisoqarneq ajorpoq.

§ 16. Aallakaatitassiornissamut tapiissutinik tunineqarnissaq STTK-mut ilaasortaanissamik piumasaqaatitaqanngilaq.
Imm. 2. Aallakaatitassiornissamut tapiissutinik tunineqarnissami piumasaqaataapput qinnuteqartup aallakaatitsisinnaanermut akuersissummik atuuttumik peqarnissaa, aammalu qinnuteqartup tv-kkut aallakaatitanik aallakaatitsisarnissaa.

§ 17. Radio- tv-lu pillugit aalajangiisartut tv-kkut aallakaatitat aallakaatitassiornissamut tapiissuteqarfigineqarsimasut, aalajangiisartut nakkutilliisussaatitaanerannut atatillugu taamungaannaq misissuiffigisarsinnaavaat.
Imm. 2. Tv-kkut aallakaatitat, tak. imm. 1, aallakaatitassiornissamut tapiissutinik qinnuteqaammut naapertuutinnginnerat paasineqarpat Radio- tv-lu pillugit aalajangiisartut tapiissutinik tunniussisarneq unitsissinnaavaat, tapiissutillu tunniunneqarsimasut tamakkiisumik ilaannakuusumilluunniit utertinneqarnissaat piumasarisinnaallugu.

§ 18. Radio- tv-lu pillugit aalajangiisartut tapiissutit pillugit aamma tapiissutinik unitsitsinissamik tapiissutinillu tamakkiisumik ilaannakuusumilluunniit utertitsinissamik aalajangiineri allaffeqarfitsigut oqartussaasunut allanut naammagittaalliuutigineqarsinnaanngillat.

§ 19. Radio- tv-lu pillugit aalajangiisartut aallakaatitassiornissamut tapiissutitut kvartalimi tunniunneqanngitsoortut kvartalimi tulliuttumi aallakaatitassiornissamut tapiissutitut immikkoortitanut nuussavaat.
Imm. 2. Radio- tv-lu pillugit aalajangiisartut aallakaatitassiornissamut tapiissutitut tunniunneqanngitsoorsimasinnaasut, siunertanut § 2, imm. 1, nr. 4-mi taaneqartunut ukiumi tulliuttumi atugassatut ukiup naalernerani nuussavaat

 

Kattuffimmut tapiissutit

§ 20. Kattuffimmut tapiissutit kultureqarnermut pisortaqarfimmit aningaasaliissutigineqartarlutillu aqunneqassapput.

§ 21. Kultureqarnermut pisortaqarfiup kattuffimmut tapiissutinik STTK-mut tunniussinissaani, tak. § 2, imm. 1, nr. 3, piumasaqaatit makkua naammassineqarsimassapput:
1) STTK-p missingersuutai, anguniakkatut iliuusissatullu pilersaarutai kiisalu ilaasortaasa allattorsimaffiat kultureqarnermut pisortaqarfiup, qaammatisiutit malillugit ukiumi kattuffimmut tapiissutit attuumassuteqarfigisaanni kingusinnerpaamik ulloq 5. januar tigoreersimassavai.
2) Aallakaatitsiviit ilaasortaasut tamarmik qaammatisiutit malillugit ukiumi qaangiuttumi aallakaatissimasaasa tamarmiusut ukiumut naatsorsorneqarfiat kultureqarnermut pisortaqarfiup kingusinnerpaamik ulloq 10. januar STTK-mit tigoreersimassavaa.
Imm. 2. Aallakaatitsiviit tamarmik aallakaatissimasaasa tamarmiusut imm. 1, nr. 2 malillugu ukiumut naatsorsorneqarfiat makkuninnga imaqassaaq:
1) Aallakaatitsiviit ataasiakkaat nammineerlutik aallakaatitassiaat tamarmiusut minutsinngorlugit.
2) Taakkua imarisaasa, nunaqarfigisami nutaarsiassanut aallakaatitanullu innuttaasut oqaaseqarsinnaatitaaffigisaannut agguataakkat nalunaarneqarnerat.
3) Nammineerluni aallakaatitassiat oqaatsinut agguataarnerisa nalunaarneqarnerat.
4) Satellitradiup imaluunniit satellit-tv-p, kanalip aqqa nalunaarlugu, atugaanerata annertussusiata nalunaarneqarnera.
Imm. 3. Kattuffimmut tapiissutinut taakkua saniatigut piumasaqaataapput STTK-p nunaqarfigisami aallakaatitsivinnut ingerlaavartumik attaveqartarnissaa ilitsersuinissamillu neqerooruteqartarnissaa, aammalu nunaqarfigisami aallakaatitsivinnut sammisumik pikkorissarnernik isumaginnittuunissaa.

§ 22. Kattuffimmut tapiissutit tunniunneqarnissaanni piumasaqaatit makkua atuupput:
1) Aallakaatitsiviit sorliit kvartalimi qaangiuttumi tunngaviusumik tapiissutinik tunineqarsimanerannik naatsorsuiffik aammalu aningaasat nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutitut immikkoortinneqartunut kvartalimi qaangiuttumi nuunneqarsimasinnaasut naatsorsorneqarfiat kultureqarnermut pisortaqarfiup kingusinnerpaamik ulluni 10. april, 10. juli, 10. oktober aamma 10. januar STTK-mit tigoreersimasassavai.
2) Qaammatisiutit malillugit ukiumi qaangiuttumi ukiumoortumik naatsorsuutit siulersuisullu ukiumoortumik nalunaarutaat kingusinnerpaamik ukiumi tapiissutit attuumassuteqarfigisaanni ulloq 1. juni kultureqarnermut pisortaqarfimmut nassiunneqareersimassapput. Ukiumoortumik naatsorsuutit kukkunersiuisumit naalagaaffimmit akuerisaasumit imaluunniit nalunaarsorneqarsimasumit kukkunersiorneqarsimassapput, siulersuisunit tamarmiusunit atsiorneqarsimassallutik aammalu kukkunersiuisut oqaaseqaataat ilanngunneqarsimassapput.
3) Nunaqarfigisami aallakaatitsiviit sulisuisa ilinniartitaanerisa § 2, imm. 1, nr. 4-mi taaneqartut allaaserineqarneri, naliliivigineqarneri naatsorsuutitaallu ukiumoortumik naatsorsuutini nalunaarummilu immikkoortillugit allanneqarsimassapput.

§ 23. Kattuffimmut tapiissutitut aningaasaliissutigineqartut atorneqarnerat kultureqarnermut pisortaqarfiup nakkutigissavaa.
Imm. 2. Kattuffimmut tapiissutit aningaasaliissutigineqarnerminni siunertaannit allaasunut atorneqartut paasineqarpat, kultureqarnermut pisortaqarfiup tapiissutit tunniunneqartarnerat unitsissinnaavaa kattuffimmullu tapiissutit tamakkiisumik ilaannakuusumilluunniit utertinneqarnissaat piumasarisinnaallugu.

 

Nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutit

§ 24. Nunaqarfigisami radioqarfiit tv-qarfiillu sulisuisa ilinniarteqqinneqartarnerannut ingerlaqqiffiusumillu ilinniartinneqarnerannut tapiissutit STTK-mit aqunneqarlutillu tunniunneqartassapput aammalu aningaasanik §§-ini 11-mi 19-imilu taaneqartunik ilaneqartassallutik.

§ 25. Aningaasat § 2, imm. 1, nr. 4-mi taaneqartut atorlugit STTK-p nunaqarfigisami radioqarfiit tv-qarfiillu sulisui ilinniarteqqinneqarluni ingerlaqqiffiusumillu ilinniartinneqarluni pikkorissarnerni peqataanissamut neqeroorfigisassavai.
Imm. 2. Pikkorissarnerit imm. 1-imi taaneqartut kattuffimmit namminermit sulissutigineqarsinnaapput taannaluunniit aqqutigalugu ingerlanneqarsinnaallutik.
Imm. 3. Aningaasat imm. 1-imi taaneqartut pikkorissarnernut, sulisuusut tusagassiornermik sulinerminni piginnaasaannik, matumani aamma pitsaasumik tusagassiornissamik, tusagassiuutit iluani naatsorsuuserinerullu iluani piginnaasassanik annertusaasunut atorneqarnerussapput.

§ 26. Pikkorissarnernut § 2, imm. 1, nr. 4-mi taaneqartunut peqataanissaq STTK-mut ilaasortaanissamik piumasaqaatitaqanngilaq. Peqataanissamili piumasaqaataavoq pikkorissarnermi peqataasussap nunaqarfigisami aallakaatitsivimmut aallakaatitsisinnaanermut akuersissummik peqartumut aammalu piffissap pikkorissarnermik pineqartumik ingerlatsiviusup nalaani radiukkut tv-kkulluunniit aallakaatitanik aallakaatitsisartumut attuumassuteqartuunissaa.

§ 27. Ilinniarteqqinneqartarnernut ingerlaqqiffiusumillu ilinniartinneqarnernut tapiissutitut aningaasaliissutigineqartut atorneqarnerat kultureqarnermut pisortaqarfiup nakkutigissavaa.
Imm. 2. Tapiissutit aningaasaliissutigineqarnerminni siunertaannit allaasunut atorneqartut paasineqarpat, kultureqarnermut pisortaqarfiup tapiissutit tunniunneqartarnerat unitsissinnaavaa tapiissutillu tunniunneqarsimasut tamakkiisumik ilaannakuusumilluunniit utertinneqarnissaat piumasarisinnaallugu.

§ 28. Pikkorissarnernut § 2, imm. 1, nr. 4-mi taaneqartunut peqataanissamik qinnuteqaammik itigartitsineq ullormit aalajangiiffiusumiit sap.ak. 4-t qaangiutsinnagit kultureqarnermut pisortaqarfimmut allakkatigut naammagittaalliuutigineqarsinnaavoq.

 

Qinnuteqaatit il.il. tunniunneqartarneri suliarineqartarnerilu

§ 29. § 2, imm. 1, nr. 1 aamma 2 malillugit qinnuteqaatit suliarineqarnissaanni qinnuteqarfissatut immersugassap kultureqarnermut pisortaqarfimmit akuerisaasup immersorneqarnissaa piumasaqaatigineqarsinnaavoq.
Imm. 2. STTK-p tapiissutinik § 2, imm. 1, nr. 1-imi 3-milu taaneqartunik aqutsineranut atatillugu nalunaaruteqartarfissatut immersugassat kultureqarnermut pisortaqarfimmit akuerisaasut immersorneqartarnissaat piumasaqaatigineqarsinnaavoq.

§ 30. Tapiissutit § 2, imm. 1, nr. 1-imiit 4-mut taaneqartut pillugit qinnuteqaatinik naammagittaalliuutinillu il.il. suliarinninnermi pisortat ingerlatsineranni suliassat suliarineqartarnerat pillugu Inatsisartut inatsisaat malinneqassaaq, matumani aamma suliassanik aalajangersimasunik suliarinninnermi nipangiussisussaatitaanermut maleruagassat.

 

Pineqaatissiisarnerit

§ 31. Kinaluunniit tapiissutitut aningaasaliissutit aningaasaliissutigineqarneranni siunertaannit allaasunut atuisoq, tapiiffigineqarnissamik maleruagassanik unioqqutitsineq annertuppat arlaleriarluniluunniit unioqqutitsineruppat akiliisinneqarsinnaavoq.
Imm. 2. Aktieselskabi, anpartsselskabi, andelsselskabi, peqatigiiffik assigisaalluunniit imm. 1-imik unioqqutitsippat, ingerlatseqatigiiffik il.il. akiliisitsissummik taamaattumik akiliisussanngortinneqarsinnaavoq. Kommuni kommunilluunniit suleqatigiiffiat il.il. unioqqutitsippat kommuni kommunilluunniit suleqatigiiffiat il.il. aalajangersagaq aamma taanna naapertorlugu akiliisitsissummik taamaattumik akiliisussanngortinneqarsinnaavoq.

 

Atortuulerfia

§ 32. Nalunaarut una ulloq 1. januar 2005-imi atortuulerpoq.

Namminersornerullutik Oqartussat, ulloq 30. december 2004

Henriette Rasmussen

/

Lise Lennert Olsen