Qummoroortaatinik toqqortaqartarneq pillugu Namminersornerullutik Oqartussat nalunaarutaat nr. 19, 9. december 2004-meersoq.

Ikuallannaveersaartitsineq qatserinerlu pillugit Inatsisartut peqqussutaanni nr. 6, 30. oktober 1992-imeersumi § 25, imm. 1 aamma § 26, imm. 2 - 4 naapertorlugit makku aalajangersarneqarput:

 

Atuuffiit

§ 1. Nalunaarut qummoroortaatinik, naalagaaffiup sinneraniit immikkut akuersissutitaqanngitsumik Kalaallit Nunaannut eqqunneqarsinnaasunik toqqortaqartarnermut atuutsinneqarpoq, tak. Inatsiseqarnermut ministereqarfiup qummoroortaatit pillugit nalunaarutaa Kalaallit Nunaannut tunngasoq nr. 227, 6. juni 1968-imeersoq.

 

Nassuiaatit

§ 2. Nalunaarummi matumani qummoroortaatit pineqartut kisimik tassaapput qummooroortaatit aliikkutaralugu atugassiat.
Imm. 2. Nalunaarummi matumani qummoroortaatit aliikkutaralugu atugassiatut pineqartut tassaapput qummoroortaatit aallartinneqarnerminni qaammaallattartut, nipiliortartut pujuliortartulluunniit, imaluunniit taakku kattullugit piginnaaneqartut, aammalu aliikkutassatut atorneqarnissaat siunertaralugu sanaajusut. Qummoroortaatit taakku I-itut aamma II-tut suussusiligaapput.
Imm. 3. Nalunaarummi matumani qummoroortaatit I-itut suussusilikkat pineqartut tassaapput qummoroortaatit killilimmik piginnaanillit, akissarsiutigalugu suliaqartunut atugassiatut sanaajunngitsut, aammalu atugassanik pisiniarfinniit tuniniarneqarsinnaasut. I-tut suussusilikkani pineqarput: Seqqortaatit (amorces), nusullugit seqqortaatit (amorcesbånd), seqqortartut (knaldperler), imassat seqqortaatit (knaldpropper), seqqortaatit (knallerter), qaartittakkat nerriviup qaanut ilisakkat, nusullugit qaartittakkat nerriviup qaanut ilisakkat, seersartut aamma isfontænit.
Imm. 4. Nalunaarummi matumani qummoroortaatit II-itut suussusilikkat pineqartut tassaapput qummoroortaatit aliikkutaralugu atugassiat, akissarsiutigalugu suliaqartunut atugassiatut sanaajunngitsut, aammalu atugassanik pisiniarfinniit tuniniarneqarsinnaasut. Qummoroortaatit II-tut suussusilikkat akuersissutip normuanik immikkut ittumik piligaapput, Sikkerhedsstyrelsip qummoroortaatinut akuerisanut nalunaarsuiffiani takuneqarsinnaasumik.

§ 3. Nalunaarummi matumani amerlassuserititat kg-nngorlugit ilanngaateqanngitsumik nalunaarsugaapput.

§ 4. Nalunaarummi matumani tunitsivik pineqartoq tassaavoq nerriviusaq, nerrivik, ungaluusaq assigisaaluunniit, qummoroortaatinik tuniniaaffiusoq tunniussuiffiusorlu.
Imm. 2. Nalunaarummi matumani containeri pineqartoq tassaavoq assartuinermut containeri assigisaaluunniit sisaasoq, annerpaamik 20 fodinik angissusilik.
Imm. 3. Nalunaarummi matumani toqqorsivik pineqartoq tassaavoq illu imaluunniit containeri.
Imm. 4. Nalunaarummi matumani sumiiffinnut killiliussat pineqartut tassaapput sumiiffiit illoqarfiup imaluunniit nunaqarfiup killeqarfiisa iluiniittut, aammalu kommunini pilersaarutini atuuttuni A-tut, B-tut, C-tut, D-tut imaluunniit E-tut suussusilerneqarsimasut.

 

Toqqortaqarneq

§ 5. Illuni inissiatut atorneqartuni inissiami ataatsimi qummoroortaatit annerpaamik 5 kg-t uninngatinneqarsinnaapput.

§ 6. Inini qummoroortaatinik amerlasuunngorlugit tuniniaaffiusuni, tunitsivinnik aalajangersimasunik pilersugaasuni imaluunniit pilerneqarallarsimasuni annerpaamik 50 kg-t uninngatinneqarsinnaapput.

§ 7. Inini ininut tunitsiviusunut tulliusuni, tak. imm. 2, qummoroortaatit annerpaamik 100 kg-t toqqortarineqarsinnaapput.
Imm. 2. Init aalajangersakkami matumani taaneqartut tunitsivimmiit avinngarusimassapput, ussissunik matoqassallutik.

§ 8. Illumi, sumiiffimmut killiliussap A-p imaluunniit C-p iluani inissisimasumi qummoroortaatit annerpaamik 150 kg-t toqqortarineqarsinnaapput.
Imm. 2. Sumiiffimmut killiliussap A-p imaluunniit C-p iluani containerinik qummorootaatinik imalinnik inisseeqqusaanngilaq.

§ 9. Sumiiffimmut killiliussap B-p, D-p imaluunniit E-p iluani qummoroortaatinik illuni imaluunniit containerini toqqortaqartoqarsinnaavoq, taamaattorli tak. imm. 2 - 4, piumasaqaatit uku naammassineqarsimappata:
1) toqqortaqarfiusut minnerpaamik 10 meterinik akuttussuseqassapput,
2) silami inissitat ikuallajasut minnerpaamik 15 meterinik ungasissuseqassapput, aamma¨
3) illut inissiatut atorneqartut minnerpaamik 40 meterinik ungasissuseqassapput.
Imm. 2. Containerinik arlalinnik inissiinermi taakku assigiimmik sammivilerlugit matuilu nalleqqatigiisillugit ilineqassapput.
Imm. 3. Containerit kinguleriisillugit inissinneqassanngillat.
Imm. 4. Sumiiffimmut killiliussap B-p, D-p aamma E-p iluani qummoroortaatinik containerinut toqqorsinissaq pitinnagu, akuersissummik kommunalbestyrelsimut piniartoqassaaq.

 

Pineqaatissiissutinut atuutilerfianullu aalajangersakkat

§ 10. §§ 5-9-mi aalajangersakkanik unioqqutitsineq pillaammik akiliitsinermik kinguneqassaaq.
Imm. 2. Unioqqutitsinermi aktiaatileqatigiiffik, piginneqatigiiffik assigisaaluunniit unioqqutitsisuusimappat, pillaammik akiligassiissut ingerlatseqatigiiffimmut akiligassanngortinneqarsinnaavoq.
Imm. 3. Unioqqutitsinermi kommuni imaluunniit kommunit suleqatigiiffiat unioqqutitsisuusimappat, kommuni imaluunniit kommunit suleqatigiiffiat pillaammik akiliisussanngortinneqarsinnaavoq.

§ 11. Nalunaarut 17. december 2004-mi atuutilerpoq.

Namminersornerullutik Oqartussat, ulloq 9. december 2004

 Jens NapãtôK

/

Dorthe Johannsen