Aningaasarsiat A-t pillugit Namminersornerullutik Oqartussat nalunaarutaat nr. 16, 2. december 2004-imeersoq

Aningaasarsianit akileraarutit pillugit Inatsisartut inatsisaanni nr. 5-imi 19. maj 1979-imeersumi, § 31, imm. 3, §37, imm. 2 aamma imm. 4, § 38, imm. 1, aammalu § 91 naapertorlugit makku aalajangersarneqarput:

 

Aningaasarsiat A-t

§ 1. Inatsisartut inatsisaanni § 37, imm. 1-imi taaneqartut saniatigut makku aningaasarsiatut A-tut naatsorsuunneqassapput:
1) Aningaasat, annertussusileriikkanik ikiorsiissutit pillugit Inatsisartut peqqussutaat naapertorlugu annertussusileriikkanik ikiorsiissutitut sulinermik inuussutissarsiuteqartup suliffissaaleqineranik peqquteqartumik tunniunneqartartut,
2) aningaasat, pisortanit ikiorsiissutit pillugit Inatsisartut peqqussutaanni kapitali 5 naapertorlugu pisariaqavissuinnarnut ikiorsiinertut tunniunneqartartut,
3) Soraarnerussutisiat, aningaasat utaqqiisit aningaasallu tunniunneqartartut akileraaruteqaataasussat taakkununnga assingusut, taakku siusinnerusukkut atorfeqarsimanermut atasuuppata,
4) pensionit tunngaviusumik aningaasartaat, pisortanit pensionisiat pillugit Inatsisartut peqqussutaat naapertorlugu tunniunneqartartut,
5) soraarnerussutisiatigut aaqqissuussinernit pisartakkat akileraaruteqaataasussat aningaasarsianit akileraarutit pillugit inatsimmi § 17 b-mi § 17 c-milu taaneqartut,
6) naartunermut, erninermut meerarsiartaarnermullu atatillugu sulinngiffeqartarneq ullormusiaqartarnerlu pillugit Inatsisartut peqqussutaat naapertorlugu ullormusiat tunniunneqartartut,
7) aningaasarsianut annaasanut imaluunniit suliffissaagaluanut annaasanut taartisiat,
8) kisimiilluni erinarsortartutut nipilersortartutullu, timersornikkut aliikkusersuisartutut, nipilersortartutut, atuakkiortutut, allatut tamatigut eqqumiitsuliortutut, timersortartutut, aviisitigut allaaserinnittarnikkut, dommeritut, eqqartuusseqataasutut, illersuisutut freelancetullu nutserisartutut akissarsiat aammalu
9) Kalaallit Nunaanni sulinermi ajutoornermi sillimmasiinissamut peqqussut, tak. Kalaallit Nunaanni sulinermi ajutoornermi sillimmasiinissamut peqqussut, naapertorlugu akiliutisiat makku:
a) inatsisitigut piumasaasut malillugit ajunaarnissamut sillimmasiineq najoqqutaralugu sulliveqarluni akissarsiortunut ullormusiat,
b) innarluuteqarnermut taartisiat aamma qimataasunut taartisiat, taartisiat ukiumut pisassarititatut tunniunneqarpata,
10) aalisarnermit, piniarnermit, aallaaniarnermit, savaateqarnermit tuttuuteqarnermillu tunisassianik Kalaallit Nunaanni tunisinermi isertitat, piginneqatigiiffiit, peqatigiiffiit assigisaasaluunniit tunisarinngippatigit.

 

Aningaasarsiat aningaasarsiatut A-tut isigineqanngitsut

§ 2. Aningaasarsiaasartut ilaat makku aningaasarsiatut A-tut isigineqanngillat:
1) Kiffartuussinermi kajumissaatissiissutit aamma
2) inuinnaat illumi ikiortiminnut ikiortiminnullu allanut aningaasarsiarititaat, sulisitsisoq taassumaluunniit aapparisaa aningaasarsiat akileraaruteqaataasussat naatsorsorneranni pineqartumut akissarsiarititat ilaannik sumilluunniit ilanngaateqarsinnaanngippata.

 

Sulinngiffeqarnersiutit aamma naalliuttuni sapaataanngitsuni akissarsiat

§ 3. Akileraarutinik A-nik sulinngiffeqarnersiutinit sapaataanngitsunilu nalliuttuni akissarsianit unerartitsinermut piffissaq aamma akissarsiat taakkua akileraarusigaanerat pillugu makku atuupput:
1) Akissarsiortup sulinngiffeqarnerani sulisitsisoq akissarsisitsisarpat akissarsiarititanit taakkunannga sulinngiffeqarnersiutinullu immikkut tapinit akileraarutinik unerartitsineqassaaq maleruagassiat aningaasarsianut A-nut allanut atuuttut malillugit, tak. Aningaasarsianit akileraarutit pillugit inatsimmi § 38, imm. 1, oqaaseqatigiit siulliit. Sulinngiffeqarnermi ajunngitsorsiat akissarsiortut atorfeqarnerminni akissarsiaqarlutik sulinngiffeqartussaatitaasimasut atorfimminnit soraarnerminni pisassaasa tungaasigut unerartitsineqassaaq maleruagassiat ataani nr. 2-mi, oqaaseqatigiinni siullerni allassimasut malillugit.
2) Sulisitsisup atorfilik sulinngiffeqarnerani akissarsiaqartinnagu, taamaattorli ukiup sulinngiffeqarnermi ajunngitsorsiaqaataasussanik aningaasarsiorfiup tulliani ukiumi sulinngiffeqarfissami akiligassanngorlugit toqqorneqartunik sulinngiffeqarnersiaqartippagu, taava sulinngiffeqarnermi ajunngitsorsiat sulinngiffeqarnissamut allagartap (feriekortip) il.il. tunniunneqarneratigut akissarsiortumut pisassanngortitsinermi akileraarutinik unerartitsisoqassaaq. Taamaattoq akileraarutinik unerartitsineq kingusinnerpaamik ukiumi sulinngiffeqaataasussanik aningaasarsiorfimmi 31. december pissaaq. Taamaakkujortaaq sapaataanngitsuni nalliuttuni akissarsiarisassat ukiup sulinngiffeqaataasussanik aningaasarsiorfiup ingerlanerani tunniunneqarsimanngitsut tungaasigut.
3) Sulinngiffeqarnermi ajunngitsorsiat aamma sapaataanngitsuni nalliuttuni akissarsiat akileraarusersorneqassapput qaammatisiutit malillugit ukiumi, qulaani maleruagassiani nr. 1-imi aamma nr. 2-imi allassimasut malillugit unerartitsiviusussaasumi. Akileraarusiinermut akileraarutillu naatsorsorneqarneranni paasissutissat aningaasarsianit akileraarutit pillugit inatsimmi § 88, imm. 1, malillugu atugassat ukiumut aningaasarsiorfimmut taannaasumut tunngasumik tunniunneqassapput.

§ 4. Akissarsiortoq akileraartussaajunnaarpat aningaasarsiat A-t § 3-mi taaneqartut, taakkununnga ilaallutik akileraartussaajunnaarneq sioqqullugu sulinngiffeqarnermi akissarsiassanut katersat, akileraaruteqaataasussaapput kingusinnerpaamik piffissami akileraartussaajunnaarfimmi. Akileraarutinik A-nik unerartitsisoqassaaq kingusinnerpaamik piffissami tassani.

§ 5. Inunnut nunani allani najugaqartunut, pensionit, utoqqarnut angerlarsimaffiit il.il. pillugit Inatsisartut peqqussutaat naapertorlugu, tak. § 1, nr. 4, pensioninik pisartagaqartunut, inunnut akileraartussaasunut aningaasarsianit akileraarutit pillugit inatsimmi § 31, imm. 1-imi aalajangersakkat taaneqartut assigalugit pisartakkanit pineqartunit aningaasarsiat akileraarusigassat naatsorsorneqassapput (inummut ilanngaateqartitsisoqassaaq).

§ 6. Nalunaarut 1. januar 2005-imiit atuutilissaaq.
Imm. 3. Tamatumunnga peqatigitillugu aningaasarsiat A-t pillugit Namminersornerullutik Oqartussat nalunaarutaat nr. 27, 28. november 1996-imeersoq atorunnaarsinneqarpoq.

Namminersornerullutik Oqartussat, ulloq 2. december 2004

Josef Motzfeldt

/

Kaare Hagemann