Pisortanut akiitsut pantefogdinit akilersinniarneqartarnerat pillugit Namminersornerullutik Oqartussat nalunaarutaat nr. 10, 18. juni 2004-meersoq.

Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni nr. 3, 2. maj 1996-imeersumi § 10 naapertorlugu makku aalajangersarneqarput:

 

§ 1. Pantefogdit akiligassiissutinik, pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaanni § 1, imm. 2, nr. 15-imi pineqartunik akiligassiinermi aamma akiliisitsiniarnermi akiitsoqartoq saniatigut akiliutissamik akiligassissinnaavaat.
Imm. 2. Nalunaarut manna malillugu saniatigut akiliutissaq qaammatip tulliuttup aallaqqaataani akilerneqartussanngussaaq.

§ 2. Inatsisartut inatsisaanni § 1, imm. 2, nr. 15 naapertorlugu akiligassiissutit akilerneqartussanngorsimasut piffissaagallartillugu akilerneqarsimatinnagit pantefogdit akileeqqusigaangata, aggersaagaangata assigisaanilluunniit peqqusigaangata saniatigut akiliutissaq akiligassiissutigineqartassaaq.
Imm. 2. Meeqqanut akilersuutit il.il. aammalu meeravissiartaarnermi tapiissutit pillugit Inatsisartut peqqussutaat naapertorlugu akiligassiissutit siumoortumik unerartinneqarpata saniatigut akiliutissaq nutaaq akiligassutigineqaassaaq.
Imm. 3. Kalaallit Nunaanni eqqaartuussisarnermik inatsit malillugu akiitsoqartoq ornillugu pigisaanik qularnaveeqqutissatut arsaarinnittoqarpat saniatigut akiliutissaq nutaaq akiligassiissutigineqassaaq.

§ 3. § 2, imm. 1, 2 aamma 3 malillugit saniatigut akiliutissaq pisortat, pantefodgip akiliisitsi-niarneranut aningaasartuuteqarsimasut pisassaraat.

§ 4. Nalunaarut manna malillugu saniatigut akiliutissaq 250 kr.-iuvoq.

§ 5. Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat naapertorlugu nammineerluni imaluunniit pinngitsaaliinikkut akiliisinneqarnikkut akiliisimagaanni saniatigut akiliut aatsaat akilersinneqassaaq akiitsut tamakkerlugit akilerneqareernerisigut.

§ 6. Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat malillugu akiitsoqartup akiligassiissutit naafferartumik akilersorniarlugit isumaqatigiissuteqarnermigut akiliiumassuseqarpat, pantefogdi saniatigut akiliutissamik akiligassiissanngilaq.
Imm. 2. Nalunaarut una malillugu, akiitsoqartup naafferartumik akilersuinissamik isumaqatigiissut eqquutitinngippagu akiliisitsiniarnermut ataatillugu saniatigut akiliutissaq akiligassiissutigineqarsinnaavoq.

§ 7. Kalaallit Nunaanni eqqartuussinermik inatsimmi § 12 naapertorlugu, saniatigut akiliutissat nalunaarummi matumani pineqartut, akiligassiissutit saniatigut akiliutissat attuumassuteqarfigisaat assigalugit akilersinniarneqarsinnaapput, matumani aamma akissarsianit il.il. unerartitsinikkut ilanngaassuinikkulluunniit.
Imm. 2. Nalunaarut manna malillugu saniatigut akiliutissaq akiligassiissutit piffissaagallartillugu akilerneqarsimanngitsut attuumassuteqarfigisatik assigalugit pinngitsaaliinikkut naammassisitsinikkut akilersinneqarsinnaapput.

§ 8. Nalunaarut ullormi 1. juli 2004-mi atortuulissaaq.

Namminersornerullutik Oqartussat, ulloq 18. juni 2004

Josef Motzfeldt

/

Kaare Hagemann