Namminersornerullutik Oqartussat Piginnaasat ineriartortinnissaat pillugu siunnersuisoqatigiit pillugit nalunaarutaat nr. 5, 22. marts 2004-meersoq

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaat nr. 2, 31. maj 1999-imeersoq, § 3 aamma § 7, naapertorlugu aalajangersarneqarpoq:

 

Siunnersuisoqatigiit siunertaat suliassaallu

§ 1. Naalakkersuisut inuutissarsiutinik ilinniartitaanermi piginnaasat ineriartortinnissaat aammalu suliffissaqartitsiniarnermi inuutissarsiutinillu ilinniartitaanermi pilersinneqartut ataatsimut aaqqissugaanissaassa nukittorsarneqarnissaat anguniarlugu Piginnaasat ineriartortinnissaat pillugu siunnersuisoqatigiinnik Naalakkersuisunik siunnersuisartussanik pilersitsipput.
Imm. 2. Siiunnersuisoqatigiit suliassat Naalakkersuisunit saqqummiunneqartut suliarisassavaat innersuussuteqarfigisassallugillu. Siunnersuisoqatigiit namminneerlutik suliassat sammisamut attuumassuteqartut suliarisinnaavaat.
Imm. 3. Siunnersuisoqatigiit innersuussuteqarnerminni ajornartorsiutinut pisunut nassuiaataasinnaasunik misissueqqissaartitsisinnaavoq takussutissiortitsisinnaallunilu, tamatumunnga ilanngullugit ajornartorsiutit piffinni ataasiakkaani nunallu immikkoortuini pisut.
Imm. 4. Siunnersuisoqatigiit ukiumoortumik suliartik pillugu sammisallu iluani ineriartortitsineq pillugit Naalakkersuisunut nalunaarusiortassapput kingusinnerpaamik majip aallaqqaataa nallertinnagu.

§ 2. Siunnersuisoqatigiit sulinerminni:
1) Inuussutissarsiutit ineriartortinneqarnerisa, suliffissaqartitsiniarnerup inuutissarsiutinillu ilinniartitaanerup suliamik ingerlatsinermi illuatungeriit akornanni ataatsimut aaqqissugaanissaat imminnullu attuumassuteqarnissaasa eqqanaarneqarnissaat peqataaffigissavaat.
2) Inuussutissarsiornerup uummaarissup pilersinneqarnissaata ineriartortitsinikkullu suliffissaqartitsiniarnerup eqaatsumik ingerlasuunissaasa aqqutissiuunneqarnissaat anguniassavaat aammalu inuutissarsiutinik ilinniartitaanerup immikkuullarissumik nalinginnaasumillu piginnaasanik ineriartortitsinermik eqqanaarisup pilersinneqarnissaa aqqutissiuutissallugu.
3) Suliffissaqartitsiniarnermi ilinniartitaanermilu piginnaasanik ineriartortitsinermi piffissami sivikitsumi atuuttussanik siunissarlu ungasinnerusoq eqqarsaatigalugu atuuttussanik pisariaqartinneqartut aaqqiivigineqarnissaat anguniassavaat.
4) Suliniutinik inatsisiliornikkullu ilusilersuinernik siunnersuusiortassapput, taakku aqqutigalugit sulianik ingerlatsinermi illuatungeriit pisortallu piginnaasat ineriartortinneqarnissaannut pisariaqartitsiffiusuni aningaasaleeqataanissaannik kajumilersinneqaqqullugit.
4) Siunnersuinerminni inuuneq naallugu ilinniarnermik oqartarnerup naleqquttumik pilersitsinikkut imaqartinneqarnissaa anguniassavaat.
5) Nunami tamarmi inuussutissarsiornikkut ineriartortitsinerup, inuutissarsiutinik ilinniartitaanermi suliffissaqartitsiniarnermillu suliniutit malittarissavaat, suliffissaqartitsiniarnerup inuutissarsiutinillu ilinniartitaanernut eqaatsumik iluseqartinneqarnissaa aqqutissiuutissallugu aammalu sulisut tamarmik piginnaasaannik ineriartortitsinissap eqqanaarneqarnissaa peqataaffigissallugu.
6) Inuutissarsiutinik ilinniartitaanerup ineriartortinneqarnera malittarissavaat, ilinniartitaanerillu pitsaassusaat, ineriartortinneqarnerat, naleqqussarsinnaassuseqarnerat ilinniakkallu ataasiakkaat immikkoortuini ataqatigiissaarineq pillugu innersuussisassallutik.
7) Sulisitsisut inuutissarsiutinut ilinniartitaanermut akiliutaat pillugit ataatsimiititaliap (AEB-nævn) aalajangiussaat malinnaaffigissavaat.
8) Naafferartumik ilinniartitseqqittarnerni piginnaasallu ineriartortinnissaat pillugu pilersinneqartut ilusilersorneqarsimanerisa nakkutigineqarnerat peqataaffigissavaat siunnersuiffigisassallugulu.
9) Apeqqutit pitsanngorsaataasinnaasut pilersitsinernullu siuarsaaneq sulinerminni ilanngutissavaat, ilinniartitaanerup iluani pilersinneqartut pingaartuutillugit.
10) Sumiiffinni ataasiakkaani nunallu immikkoortuini attuumassuteqartut peqatigalugit sumiiffinni ataasiakkaani nunallu immikkoortuini suliffissaqartitsiniarnermi inuutissarsiutinillu ilinniartitaanermi suliniutit aaqqissuunneqarnerannut siunnersuuteqartassapput aammalu piffinni ataasiakkaani nunallu immikkoortuini suliniutit nuna tamakkerlugu suliniutinut tulluarsarneqarnerat peqataaffigissallugu.

 

Siunnersuisoqatigiit inuttalersugaanerat inissitsiternerallu

§ 3.Siunnersuisoqatigiit ilaasortaqarput siulittaasumik Naalakkersuisunit toqqarneqartumik aammalu matuma kinguliani taaneqartunit kattuffinnit oqartussaaffeqarfinnillu sinniisunik kingoraartissanillu toqqarneqartunit:
1) Kalaallit Nunaanni Sulisitsisut Peqatigiiffiannit (GA).
2) Sulinermik Inuutissarsiuteqartut Kattuffiannit (SIK).
3) KANUKOKA-mit.
4) Qitiusumik ilinniarfinni ataatsimiitalianit siulittaasut akornannit.
5) Qitiusumik ilinniarfinni forstanderinit, forstanderit akornannit.
Imm. 2. Siunnersuisoqatigiit qinigaaffimmi ukiuni sisamanik sivisussuseqartumi qinigaassapput.
Imm. 3. Siunnersuisoqatigiit akunnerminni siulittaasup tullissaanik toqqaassapput. Siulittaasup tullia siulittaasoq ataatsimeeqataanngippat ataatsimiinneq aquttassavaa.
Imm. 4. Uku aalajangersimasumik taaseqataasinnaanngitsunik peqataatitaqassapput:
1) Ilaqutariinnermut Pisortaqarfik.
2) Inuussutissarsiornermut, Nunalerinermut Suliffeqarnermullu Pisortaqarfik.
3) Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik.
4) Kalaallit Nunaanni Naatsorsueqqissaartarfik.
Imm. 5. Siunnersuisoqatigiit imm. 4-mi taaneqartut saniatigut immikkut ilisimasalinnik aammalu ataatsimiinnermi suliarineqartut ataasiakkaat pillugit paasisimasalinnik taaseqataasinnaanatik ataatsimeeqataasunik peqataatitaqarsinnaapput.

 

Ataatsimiinnerit

§ 4. Siunnersuisoqatigiit ukiumut minnerpaamik marloriarlutik ataatsimiittassapput.
Imm. 2. Siunnersuisoqatigiit immikkut ittumik ataatsimiittassapput
1) Naalakkersuisut piumasarippassuk, imaluunniit
2) siulittaasup pisariaqartippagu, imaluunniit
3) ilaasortat amerlanerussuteqartut siunnersuutigippassuk.

 

Suleriaasissaq

§ 5. Naalakkersuisut Siunnersuisoqatigiit suleriaasissaat aalajangissavaat.

 

Allattoqarfik

§ 6. Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik Siunnersuisoqatigiit allattoqarfigissavaat.
Imm. 2. Allattoqarfiup suliassai Inuussutissarsiornermut, Nunalerinermut Suliffeqarnermullu Pisortaqarfik peqatigalugu ataqatigiissarneqassapput.

 

Aningaasalersorneqarnera

§ 7. Siunnersuisoqatigiinnut ilaasortaaneq akissarsiaqarfiunngilaq. Siunnersuisoqatigiit suliaannut, tamatuma ataani angalanermi, tassungalu atatillugu najugaqartinneqarnermi, aningaasartuutit Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit akilerneqartassapput.

 

Atortuulersitsinermik atorunnaarsitsinermillu aalajangersakkat

§ 8. Nalunaarut 5. april 2004 aallarnerfigalugu atortuulersinneqarpoq.
Imm. 2. Piginnaasat ineriartortinnissaat pillugu siunnersuisoqatigiit Nuna Tamakkerlugu Suliffissaqartitsiniarnermut Siunnersuisoqatigiit aammalu Ilinniarfinnut Siunnersuisoqatigiit taarserpaat; tamatuma nassataraa Nuna Tamakkerlugu Suliffissaqartitsiniarnermut Siunnersuisoqatigiinnut suliassiissutip suleriaasaannullu aalajangersakkat atorunnaarsinneqarnerat.

Namminersornerullutik Oqartussat, ulloq 22. marts 2004.

Henriette Rasmussen

/

Lise Lennert Olsen