Namminersornerullutik Oqartussat Sulisitsisut inuutissarsiutinut ilinniartitaanermut akiliutaat pillugit ataatsimiititaliaq (AEB-nævn) pillugu nalunaarutaat nr. 4, 22. marts 2004-meersoq

Sulisitsisut inuutissarsiutinut ilinniartitaanermut akiliutaat pillugu (AEB) Inatsisartut inatsisaat nr. 16 23. november 1989-meersumi § 8 kingullermillu Inatsisartut inatsisaanni nr. 27 18. december 2003-meersumi allanngortinneqartoq naapertorlugu aalajangersarneqarpoq:

 

Siunertaq suliassallu

§ 1. Naalakkersuisut Sulisitsisut inuutissarsiutinut ilinniartitaanermut akiliutaat pillugit ataatsimiititaliamik (AEB-nævn) AEB-mi aningaasaatigineqartut pikkorissarnernut ilinniartitseqqittarnernullu atorneqarnerannut aalajangiisartussamik pilersitsipput.
Imm. 2. Ataatsimiititaliaq makkuninnga aalajangiisassaaq
1) Pikkorissaanernut ilinniartitseqqittarnernullu aningaasanik pissarsinissamut tunngaviit.
2) Inuutissarsiornermi ilinniarfiit pikkorissaanernut ilinniartitseqqittarnernullu ukiumoortumik AEB-mit aningaasanik atuinissaasa killilersorneqarnerat.
3) Inuutissarsiornermi ilinniarfiit avataaniittunut pikkorissaanernut ilinniartitseqqittarnernullu tapiissutit annertussusissaasa killissaat.
4) Inunnut ataasiakkaanut pikkorissarnissamut tapiissutit annertussusissaasa killissaat.
5) Tapiiffigineqarnissamut periarfissat pillugit saqqumilaartitsinissaq ussassaarinissarlu.
Imm. 3. Ataatsimiititaliaq Piginnaasat ineriartortinnissaat pillugu siunnersuisoqatigiit sulinerannut malinnaassaaq.
Imm. 4. Ataatsimiititaliap AEB-mi aaqqissuussineq pillugu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq siunnersortassavaa.
Imm. 5. Ataatsimiititaliaq ukiumi qaangiuttumi sulisimanerminik ukiut tamaasa majip aallaqqaataa nallertinnagu nalunaarusiortassaaq. Ukiumoortumik nalunaarusiaq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisumut, Inuussutissarsiornermut, Nunalerinermut Suliffeqarnermullu Naalakkersuisumut aammalu Piginnaasat ineriartortinnissaat pillugu siunnersuisoqatigiinnut nassiunneqartassaaq.

 

Inuttalersugaanera inissitsiterneralu

§ 2. Sulisitsisut inuutissarsiutinut ilinniartitaanermut akiliutaat pillugu ataatsimiititaliaq kattuffinnit oqartussanillu ukunannga toqqarneqartunik inuttaqartinneqassaaq:
1) Kalaallit Nunaanni Sulisitsisut Peqatigiiffiat
2) Sulinermik Inuussutissarsiuteqartut Kattuffiat
3) Kalaallit Nunaanni Kommunit Kattuffiat (KANUKOKA)
4) Inuussutissarsiornermut, Nunalerinermut Suliffeqarnermullu Pisortaqarfik
5) Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik.

§ 3. Ataatsimiititaliaq inissititissaaq siulittaasumik siulittaasullu tullianik ataatsimiititaliap ilaasortaanit § 2, imm. 1. nr. 1 – 3-mi oqaatigineqartut kattuffiit akornannit toqqarneqartunik.

 

Ataatsimiinnerit

§ 4. Siulittaasup pisariaqartoqarneranik naliliineratigut imaluunniit ikinnerpaamik ilaasortat marluk piumasarippassuk ataatsimiittoqartassaaq. Ukiulli affaata iluani ikinnerpaamik ataasiarluni ataatsimiittoqartassaaq.

 

Suleriaasissaq

§ 5. Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisup Ataatsimiititaliap suleriaasissaa aalajangissavaa.

 

Allaffeqarfik

§ 6. Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik Ataatsimiititaliap allaffeqarfigissavaa.

 

Aningaasalersorneqarnera

§ 7. Ataatsimiititaliami ilaasortaaneq akissarsiaqarfiunngilaq. Ataatsimiititaliap ataatsimiinnermi aningaasartuutai Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmit matuneqartassapput.

 

Atortuulersinneqarnera

§ 8. Nalunaarut ulloq 5. april 2004 aallarnerfigalugu atortuulersinneqarpoq.

Namminersornerullutik Oqartussat, ulloq 22. marts 2004

Henriette Rasmussen

/

Lise Lennert Olsen